Read Southern Kisi Sa᷅m 92 Bible Online

Sa᷅m 92 - Southern Kisi bible

Sa᷅m 92

¹[89] Ō chō bɔ̍ɔ̍ su̍ɛ̍i̍ kɛ̍ndɛ̄ le̍ nu̍m ba̍li̍ka̍a̍ mēllo̍ Mɛ̄lɛ̄ka̍ Ya̍a̍wɛ̄ɛ̍, ndu̍yɛ̍ a̍ le̍ nu̍m sāŋgālāa̍ o̍ chōndo̍ŋ ni᷄ŋ Mɛ̄lɛ̄ka̍ Kpāāyā Bɛ̍ndōo̍.

²Ō chō sūɛ̍i̍ kɛ̍ndɛ̄ le̍ wāŋnda̍ dīmūllo̍ īdīi̍ o̍ īdīi̍ a̍ mɛ̄ɛ̍ ŋ̄ kāāla̍ na̍a̍ le̍ te̍le̍ŋ o̍ te̍le̍ŋ yɛ̍, ndu̍yɛ̍ mī ŋ̄ dīmu̍l wāŋnda̍ īchɔ̄l o̍ īchɔ̄l a̍ mɛ̄ɛ̍ ŋ̄ chō wānā sa̍kpō yɛ̍.

³I̍ cho̍ wā he̍ī tōsāa̍, a̍ nyɛ̄m chāā īyōō wo̍ŋ, ndu̍yɛ̍ a̍ tōwāa̍ lɔ̄ɔ̍.

⁴Kāni̍ fo̍ndōle̍, nyɛ̄ o̍ nyɛ̄ ŋ̄ tōsā Mɛ̄lɛ̄ka̍ Ya̍a̍wɛ̄ɛ̄, kɔ̄llo̍ ya̍ I̍ na᷅ŋ ni̍, ndu̍yɛ̍ mī so̍li̍ chōndu̍ŋ kɔ̄l kɛ̄ndɔ᷄ŋ le̍ nu̍m sāŋgālāa̍.

⁵O̍o̍ Mɛ̄lɛ̄ka̍ Ya̍a̍wɛ̄ɛ̄, wa̍lta̍ ŋ̄ tōsā la̍ŋ lā chō wa̍lta̍ kɔ̄ndɔ̄fi̍li̍ bɛ̄ndū. Yīya᷄ŋnda̍ nu̍mnda̍ŋ lā yīŋgi̍la̍ bɔ̄ɔ̍.

⁶Kɛ̍ wāna̍ nɔ̍ kɔ̍l kālu̍ le̍ wo̍ ndu̍, ō si̍nā he̍ī le̍. Dīɔ̄mndo̍ ndu̍ si̍nā he̍ī pɛ̄ŋgu̍ le̍.

⁷Ō si̍nā nu̍a̍ā māā wānāā dɛ̍nɛ̍ wɔ̍ɔ̍ŋnda̍ ā chō māchūāā mɛ̄ɛ̍ bīllo̍ ō chō nu̍a̍ā, mɛ̄ɛ̍ mɛ̍ɛ̍ o̍ wa̍ pu̍īyo̍ tɛ̍ɛ̍ tɛ̍ɛ̍ ō nɛ̍ī a̍ ītāmu̍ yɛ̍ le̍ le̍, māā wānāa̍ to̍sā sɔ̍ɔ̍ŋ wɔ̍ɔ̍ŋndo̍ŋ nda̍, mī nyɛ̄ o̍ nyɛ̄ wa᷄ ō kɛ̄ndɛ̄ a̍ nda̍, kɛ̍ mā wa᷄ ā tɛ̄ɛ̄mbāā le̍ fɛ̍ɛ̍ŋ a̍ fɛ̍ɛ̍ŋ te̍.

⁸Kɛ̍ nūm Mɛ̄lɛ̄ka̍ Ya̍a̍wɛ̄ɛ̄, le̍ fɛ̍ɛ̍ŋ a̍ fɛ̍ɛ̍ŋ nu᷄m cho̍ māsāa̍ kpo̍u̍ ni̍.

