Read Southern Kisi Sa᷅m 90 Bible Online

Sa᷅m 90 - Southern Kisi bible

Sa᷅m 90

¹[88] O̍o̍ Māsānɔ̄ɔ̍ Mɛ̄lɛ̄ka̍, kāni̍ ma̍si̍ndɛ̄, chɔ̍ŋ bɛ̍ɛ̍ o̍ kāndɔ᷄ŋndo̍, nu᷄m cho̍ nāa̍ nāā cha̍lāa̍ ni̍.

²Lɔ̍ɔ̍pa̍ bɛ̍ɛ̍ ma̍ tōōsīāā lūāŋūŋ bɛ̄ndo᷄ŋ, ɔ̄ɔ̄ ma̍ tōōsīāā chi̍e̍ēŋndo̍, a̍ wa̍ ni᷅ŋ Mɛ̄lɛ̄ka̍, ndu̍yɛ̍ le̍ fɛ̍ɛ̍ŋ a̍ fɛ̍ɛ̍ŋ, Mɛ̄lɛ̄ka̍ ŋ̄ chō ni̍.

³Nu᷄m di̍mūl wa᷅na̍ chi̍o̍o̍ ni̍ le̍ mbō mīīŋgu̍ o̍ pūūlōo̍ ni᷄ŋ nāa̍ o̍ fu̍la̍ wa̍. Mā to̍sa̍ mī wāna̍ chi̍o̍o̍ ō mīīŋgu̍ o̍ pūūlōo̍ ni᷄ŋ.

⁴Nūm a̍ chu̍a̍ māchūāā pāa̍le̍ŋ lē pīlɛ̍ a̍ wɔ̄sīlā wāa̍la̍ŋ māā nyɛ̄ pīlɛ̍. Mɛ̄ɛ̍ pāa̍le̍ŋ lē hīāū nu̍a̍ā lē pīlɛ̍ yɛ̍, le̍nde̍ ŋ̄ chūa̍ wɔ̄sīlā wāa̍la̍ŋ ni̍. Mɛ̄ɛ̍ ha̍vɛ̄i̍la̍ wānā mɛ̍ŋgɛ̄lāa̍ lā kēlēŋā nu̍a̍ā hīōūwɔ̄ɔ̍ īchɔ̄l lɛ̍, le̍nde̍ ŋ̄ chūa̍ wɔ̄sīlā la̍ŋ ni̍.

⁵Mɛ̄ɛ̍ mɛ̄ŋmā hūna᷄ŋ mā kēlēŋā nu̍a̍ā hīōūwɔ̄ɔ̍ a̍ nyɔ̄ɔ̍ yɛ̍, le̍nde̍ ŋ̄ kēlēŋā wa᷅na̍ chi̍o̍o̍ fāŋā o̍ lē pīlɛ̍ ni᷄ŋ ni̍. Na̍a̍ wāŋndā chīe̍e̍ya̍ ŋ̄ chō māchūāā mɛ̄ɛ̍ bīl pūīyāā ō wā nu̍a̍ā īdīi̍ yɛ̍.

⁶Īdīi̍ mbō wa᷄ pūīyo̍ tɛ̍ɛ̍ tɛ̍ɛ̍, kɛ̍ chɔ̍ŋ i̍di̍i̍ mbō kūɛ̄ a̍ pāa̍le̍ŋ dēlɔ̄ɔ̍, ō nyāma̍la̍ bɛ̍ɛ̍ ō vēsa̍.

⁷Ā dɔ̄ɔ̄nu᷄ŋ tu̍mbe̍ a̍ na̍a̍ mā tɛ̍ɛ̍mbu̍u̍ na̍a̍. A̍ tu̍u̍lu̍ kɔ̄l a̍ na̍a̍ mā to̍sa̍ mī sīōōŋīī bɛ̄ndūe̍i̍ ī bīī na̍a̍.

⁸A̍ kɛ̍si̍ŋ yɔ᷅ŋndā nāāla̍ wɔ̍ɔ̍ŋnda̍ŋ nu̍m o̍ hɔ̄l kpe̍nde̍ke̍le̍, le̍ mā wa̍ la̍ŋ chɔ̄ɔ̍. Yɔ̄ŋndā wɔ̄ɔ̍ŋndā na̍a̍ ŋ̄ tōsa̍ bɛ̍ɛ̍ sɔ̍ɔ̍sɔ̍ɔ̍ la̍ŋ, lā chō nu̍m o̍ hɔ̄l kpe̍nde̍ke̍le̍.

⁹Tē ā dɔ̄ɔ̄nu᷄ŋ tu̍mbe̍ a̍ na̍a̍ pɛ̍, pālɛ̍i̍ na̍a̍ ŋ̄ nɔ̄ le̍ chīīyo̍ yōōmū ve̍, ī chu̍ū le̍ mā kēlū ndi̍ lēchōo̍. O̍ chɔ̍chɔ̍ bɛ̍ndū ni᷄ŋ, mī yōōmū nāa̍ kīōlu̍ kpa̍li̍.

