Read Southern Kisi Sa᷅m 94 Bible Online

Sa᷅m 94 - Southern Kisi bible

Sa᷅m 94

¹O̍o̍ Mɛ̄lɛ̄ka̍ Ya̍a̍wɛ̄ɛ̄, nu᷄m cho̍ wāna̍ mi̍ŋgī ma̍a̍ wo̍ ni̍. Nu᷄m cho̍ wānā mi̍ŋgīāā māa̍ ni̍ Mɛ̄lɛ̄ka̍, le̍la̍ŋ chɔ̍m kpa̍a̍yā nu̍mndo̍.

²Nu᷄m cho̍ wāna̍ ki̍a̍lū ya᷅mɛ̍i̍ kpo̍u̍ wo̍ ni̍. Chɔ̍ŋ mā ki̍lu̍l wānāā yōŋgāā bɛ̍ndūa̍a̍ yāmɛ̍i̍, le̍ mā sɔ̄la̍ dɛ̍nɛ̍ pa̍lāā nda̍ nɔ̄ le̍ sɔ̄lāa̍ wo̍.

³O̍o̍ Mɛ̄lɛ̄ka̍ Ya̍a̍wɛ̄ɛ̄, vɛ̄ɛ̍nɛ̍ kpɛ̍ ŋ̄ māl lɛ̍ ni̍ŋ wānāā dɛ̍nɛ̍ wɔ̍ɔ̍ŋnda̍ mā hīōū lāchī a̍ yōŋgāa̍ kīōlɔ̄ɔ̍? Vɛ̄ɛ̍nɛ̍ kpɛ̍ Mɛ̄lɛ̄ka̍?

⁴Wānāā dɛ̍nɛ̍ wɔ̍ɔ̍ŋnda̍ ha̍ā ā chō kēīyo̍ sɔ̄ɔ̍ŋ yōŋga᷄ŋ dīmīo̍o̍, ndu̍yɛ̍ mā kīālū yo̍ŋgāla̍ŋ kpe̍e̍kpe̍i̍.

⁵Mɛ̄lɛ̄ka̍ Ya̍a̍wɛ̄ɛ̄, wāŋnda̍ ha̍ā ā chō wānāā nūmnda̍ nyɛ̄ pālāa̍ tūsīo̍o̍ chōo̍ kpe̍e̍kpe̍i̍. Wānāā ŋ̄ hɛ̄li̍ le̍ wāa̍ wānāā nūmnda̍ wa̍, wāŋnda̍ ha̍ā ā chō nda̍ nyɛ̄ kīndīlāa̍ hāndɔ̄ɔ̍ chōo̍ kpe̍e̍kpe̍i̍.

⁶Ā chō kēīyo̍ wāŋ lāāndūāā vīi̍ya̍a̍ nɔ̍ lɛ̍ ŋ̄pīāāndū le̍ wa̍, a̍ wānāā lēkāa̍wa̍a̍ cho̍ na̍a̍ tɛ̄ɛ̄ŋ nda̍ dīūwo̍ kpe̍e̍kpe̍i̍. Vīi̍ya̍a̍ nɔ̍ le̍ ŋ̄fi̍nyā le̍ wa̍ bɛ̍ɛ̍, ma̍ wā nda̍ dīūwo̍.

⁷Ā chō dīmīo̍o̍ āā, “Mɛ̄lɛ̄ka̍ Ya̍a̍wɛ̄ɛ̄ o̍ cho̍ na̍a̍ chɔ̄ le̍. Mɛ̄lɛ̄ka̍ I̍sɔ̄lūɛ̍i̍ya̍, ō būūla̍ŋ pɛ̍ɛ̍ŋ a̍ nyɛ̄ na̍a̍ ŋ̄ chō tōsāa̍ wo̍ le̍.”

⁸Nya̍ dīɔ̄mnda̍ ha̍ā, lā nɔ̍ si̍nā pɛ̄ŋgo̍o̍. Lɔ̍ɔ̍ kūɛ̍ɛ̍nɛ̍ nya̍ kīāndū yɛ̍ ni̍ŋ kɔ᷅l, nya̍ dīɔ̄mnda̍ ha̍ā?

⁹Mɛ̄lɛ̄ka̍ to̍o̍si̍a̍a̍ nīla̍ŋ ndo̍ bāā ō tu̍i̍ī le̍? Ndu̍ to̍o̍si̍a̍a̍ hɔ̄lta̍ŋ ndo̍, bāā ō nɔ̍lā mbō chē le̍?

¹⁰Ndu̍ tu̍sī lɛ᷅ŋnde̍ nyɛ̄ pālāa̍ chōo̍ ni̍ le̍ ndi̍ sīlāa̍. Lā nɔ̄ o̍ kɔ̄l ō tu̍sī nya̍ nyɛ̄ pālāa̍ chōo̍, le̍ nyɛ̄ nya̍ chō tōsāa̍ wo̍, le̍ nya̍ sīlāa̍ le̍? Ndu̍ cho̍ wāna̍ pɛ̍ɛ̍kū wa᷅ŋnda̍ wo̍, lā nɔ̄ o̍ kɔ̄l māā ō nɔ̍ kɔ᷅l kālu̍ le̍?

¹¹Mɛ̄lɛ̄ka̍ Ya̍a̍wɛ̄ɛ̄ o̍ si̍nā yi̍ya᷄ŋnda̍ wāna̍ chi̍o̍o̍ kpo̍u̍. Ō sīnā māā wāna̍ chi̍o̍o̍ kɔ̄l kālu̍ ndɔ̄ɔ̍ nyɛ̄ fo̍ndō fu̍u̍ o̍ cho̍ ni̍, a̍ ndu̍ Mɛ̍lɛ̄ka̍a̍ ni̍.

