Read Southern Kisi Sa᷅m 83 Bible Online

Sa᷅m 83 - Southern Kisi bible

Sa᷅m 83

¹[81] O̍o̍ Mɛ̄lɛ̄ka̍, yāndi̍i̍ me̍ī nu̍a̍ā a̍ na̍a̍ le̍. Cha᷅l na̍a̍ tōfā nu̍a̍ā le̍ Mɛ̄lɛ̄ka̍, me̍ī a̍ sūɛ̍i̍ he̍ī le̍.

²Ya̍ŋ ndɔ̍ ni᷅la̍ŋ mā tūēī bɔ̄ɔ̄lūū bɛ̄ndū ya̍a̍mɔ̍ɔ̍wa̍a̍ nu̍mnda̍ ā chō wo̍. Wānāa̍ tu̍l nu̍m ha̍ā yɛ̄le̍ŋ nda̍ ā sīmu̍l nu̍m sīmūllo̍ pīla̍.

³Ā chō tūūlā wɔ̄ɔ̍ŋnda̍ŋ kpe̍e̍kpe̍i̍ a̍ wānāā nūmnda̍ o̍kɔ̄ɔ̄. Ā chō wānāā nūm a̍ ŋ̄ chō māndāa̍ wa̍ de̍fo̍o̍ yīīyo̍ kpe̍e̍kpe̍i̍.

⁴Ā chō dīmīo̍o̍ āā, “Lā hu᷄ŋ mī ŋ̄ kɔ᷄ de᷅lnūŋ nda̍ chōo̍, mī ŋ̄ tɛ̄ɛ̄mbu̍u̍ lɛ̄ŋndē ndāle̍ŋ kpa̍ta̍ kpa̍ta̍. Lā ŋ̄ tōsa᷅ŋ fɛ̍ɛ̍ŋ a̍ fɛ̍ɛ̍ŋ wāŋnda̍ yi̍yāŋ ndɛ̍ a̍ I̍sɔ̄lūɛ̄ī o̍kɔ̄ɔ̄ le̍.”

⁵Nda̍ kpo̍u̍ ā chɛ̄la᷅ŋ ma̍ yīī nu̍m de̍fo̍o̍. Wānāa̍ to̍sa̍ chɛ̄la᷅ŋndo̍ nda̍ pi̍la̍ tɛ̄ɛ̄ŋ le̍ nu̍m chīŋa̍la᷅ŋndo̍ wa̍ nda̍ cho̍ ha̍ā ni̍.

⁶Wāŋnda̍ I̍dɔ̄m, a̍ Īsīmāli̍īya̍, a̍ wāŋnda̍ Mo̍wa̍bī, a̍ Hākīlu̍a̍i̍tīi̍ya̍,

⁷a̍ wāŋnda̍ Kɛ̍bāl, a̍ wāŋnda̍ A̍mɔ̄ŋ, a̍ wāŋnda̍ A̍ma̍lɛ̍kī, a̍ Fīli̍i̍tīāŋnda̍, a̍ wāŋnda̍ Ta̍a̍yā.

⁸Ndu̍yɛ̍ Āsi̍i̍līāā wa̍ bɛ̍ɛ̍ ā sɔ̄ɔ̄ŋgu̍u̍ nda̍ chōo̍. Ā sɔ̄ɔ̄ŋgu̍u̍ wānāa̍ fu̍la̍ ha̍ā o̍ pūlāle̍ Lɔ̍tū le̍ŋ chōo̍ wa̍ chōo̍, a̍ lɔ̍ɔ̍nu᷄ŋ ta̍kpā le̍ nda̍ mālāa̍ wa̍.

⁹To̍sa̍ a̍ wāŋnda̍ ha̍ā mɛ̄ɛ̍ ŋ̄ tōsa̍ a̍ Mi̍dīāŋnda̍ yɛ̍. To̍sa̍ a̍ nda̍ mɛ̄ɛ̍ ŋ̄ tōsa̍ a̍ Sīsɛ̍lūā nda̍ Cha̍bīŋ, o̍ Pīo̍o̍ Ki̍sīɔ̄ŋ kɔ̍ŋgɔ̍ yɛ̍.

