Read Southern Kisi Sa᷅m 8 Bible Online

Sa᷅m 8 - Southern Kisi bible

Sa᷅m 8

¹[6] O̍o̍ Mɛ̄lɛ̄ka̍ Ya̍a̍wɛ̄ɛ̄, Māsānɔ̍ nāa̍, wāŋnda̍ bā o̍ bā fe̍e̍ o̍ chi̍e̍ēŋndo̍ chōo̍ ā chō chɔ̄ɔ̍ mɛ̄ɛ̍ ŋ̄ chō Mɛ̄lɛ̄ka̍ bɛ̄ndū yɛ̍. Sāŋgālā wāŋndā chīe̍e̍ya̍ ā chō nu̍m ndo̍ chō ō bɔ̄ɔ̍, sāŋgālā kōŋ ō fūūlu̍u̍ ɛ̄chɛ̍nɛ̄ di̍.

²Chūāāmbūa̍a̍ a̍ chɛ̄lɛ̄kpi̍a̍a̍ ā chō nu̍m sāŋgālāa̍ le̍ mɛ̄ɛ̍ ŋ̄ chō Mɛ̄lɛ̄ka̍ bɛ̄ndū yɛ̍. He̍ī tōsa̍ mi̍ ya̍a̍mɔ̍ɔ̍wa̍a̍ nu̍mnda̍ ā mēī do̍ŋ. Ī tōsa̍ wānāa̍ tu̍l nu̍m lēyɛ̄ ndu̍yɛ̍ ma̍ sīmūl nu̍m nda̍ ā nɔ̍ lɛ̍ nyɛ̄ nda̍ dīmī le̍.

³Tē I̍ to̍fa̍ pɛ̍ cho̍o̍ cho̍o̍ mī che᷅ ha̍la̍ ŋ̄ tōōsi̍a̍a̍ wo̍, mī che᷅ pāŋge̍i̍, a̍ lōo̍ŋ ŋ̄ tōōsi̍a̍a̍ ma̍ hāndū chōo̍ cho̍o̍ wo̍ŋ,

⁴tē a̍ nɔ̍la̍ pɛ̍ ma̍ tōōsīāā nyɔ̄ɔ̍ŋ mu᷅ŋ, vɛ̄ɛ̍nɛ̍ kpɛ̍ wāna̍ chi̍o̍o̍ chō yɛ̍, nūm Mɛ̄lɛ̄ka̍ ma̍ būūla᷄ŋ a̍ ndu̍ nu̍a̍ā kpɛ̍? Vɛ̄ɛ̍nɛ̍ o̍ cho̍ yɛ̍ ma̍ nɔ̄ kɔ̄llo̍ o̍ ndu̍ lo̍ nu̍a̍ā?

⁵Tōōsīāā ŋ̄ tōōsi̍a̍a̍ ndu̍ wo̍, ma̍ hāndū ndu̍ mbo̍ wā nyɛ̄ o̍ nyɛ̄ chīla̍ŋ, mɛ̄ɛ̍ nūm pi̍la̍ mi̍ nāa̍ nu̍m ā sīmāa̍ ā hīāū a̍ ndūa̍a̍ nyɛ̄ pɔ̄mbɔ̄. Ma̍ tōsā mbo̍ wā nyɛ̄ o̍ nyɛ̄ bōlle̍ŋ, ndu̍yɛ̍ ma̍ nɛ̄ŋī ndu̍, ma̍ kē ndu̍ bɛ̄ɛ̄le̍ŋ ta̍u̍.

⁶Nyɛ̄ o̍ nyɛ̄ fe̍e̍ ŋ̄ tōōsi̍a̍a̍ ma̍ chūā wāna̍ chi̍o̍o̍ ma̍ hāndū ndu̍ chīla̍ŋ kpo̍u̍. Ma̍ tōsā mi̍ nyɛ̄ o̍ nyɛ̄ fe̍e̍ wa᷅ ndu̍ o̍ bā bɛ̄ŋgu̍.

⁷Lāsāā ni̍, lānāū ni̍, a̍ vīsīāā yōndūa̍a̍,

⁸a̍ yōūwa̍, a̍ sūūwa̍, a̍ nyɛ̄ o̍ nyɛ̄ yōōmāa̍ cho̍ o̍ pēēla̍ mɛ̄ŋmā īhɛ᷄lla̍ŋ ni᷄ŋ, ndu̍ o̍ bā bɛ̄ŋgu̍ nda̍ chō ni̍.

⁹O̍o̍ Mɛ̄lɛ̄ka̍ Ya̍a̍wɛ̄ɛ̄, Māsānɔ̍ nāa̍, wāŋnda̍ bā o̍ bā fe̍e̍ o̍ chi̍e̍ēŋndo̍ chōo̍ ā chō chɔ̄ɔ̍ mɛ̄ɛ̍ ŋ̄ chō Mɛ̄lɛ̄ka̍ bɛ̄ndū yɛ̍.