Read Southern Kisi Sa᷅m 91 Bible Online

Sa᷅m 91 - Southern Kisi bible

Sa᷅m 91

¹Wāna̍ ti̍i̍nda̍ŋ Mɛ̍lɛ̄ka̍ le̍ mbō mānda̍ ndu̍ wo̍, wāna̍ Mɛ̄lɛ̄ka̍ Kpāāyā Bɛ̍ndōo̍ ō chō māndāa̍ wo̍,

²Wānā wa̍ā le̍nde̍ ndu̍ di̍mu̍l Mɛ̍lɛ̄ka̍ Ya̍a̍wɛ̄ɛ̄ ni̍ āā, “Nu᷄m cho̍ wāna̍ chi̍ɔ̍ū yo̍o̍mū nūu̍, ndu̍yɛ̍ mā ma̍nda̍ ya̍ wo̍ ni̍. Nu᷄m cho̍ Mɛ̄lɛ̄ka̍ nūu̍ ni̍, nūm ya̍ I̍ ti̍i̍nda̍ŋ ni̍.”

³Wānā wa̍ā nu̍a̍ā, māndāa̍ Mɛ̄lɛ̄ka̍ māndā nu̍m ni̍ mā hɛ̍li̍ hɛ̍li̍ŋ yāŋɔ̄ɔ̄lā ya̍a̍mɔ̍ɔ̍wa̍. Ndu̍yɛ̍, mbō tōsa̍ nāāla̍ di̍ū wa᷅ŋnda̍ la̍ŋ, lā nɔ̍lā nu̍m te̍.

⁴Kūmbɔ̄ɔ̍ Mɛ̄lɛ̄ka̍ kūmbū nu̍m o̍ wɔ̄ɔ̄ŋ ndɔ̄ɔ̍ bɛ̄ŋgu̍ ni̍. Mɛ̄lɛ̄ka̍ nɔ̄lā mbō mānda̍ nu̍m, mā wa̍ yɛ̍lɛ̍kɛ̍lɛ̍ɛ̍, nyɛ̄ o̍ nyɛ̄ yɔ̍nūŋ a̍ nūm te̍. Le̍ mɛ̄ɛ̍ Mɛ̄lɛ̄ka̍ chō wānā sa̍kpō yɛ̍, māndāa̍ o̍ ma̍ndā nu̍m ni̍, mbō chīɔ̍u̍ yōōmū nūmndo̍.

⁵Wānā wa̍ā le̍nde̍, sīōōŋīī bi̍ī nu̍m le̍ sɔ̄ɔ̍ŋ ŋ̄sīōōŋ bɛ̄ndu᷄ŋ yɔ̍nūŋ i̍chɔ̍l lo̍ŋ te̍, kɛ̄lɛ̄ŋgāāle̍ mī sīōōŋnde̍ bīī nu̍m le̍ sɔ̄ɔ̍ŋ kpūndɛ̍ŋ yɔ̍nūŋ i̍pa̍la̍ o̍ lēpīlɛ̍ ni᷄ŋ ndo̍ŋ.

⁶Ndu̍yɛ̍ sīōōŋīī bi̍ī nu̍m le̍ nāāla̍ kpu̍wā wa᷅ŋnda̍ īchɔ̄l la̍ŋ te̍, kɛ̄lɛ̄ŋgāāle̍ mī sīōōŋīī wa᷄ nu̍m le̍ kpūndɛ̍la̍ yɔ̍nūŋ i̍pa̍la̍ o̍ lēpīlɛ̍ ni᷄ŋ nda̍ŋ.

⁷Chɔ̍ bɛ̍ɛ̍ mī wānāā vīlɛ̍i̍ya̍ ā wa᷄ nu̍m ā bālāā wāa̍la̍ŋ, mī wāŋnda̍ ā wa᷄ pīɔ̍mnda̍ŋ nu̍m īkɛ̄i̍ wāa̍la̍ŋ o̍ wāa̍la̍ŋ ni᷄ŋ, sīōōŋīī bi̍ī nu̍m te̍, fo̍ndōle̍, nyɛ̄ o̍ nyɛ̄ ō yɔ̍nūŋ nu̍m te̍.

