Read Southern Kisi Sa᷅m 86 Bible Online

Sa᷅m 86 - Southern Kisi bible

Sa᷅m 86

¹[84] O̍o̍ Mɛ̄lɛ̄ka̍ Ya̍a̍wɛ̄ɛ̄, yāndi̍i̍ ya̍ŋ ni᷅la̍ŋ o̍ pīɛ̄īlē nīle̍ŋ mā mu̍li̍ ya̍ dīōm, kāni̍ fo̍ndōle̍, wānā ta̍mbɛ̍i̍yo̍ ya̍ I̍ cho̍ ni̍, wāna̍ bāhāvɛ̍i̍yo̍.

²Chi̍i̍ndi̍a̍a̍ yo̍o̍mū nūu̍ Mɛ̄lɛ̄ka̍, fo̍ndōle̍, le̍ mɛ̄ɛ̍ ya̍ I̍ yɔ̍ŋgu̍ŋ kpo̍u̍ o̍ nūmndo̍ yɛ̍. Chi̍i̍ndi̍a̍a̍ ya̍ Mɛ̄lɛ̄ka̍, fo̍ndōle̍ bu̍ɛ̍ī nūmndo̍ ya̍ I̍ cho̍ ni̍, ndu̍yɛ̍ nūm ya̍ I̍ ti̍i̍nda̍ŋ ni̍.

³Nu᷄m cho̍ Mɛ̄lɛ̄ka̍ nūu̍ ni̍, le̍la̍ŋ tu̍i̍i̍nu̍ŋ ya̍ īnyīɛ̍ɛ̍, kāni̍ fo̍ndōle̍, I̍ cho̍ nīīlōo̍ cha᷄ŋndo̍ nāa̍ nūm chu̍a̍ kpɛ᷅ŋ.

⁴To̍sa̍ mī bu̍ɛ̍ī nūmndo̍ ō na᷄ŋ kɔ̄l Māsānɔ̄ɔ̍ Mɛ̄lɛ̄ka̍, kāni̍ fo̍ndōle̍, nūm ya̍ I̍ ti̍i̍nda̍ŋ o̍ yōōmū nūu̍ ni᷄ŋ ni̍.

⁵O̍o̍ Māsānɔ̄ɔ̍ Mɛ̄lɛ̄ka̍, ā chō wānā kɛ̍ndɛ̄ nāa̍ na̍a̍ chūā, ndu̍yɛ̍ le̍ te̍le̍ŋ o̍ te̍le̍ŋ ā chō ō bɛ̍ɛ̍ndīa̍ŋ le̍ na̍a̍ mālɔ̄ɔ̍ le̍ yɔ̄ŋndā nāāla̍ wɔ̍ɔ̍ŋnda̍ŋ. Wānāa̍ nyu̍nā nu̍m le̍ mālāa̍ wa̍, kāālā ŋ̄ chɔ̄m nda̍ le̍ te̍le̍ŋ o̍ te̍le̍ŋ ni̍.

⁶Yāndi̍i̍ Mɛ̄lɛ̄ka̍ Ya̍a̍wɛ̄ɛ̄, ya̍ŋ ni᷅la̍ŋ o̍ pīɛ̄īlē nīle̍ŋ. Tu̍e̍i̍ cha̍ŋ ya̍ I̍ cho̍ nāa̍ nūm chu̍a̍ le̍ ya̍ mālāa̍ wo̍.

⁷Tē nyɛ̄ pālāa̍ kōma̍l la̍ pɛ̍, nūm ya̍ I̍ nyu̍nā di̍ōm ni̍ le̍ ya̍ mālāa̍, ndu̍yɛ̍ mā mu̍li̍ ya̍ dīōm.

⁸Nyɛ̄m wāŋnda̍ sōōlūū māā mɛ̄lɛ̄ka̍a̍ ndā wo̍ŋ, ō pīlɛ̍ bɛ̍ɛ̍ cho̍ māā nūm te̍, Māsānɔ̄ɔ̍ Mɛ̄lɛ̄ka̍. Wānā o̍ wānā cho̍ mbō tōsa̍ wa̍lta̍ kɔ̄ndɔ̄fi̍ltā ŋ̄ tōsā la̍ŋ ō pīlɛ̍ bɛ̍ɛ̍ le̍.

⁹Lɛ̄ŋīī ŋ̄ tōōsi̍a̍a̍ o̍ chi̍e̍ēŋndo̍ chōo̍ ve̍ kpo̍u̍, ī chō nu̍m hūnɔ̄ɔ̄ tūndɔ᷄ŋ o̍ lābɛ̄ŋgu̍ ni̍ŋ, Māsānɔ̄ɔ̍ Mɛ̄lɛ̄ka̍. Ī chō nu̍m hūnɔ̄ɔ̄ sāŋgālā, fo̍ndōle̍ le̍ mɛ̄ɛ̍ ŋ̄ chō wāna̍ kpāāyā bɛ̍ndū yɛ̍.

