Read Southern Kisi Sa᷅m 81 Bible Online

Sa᷅m 81 - Southern Kisi bible

Sa᷅m 81

¹[79] Lā sōli̍ chōnde̍i̍ chōo̍ cho̍o̍ le̍ Mɛ̄lɛ̄ka̍ sāŋgālāa̍, o̍ cho̍ wānā na̍a̍ māndāa̍ wo̍. Lā sōli̍ chōndi̍i̍ kɔ̄l kɛ̄ndɛ̄i̍ le̍ Mɛ̄lɛ̄ka̍ yu̍ŋgu̍ Che̍kɔ̍pū wo̍ sāŋgālāa̍.

²Lā sōli̍ chōnde̍i̍. Lā kāndu̍ nyɛ̄m chāa̍ lɔ̄ɔ̍. Lā lɔ̄ɔ̍ du̍ndūla̍ pɔ̍mbɔ̄la̍ŋ. Lā lɔ̄ɔ̍ nyɛ̄m chāāŋ chōmūlāŋ kɛ̄ndɛ̄ kɛ̍ndɔ᷄ŋ, tōwāla̍ŋ a̍ nyɛ̄m chāāŋ lēyōōŋ chēle̍ŋndo̍ŋ.

³Tē pāŋge̍i̍ chɔ᷄m sɛ̄nɛ̄ī pɛ̍, ndu̍yɛ̍ mī ī pɛ̄ cha̍, lā hɔ᷄ŋ bu̍lu̍la̍ŋ le̍ bɔ̄ŋa᷅ŋnda᷅ŋ.

⁴Wāŋnda̍ I̍sɔ̄lūɛ̄ī a̍ nɔ̍ mā chūa̍ sāwāa̍ ho̍ō. Sāwa̍ Mɛ̄lɛ̄ka̍ yu̍ŋgu̍ Che̍kɔ̍pū wo̍ ō dɔ̄ū wo̍ ndu̍ cho̍ ho̍ō ni̍.

⁵Bōōndi̍i̍ Mɛ̄lɛ̄ka̍ chīŋa̍la᷅ŋ lɛ᷅ŋndē I̍chi̍pīle̍ŋ le̍ na̍a̍ bāŋāa̍ ve̍, bōōndi̍i̍ ke̍ŋ o̍ dɔ̍ū sāwāa̍ ho̍ō le̍ wāŋnda̍ I̍sɔ̄lūɛ̄ī ni̍. Mi̍ tu̍ɛ̍ī dīōm ya̍ I̍ tu̍i̍i̍ yɔ̍ bɛ̍ɛ̍ pa̍a̍ndū le̍ wo̍ sūɛ̍i̍ āā,

⁶“Wōlɔ̄ɔ̄lā lūsu̍lɛ̍i̍la̍ wa̍ nya̍ o̍ lēbōl ta̍ŋ, mi̍ fa̍ŋā nya̍ la̍ŋ o̍ lēbōl. Bīyɔ̄ɔ̄ lēchɛ̄ nda̍ wa᷄ nya̍ wo̍, mi̍ to̍sā mi̍ lā fūlā o̍ chɛ̄lēlēŋ ni᷄ŋ.

⁷Lā wa᷄ o̍ nyɛ̄ pālāa̍ ni᷄ŋ mi̍ lā nyūnā ya̍ dīōm, ndu̍yɛ̍ mi̍ chi̍i̍ndīāā nya̍. Mi̍ mu̍lī nya̍ dīōm o̍ ha̍la̍ hūmbōo̍ ni᷄ŋ, ō ta᷅ŋnda̍ŋ mā wa᷄ dēŋīo̍o̍ lēni᷄ŋ ndo̍. Mi̍ ke᷅ nya̍ tōfāa̍ o̍ pēē pɔ̍mbɔ̄ɔ̍ Mɛ̍lu̍i̍bā, bōōndi̍i̍ kōlɔ̄ɔ̍ bīī nya̍ ve̍, le̍ mī si̍na̍ mɛ̄ɛ̍ kpɛ̍ nya̍ nɔ̄ tīīnda᷄ŋndo̍ o̍ ya̍ ni̍ŋ yɛ̍.