⁸Ā chā ni̍ŋ a̍ hɔ̄ltē nūmnde̍ŋ pɛ̍ɛ̍ŋ, mɛ̄ɛ̍ Mɛ̄lɛ̄ka̍ tūsī ni̍ŋ wa̍nāā dɛ̍nɛ̍ wɔ̍ɔ̍ŋnda̍ nyɛ̄ pālāa̍ chōo̍ yɛ̍.

⁹Le̍ mɛ̄ɛ̍ ŋ̄ tīīnda̍ŋ Mɛ̍lɛ̄ka̍ Ya̍a̍wɛ̄ɛ̄ le̍ mbō mānda̍ nu̍m yɛ̍, le̍ mɛ̄ɛ̍ ŋ̄ dɔ̄ū tīīnda᷄ŋ nu̍mndo̍ o̍ Mɛ̄lɛ̄ka̍ Bɛ̄ndōo̍ Kpo̍u̍ ni̍ŋ le̍ yōōmū nūmndo̍ chīɔ̄ūwo̍ yɛ̍,

¹⁰dɛ̍nɛ̍ pa̍lāā o̍ dɛ̍nɛ̍ pa̍lāā ō ko̍māl nu̍m te̍, kpūndɛ̍ o̍ kpūndɛ̍ o̍ sɔ̍ɔ̍ŋgūū bɛ̍ɛ̍ o̍ chīɛ̄ī nūmndo̍ īkɛ̄i̍ le̍.

¹¹Mɛ̄lɛ̄ka̍ chō ki̍i̍la̍a̍ ndūa̍a̍ dīmūl le̍ mā mānda̍ nu̍m, ō chō nu̍m māndā bā o̍ bā ŋ̄ kɔ᷄.

¹²Ā chō bāla̍ŋ hāū mā sāāla̍ nu̍m, ko̍ŋ to̍sā ni̍ pēlēi̍ bɛ̍ɛ̍ a̍ lo̍ō o̍ pōūwo̍ mā yɔ̍ŋu̍lu̍ŋ te̍.

¹³Ā kēēkū ni̍ŋ kpɔ̍kūŋnda̍ tɛ̄ɛ̄ŋ, a̍ kɛ̄ūwa̍, ā yɔ᷅ŋ nu̍m nyɛ̄ o̍ nyɛ̄ le̍. Kpɔ̍kūŋāā īyōlāā bɛ̄ndū bɛ̍ndūa̍a̍, a̍ kɛ̄ūwāā wɔ̄ɔ̍ŋ wɔ̄ɔ̍ŋāā bɛ̄ndūa̍a̍, ā yɔ᷅ŋ nu̍m ni̍ŋ nyɛ᷅ o̍ nyɛ̄ le̍.

¹⁴Mɛ̍lɛ̄ka̍ dīmi̍ āā, “Wānāa̍ ka̍a̍la̍ ya̍ wa̍, chīīndīa̍a̍ ya̍ I̍ chi̍i̍ndīāā nda̍ ni̍, ndu̍yɛ̍ wānāa̍ si̍nā ya̍ māā, ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍ wa̍, mī ma̍nda̍ nda̍.

¹⁵Tē ā nyūna̍ ya̍ dīōm le̍ nda̍ mālāa̍ pɛ̍, I̍ cho̍ nda̍ dīōm mūlī. Tē nyɛ̄ pālāa̍ kōma̍l nda̍ pɛ̍, I̍ sɔ̍ɔ̍ŋgu̍u̍ nda̍ īkɛ̄i̍ I̍ ma̍la̍ nda̍. I̍ cho̍ nda̍ chīīndīāā, ndu̍yɛ̍ mī to̍sa̍ mā sīmnu᷄ŋ wa̍nāā lēbɛ̄ɛ̄.

¹⁶I̍ cho̍ tōsā mā hīni̍ kɔ̄l mɛ̍ɛ̄, ko̍ŋ cho̍ ni̍, tōsāa̍ mā vīōū yōōmū, ndu̍yɛ̍ mī chi̍i̍ndi̍a̍a̍ nda̍.”