¹⁰Ā chō ō bɛ̄ndū Mɛ̄lɛ̄ka̍, ndu̍yɛ̍ wa̍lta̍ ŋ̄ tōsā la̍ŋ lā chō wa̍lta̍ kɔ̄ndɔ̄fi̍ltā bɛ̄ndū. Nu᷄m pīlɛ̍ kpe̍ cho̍ Mɛ̄lɛ̄ka̍ ni̍.

¹¹Mɛ̄lɛ̄ka̍ Ya̍a̍wɛ̄ɛ̄, pɛ̍ɛ̍ku̍ ya̍ sɔ̄ɔ̍ŋ nu̍m ŋ̄ yēēma̍ ya̍ mī to̍sa̍ wo̍ŋ, ko̍ŋ to̍sā ni̍ mī wa̍ o̍ nɛ̄i̍ nu̍m tōnya̍a̍ cho̍o̍. Ke̍ ya̍ kɔ̄l ya̍ I̍ so̍o̍lūū nu̍m, nu᷄m pīlɛ̍ kpe̍ wo̍, le̍ mī nɔ̍ bɛ̄ɛ̄le̍ŋ le̍ dīōlā nūmnda̍ŋ.

¹²O̍o̍ Māsānɔ̄ɔ̍ Mɛ̄lɛ̄ka̍, Mɛ̄lɛ̄ka̍ nūu̍, I̍ cho̍ nu̍m sāŋgālā a̍ kɔ̄l nūu̍ kpo̍u̍. Le̍ te̍le̍ŋ o̍ te̍le̍ŋ, I̍ wa᷅ ni̍ŋ wa᷅ŋnda̍ dīmūllo̍ a̍ mɛ̄ɛ̍ ŋ̄ chō ō bɛ̄ndū yɛ̍,

¹³kāni̍ fo̍ndōle̍, kāālā ŋ̄ nɔ̄ le̍ ya̍ wo̍ ō chō le̍ te̍le̍ŋ o̍ te̍le̍ŋ. Nu᷄m pi̍ŋi̍ ya̍ ni̍ ma̍ sōlī ya̍ pīɔ̍mndo̍ o̍ bā.

¹⁴O̍o̍ Mɛ̄lɛ̄ka̍, wānāā yōŋgāā bɛ̍ndūa̍a̍ ā chīŋa̍la᷅ŋ ya̍. Wānāā dɛ̍nɛ̍ wɔ̍ɔ̍ŋāā bɛ̄ndūa̍a̍ ā chō kīndī kīndīo̍o̍ le̍ ya̍ dīyɔ̄ɔ̍, wānāa̍ cho̍ ha̍ā ā būūla̍ŋ bɛ̍ɛ̍ a̍ nūm te̍ wa̍.

¹⁵Kɛ̍ nūm Māsānɔ̄ɔ̍ Mɛ̄lɛ̄ka̍, wāna̍ īnyīɛ̍ɛ̍yo̍ ŋ̄ chō ni̍, wāna̍ ka̍a̍la̍ ŋ̄wāŋndā chīe̍e̍ wo̍. A̍ cho̍ wa᷅na̍ dɔ̍ɔ̍nu᷄ŋ tu̍mbe̍ chɔ̍chɔ̍ le̍, wāna̍ nɔ̍ kāālāa̍ ta̍u̍ ta̍u̍ le̍ ŋ̄wāŋndā, ndu̍yɛ̍ ma̍ wā sa̍kpō wo̍ ŋ̄ chō ni̍.

¹⁶Mu̍li̍ hɔ᷅lla̍ o̍ ya̍lo̍ mā tu̍i̍i̍nu̍ŋ ya̍ īnyīɛ̍ɛ̍ fɔ̍. Ke̍ ya̍ kpāāyāa̍ ndu̍yɛ̍ mā chi̍i̍ndi̍a̍a̍ ya̍, kāni̍ fo̍ndōle̍, nūm ya̍ I̍ cho̍ sāāŋgīāllo̍ ni̍, mɛ̄ɛ̍ kāla̍ nūu̍ ndu̍ o̍o̍ sa̍a̍ŋgīāl nu̍m yɛ̍.

¹⁷O̍o̍ Mɛ̄lɛ̄ka̍ Ya̍a̍wɛ̄ɛ̄, chɔ̍m ya̍ tāāmāsi̍o̍o̍ māā ā tōsāl la̍ ni̍ŋ dɛ̍nɛ̍ kɛ̍ndɛ̄, o̍ ko̍ŋ, tē wānāa̍ tu̍l la̍ yɛ̄le̍ŋ nda̍ ā chē pɛ̍ mɛ̄ɛ̍ ŋ̄ māla̍ ya̍ yɛ̍, ndu̍yɛ̍ ma̍ nyɔ̄ɔ̄lū ya̍ kɔ̄llo̍ yɛ̍ pɛ̍, si̍ɔ̍mbu̍la̍ŋ lā chō nda̍ bīyɔ̄ɔ̄.