¹⁰Wāna̍ chi̍o̍o̍ ō nɔ̄ mbō chīi̍ wɔ̄sīla̍ŋ be̍le̍-ŋɔ̍mmɛ̍ū, ɔ̄ɔ̄ wɔ̄sīla̍ŋ be̍le̍-ŋɔ̍ma̍a̍, tē ō kēndū ŋ̄dīāl pɛ̍. Kɛ̍ wɔ̄sīlā lāŋ bɛ̍ɛ̍ o̍ sāŋgā bɛ̄ndōo̍ ni᷄ŋ, ndu̍yɛ̍ a̍ o̍ kɔ̄l tāmbɛ̍i̍ bɛ̍ndōo̍ ni᷄ŋ o̍ chi̍ī la̍ŋ ni̍. Ndu̍yɛ̍ wɔ̄sīlā lāŋ bɛ̍ɛ̍, kēlēŋāa̍ chūwɔ̄ɔ̍ chɔ̍chɔ̍, mī wāna̍ chi̍o̍o̍ lo̍ lēpīlɛ̍ kpe̍.

¹¹Tē ā dɔ̄ɔ̄nu᷄ŋ tu̍mbe̍ pɛ̍, wānā o̍ wānā cho̍ mbō sīnā mɛ̄ɛ̍ kpɛ̍ tu̍mbe̍ nu̍mndo̍ ō nɔ̄ kpāāyāa̍ yɛ̍ le̍. Mɛ̄ɛ̍ sīōōŋīī bɛ̄ndūe̍i̍ ī nɔ̄ mī ī bīī na̍a̍ a̍ nūm yɛ̍, le̍nde̍ ko̍ni̍ sīōōŋīī bɛ̄ndūe̍i̍ ī nɔ̄ ni̍ mī ī wa̍ na̍a̍ a̍ tu̍mbe̍ nu̍mndo̍.

¹²Pɛ̍ɛ̍ku̍ na̍a̍, mī ŋ̄ sīna̍ pālɛ̍i̍ na̍a̍ nɔ̄ le̍ wāa̍ yōōmū ve̍, ndu̍yɛ̍ mī ŋ̄ sīna̍ mɛ̄ɛ̍ na̍a̍ bīī ndi̍ yɛ̍, ko̍ŋ to̍sa̍ mī ŋ̄ kēndū kɔ̄l.

¹³O̍o̍ Mɛ̄lɛ̄ka̍ Ya̍a̍wɛ̄ɛ̄, vɛ̄ɛ̍nɛ̍ kpɛ̍ tu̍mbe̍ ŋ̄ dɔ̄ɔ̄nu᷄ŋ a̍ na̍a̍ wo̍ ō chō yɛ̄ hīōūwɔ̄ɔ̄ lāchī a̍ vīōūwɔ̄ɔ̍? Tu̍i̍i̍nu̍ŋ na̍a̍ īnyīɛ̍ɛ̍ fɔ̍, bu̍ɛ̍i̍yāā nūmnda̍ na̍a̍ ŋ̄ chō ni̍.

¹⁴Īdīi̍ o̍ īdīi̍, chɔ̍m na̍a̍ kāālā nu᷄m cho̍ le̍ te̍le̍ŋ o̍ te̍le̍ŋ ndo̍, o̍ ko̍ŋ, mī ŋ̄ dɔ̄ɔ̄nu᷄ŋ nya̍a̍le̍, mī ŋ̄ wa̍ a̍ kɔ̄l kɛ̄ndɛ̄, ha̍a̍a̍ a̍ te̍le̍ŋ na̍a̍ ŋ̄ chō yōōmū wo̍.

¹⁵To̍sa̍ mī ŋ̄ sɔ̄la̍ kɔ̄l kɛ̄ndɔ̄ɔ̍, mɛ̄ɛ̍ kpɛ̍ ŋ̄ tūsi̍ na̍a̍ nyɛ̄ pālāa̍ chōo̍ yɛ̍. To̍sa̍ mī ŋ̄ sɔ̄la̍ dɛ̍nɛ̍ kɛ̍ndɔ̄ɔ̍, mɛ̄ɛ̍ kpɛ̍ wɔ̄sīlā nyɛ̄ pālāa̍ ō kēēku̍ na̍a̍ chōo̍ la̍ŋ lā wa̍ yɛ̍.

¹⁶To̍sa̍ vɛ̍lɛ̄ mī na̍a̍ bu̍ɛ̍i̍yāā nūmnda̍ ŋ̄ chē sɔ̄ɔ̍ŋ kɔ̄ndɔ̄fi̍li̍ŋ bɛ̄ndūŋ ŋ̄ tōsā wo̍ŋ, ndu̍yɛ̍ mā to̍sa̍ mī chūāūwāā nāa̍ ā chē nāŋɔ̄ɔ̄ nu᷄m kpāāyā bɛ̍ndōo̍.

¹⁷O̍o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍, yāndi̍i̍ chɔ̍ na̍a̍ nyīnā. Dɔ̍u̍ na̍a̍ sa̍lā o̍ nyɛ̄ o̍ nyɛ̄ ni̍ŋ na̍a̍ ŋ̄ tōsa̍ a̍ bālā nāāla̍ŋ.