Read Southern Kisi Sa᷅m 9 Bible Online

Sa᷅m 9 - Southern Kisi bible

Sa᷅m 9

¹[7] O̍o̍ Mɛ̄lɛ̄ka̍ Ya̍a̍wɛ̄ɛ̄, I̍ cho̍ nu̍m sāŋgālā a̍ kɔ̄l nūu̍ kpo̍u̍. I̍ cho̍ wāŋnda̍ dīmūl a̍ wa̍lta̍ kɔ̄ndɔ̄fi̍ltā ŋ̄ tōsa̍ la̍ŋ kpo̍u̍ o̍kɔ̄ɔ̄.

²I̍ cho̍ chōndi̍i̍ kɔ̄l kɛ̄ndɛ̄i̍ sōlī, ndu̍yɛ̍ mī dɔ̍ɔ̍nu᷄ŋ nya̍a̍le̍ le̍ sa̍bū nūmndo̍. O̍o̍ Mɛ̄lɛ̄ka̍ hi̍o̍ū kpo̍u̍ wo̍, I̍ cho̍ dīōlā nūmnda̍ŋ sāŋgālā o̍ chōnde̍i̍ ni᷄ŋ.

³Mɛ̄ɛ̍ ya̍a̍mɔ̍ɔ̍wa̍a̍ nīa̍a̍ ā chē nu̍m, ma̍ mūli᷄ŋ ma̍ mīīŋgū a̍ kīlta̍ŋ. Ā bōŋi̍ bo̍ŋi̍ ma̍ dēlī ndu̍yɛ̍ ma̍ wū.

⁴A̍ mɛ̍ɛ̍nda᷄ŋ o̍ sūɛ̍i̍ nīi̍ ni᷄ŋ kpo̍u̍ ma̍ kīālū yāmɛ̍i̍ o̍ nɛ̄i̍ sa̍kpōo̍ chōo̍, ma̍ kē ya̍ di̍ nūu̍.

⁵Lɛ̄ŋīi̍ kɛ̍ɛ̍ le̍ nu̍m sōōlūūwo̍ ve̍, ma̍ lō o̍ ko̍ŋ ma̍ pɛ̄ɛ̄sā ndi̍, ndu̍yɛ̍ ma̍ tɛ̄ɛ̄mbūū wānāā dɛ̍nɛ̍ wɔ̍ɔ̍ŋnda̍. A̍ to̍sa̍ fɛ̍ɛ̍ŋ a̍ fɛ̍ɛ̍ŋ wāŋnda̍ yi̍yāŋ ndɛ̍ a̍ nda̍ o̍kɔ̄ɔ̄ le̍.

⁶Ya̍a̍mɔ̍ɔ̍wa̍a̍ nāa̍ ā chūū tɛ̄ɛ̄mbūū, fɛ̍ɛ̍ŋ a̍ fɛ̍ɛ̍ŋ ŋ̄ de᷅l lɛ̍ nda̍ hɔ̄lte̍ŋ te̍. Chi̍e̍e̍ŋ ndāa̍ŋ bɛ̍ndo᷄ŋ a̍ chi̍i̍ mu̍ŋ pēsī pēsī mi̍ ŋ̄ sīmnu᷄ŋ pɔ᷅mnda̍ŋ. Fɛ̍ɛ̍ŋ a̍ fɛ̍ɛ̍ŋ, wānā o̍ wānā yi̍yāŋ ndɛ̍ a̍ mu̍ŋ o̍kɔ̄ɔ̄ le̍.

⁷Kɛ̍ Mɛ̄lɛ̄ka̍ Ya̍a̍wɛ̄ɛ̄, ndu̍ cho̍ māsā bɛ̍ndōo̍ le̍ fɛ̍ɛ̍ŋ a̍ fɛ̍ɛ̍ŋ ni̍. Ō kɛ̄si̍ kpe̍ŋgbe̍i̍ ndɔ̍ lēmāsāa̍ mbo̍ chāl le̍ wāŋnda̍ yāmɛ̍i̍ kīlūllo̍.

