Read Southern Kisi Sa᷅m 76 Bible Online

Sa᷅m 76 - Southern Kisi bible

Sa᷅m 76

¹[73] Wānā o̍ wāna̍ cho̍ o̍ lɛ̄ŋndē Chu̍dāle̍ŋ ni᷄ŋ, ā sīnā a̍ Mɛ̄lɛ̄ka̍ o̍kɔ̄ɔ̄, o̍ lɛ̄ŋndē I̍sɔ̄lūɛ̍i̍le̍ŋ ni᷄ŋ kpo̍u̍ wāŋnda̍ nɔ̄ bɛ̄ɛ̄le̍ŋ le̍ Mɛ̄lɛ̄ka̍.

²Nāa̍ ndūāā cha̍lāa̍, nda̍ cho̍ Chūlu̍sɛ̄lɛ̄m ni̍. O̍ Pēmbīī Sa̍a̍yɔ̄ŋnde̍ chōo̍ o̍ cho̍ īchāli̍ ni̍.

³Lo̍ŋ o̍ tɛ̍ɛ̍mbu̍u̍ wōlɔ̄ɔ̄lā chɔ̄ūlā ya̍a̍mɔ̍ɔ̍wa̍ ni̍, chīŋɔ̍ma̍ wa̍ īpɛ̄ɛ̄ pɛ̄ɛ̄ve̍ o̍ hūēīye̍ ni᷄ŋ nda̍ŋ ni̍, a̍ bōo̍la̍ ŋ̄chīli̍ŋnda̍ so̍vɛ̄i̍ya̍ sɔ̄ŋgā o̍ lābā le̍ ndā māndāa̍ la̍ŋ, a̍ mɔ̄ɔ̄ŋ fāŋndo̍ŋ, ndu̍yɛ̍ a̍ wōlɔ̄ɔ̄lā chɔ̄ūla̍ŋ lā pīlɛ̍ la̍ŋ.

⁴O̍o̍ Mɛ̄lɛ̄ka̍, ā chō wāna̍ tɔ̍ɔ̍ ndu̍yɛ̍ ma̍ wā wāna̍ lēbɛ̄ɛ̄ bɛ̄ndū, ā hīōū pēmbūŋ māsīndɛ̄ si̍ndɔ᷄ŋ nɔ̍ tɔ̍ɔ̍ bɛ̍ndōo̍ wo̍ŋ po̍lo̍ŋ.

⁵So̍vɛ̄i̍ya̍a̍ kpāāyāā bɛ̍ndūa̍a̍ ā chō īhīni̍ lɛ᷅ŋ, nyɛ̄ o̍ nyɛ̍ nda̍ nɔ̍ ā chīi̍ nda̍ pōōndīāā o̍ lābā kpo̍u̍. Ā lɔ᷄l lɔ̄mā fɛ̍ɛ̍ŋ fɛ̍ɛ̍ŋ ma̍ nda̍ ti̍ndū lɛ̍ le̍ wa̍ŋ. Ō pīlɛ̍ bɛ̍ɛ̍ nɔ̍lā lɛ̍ mbō kpēŋa̍ŋ te̍.

⁶O̍o̍ Mɛ̄lɛ̄ka̍, Mɛ̄lɛ̄ka̍ Che̍kɔ̍pū wo̍, mɛ̄ɛ̍ ŋ̄ dɔ̄ɔ̄nu᷄ŋ tu̍mbe̍ a̍ ya̍a̍mɔ̍ɔ̍wa̍a̍ nāa̍ ma̍ dēŋūl nda̍, su̍a̍ā ndāa̍ chɔ̄ūwa̍ ni̍, so̍vɛ̄i̍ya̍a̍ sɔ̍ŋgā o̍ su̍a̍ā kāŋ chōo̍ wa̍ ni̍, nda̍ kpo̍u̍ ma̍ dēlī lɛ̍ɛ̍si̍ɛ̍ŋ ma̍ wū.

⁷Kɛ̍ nūm Mɛ̄lɛ̄ka̍, nu᷄m pīlɛ̍ kpe̍ wānā o̍ wānā nɔ̍ ni̍ mbō wo̍. Tē ā dɔ̄ɔ̄nu᷄ŋ tu̍mbe̍ pɛ̍, ō nɛ̄ɛ̍nɛ̍ nɔ̍lā yɛ̍ mbō si᷄m nu̍m o̍ hɔ̄l?

⁸A̍ lo̍ ɛ̄chɛ̍nɛ̄, ma̍ kīlūl ya̍a̍mɔ̍ɔ̍wa̍a̍ nu̍mnda̍ yāmɛ̍i̍ le̍ nda̍ nyɛ̄ pālāa̍ tūsīo̍o̍ chōo̍. Ndu̍yɛ̍ wānā o̍ wāna̍ cho̍ o̍ chi̍e̍ēŋndo̍, chōo̍ mi̍ sīōōŋnde̍ bīī nda̍ ma̍ mēī do̍ŋ do̍ŋ.

⁹Ndu̍ yɔ̍nūŋ ni̍ māā bōōndi̍i̍ ŋ̄ dɔ̄ɔ̄nu᷄ŋ tu̍mbe̍ ma̍ cha᷄ŋ le̍ yāmɛ̍i̍ kīōlɔ̄ɔ̍, le̍ mā chi̍i̍ndi̍a̍a̍ wānāā nda̍ chō nyɛ̄ pālāa̍ tūsīo̍o̍ chōo̍ wa̍ ve̍.

¹⁰Tē ā dɔ̄ɔ̄nu᷄ŋ tu̍mbe̍ a̍ wānāā dɛ̍nɛ̍ wɔ̍ɔ̍ŋnda̍ pɛ̍, sāŋgālāa̍ wāŋnda̍ sāŋgālā nu̍m ni̍. Wānāā tu̍mbe̍ nu̍mndo̍ ō kēēkū cho̍o̍ mā lo᷄ yōōmū wa̍, bɔ̄ŋa᷅ŋnda̍ŋ nda̍ bīī le̍ nu̍m sōōlūūwo̍ ni̍.

¹¹Wāŋnda̍ lā pēēlu̍ bu̍ŋgāŋ nya̍ chu̍a̍ o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ lo̍ wo̍ŋ. Nya̍ wāŋnda̍ o̍ lɛ̄ŋīi̍ cho̍ māchɛ̄lū ve̍ ni᷄ŋ, lā hu᷄ŋ a̍ nyɔ̄ɔ̍ŋ nāa̍ Mɛ̄lɛ̄ka̍ chūā māā lākē. Mɛ̄lɛ̄ka̍ ndu̍ wānā nɔ̍ ni̍ mā wo̍.

¹²Wānāā bɛ̄ndūa̍a̍ nɔ̍ yōŋgāa̍ wa̍, mbō tūsi̍ nda̍ tōōlō, ndu̍yɛ̍, māsāā bɛ̍ndūa̍a̍ mbō tōsa̍ mī sīōōŋīī bɛ̄ndūe̍i̍ ī bīī nda̍.