⁸Lā ya᷄ŋ ni᷅la̍ŋ o̍ sīlā ya̍ I̍ cho̍ nya̍ wo̍ wānāā nīa̍a̍. Wāŋnda̍ I̍sɔ̄lūɛ̄ī, ndu̍ o̍o̍ bɛ̍ndā bɔ̍ɔ̍ mī nya̍ a̍a̍ tu̍e̍ī ya̍ dīōm.

⁹Lā nɔ̍ mī lā nɔ̄ mɛ̄lɛ̄ka̍a̍ chēle̍ŋnda̍ nya̍ tɛ̄ɛ̄ŋ te̍. Lā nɔ̍ bɛ̍ɛ̍ mī lā sōōlu̍u̍ mɛ̄lɛ̄ka̍ o̍ mɛ̄lɛ̄ka̍ chēle̍ŋ o̍ ya̍ kɔ̍ɔ̍lī le̍.

¹⁰Ya̍ cho̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nyāa̍ ni̍, o̍ so̍li̍ nya̍ o̍ lɛ̄ŋndē I̍chi̍pīle̍ŋ ni᷄ŋ ndo̍. Lā dɔ̄u̍ ti̍i̍nda᷄ŋ nyāa̍ o̍ ya̍ ni̍ŋ, I̍ nɔ̍lā mī ma̍la̍ nya̍.

¹¹“Kɛ̍ wānāā nīa̍a̍ ā tūi̍i̍ ya̍ dīōm te̍. Wāŋnda̍ I̍sɔ̄lūɛ̄ī a̍ tu̍si̍ŋ o̍ dīōm nūu̍ bɛ̄ŋgu̍ le̍.

¹²Ndu̍yɛ̍ le̍ bōllē ndāle̍ ka̍lā le̍ŋ, mi̍ ma᷅l nda̍ o̍ bā ndāa̍ chōo̍, le̍ mā tōsa̍ nyɛ̄ o̍ nyɛ̄ nda̍ yēēma̍.

¹³Ndu̍ o̍o̍ bɛ̍ndā bɔ̍ɔ̍ mī wāŋnda̍ I̍sɔ̄lūɛ̄ī nda̍ a̍a̍ tu̍e̍ī ya̍ dīōm. Ndu̍ o̍o̍ bɛ̍ndā bɔ̍ɔ̍ mī nda̍ a̍a̍ ya̍ŋ ya̍ nīla̍ŋ.

¹⁴I̍ wa̍ ya̍a̍mɔ̍ɔ̍wa̍a̍ ndāa̍ yōmɔ̄ɔ̄ o̍ chɔ̍chɔ̍ bɛ̍ndū ni᷄ŋ, I̍ wa̍ ya̍a̍mɔ̍ɔ̍wa̍a̍ ndāa̍ chīi̍ a̍ kpāāya̍ nī bɛ̍ndōo̍.

¹⁵Wānāa̍ tu̍l la̍ yɛ̍le̍ŋ ki̍nɛ̍i̍ ya̍ ā wa᷄ ya̍ tūndɔ᷄ŋ o̍ lābɛ̄ŋgu̍ ni̍ŋ. Ndu̍yɛ̍ nyɛ̄ pālāā ya̍ i̍i̍ tu̍sī ni̍ŋ nda̍ chōo̍ wo̍ ō wa᷄ wā le̍ fɛ̍ɛ̍ŋ fɛ̍ɛ̍ŋ.

¹⁶Kɛ̍ nya̍ nya̍ I̍ wa̍ nya̍ nyɛ̄ dīāā ŋ̄wi̍tīi̍ kɛ̍ndɛ̄ kɛ̍ndɔ̄ɔ̍ kē, ndu̍yɛ̍ mī ya̍ i̍i̍ ke̍ nya̍ lɛ̄ma̍ kɛ̍ndɛ̄ kɛ̍ndīa̍ŋ, mī nya̍ a̍a̍ hi̍ni̍ kɔ̄l.”