Read Southern Kisi Sa᷅m 80 Bible Online

Sa᷅m 80 - Southern Kisi bible

Sa᷅m 80

¹[78] O̍o̍ wānā ma̍ndāā lāsāa̍ I̍sɔ̄lūɛ̍i̍, nu᷄m cho̍ ho̍ō wānāa̍ fu̍la̍ o̍ pūlāle̍ Chōo̍sɛ̍le̍ŋ chōo̍ wa̍ māndāa̍ māā lāsāa̍ wa̍, yāndi̍i̍, ya̍ŋ ni̍la̍ŋ o̍ pīɛ̄īlē nāāle̍. Mɛ̄lɛ̄ka̍, nāa̍ ŋ̄ chō īchāli̍ o̍ kpe̍ŋgbe̍i̍ nu̍m lēmāsāa̍ chōo̍ o̍ nyāā lākūmba᷅ŋnda̍ tɛ̄ɛ̄ŋ nda̍,

²chɔ̍mnu̍ŋ wa̍nāā nāa̍, nda̍ yɔ̍nūŋ ni̍ māā yu̍ŋgu̍ E̍fi̍lūēm ndo̍, a̍ yu̍ŋgu̍ Bɛ̍ŋnja̍mīŋ ndo̍, a̍ yu̍ŋgu̍ Mānāa̍sē wo̍. Yu̍sa̍ kɔ᷅llo̍ a̍ kpāāyā nu̍m bɛ̄ndōo̍, mā hīŋ mā hu̍ŋ chi̍i̍ndīāā na̍a̍.

³To̍sa̍ mī ŋ̄ mīīŋgu̍ mɛ̄ɛ̍ na̍a̍ ŋ̄ wa᷄ o̍ tāse̍la̍ ndɔ̄ɔ̍ yɛ̍, Mɛ̍lɛ̄ka̍. Tu̍i̍i̍nu̍ŋ na̍a̍ īnyīɛ̍ɛ̍ mā chi̍i̍ndi̍a̍a̍ na̍a̍.

⁴O̍o̍ Mɛ̄lɛ̄ka̍ Ya̍a̍wɛ̄ɛ̍ hi̍o̍ū kpo̍u̍ wo̍, vɛ̄ɛ̍nɛ̍ kpɛ̍ ŋ̄ chō yɛ̍ hīōūwɔ̄ɔ̄ lāchī a̍ tu̍mbo̍o̍, a̍ mu̍lī na̍a̍ dīōm te̍?

⁵A̍ to̍sa̍ mi̍ kɔ̄l tāmbɛ̍i̍yo̍ ō sīmnu᷄ŋ ni᷅ŋ māā nyɛ̄ nāā di̍a̍ā, mi̍ mɛ̍mi̍a̍ŋ mā sīmnu᷄ŋ mɛ̍ŋmā nāā ma̍ko̍lāā.

⁶A̍ to̍sa̍ mi̍ lɛ̄ŋīi̍ ba̍lu̍ na̍a̍ ve̍, ī sīīŋgūū na̍a̍ nyɛ̄ ndā ma̍māā. Ya̍a̍mɔ̍ɔ̍wa̍a̍ nāa̍ ā chūa̍ na̍a̍ ni᷅ŋ nyɛ̄ fo̍ndō fu̍u̍.

⁷O̍o̍ Mɛ̄lɛ̄ka̍ hi̍o̍ū kpo̍u̍ wo̍, to̍sa̍ mī ŋ̄ mīīŋgu̍ mɛ̄ɛ̍ na̍a̍ ŋ̄ wa᷄ o̍ tāse̍la̍ ndɔ̄ɔ̍ yɛ̍. Tu̍i̍i̍nu̍ŋ na̍a̍ īnyīɛ̍ɛ̍ mā chi̍i̍ndi̍a̍a̍ na̍a̍.

⁸Tē ō wa᷄ māā yɔ̄ŋɔ̄ɔ̄ pɛ̍, ŋ̄ chō māchūāā māā yɔ̄m mākīle̍pīi̍yo̍, ō ŋ̄ sōli̍ o̍ lɛ̄ŋndē I̍chi̍pīle̍ŋ ni᷄ŋ ndo̍. Ma̍ lō o̍ ko̍ŋ ma̍ sōlī kāa̍la̍ wa̍ na̍a̍ lāchī la̍ŋ o̍ lɛ̄ŋndē nāāle̍ŋ ni᷄ŋ, ma̍ hu᷄ŋ tɔ᷅l yɔ̄mndo̍ ho̍ō lo̍ŋ.

⁹Ma̍ bɛ̍ɛ̍ndīāā lɛ̄ŋnde̍ŋ nyɛ̄ kɛ̄ndɛ̄ kɛ̍ndɛ̄, ma̍ tūāl yɔ̄mndo̍ ho̍ō le̍ mbō hīndū. Mi̍ yɔ̄mndo̍ ho̍ō lūɛ̄ī pūūndo̍ŋ lɛ̄ŋ di̍ di̍, ndu̍yɛ̍ mbo̍ pɛ̄ŋgɛ̄la᷄ŋ lɛ᷅ŋnde̍ŋ chōo̍ kpo̍u̍.

