Read Southern Kisi Sa᷅m 77 Bible Online

Sa᷅m 77 - Southern Kisi bible

Sa᷅m 77

¹[74] Le̍ te̍le̍ŋ o̍ te̍le̍ŋ I̍ cho̍ cha᷄ŋndo̍ nāa̍ Mɛ̄lɛ̄ka̍ chūā. I̍ cho̍ cha᷄ŋndo̍ chōo̍ cho̍o̍ kpe̍le̍ŋ le̍ hāli̍kpe̍ŋ mī Mɛ̄lɛ̄ka̍ tūēī pīɛ̄īlē nīle̍ŋ.

²Tē nyɛ̄ pālāa̍ kōma̍l la̍ pɛ̍, Māsānɔ̄ɔ̍ Mɛ̄lɛ̄ka̍ ya̍ I̍ nyu̍nā di̍ōm ni̍ le̍ mbō māla̍ ya̍. Mī lɔ̍ɔ̍lu̍ pīɛ̄īle̍ŋ pi̍i̍ a̍ bāla̍ŋ lā hēēlāā chōo̍ cho̍o̍, I̍ sa̍ŋgā le̍. Kɛ̍ ndu̍yɛ̍ I̍ sɔ̍lā pɛ̍ŋgī o̍ pɛ̄ŋgī o̍ yōōmū nūu̍ ni᷄ŋ te̍.

³Tē I̍ yi̍ya̍ŋ a̍ Mɛ̄lɛ̄ka̍ o̍kɔ̄ɔ̄ pɛ̍ wāna̍ o̍ cho̍ wo̍, cha᷄ŋndo̍ ya̍ I̍ cha᷅ŋ o̍ kɔ̄l ni᷄ŋ ni̍. Tē I̍ chi̍i̍ kɔ̄llo̍ kēēlā a̍ ndu̍ o̍kɔ̄ɔ̄ pɛ̍ kpo̍u̍, kɔ̄llo̍ ta̍mbū ya̍ ni̍.

⁴Mbō tōsa̍ I̍ hi̍ni̍ bɛ̍ɛ̍ I̍ nɔ̍lā mī ku̍mbū hɔ̄lte̍ŋ īchɔ̄l te̍. Mī kɔ̄llo̍ tāmbu̍ ya̍ ha̍a̍a̍, ba̍kō bɛ̍ɛ̍ I̍ nɔ̍lā mī so̍ō le̍.

⁵Mī yi̍ya̍ŋ a̍ pālɛ̍i̍ hi̍o̍ū ve̍ o̍kɔ̄ɔ̄, mī lo̍o̍nu̍ŋ sɔ̍ɔ̍ŋ yɔ̍nu̍ŋ o̍ wɔ̄sīla̍ hi̍o̍ū sīndɛ̄ la̍ŋ ni᷄ŋ ndo̍ŋ.

⁶Mī lo̍o̍nu̍ŋ cho̍ndu̍ŋ kɔ̄l kɛ̄ndɛ̄ŋ ya̍ i̍i̍ so̍lī i̍chɔ̍l lo̍ŋ. Mī ke̍e̍la̍ kɔ̄llo̍, mī nyu̍na̍ ya̍ pi̍la̍ a̍a̍,

⁷“Bāā Mɛ̄lɛ̄ka̍ mbō kɛ̄ɛ̍ na̍a̍ le̍ fɛ̍ɛ̍ŋ a̍ fɛ̍ɛ̍ŋ? Bāā ō cho᷄ lɛ̍ kɔ̄l lāhīni̍ a̍ na̍a̍ le̍ fɛ̍ɛ̍ŋ a̍ fɛ̍ɛ̍ŋ te̍?

⁸Bāā kāālā ndu̍ o̍o̍ ka̍a̍la̍ na̍a̍ a̍ kɔ̄l ndɔ̄ɔ̍ kpo̍u̍ wo̍, chūwɔ̄ɔ̍ kāālā kōŋ ō chūū nu̍a̍ā ni̍? Būŋgāŋ o̍ chūe̍l na̍a̍ wo̍ŋ, mɛ̄ɛ̍ ō cho᷄ lɛ̍ mu̍ŋ pēēlū le̍?

⁹Mɛ̄ɛ̍ Mɛ̄lɛ̄ka̍ ō cho᷄ lɛ̍ wāna̍ īnyīɛ̍ɛ̍ le̍? Mɛ̄ɛ̍ tu̍mbe̍ o̍ dɔ̍ɔ̍nu᷄ŋ ho̍ō a̍ na̍a̍ wo̍, ō cho᷄ lɛ̍ na̍a̍ īnyīɛ̍ɛ̍ tūīīnɔ᷄ŋ te̍?”

¹⁰O̍ ko̍ŋ kɔ̍ɔ̍lī, mī di̍mi̍ o̍ kɔ̄l ni᷄ŋ a̍a̍, “Nyɛ᷄ tɛ̍ɛ̍mbu̍u̍ ya̍ ni᷅ŋ kɔ̄llo̍ kpe̍e̍kpe̍i̍yo̍ cho̍ mālɔ̄ɔ̄ Mɛ̄lɛ̄ka̍ hi̍o̍ū kpo̍u̍ wo̍ ō ma᷄l nāa̍ ho̍ō, ō ma̍lā na̍a̍ māā pāāndū le̍ wo̍ ni̍.”

¹¹Kɛ̍ ndu̍yɛ̍ I̍ lōōnu̍ŋ a̍ sɔ̄ɔ̍ŋ bɛ̍ndūŋ ŋ̄ tōsa̍ wo̍ŋ o̍kɔ̄ɔ̄, Mɛ̄lɛ̄ka̍ Ya̍a̍wɛ̄ɛ̄. I̍ lo̍o̍nu̍ŋ a̍ wa̍lta̍ kɔ̄ndɔ̄fi̍ltā ŋ̄ tōsa̍ sīndɛ̄ la̍ŋ.

¹²Le̍ te̍le̍ŋ o̍ te̍le̍ŋ I̍ cho̍ yīya᷄ŋndo̍ a̍ wa̍lta̍ nu̍mnda̍ŋ o̍kɔ̄ɔ̄. I̍ sa̍ŋgā a̍ yīya᷄ŋndo̍ a̍ wa̍lta̍ nu̍mndā bɛ̄ndūlā ŋ̄ tōsā la̍ŋ o̍kɔ̄ɔ̄ le̍.

¹³O̍o̍ Mɛ̄lɛ̄ka̍, sɔ̄ɔ̍ŋ ŋ̄ tōsā ki̍nɛ̍i̍ yo̍ŋ, sɔ̄ɔ̍ŋ cho̍ sa̍kpō wo̍ŋ ŋ̍ cho̍ ni̍. Mɛ̄lɛ̄ka̍ o̍ mɛ̄lɛ̄ka̍ cho᷄ o̍ bɛ̍ndū māā nūm te̍.

¹⁴Nu᷄m cho̍ Mɛ̄lɛ̄ka̍ to̍sā sɔ̍ɔ̍ŋ kɔ̄ndɔ̄fi̍li̍ŋ bɛ̄ndo᷄ŋ ndo̍ ni̍. Ma̍ lō o̍ ko̍ŋ ma̍ chɔ̄m kpāāyā nu̍m bɛ̄ndōo̍ wāŋnda̍ tɛ̄ɛ̄ŋ.

¹⁵A̍ kpāāyā nu̍m bɛ̄ndōo̍, ma̍ chīīndīāā wānāā nūmnda̍, nda̍ yɔ̍nūŋ ni̍ māā wānāa̍ fu̍la̍ o̍ pūlāle̍ Che̍kɔ̍pū a̍ Chōo̍sɛ̍ le̍ŋ chōo̍ wa̍.

¹⁶O̍o̍ Mɛ̄lɛ̄ka̍, Mɛ̄ɛ̍ mɛ̄ŋnda̍ŋ mā chē nu̍m nyɔ᷅, mi̍ sīōōŋnde̍ bīī ma̍ŋ. Mɛ̄ɛ̍ mɛ̄ŋnda̍ŋ o̍ fo̍ndāŋ yīŋgi̍lɛ̍i̍ bɛ̍ndōo̍ o̍ pēe̍ mɛ̄ŋmā īhɛ᷄llo̍ mā chē nu̍m, mi̍ mā hīīlu᷄ŋ yo̍kpa᷄ŋ yo̍kpa᷄ŋ.

¹⁷Mi̍ mɛ̄ŋma̍ wa̍ o̍ ha̍la̍a̍ ni᷄ŋ cho̍o̍ cho̍o̍ wa̍ŋ mā hūlu᷄ŋ o̍ chi̍e̍ēŋndo̍ chōo̍. Mi̍ ta᷅ŋnda̍ŋ mā dēŋī, ndu̍yɛ̍, mi̍ nyɛ̄ ŋūāla̍lɛ̍ī ŋūāla̍lɛ̍īyo̍ ō tīū o̍ ha̍la̍a̍ ni᷄ŋ kpo̍u̍.

¹⁸Ta᷅ŋnda̍ŋ mā wa᷄ kɔ̄la̍ŋ a̍ dēŋīo̍o̍ kpe̍e̍kpe̍i̍ o̍ hūēīyīī fūkū fūkūī bɛ̄ndūe̍i̍ ni᷄ŋ. Mi̍ nyɛ̄ wa̍wo̍ŋndo̍ ō tīū o̍ chi̍e̍ēŋndo̍ chōo̍ kpo̍u̍, a̍ nyɛ̄ ŋūāla̍lɛ̍ī ŋūāla̍lɛ̍ī wa̍ kīōlōo̍ o̍ ha̍la̍a̍ ni᷄ŋ cho̍o̍ cho̍o̍ wo̍. Mi̍ lɛ̄ŋnde̍ŋ lē nyīīyā.

¹⁹Ma̍ lō o̍ ko̍ŋ ma̍ yāmbū nɛ̄īyo̍ o̍ pēe̍ mɛ̄ŋmā īhɛ᷄llo̍ tɛ̄ɛ̄ŋ, ma̍ kēēkū lo̍ŋ. Ma̍ kēēkū o̍ pēe̍ kpāāyā bɛ̄ndū kōŋ tɛ̄ɛ̄ŋ ma̍ tāŋ. Kɛ̍ wānā o̍ wānā chi̍ pe̍lūŋ nūmndo̍ŋ nāa̍ ŋ̄ kēēku̍ wa̍ le̍.

²⁰Ma̍ lō o̍ ko̍ŋ ma̍ kūā a̍ wānāā nūmnda̍ mɛ̄ɛ̍ wānā ma̍ndāā lāsāa̍ o̍ kūā nu̍a̍ā a̍ sāa̍ ndūa̍a̍ yɛ̍. Ma̍ sīmī Mūu̍sē nda̍ E̍lɔ̄ŋ nda̍ lāchī le̍ mā kūɛ̄ a̍ nda̍.