¹⁰Ma̍ tɛ̄ɛ̄mbūū wāŋnda̍ ha̍ā Ɛ̍ŋdɔ̄ɔ̄ chi̍e̍e̍, ndu̍yɛ̍ ma̍ tōsā mi̍ dīāllūŋ ndāa̍ŋ ŋ̄ sīā lɛ̄ŋ.

¹¹To̍sa̍ a̍ wānāā ndāā bɛ̍ndūa̍a̍ mɛ̄ɛ̍ ŋ̄ tōsa̍ a̍ O̍lu̍ɛ̍bī nda̍ Si̍i̍bī yɛ̍. To̍sa̍ a̍ wānāā ndāā bɛ̍ndūa̍a̍ kpo̍u̍, mɛ̄ɛ̍ ŋ̄ tōsa̍ a̍ Sɛ̍bāā nda̍ Sālīmu̍nā yɛ̍.

¹²Wāŋnda̍ ha̍ā nda̍ di̍mi̍ ni̍ āā, “Ŋ̄ chō lākɔ̄ mī ŋ̄ kɔ᷄ bi̍ī fo̍ndāŋndā chɔ̄lūa̍a̍ ā kūā di̍o̍la̍ŋ, mi̍ lā wā le̍ Mɛ̄lɛ̄ka̍ la̍ŋ, mī lā wa᷄ ni᷅ŋ le̍ na̍a̍.”

¹³O̍o̍ Mɛ̄lɛ̄ka̍, to̍sa̍ mī wāŋnda̍ ha̍ā sīmnu᷄ŋ mɛ̄ɛ̍ bīl vēsɛ̍i̍yo̍ chō nu̍a̍ā yɛ̍, mɛ̄ɛ̍ tɛ̄fɛ̍la̍ŋ lā chō nu̍a̍ā tē hūēīye̍ ī hɔ᷄ŋ pɛ̍, ī kūɛ̄nu᷄ŋ a̍ la̍ŋ yɛ̍.

¹⁴Mɛ̄ɛ̍ yīŋnde̍ŋ lē wā nu̍a̍ā kɔ̄la̍ŋ a̍ yōndōo̍ lōmɔ̄ɔ̍ yɛ̍, ɔ̄ɔ̄ mɛ̄ɛ̍ yīŋnde̍ŋ lē wā nu̍a̍ā kɔ̄la̍ŋ a̍ yōndōo̍ lōmɔ̄ɔ̍ o̍ pēmbo᷄ŋ chōo̍ yɛ̍,

¹⁵le̍nde̍ ŋ̄ tīsa̍ nda̍ kɔ̄ɔ̄lī a̍ tu̍mbo̍o̍ ni̍, mā to̍sa̍ mī sīōōŋīī bɛ̄ndūe̍i̍ ī bīī nda̍ a̍ tu̍mbe̍ ŋ̄ dɔ̄ɔ̄nu᷄ŋ a̍ nda̍ wo̍.

¹⁶O̍o̍ Mɛ̄lɛ̄ka̍ Ya̍a̍wɛ̄ɛ̄, to̍sa̍ mī si̍ɔ̍mbu̍la̍ŋ lā bīī wāŋnda̍ ha̍ā a̍ bōlle̍ŋ mɔ̍ɔ̍su̍, ko̍ŋ to̍sā ni̍ mā sīna̍ mɛ̄ɛ̍ ŋ̄ chō wāna̍ kpāāyā yɛ̍.

¹⁷To̍sa̍ mī si̍ɔ̍mbu̍la̍ŋ lā bīī nda̍ ndu̍yɛ̍ mī sīōōŋīī bɛ̄ndūe̍i̍ ī bīī nda̍ le̍ fɛ̍ɛ̍ŋ a̍ fɛ̍ɛ̍ŋ. To̍sa̍ mā tɛ̄ɛ̄mbu̍u̍ nda̍ bɛ̄ɛ̄la̍ŋ, ndu̍yɛ̍ mā tɛ̄ɛ̄mbu̍u̍ nda̍.

¹⁸To̍sa̍ mā sīna̍ māā nu᷄m pīlɛ̍ kpe̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍, māā nu᷄m cho̍ Mɛ̄lɛ̄ka̍ hi̍o̍ū kpo̍u̍ wo̍ ni̍.