Read Southern Kisi Sa᷅m 96 Bible Online

Sa᷅m 96 - Southern Kisi bible

Sa᷅m 96

¹Lā sōli̍ cho̍ndu̍ŋ sɛ̍nɛ̄īyo̍ŋ le̍ Mɛ̄lɛ̄ka̍ Ya̍a̍wɛ̄ɛ̍ sāŋgālāa̍. Nya̍ wāŋnda̍ o̍ chi̍e̍ēŋndo̍ ni᷄ŋ kpo̍u̍, lā sōli̍ cho̍ndo̍ŋ mī lā sāŋgāla̍ Mɛ̄lɛ̄ka̍ Ya̍a̍wɛ̄ɛ̄.

²Lā sōli̍ cho̍ndo̍ŋ le̍ Mɛ̍lɛ̄ka̍ Ya̍a̍wɛ̄ɛ̄, ndu̍yɛ̍ mī lā sāŋga̍la̍ ndu̍. Lēpāa̍ o̍ lēpāa̍ lā chɔ᷄m a̍ mɛ̄ɛ̍ o̍ chi̍i̍ndīāā wa᷅ŋndā chīe̍e̍ya̍ yɛ̍ o̍kɔ̄ɔ̄

³Lā dīmu̍l wa᷅ŋnda̍ o̍ lɛ̄ŋīī chēle̍ŋnde̍ ni᷄ŋ a̍ nāŋɔ̄ɔ̄ ndɔ̄ bɛ̍ndōo̍ o̍kɔ̄ɔ̄. Lā dīmu̍l wa᷅ŋnda̍ a̍ wa̍lta̍ ndɔ̄la̍ kɔ̄ndɔ̄fi̍lta̍ŋ o̍kɔ̄ɔ̄.

⁴Mɛ̄lɛ̄ka̍ Ya̍a̍wɛ̄ɛ̄ o̍ cho̍ ō bɛ̄ndū, ō nɔ̄ mbō sɔ̍la̍ sāŋgālā bɛ̄ndōo̍. Ō nɔ̄ mbō sɔ̄la̍ bɛ̄ɛ̄le̍ŋ mbō hīōū mɛ̄lɛ̄ka̍a̍ kpo̍u̍.

⁵Kāni̍ fo̍ndōle̍, mɛ̄lɛ̄ka̍a̍ wāŋnda̍ o̍ lɛ̄ŋnde̍ ni᷄ŋ a̍ so̍o̍lūū wa̍ ki̍nɛ̍i̍, ā cho̍ mɛ̍lɛ̄ka̍ā kpe̍e̍kpe̍i̍ le̍. Kɛ̍ Mɛ̄lɛ̄ka̍ Ya̍a̍wɛ̄ɛ̄ ndu̍, ndu̍ to̍o̍si̍a̍a̍ chi̍e̍ēŋndo̍ a̍ nyɛ̄ o̍ nyɛ̍ cho̍ lēni᷄ŋ ni̍.

⁶Ō chō wāna̍ lēbɛ̄ɛ̄, ndu̍yɛ̍ mbo̍ wā wāna̍ kpāāyā bɛ̍ndū. Tē wānā lu̍ɛ̍ī dɔ̍ɔ̍ o̍ chīɛ̄ī ndɔ̄ɔ̍ ni᷄ŋ pɛ̍, ā chē kpāāya̍ ndɔ̄ bɛ̍ndōo̍ ā nāŋɔ̄ɔ̄ ndɔ̄ bɛ̍ndōo̍.

⁷Nya̍ wāŋnda̍ kpo̍u̍ o̍ chi̍e̍ēŋndo̍ ni᷄ŋ, lā sāŋga̍la̍ Mɛ̍lɛ̄ka̍ Ya̍a̍wɛ̄ɛ̄, lā sāŋga̍la̍ na̍ŋɔ̄ɔ̄ ndɔ̄ bɛ̍ndōo̍ a̍ kpāāya̍ ndɔ̄ bɛ̍ndōo̍.

