Read Southern Kisi Sa᷅m 98 Bible Online

Sa᷅m 98 - Southern Kisi bible

Sa᷅m 98

¹[90] Lā sōli̍ chōndi̍i̍ sɛ̍nɛ̄īye̍ le̍ Mɛ̄lɛ̄ka̍ Ya̍a̍wɛ̄ɛ̍ sāŋgālāa̍. Kāni̍ fo̍ndōle̍, ō tōsa̍ sɔ̄ɔ̍ŋ kɔ̄ndɔ̄fi̍li̍ŋ bɛ̄ndū. Ō yēm chɔ̄ūwo̍ a̍ kpāāya̍ ndɔ̄ bɛ̍ndōo̍, ndu̍yɛ̍ a̍ dīāllūŋ ndɔ̄ŋ ka̍la᷄ŋ.

²Mɛ̄lɛ̄ka̍ Ya̍a̍wɛ̄ɛ̄ to̍sa̍ mi̍ wānāā ndūa̍a̍ sīnā māā ō yēm ya̍a̍mɔ̍ɔ̍wa̍a̍ ndūa̍a̍. Ō chɔ᷄m wāŋnda̍ o̍ lɛ̄ŋnde̍ ni᷄ŋ kpe̍nde̍ke̍le̍, mɛ̄ɛ̍ o̍ cho̍ wānā sa̍kpō yɛ̍.

³Ō lōōnu̍ŋ bu̍ŋgɛ̄ī o̍ chūe̍l wāŋnda̍ I̍sɔ̄lūɛ̍i̍ le̍ nda̍ kāālā ndɔ̍ cho̍ le̍ te̍le̍ŋ o̍ te̍le̍ŋ ndo̍ chɔ̄mndo̍, ndu̍yɛ̍ mbō wa᷄ sa̍kpō a̍ nda̍ ve̍. Wāŋnda̍ o̍ chi̍e̍ēŋndo̍ ni᷄ŋ kpo̍u̍, ā chē mɛ̄ɛ̍ Mɛ̄lɛ̄ka̍ nāa̍ ō yēm ya̍a̍mɔ̍ɔ̍wa̍a̍ ndūa̍a̍ yɛ̍.

⁴Nya̍ wāŋnda̍ o̍ chi̍e̍ēŋndo̍ ni᷄ŋ kpo̍u̍, lā sōli̍ cho̍ndu̍ŋ kɔ̄l kɛ̄ndɔ᷄ŋ o̍ Mɛ̍lɛ̄ka̍ Ya̍a̍wɛ̄ɛ̄ lo̍. Lā sāŋga̍la̍ ndu̍ o̍ chōndo̍ŋ ni᷄ŋ.

⁵Lā sāŋga̍la̍ Mɛ̍lɛ̄ka̍ Ya̍a̍wɛ̄ɛ̄ o̍ chōndo̍ŋ ni᷄ŋ a̍ tōwāla̍ŋ. Lā sāŋga̍la̍ ndu̍ a̍ tōwa̍la̍ŋ, ndu̍yɛ̍ a̍ nyɛ̄m chāāŋ kɛ̄ndɛ̄ kɛ̍ndɛ̄ŋ chēle̍ŋ.

⁶Lā hɔ᷄ŋ pu᷅tɛ̍nɛ̍i̍la̍ŋ, ndu̍yɛ̍, a̍ la̍ cho̍ lēēlā vīsīla̍ŋ nda̍ŋ, ndu̍yɛ̍ mī lā tōsa̍ bɔ̄ɔ̄lūū kɔ̄l kɛ̄ndɔ̄ɔ̍ Mɛ̄lɛ̄ka̍ Ya̍a̍wɛ̄ɛ̍ lāchī, Māsa̍ nāā Bɛ̍ndōo̍.

⁷Pēe̍ mɛ̄ŋmā īhɛ᷄llo̍, a̍ nyɛ̄ o̍ nyɛ̍ cho̍ lēni᷄ŋ, lā bɔ̄ɔ̄lu̍u̍ bɔ̍ɔ̍lūū kɔ̄l kɛ̄ndɔ̄ɔ̍. Nya̍ wāŋnda̍ o̍ chi̍e̍ēŋndo̍ ni᷄ŋ kpo̍u̍, lā sōli̍ cho̍ndo̍ŋ.

⁸Pēēla̍ŋ lā tīɔ̍ɔ̍m ba᷅la̍ŋ, ndu̍yɛ̍ pēmbo᷄ŋ mī lā sōli̍ chōndu̍ŋ kɔ̄l kɛ̄ndɔ᷄ŋ dīōm pīlɛ̍.

⁹Mɛ̄lɛ̄ka̍ Ya̍a̍wɛ̄ɛ̄ lāchī nya̍ nɔ̍ ni̍ mī lā sōli̍ mu̍ŋ, kāni̍ fo̍ndōle̍, ō chō hūnɔ̄ɔ̍ le̍ mbō hu᷄ŋ mbō kīlu̍l chi̍e̍ēŋndo̍ yāmɛ̍ī. Ō kīlūl ni̍ŋ wa᷅ŋnda̍ o̍ chi̍e̍ēŋndo̍ ni᷄ŋ ya᷅mɛ̍i̍ o̍ nɛ̄i̍ sa̍kpō, ndu̍yɛ̍ mbō kīlu̍l wāŋnda̍ o̍ lɛ̄ŋnde̍ ni᷄ŋ ya᷅mɛ̍i̍ o̍ nɛ̄ī tōnya̍a̍ chōo̍.