¹⁰Mi̍ wūndu̍ma̍ ndūa̍a̍ŋ mā kūmbū pēmbo᷄ŋ, ndu̍yɛ̍ mi̍ lɛ̄ūwūŋ ndɔ̄ɔ̍ŋ ŋ̄ pɛ̄ŋgɛ̄la᷄ŋ yɔ̍mīī tɔ̍ɔ̍mɛ̍i̍ si̍dāāve̍ chōo̍ kpo̍u̍.

¹¹Mi̍ lɛ̄ūwūŋ yɔ̄mndo̍ ho̍ō ŋ̄ fūūlūū o̍ Pēe̍ Mɛ̄ŋmā Īhɛ᷄llo̍ Mɛ̄dītālu̍e̍e̍nīāā, ndu̍yɛ̍ mi̍ ŋ̄ fūūlūū o̍ Pēē Bɛ̍ndōo̍ Yūfi̍lu̍a̍tīī di̍.

¹²Kɛ̍ vɛ᷅ ni᷅ŋ ma̍ pīāl kpāki̍ wa̍ yɔ̄mndo̍ ho̍ō ō bālāā wo̍, mi̍ wānāā hīāūwa᷄ŋnda̍ ā wā ni᷅ŋ kēīyo̍ kīle̍pīi̍ma̍ yɔ̄mndo̍ ho̍ō kēēndūūwo̍?

¹³Pēūwāā yōndūa̍a̍ ā chō yɔ̄mndo̍ ho̍ō tɛ̄ɛ̄mbūūwo̍, ndu̍yɛ̍ vīsīāā yōndūa̍a̍ kpo̍u̍, mā hu᷄ŋ yɔ᷅mndo̍ ho̍ō dīo̍o̍.

¹⁴O̍o̍ Mɛ̄lɛ̄ka̍ hi̍o̍ū kpo̍u̍ wo̍, yāndi̍i̍ mi̍ŋgi̍ hɔ᷅lla̍ o̍ na̍a̍lo̍. Nāa̍ ŋ̄ chō ɛ̄chɛ̍nɛ̄ wa̍, yāndi̍i̍ to̍fa̍ lɛ᷅ŋ na̍ŋnu᷄ŋ mā chē nyɛ̄ nāā pa̍lāa̍. Hu̍ŋ mā hu̍ŋ chi̍i̍dīāā na̍a̍ fɔ̍.

¹⁵Hu̍ŋ mā hu̍ŋ chi̍i̍ndīāā yɔ̄m mākīle̍pīi̍ nūm pi̍la̍ tɔ᷅l ho̍ō wo̍, yɔ̄m pɔ̄mbɔ̄ ŋ̄ tɔ̄l ho̍ō ma̍ tōsā mbo̍ sīmnu᷄ŋ yɔ᷅m kpāāyā bɛ̍ndū wo̍.

¹⁶Ya̍a̍mɔ̍ɔ̍wa̍ kēŋ yɔ̄mndo̍ ho̍ō, ma̍ māl ndu̍ o̍ yīŋ mbo̍ ŋūā. Dɔ̍ɔ̍nu̍ŋ tu̍mbe̍ a̍ ya̍a̍mɔ̍ɔ̍wa̍ ha̍ā mā tɛ̍ɛ̍mbu̍u̍ nda̍.

¹⁷Kɛ̍ wānāā nūm a̍ ŋ̄ hɛ̄li̍ wa̍ nda̍, ma̍nda̍ nda̍, mā kɛ̍si̍ nda̍ mā wa᷄ o̍ bā ndāa̍ chōo̍ yɛ̍lɛ̍kɛ̍lɛ̍ɛ̍, nda̍ yɔ̍nūŋ ni̍ māā lɛ̄ŋndē ŋ̄ tōsa̍ le᷅ŋ mi̍ lē sīmnu᷄ŋ lɛ̍ŋndē kpāāyā le̍ŋ.

¹⁸Ko̍ŋ to̍sā ni̍, ŋ̄ kɛ̍ɛ̄ lɛ̍ nu̍m mī ŋ̄ mūlu̍l nu̍m kɔ̄ɔ̍ le̍. Ma̍nda̍ na̍a̍ mī ŋ̄ wa̍ yōōmū, ko̍ŋ to̍sā ni̍, mī ŋ̄ mīīŋgu̍ vɛ̄lɛ̄ nu̍m sōōlūūwo̍.

¹⁹O̍o̍ Mɛ̄lɛ̄ka̍ Ya̍a̍wɛ̄ɛ̍ hi̍o̍ū kpo̍u̍ wo̍, to̍sa̍ mī ŋ̄ mīīŋgu̍ mɛ̄ɛ̍ na̍a̍ ŋ̄ wa᷄ o̍ tāse̍la̍ ndɔ̄ɔ̍ yɛ̍. Tu̍i̍i̍nu̍ŋ na̍a̍ īnyīɛ̍ɛ̍ mā chi̍i̍ndi̍a̍a̍ na̍a̍.