Read Southern Kisi Pu̍lɔ̍wāā 1 Bible Online

Pu̍lɔ̍wāā 1 - Southern Kisi bible

Pu̍lɔ̍wāā 1

¹Sɔ̍lɔ̍mɔ̄ŋ, po̍ Dēēvi̍o̍o̍, o̍ wa̍ māsā bɛ̍ndōo̍ le̍ I̍sɔ̄lūɛ̄ī yo̍, tāle̍lā o̍ di̍mi̍ la̍ŋ, la̍ŋ la̍ cho̍ la᷅ŋ ni̍.

²Tāle̍la̍ŋ ndāŋ, lā nɔ̄lā mī lā pɛ̄ɛ̄ku̍ wānā mā sɔ̍la̍ kɔ̄l kālo̍o̍, ndu̍yɛ̍ mī lā tōsa̍ mā wa̍ wāna̍ ti̍u̍ kɔ̄l nūmndo̍ bā. Lā nɔ̄lā mī lā māla̍ wānā mā si̍na̍ sɔ̄ɔ̍ŋ kɔ̄l kālo̍ŋ pɛ̄ŋgu̍.

³Lā pɛ̄ɛ̄kū nu̍m mā wa̍ wāna̍ kɔ̄l kɔ̄lu̍ ndu̍yɛ̍, mā wa̍ wāna̍ ti̍u̍ kɔ̄l nūmndo̍ bā. Lā pɛ̄ɛ̄kū nu̍m le̍ sɔ̄ɔ̍ŋ tōnya̍ŋ tōsāa̍, ndu̍yɛ̍ mī lā pɛ̄ɛ̄ku̍ nu̍m mɛ̄ɛ̍ ŋ̄ wā sa̍kpō, ndu̍yɛ̍ mā wa̍ wānā kɛ̍ndɛ̄, o̍ ko̍ŋ kɔ̍ɔ̍lī, mā wa̍ wāna̍ tōnya̍ yɛ̍.

⁴Lā nɔ̄lā mī lā tōsa̍, wānāa̍ si̍nā nyɛ̄ o̍ nyɛ̄ le̍ wa̍ bɛ̍ɛ̍ mā wa̍ wānāā kɔ̄l kālu̍a̍a̍ bɛ̍ndū, o̍ ko̍ŋ kɔ̍ɔ̍lī, mī lā tōsa̍ mī fe̍le̍ŋgu̍a̍a̍ ā sɔ̄la̍ tāāsi̍o̍o̍ ndu̍yɛ̍ a̍ kɔ̄l kālo̍o̍.

⁵Wānāā kɔ̄l kālu̍a̍a̍ bɛ̍ɛ̍, ā yāŋ ni᷅la̍ŋ o̍ tāle̍la̍ŋ nda᷅ŋ mā sɔ̄la̍ pɛ̄ɛ̄kōo̍ lēni᷄ŋ. Wānāā tāāsi̍a̍a̍ bɛ̄ndūa̍a̍ bɛ̍ɛ̍, tāle̍la̍ŋ nda᷅ŋ lā nɔ̄lā mī lā māla̍ nda̍ mā chɔ̄ɔ̄lu̍ tāāsi̍o̍o̍ sɔ̄lā.

⁶Lā mālā wa̍nā mā si̍na̍ tāle̍lā yīŋgi̍lɛ̍i̍la̍ŋ a̍ sɔ̄ɔ̍ŋ yi̍ŋgi̍lɛ̍ɛ̍ŋ wānāā kɔ̄l kālu̍a̍a̍ ā dīmī wo̍ŋ pɛ̄ŋgu̍.

⁷Tē wānā nɔ̍ sīōōŋīi̍ Mɛ̄lɛ̄ka̍ Ya̍a̍wɛ̄ɛ̄ ve̍ pɛ̍, mɛ̄ɛ̍ kɔ̄l kālo̍o̍ kāndɔ᷄ŋ ndɔ̄ɔ̍ cho̍ ko̍ŋ ni̍. Kɛ̍ dīɔ̄mnda̍ nda̍ nda̍, kɔ̄l kālo̍o̍, a̍ pɛ̄ɛ̄kūla̍ŋ, mu̍ŋ nda̍ tu᷄l lēyɛ̄ ni̍.

⁸Po̍ nūu̍, tu̍e̍i̍ fi̍nyā nu̍m a̍ kālā nu̍m dīōm.

⁹Sīlā fi̍nyā nūm a̍ kālā nu̍m ā sīlā nu̍m ndo̍, ō chō māchūāā mɛ̄ɛ̍ wānā la̍nɔ̍ɔ̍ ō tōōsīāā nu̍a̍ā yīīŋnde̍, mbō hɛ̄ɛ̄ndu̍ŋ nyɛ̍lā kɛ̄ndɛ̄ kɛ̍ndɛ̄la̍ŋ o̍ lēbōl māā lāpe̍e̍ŋge̍ le̍ ndu̍ bōlle̍ŋ nɛ̄ŋīo̍o̍ yɛ̍. Ō chō māchūāā mɛ̄ɛ̍ wāŋndo̍ ō wōōnūŋ nu̍a̍ā yɔ̄lɔ̄ŋ kɛ̍ndɛ̄ kɛ̍ndɔ̍ŋ o̍ lābo̍llō yɛ̍.

¹⁰Po̍ nūu̍, tē wānāā yɔ̄ŋ wɔ̄ɔ̍ŋnda̍ ā dɛ̄ɛ̄ni̍a̍a̍ nu̍m pɛ̍ le̍ mā to̍sa̍ yɔ̄ŋ wɔ̄ɔ̍ŋndo̍, chɛ̍la᷅ŋ a̍ nda̍ le̍.

¹¹Ā dīmu̍l nu̍m bɛ̍ɛ̍ āā, “To̍l na̍a̍ kɔ̄ɔ̄lī ŋ̄ kɔ̄ŋnu᷅ŋ, mī ŋ̄ kɔ̍ vi̍o̍ŋnu᷄ŋ i̍nɛ̍, tē ŋ̄ chē wānā o̍ wānā pɛ̍, ā yɔ̍ŋ bɛ̍ɛ̍ āā wāna̍ tɛ̍ɛ̍mbu̍u̍ i̍sɔ̍ɔ̍ le̍ wo̍, ŋ̄ de᷄l ndu̍ chōo̍ ŋ̄ dīī ndu̍. Ŋ̄ kɔ̄ŋnu᷅ŋ mī ŋ̄ tōsa᷅ŋ nu̍a̍ā ŋ̄ chāā pīsu̍lta̍ŋ na̍a̍ ŋ̄ chō ni̍, mī kɔ̍ de̍lnūŋ nda̍ chōo̍.

¹²Mi̍ chē bɛ̍ɛ̍ ma̍ wā yōōmū ndu̍yɛ̍ ma̍ wānu᷄ŋ kɛ̍ndi̍a̍a̍ che̍che̍ŋ, kɛ̍ tē ŋ̄ chīi̍ a̍ nda̍ pɛ̍ kpo̍u̍, ā vīlɛ̍i̍ya̍ nda̍ wā ni̍.

¹³Ŋ̄ kɔ̍ de̍lnūŋ nda̍ chōo̍ mī ŋ̄ pūŋga̍ nyɛ̄m ndāŋ su̍la᷄ŋ mī ŋ̄ kɔ̍ pe̍ī mu̍ŋ chīɛ̄īlā nāāla̍ŋ ni᷄ŋ.

¹⁴Le̍la̍ŋ to̍l na̍a̍ kɔ̄ɔ̄lī ