Read Southern Kisi Sa᷅m 79 Bible Online

Sa᷅m 79 - Southern Kisi bible

Sa᷅m 79

¹[77] O̍o̍ Mɛ̄lɛ̄ka̍, lɛ̄ŋīi̍ kɛ̍ɛ̍ le̍ nu̍m pīɛ̄īyo̍ ve̍ ī hu᷄ŋ de᷅l lɛ̄ŋndē nūmnde̍ŋ chōo̍ a̍ sɔ̍ŋgɔ̍ɔ̍. Ā hu᷄ŋ tɛ̍ɛ̍mbūū chīɛ̄ī nūm kāsīo̍o̍ lābɛ̄ɛ̄. Ā tōsa̍ mi̍ Chūlu̍sɛ̄lɛ̄m o̍ si̍mnu᷄ŋ pɔ᷅mndo̍.

²A̍ dīu̍ wānāā nūmnda̍ ma̍ mɛ̄ī nda̍ īhīni̍ a̍ vi̍lɛ̍i̍ya̍, le̍ mī yōūwa̍ dē dīāllūŋ ndāa̍ŋ. Bu̍ɛ̍i̍yāā nūmnda̍, dīāllūŋ ndāa̍ŋ ŋ̄ sīmnu᷄ŋ nyɛ᷅ dīa̍a̍ le̍ vīsīāā yōndūa̍a̍.

³Ā tōsa̍ mi̍ kōo̍ma̍ wānāā nūmnda̍ mā kūā kōŋgi̍la̍ŋ lɛ̄ŋ Chūlu̍sɛ̄lɛ̄m chi̍e̍e̍, mɛ̄ɛ̍ mɛ̄ŋnda̍ŋ mā kūā nu̍a̍ā kōŋgi̍la̍ŋ yɛ̍. Ndu̍yɛ̍ wānā o̍ wānā ve̍ mbō chɔ᷄ nda̍ le̍.

⁴Lɛ̄ŋīi̍ ba̍lu̍ na̍a̍ ve̍ ā chō na̍a̍ māmɔ̄ɔ̍ mā tɛ̄ɛ̄mbūū na̍a̍ bɛ̄ɛ̄la̍ŋ kpe̍e̍kpe̍i̍. Ā sīīŋgu̍u̍ na̍a̍ nyɛ̄ māmāā, ma̍ chūā na̍a̍ nyɛ̄ fo̍ndō fu̍u̍.

⁵O̍o̍ Mɛ̄lɛ̄ka̍ Ya̍a̍wɛ̄ɛ̄, mɛ̄ɛ̍ tu̍mbe̍ ŋ̄ dɔ̄ɔ̄nu᷄ŋ a̍ na̍a̍ wo̍ ō nɔ̍ la̍mɛ̍ɛ̍lu̍ le̍? Tu̍mbe̍ nu̍mndo̍ ō nɔ̍ pɔ̍lūl te̍, hīōūwɔ̄ɔ̍ lāchī a̍ tūūlo̍o̍ tu̍ŋ?

⁶Lɛ̄ŋīi̍ kɛ̍ɛ̍ le̍ nu̍m sōōlūūwo̍, ɔ̄ɔ̄ ma̍ kɛ̄ɛ̄ le̍ nu̍m pīɛ̄īyo̍ ve̍, a̍ nda̍ ŋ̄ nɔ̄ ni̍ mā dɔ̄ɔ̄nu᷄ŋ tu̍mbe̍.

⁷Wāŋnda̍ ha̍ā nda̍ di̍u̍ wānāā nūmnda̍ ni̍, ndu̍yɛ̍ ma̍ tōsā mi̍ lɛ̄ŋndē nūmnde̍ŋ lē sīmnu᷄ŋ pɔ᷅mndo̍.

⁸Tu̍sī na̍a̍ nyɛ̄ pālāa̍ chōo̍, le̍ yɔ̄ŋ wɔ̄ɔ̍ŋ fi̍nyāā nāā ma̍māa̍ ā tōsa̍ wo̍ le̍. Yāndi̍i̍, ke̍le̍ŋa̍ na̍a̍ īnyīɛ̍ɛ̍ tūīīnɔ᷄ŋ fɔ̍, kāni̍ fo̍ndōle̍, ŋ̄ nɔ̍ lɛ̍ tīīnda᷄ŋ o̍ tīīnda᷄ŋ te̍.

⁹O̍o̍ Mɛ̄lɛ̄ka̍, nu᷄m cho̍ wāna̍ nāā pi̍ŋīa̍a̍ ni̍. Yāndi̍i̍, ma̍la̍ na̍a̍ fɔ̍, ko̍ŋ to̍sā ni̍ mī wāŋnda̍ ā ke᷄ dīōlā nūmnda̍ŋ bɛ̄ɛ̄le̍ŋ. Yāndi̍i̍ Mɛ̄lɛ̄ka̍, le̍ mī dīōlā nūmnda̍ŋ lā sɔ̄la̍ bɛ̄ɛ̄le̍ŋ, chi̍i̍ndi̍a̍a̍ na̍a̍ ndu̍yɛ̍ mā ma̍l na̍a̍ le̍ yɔ̄ŋndā nāāla̍ wɔ̍ɔ̍ŋnda̍ŋ.

¹⁰Chɛ᷅l mī lɛ̄ŋīī chēle̍ŋnde̍ ī nyūna̍ na̍a̍ āā, “Vɛ᷅ ni̍ko̍ Mɛ̄lɛ̄ka̍ nyāa̍ ō ma̍lā nya̍ le̍?” le̍. Lɛ̄ŋīi̍ di̍u̍ he̍ī bu̍ɛ̍i̍yāā nūmnda̍ ve̍, mi̍ŋgu̍l nda̍ māa̍ na̍a̍ o̍ hɔ̄l kpe̍nde̍ke̍le̍, mī ŋ̄ chē.

¹¹Wānāa̍ cho̍ o̍ bīyɔ̄ɔ̍ ni᷄ŋ nda̍, ya̍ŋ ni᷅la̍ŋ o̍ kūŋndā nda̍ chō a̍ nyɛ̄ pālāa̍ la̍ŋ, mā ma̍la̍ nda̍. Mɛ̄ɛ̍ ŋ̄ chō wāna̍ kpāāyā bɛ̍ndū yɛ̍, yāndi̍i̍, ma̍nda̍ wa̍nāā nda̍ kīlu̍l yāmɛ̍i̍ le̍ nda̍ dīyɔ̄ɔ̍ wa̍.

¹²Māsānɔ̄ɔ̍ Mɛ̄lɛ̄ka̍, lɛ̄ŋīi̍ tɛ̍ɛ̍mbu̍u̍ nu̍m he̍ī bɛ̄ɛ̄la̍ŋ nde̍, nyɛ̄ nda̍ tōsa̍ ko̍ŋ a̍ nūm ndo̍, mi̍ŋgu̍l nda̍ māa̍ ko̍ŋ sālā ŋɔ᷄mmɛ̍ū.

¹³O̍ ko̍ŋ, na̍a̍ wānāā nūmnda̍, na̍a̍ ŋ̍ cho̍ ha̍ā māā sāā nu̍mnda̍, mī ŋ̄ wa᷄ nu̍m ba̍li̍ka̍a̍ mēllo̍ le̍ fɛ̍ɛ̍ŋ a̍ fɛ̍ɛ̍ŋ. Ndu̍yɛ̍ mī ŋ̄ wa᷄ nu̍m sāŋgālāa̍ le̍ te̍le̍ŋ o̍ te̍le̍ŋ.