⁹Ŋ̄ sīnā māā ya̍a̍mɔ̍ɔ̍wa̍a̍ nu̍mnda̍, nda̍ nda̍ ā nɔ̄ le̍ pīɔ̍mndo̍ sɔ̄lāa̍, ndu̍yɛ̍ māā wānāā dɛ̍nɛ̍ wɔ̍ɔ̍ŋnda̍ ki̍nɛ̍i̍ ā chō nda̍ yōmɔ̄ɔ̄ mā sɛ̄ŋi̍ŋ.

¹⁰A̍ to̍sa̍ mi̍ sɔ̍lā dīāllūŋ kāla᷄ŋ, mi̍ yɔ̄nu᷄ŋ mɛ̄ɛ̍ chīi̍yo̍ ō wā nu̍a̍ā yɛ̍. Kpāāya̍ ŋ̄ lūe̍i̍ ya̍ wo̍ ō tōsa̍ mi̍ sɔ̍lā yōōmūmā sɛ̄nɛ̄īya̍ŋ.

¹¹I̍ che᷅ a̍ hɔ̄ltē nīle̍ŋ pɛ̍ɛ̍ŋ, mɛ̄ɛ̍ ya̍a̍mɔ̍ɔ̍wa̍a̍ nīa̍a̍ ā sɔ̄la̍ yōmɔ̄ɔ̍ yɛ̍, ndu̍yɛ̍ mi̍ tu̍ɛ̍ī a̍ nīlē nīle̍ŋ, mɛ̄ɛ̍ wānāā dɛ̍nɛ̍ wɔ̍ɔ̍ŋāā bɛ̄ndūa̍a̍ ā wa᷄ cha᷄ŋnda̍ŋ yɛ̍.

¹²Wānāa̍ cho̍ Mɛ̍lɛ̄ka̍ o̍ hɔ̄l sa̍kpō wa̍, ā wā ni̍ŋ ma̍wa̍ā mɛ̄ɛ̍ wāūwo̍ ō chō nu̍a̍ā nyɛ̄ tɔ̄nɔ̄ yɛ̍. Ā sɔ̄lā ni̍ŋ kpa̍a̍yāa̍ mā wa̍ mɛ̄ɛ̍ yɔ̄mīī si̍dāāve̍ Le̍ba̍nɔ̄ŋ i̍ cho̍ nu̍a̍ā yɛ̍.

¹³Wāŋnda̍ ha̍ā ā chō māchūāā māā yɔ̄mīī tūālāā o̍ chīɛ̍i̍ Mɛ̍lɛ̄ka̍ Ya̍a̍wɛ̄ɛ̄ wo̍, le̍ te̍le̍ŋ o̍ te̍le̍ŋ ā wā ni̍ŋ pu̍īyo̍ tɛ̍ɛ̍ tɛ̍ɛ̍ o̍ la̍ū chīɛ̍i̍ Mɛ̍lɛ̄ka̍ nāa̍.

¹⁴Ā chō māchūāā mɛ̄ɛ̍ yɔ̄mnde̍ ī wā nu̍a̍ā, ā yɔ᷄ŋ bɛ̍ɛ̍ mī ī wa᷄ ni᷅ŋ ī pāāndū pa̍a̍ndū ī wā wɔ̍ kōmɔ̄ɔ̍ kɛ᷅, ndu̍yɛ̍ mī ī wa᷄ wɔ̄ pūīyo̍ tɛ̍ɛ̍ tɛ̍ɛ̍ yɛ̍.

¹⁵He̍ī chɔ᷅m ni̍ māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ sa̍kpō, māā wāna̍ ma̍ndā ya̍ māā Pōū Kpo̍o̍wa̍ bɛ̍ndū wo̍ ō cho̍ wa᷅na̍ tu̍ndu᷄ŋ o̍ īsɔ̄ɔ̍ ni̍ŋ te̍.