Read Southern Kisi Sa᷅m 84 Bible Online

Sa᷅m 84 - Southern Kisi bible

Sa᷅m 84

¹[82] O̍o̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, nāa̍ nu̍m ā chālāa̍ ā chō bɔ̄ɔ̍ fo̍ndāŋ kɛ̄ndɛ̄.

²Yēēmɛ̍i̍ ī chō ya̍ bɔ̄ɔ̍, le̍ wāa̍ o̍ chīɛ̄ī nūmndo̍ ni᷄ŋ Mɛ̄lɛ̄ka̍ Ya̍a̍wɛ̄ɛ̄. Yēēmɛ̍i̍ cho̍ o̍ kɔ̄l nūu̍ ni᷄ŋ le̍ mī wa̍ lo̍ŋ nde̍, ī chō ī bɔ̄ɔ̍. I̍ cho̍ chōndi̍i̍ kɔ̄l kɛ̄ndɛ̄i̍ sōlī a̍ kɔ̄l nūu̍ kpo̍u̍, le̍ mī sa̍ŋga̍la̍ nūm Mɛ̄lɛ̄ka̍ cho̍ yōōmū le̍ fɛ̍ɛ̍ŋ a̍ fɛ̍ɛ̍ŋ ndo̍.

³To̍fa̍ wɔ̍ lɛ̄ɛ̄fɛ̄ŋāā ība̍lla̍, a̍ yōūwa̍ ā pīli̍a̍a̍, ā chōŋnu᷄ŋ o̍ wāa̍ŋīī ndɛ̄i̍ ni᷄ŋ. Ā chōŋnu᷄ŋ a̍ chūāūwāā ndāa̍ īkɛ̄i̍ o̍ ma̍āŋnda̍ Mɛ̄lɛ̄ka̍ Ya̍a̍wɛ̄ɛ̄ la̍ŋ īkɛ̄i̍, Mɛ̄lɛ̄ka̍ nɔ̍ kpāāyāa̍ kpo̍u̍ wo̍, o̍ cho̍ māsa̍ nī bɛ̍ndōo̍, ndu̍yɛ̍ mbo̍ wā Mɛ̄lɛ̄ka̍ nūu̍ wo̍.

⁴Wānāa̍ cho̍ŋnu̍ŋ o̍ chīɛ̄ī nūmndo̍ wa̍, ā pɛ̄l tɔ̄nɔ̄ɔ̍. Le̍ te̍le̍ŋ o̍ te̍le̍ŋ ā chō nu̍m sāŋgālāa̍ o̍ chōndo̍ŋ ni᷄ŋ.

⁵Wānāā ŋ̄ kē ha̍ā kpa̍a̍yāa̍ wa̍ ā pɛ̄l tɔ̄nɔ̄ɔ̍, wānāa̍ nɔ᷅ ha̍ā yēēmɛ̍i̍ le̍ hēlɔ̄ɔ̍ o̍ Pēmbīī Sa̍a̍yɔ̄ŋnde̍ chōo̍ le̍ nu̍m sōōlūūwo̍ wa̍.

⁶Wāŋnda̍ ha̍ā mā kēēku̍ o̍ lɛ̄ŋndē vēsɛ̍i̍le̍ŋ Ba̍kā, mī lɛ̄ŋndē vēsɛ̍i̍le̍ le̍ŋ lē sīmnu᷄ŋ fo̍ndāŋ pēēla̍ pɔ̍mbɔ̄la̍ŋ lā wā wo̍, mī pīɔ̍ɔ̍ sīā mī mɛ̄ŋnda̍ŋ mā pɛ̄ o̍ so̍o̍ŋnda̍ŋ ni᷄ŋ.

⁷Wāŋnda̍ ha̍ā le̍ te̍le̍ŋ o̍ te̍le̍ŋ dīāllūŋ kālāŋ sɛ̄nɛ̄īyo̍ŋ nda̍ sɔ̄lā ni̍. Ndu̍yɛ̍ ā chō hūnɔ̄ɔ̄ Mɛ̄lɛ̄ka̍ hi̍o̍ū mɛ̄lɛ̄ka̍a̍ kpo̍u̍ wo̍ chɔ̄ o̍ Pēmbīī Sa̍a̍yɔ̄ŋnde̍ chōo̍.

⁸O̍o̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, yāndi̍i̍ tu̍e̍i̍ pi̍ɛ̍īlē nīle̍ŋ. Yāŋ ni᷅la̍ŋ o̍ pīɛ̄īlē nīle̍ŋ, Mɛ̄lɛ̄ka̍ Che̍kɔ̍pū wo̍.

⁹O̍o̍ Mɛ̄lɛ̄ka̍, yāndi̍i̍ chɔ̍ ma᷅sa̍ nāā bɛ̍ndōo̍ nyīnā, wāna̍ cho̍ na̍a̍ māndāa̍ wo̍. Tu̍i̍i̍nu̍ŋ wa᷅na̍ nūm pi̍la̍ hɛ̍li̍ ho̍ō wo̍ īnyīɛ̍ɛ̍.

¹⁰Wāa̍ o̍ chīɛ̄ī nūmndo̍ le̍ pāa̍le̍ŋ lēpīlɛ̍ kpe̍, ō bɛ̄nda̍ mbo̍ hīāū wāa̍ o̍ fo̍ndā chēle̍ŋ le̍ pālɛ̍i̍ wāa̍ ō pīlɛ̍. Ō bɛ̄ndā bɛ̍ɛ̍ mī wa̍ wa̍nā ma̍ndāā dīō kpākīo̍o̍ o̍ chīɛ̄ī Mɛ̄lɛ̄ka̍ nūu̍, mbo̍ hīāū a̍ wāa̍ o̍ chīɛ̄īlā wānāā dɛ̍nɛ̍ wɔ̍ɔ̍ŋnda̍ ni᷄ŋ.

¹¹Mɛ̄lɛ̄ka̍ Ya̍a̍wɛ̄ɛ̄, ā chō māchūāā pāa̍le̍ŋ le̍ na̍a̍, nu᷄m ke᷅ na̍a̍ nyɛ̄ wa̍wo̍ŋndo̍ a̍ yōōmōo̍ ni̍. Nu᷄m cho̍ wāna̍ na̍a̍ ŋ̄ tīīnda̍ŋ le̍ na̍a̍ māndāa̍ wo̍ ni̍. Wāna̍ ka̍a̍la̍ na̍a̍ wo̍ ŋ̄ cho̍ ni̍, ndu̍yɛ̍ tē ŋ̄ hīŋ nāa̍ nūm chu̍a̍ pɛ̍, hɔ̍ɔ̍ya̍le̍ŋ ŋ̄ chɔ̄m na̍a̍ ni̍. Wānāa̍ cho̍ nu̍m o̍ hɔ̄l sa̍kpō wa̍, sɔ̄ɔ̍ŋ kɛ̍ndɛ̄ŋ bɛ̄ndo᷄ŋ ŋ̄ tōsāl nda̍ ni̍.

¹²O̍o̍ Mɛ̄lɛ̄ka̍ Ya̍a̍wɛ̄ɛ̍ nɔ̍ kpāāyāa̍ kpo̍u̍ wo̍, wānāa̍ du̍a̍ū ti̍i̍nda᷄ŋ ndāa̍ o̍ nūm ni̍ŋ nda̍ ā pɛ̄l tɔ̄nɔ̄ɔ̍.