⁸Ndu̍yɛ̍ o̍ nɛ̄i̍ sa̍kpōo̍ chōo̍ o̍ ki̍lūl wa᷅ŋnda̍ o̍ chi̍e̍ēŋndo̍ ni᷄ŋ ya᷅mɛ̍i̍ ni̍. O̍ nɛ̄ī tōnya̍a̍ chōo̍ o̍ ki̍lūl lɛ᷅ŋnde̍ yāmɛ̍i̍ ni̍.

⁹Mɛ̄lɛ̄ka̍ Ya̍a̍wɛ̄ɛ̄ ndu̍ ma̍ndā wa̍nāā nda̍ chō nyɛ̄ pālāa̍ tūsīo̍o̍ chōo̍ wa̍ ni̍. Ndu̍ ma̍ndā wa᷅ŋnda̍ te̍le̍ŋnda̍ nyɛ̄ pālāā la̍ŋ ni̍.

¹⁰Mɛ̄lɛ̄ka̍ Ya̍a̍wɛ̄ɛ̄, wānāa̍ si̍nā wa᷅na̍ ŋ̄ chō wo̍ wa̍, tīīnda᷄ŋndo̍ nda̍ dūāū o̍ nūm ni̍ŋ ni̍. Wānā o̍ wāna̍ hi᷅ŋ nāa̍ nūm chu̍a̍ pɛ̍ le̍ mālāa̍, a̍ kɛ̍ɛ̄ ndu̍ le̍.

¹¹Wāŋnda̍ lā sāŋga̍la̍ Mɛ̄lɛ̄ka̍ Ya̍a̍wɛ̄ɛ̄, o̍ cho̍ māsāa̍ Sa̍a̍yɔ̄ŋ chi̍e̍e̍ wo̍. Lā dīmu̍l wa᷅ŋnda̍ o̍ lɛ̄ŋnde̍ ni᷄ŋ a̍ sɔ̄ɔ̍ŋ o̍ to̍sa̍ ki̍nɛ̍i̍ yo̍ŋ o̍kɔ̄ɔ̄.

¹²Wānāa̍ tɛ̍ɛ̍mbūū yo̍o̍mūlā wāŋndā chīe̍e̍ya̍ wa̍, māa̍ Mɛ̄lɛ̄ka̍ ō mīŋgūl nda̍ ni̍. Wānāā nda̍ chō nyɛ̄ pālāa̍ tūsīo̍o̍ chōo̍ wa̍, tē ā cha᷄ŋ nāa̍ ndu̍ chu̍a̍ le̍ mālāa̍ pɛ̍, tūēīyɔ̄ɔ̍ o̍ tu̍ɛ̍ī nda̍ dīōm ni̍.

¹³O̍o̍ Mɛ̄lɛ̄ka̍ Ya̍a̍wɛ̄ɛ̄, tu̍i̍i̍nu̍ŋ ya̍ īnyīɛ̍ɛ̍ fɔ̍! Chɔ̍ sa̍ŋgā ya̍a̍mɔ̍ɔ̍wa̍a̍ nīa̍a̍ ā tūsi̍ ya̍ chōo̍ ki̍nɛ̍i̍ yo̍. O̍o̍ Mɛ̄lɛ̄ka̍ Ya̍a̍wɛ̄ɛ̄, so̍li̍ ya̍ pīɔ̍mndo̍ o̍ bā fɔ̍.

¹⁴Ko̍ŋ to̍sā ni̍ mī si̍m o̍ dīōlā sāāsāa̍ Chūlu̍sɛ̄lɛ̄m mī sa̍ŋga̍la̍ nu̍m wāŋnda̍ o̍ hɔ̄l lo̍ŋ kpo̍u̍, ndu̍yɛ̍ mī dɔ̍ɔ̍nu᷄ŋ nya̍a̍le̍ le̍ mɛ̄ɛ̍ ŋ̄ chīīndi̍a̍a̍ ya̍ yɛ̍.