⁸Lā ke̍ Mɛ̍lɛ̄ka̍ Ya̍a̍wɛ̄ɛ̍ bɛ̍ɛ̍le̍ o̍ nɔ̍ le̍ sɔ̄lāa̍ le̍ŋ. Lā hu᷄ŋ a̍ kēla̍ŋ nāa̍ ndu̍ chu̍a̍, ndu̍yɛ̍ mī lā kūɛ̄ o̍ chīɛ̄ī ndɔ̄ɔ̍ ni᷄ŋ.

⁹Lā tūndu̍ŋ mī lā sōōlu̍u̍ ndu̍, le̍ bɛ̍ɛ̍le̍ ndɔ̄le̍ bɛ̍ndūle̍ŋ. Nya̍ wāŋnda̍ kpo̍u̍ o̍ chi̍e̍ēŋndo̍ ni᷄ŋ, lā yɔ᷄ŋ si̍o̍ōŋnde̍, mī lā sōōlu̍u̍ ndu̍.

¹⁰Lā dīmu̍l wa᷅ŋnda̍ o̍ lɛ̄ŋnde̍ ni᷄ŋ āā, “Mɛ̄lɛ̄ka̍ Ya̍a̍wɛ̄ɛ̄ cho̍ māsā bɛ̍ndōo̍ ni̍. Ō lo̍ o̍ ko̍ŋ mbo̍ tōōsīāā chi̍e̍ēŋndo̍ kpɛ̍ kpɛ̍ mɛ̄ɛ̍ o̍ nɔ̍ le̍ wāa̍ yɛ̍, ndu̍yɛ̍ wānā o̍ wānā fe̍ŋā ndu̍ o̍ bā kōŋ chōo̍ le̍. O̍ nɛ̄ī tōnya̍a̍ chōo̍ o̍ ki̍lūl lɛ᷅ŋnde̍ yāmɛ̍i̍ ni̍.”

¹¹Nyɛ̄ o̍ nyɛ̍ cho̍ o̍ ha̍la̍a̍ ni᷄ŋ cho̍o̍ cho̍o̍, a̍ o̍ chi̍e̍ēŋndo̍ ni᷄ŋ, lā dɔ̄ɔ̄nu̍ŋ nya̍a̍le̍. Pēe̍ mɛ̄ŋmā īhɛ᷄llo̍, a̍ nyɛ̄ o̍ nyɛ̄ cho̍ lēni᷄ŋ, lā bɔ̄ɔ̄lu̍u̍ bɔ̍ɔ̍lūū kɔ̄l kɛ̄ndɔ̄ɔ̍.

¹²Yōndōla̍ŋ, a̍ nyɛ̄ o̍ nyɛ̍ cho̍ yōndōla̍ŋ ni᷄ŋ, lā dɔ̄ɔ̄nu̍ŋ nya̍a̍le̍. Yɔ̄mnde̍ o̍ būndɛ̍la̍ŋ ni᷄ŋ, lā dēŋi̍ cho̍o̍ cho̍o̍ a̍ nya̍a̍lo̍o̍,

¹³Mɛ̄lɛ̄ka̍ Ya̍a̍wɛ̄ɛ̍ lāchī. Kāni̍ fo̍ndōle̍, Mɛ̄lɛ̄ka̍ Ya̍a̍wɛ̄ɛ̄ o̍ cho̍ hūnɔ̄ɔ̍. Ō chō hūnɔ̄ɔ̍ le̍ mbō kīlu̍l chi̍e̍ēŋndo̍ yāmɛ̍i̍. Ō kīlūl ni̍ŋ chi̍e̍ēŋndo̍ yāmɛ̍i̍ o̍ nɛ̄i̍ sa̍kpō, ndu̍yɛ̍ mbō kīlu̍l wāŋnda̍ o̍ lɛ̄ŋnde̍ ni᷄ŋ ya᷅mɛ̍i̍ o̍ nɛ̄i̍ tōnya̍a̍ chōo̍.