Read Southern Kisi Sa᷅m 99 Bible Online

Sa᷅m 99 - Southern Kisi bible

Sa᷅m 99

¹Mɛ̄lɛ̄ka̍ cho̍ Māsā Bɛ̍ndōo̍ ni̍. Wāŋnda̍ o̍ lɛ̄ŋnde̍ ni᷄ŋ, sīōōŋnde̍ nɔ̄ mī ī bīī nya̍ le̍ ndu̍. Ō chō īchāli̍ o̍ kpe̍ŋgbe̍i̍ ndɔ̍ lēmāsāa̍ chōo̍ o̍ nyāā lākūmba᷅ŋnda̍ chōo̍. Ndu̍yɛ̍ lɛ̄ŋnde̍ŋ lē chō nyīīyāa̍ ndu̍ lāchī.

²Mɛ̄lɛ̄ka̍ Ya̍a̍wɛ̄ɛ̄ o̍ cho̍ wānā bɛ̍ndū Sa̍a̍yɔ̄ŋ chi̍e̍e̍. Ndu̍ cho̍ māsāa̍ lɛ̄ŋnde̍ kpo̍u̍ cho̍o̍ ni̍.

³Mɛ̄lɛ̄ka̍, wāŋnda̍ kpo̍u̍ ā chō nu̍m sāŋgālā, kāni̍ fo̍ndōle̍, le̍ mɛ̄ɛ̍ ŋ̄ chō ō bɛ̄ndū, ndu̍yɛ̍ mi̍ dīōlā nūmnda̍ŋ lā wā dīōlā īsīōōŋndā bɛ̄ndū yɛ̍. Ā chō wāna̍ kāsī.

⁴Māsa̍ bɛ̍ndōo̍, ā chō wāna̍ kpāāyā bɛ̍ndū, ndu̍yɛ̍ ma̍ kāālā wāa̍ sa̍kpō. A̍ to̍sa̍ mi̍ sa̍kpōyɛ̍i̍ ī wā wāŋnda̍ tɛ̄ɛ̄ŋ. A̍ to̍sa̍ mi̍ sɔ̄ɔ̍ŋ wā ni᷅ŋ kɔ̄la̍ŋ o̍ nɛ̄ī tōnya̍a̍ chōo̍, ndu̍yɛ̍ a̍ o̍ nɛ̄i̍ sa̍kpōo̍ chōo̍ I̍sɔ̄lūɛ̄ī.

⁵Lā sāŋga̍la̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍. Lā sōōlu̍u̍ ndu̍ o̍ kpe̍ŋgbe̍i̍ ndɔ̍ lēmāsāa̍ lāchī, kāni̍ fo̍ndōle̍, Mɛ̄lɛ̄ka̍ kāsīo̍o̍ o̍ cho̍ ni̍.

⁶Mūu̍sē nda̍ E̍lɔ̄ŋ, nda̍ wa̍ wānāā ndūāā so̍līāā lāsa̍lāa̍ ni̍. Wānāā nda̍ a̍a̍ pi̍ɛ̍ī ndu̍ wa̍, Sa̍a̍mi̍ɛ̍ɛ̄ o̍ wa̍ ō pīlɛ̍. Wāŋnda̍ ha̍ā tē nda̍ a̍a̍ ko̍ŋu̍l Mɛ̄lɛ̄ka̍ Ya̍a̍wɛ̄ɛ̍ lāchī pɛ̍, ō tūēī nda̍ dīōm.

⁷Mi̍ Mɛ̄lɛ̄ka̍ sūāā nāa̍ nda̍ chūā o̍ yu̍mbu̍ yu̍mbu̍ i̍kpu̍ŋgbāa̍ ni᷄ŋ. Mi̍ wāŋnda̍ ha̍ā ā tūsi᷄ŋ o̍ sāwāla̍ o̍ ke̍ nda̍ la̍ŋ bɛ̄ŋgu̍, ndu̍yɛ̍ a̍ pɛ̄ɛ̄kūlā o̍ ke̍ nda̍ la̍ŋ.

⁸O̍o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍, tē wāŋnda̍ ha̍ā nda̍ a̍a̍ nyu̍na̍ nu̍m dīōm le̍ nyɛ̄ o̍ nyɛ̄ pɛ̍, a̍ mu̍li̍ nda̍ dīōm. Mi̍ chē bɛ̍ɛ̍ ma̍ tūsī nda̍ nyɛ̄ pālāa̍ chōo̍ le̍ yɔ̄ŋndā ndāla̍ wɔ̍ɔ̍ŋnda̍ŋ, kɛ̍ ma̍ chɔ̄m nda̍ māā Mɛ̄lɛ̄ka̍ ma᷅l wa᷅ŋnda̍ le̍ yɔ̄ŋndā ndāla̍ wɔ̍ɔ̍ŋnda̍ŋ ndo̍ ŋ̄ chō ni̍.

⁹Lā sāŋga̍la̍ Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍, ndu̍yɛ̍ mī lā sōōlu̍u̍ ndu̍ o̍ pēmbīī ndūɛ̄ī kāsīe̍i̍. Mɛ̍lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nāa̍, Mɛ̄lɛ̄ka̍ kāsīo̍o̍ o̍ cho̍ ni̍.