¹⁵Wāŋnda̍ o̍ lɛ̄ŋnde̍ ni᷄ŋ so̍o̍ŋnda̍ nda̍ tūu̍ wāŋnda̍ le̍ mā dēli̍ lēni᷄ŋ nda̍ŋ, nda̍ pi̍la̍ ā dēli̍ lēni᷄ŋ. Yāŋɔ̄ɔ̄lā nda̍ ye᷄ŋ wāŋnda̍ la̍ŋ, nda̍ pi̍la̍ hāu̍ o̍ la̍ŋ.

¹⁶Mɛ̍lɛ̄ka̍ Ya̍a̍wɛ̄ɛ̄ o̍ chɔ̍m wāna̍ o̍ cho̍ wo̍, sa̍na̍a̍ a̍ mɛ̄ɛ̍ o̍ ki̍lu̍l wāŋnda̍ yāmɛ̍i̍ o̍ nɛ̄ī tōnya̍a̍ chōo̍ yɛ̍. Wānāā dɛ̍nɛ̍ wɔ̍ɔ̍ŋnda̍, ka̍ālā ndāla̍ŋ lā tōsa̍ ma̍ hāū o̍ yāŋɔ̄ɔ̄lā nda̍ ye᷄ŋ wāŋnda̍ la̍ŋ.

¹⁷Wānāā dɛ̍nɛ̍ wɔ̍ɔ̍ŋnda̍, chi̍e̍e̍ pīɔ̍m nda̍ nɔ̄ le̍ kɔ̄la̍ŋ ni̍. Kāa̍la̍ kɛ̍ɛ̍ Mɛ̄lɛ̄ka̍ la̍ŋ ki̍nɛ̍i̍, nāa̍ nda̍ nɔ̄ le̍ kɔ̄la̍ŋ nda̍, nda̍ cho̍ ka̍ŋ ni̍.

¹⁸Wānāa̍ nɔ̍ nyɛ᷅ o̍ nyɛ̄ o̍ bā le̍ wa̍, Mɛ̄lɛ̄ka̍ pu̍ɛ̍ɛ̍nūŋ a̍ nda̍ o̍kɔ̄ɔ̄ le̍ fɛ̍ɛ̍ŋ a̍ fɛ̍ɛ̍ŋ te̍. Wānāā tāmbɛ̍i̍ya̍ le̍ fɛ̍ɛ̍ŋ a̍ fɛ̍ɛ̍ŋ, tīīnda᷄ŋ nda̍ nɔ̄ o̍ Mɛ̄lɛ̄ka̍ ni᷄ŋ ndo̍ ō te̍mbū le̍.

¹⁹O̍o̍ Mɛ̄lɛ̄ka̍ Ya̍a̍wɛ̄ɛ̄, chɔ̍ŋ fɔ̍! Chɛ᷅l mī wāna̍ chi̍o̍o̍ ō yēm nu̍m te̍. To̍sa̍ mī lɛ̄ŋīī chēle̍ŋnde̍, ī sɔ̄la̍ kɔ̍ɔ̍sɔ̍ɔ̍ nu̍m o̍ hɔ̍l.

²⁰O̍o̍ Mɛ̄lɛ̄ka̍ Ya̍a̍wɛ̄ɛ̄, to̍sa̍ mī sīōōŋīī bɛ̄ndūe̍i̍ ī bīī lɛ̄ŋnde̍ he̍ī. To̍sa̍ mī wāŋnda̍ o̍ lɛ̄ŋnde̍ he̍ī ni᷄ŋ ā si̍na̍ māā wāŋndā chīe̍e̍ya̍ ko̍ni̍ nda̍ chō ni̍.