¹²Mɛ̄lɛ̄ka̍ Ya̍a̍wɛ̄ɛ̄, wānāā ŋ̄ tūsī ha̍ā nyɛ̄ pālāa̍ chōo̍ le̍ nda̍ sīlāa̍ wa̍, ā pɛ̄l tɔ̄nɔ̄ɔ̍, nda̍ yɔ̍nūŋ ni̍ māā, wānāā ŋ̄ pɛ̄ɛ̄kū ha̍ā sa̍wāla̍ nu̍mnda̍ŋ nda̍.

¹³Wānāā wāā le̍nde̍, mā lo̍ nda̍ pɛ̄ŋgīo̍o̍ kīo̍o̍ a̍ te̍le̍ŋ nyɛ̄ pālāa̍, ha̍a̍a̍, mbō lo̍ o̍ ko̍ŋ mī sɛ̄īla̍ wānāā dɛ̍nɛ̍ wɔ̍ɔ̍ŋnda̍ lā chūū tōūwɔ̄ɔ̄.

¹⁴Mɛ̍lɛ̄ka̍ Ya̍a̍wɛ̄ɛ̄ o̍ kɛ̍ɛ̄ wa̍nāā ndūa̍a̍ le̍, ō me᷅l wa̍nāā ndūa̍a̍ cho̍ le̍ ndu̍ wa̍ le̍.

¹⁵Sa̍kpōyɛ̍i̍ ī chō mīīŋgū o̍ tōŋgōla̍ kɔ̍ɔ̍sɔ̍ la̍ŋ, ni᷄ŋ o̍ nɛ̄ī tōnya̍a̍ chōo̍. Ndu̍yɛ̍ wānāa̍ cho̍ sa̍kpō Mɛ̄lɛ̄ka̍ o̍ hɔ̄l la̍ ki̍nɛ̍i̍, ā tūāl ni̍ŋ sa̍kpōyɛ̍i̍ Mɛ̄lɛ̄kɛ̍i̍ kɔ̄ɔ̄lī.

¹⁶Bōōndi̍i̍ ya̍a̍mɔ̍ɔ̍wa̍ ā chīŋa̍la᷅ŋ ya̍ ve̍, ō nɛ̄ɛ̍nɛ̍ su̍ŋgū yɛ̍ le̍ ya̍ mbo̍ chīɔ̄ū ya̍ nda̍ o̍ bā? Bōōndi̍i̍ wānāā dɛ̍nɛ̍ wɔ̍ɔ̍ŋnda̍ ā chīŋa̍la᷅ŋ ya̍ ve̍, ō nɛ̄ɛ̍nɛ̍ si̍mu̍l lɛ̍ nda̍ le̍ ya̍?

¹⁷Tē Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ ma̍la̍ ya̍ le̍, I̍ wa̍ lākɔ̄ chi̍e̍e̍ pīɔ̍m.

¹⁸Mi̍ ma᷅l yi̍o̍o̍ chōo̍ cho̍o̍ kpe̍le̍ŋ a̍a̍, “I̍ hi᷅ŋ dēlɔ̄ɔ̄ fɔ̍.” O̍ ko̍ŋ, mi̍ nūm Mɛ̄lɛ̄ka̍ Ya̍a̍wɛ̄ɛ̄, chɔ᷅m ya̍ kāālā nu᷄m cho̍ le̍ te̍le̍ŋ o̍ te̍le̍ŋ ndo̍, ma̍ sāā ya̍ bāa̍.

¹⁹Tē būūla᷄ŋ bɛ̍ndōo̍ ō lūɛ̄ī o̍ kɔ̄l nūu̍ ni᷄ŋ pɛ̍, nu᷄m dɛ̍ɛ̍nīāā ya̍ kɔ̄l lo̍ ni᷄ŋ ni̍.

²⁰Māsāa̍ lāka̍fāa̍, ā ye̍ē na̍āŋa᷅ŋndo̍ a̍ nūm te̍, nda̍ yɔ̍nūŋ ni̍ māā, māsāa̍ ki̍lūl ha̍ā wāŋnda̍ yāma̍ŋ a̍ sāwāla̍ ndāla̍ lāka̍fā la̍ŋ nda̍.

²¹Tē ā bīī pɛ̍, ā yīīna᷅ŋ le̍ wānāā tōnya̍a̍ nyɛ̄ pālāa̍ tūsīo̍o̍ chōo̍, wa̍nāa̍ tɛ̍ɛ̍mbūū i̍sɔ̍ɔ̍ o̍ īsɔ̄ɔ̍ le̍ wa̍, mā kīlūl nda̍ yāma̍ŋ le̍ nda̍ dīūwo̍.

²²Kɛ̍ ya̍ ya̍, Mɛ̄lɛ̄ka̍ Ya̍a̍wɛ̄ɛ̍ cho̍ wāna̍ ma̍ndā ya̍ wo̍ ni̍, ndu̍yɛ̍ Mɛ̄lɛ̄ka̍ nūu̍, ndu̍ cho̍ Pōū Kpo̍o̍wa̍ ma̍ndā ya̍ wo̍ ni̍.

²³Ō chō wānāā dɛ̍nɛ̍ wɔ̄ɔ̍ŋnda̍ nyɛ̍ pālāa̍ tūsī chōo̍ le̍ yɔ̄ŋndā ndāla̍ wɔ̍ɔ̍ŋnda̍ŋ, ndu̍yɛ̍ mbō bāsu̍ nda̍ tɛ̍ɛ̍. Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍ ō chō nda̍ tɛ̄ɛ̄mbūū.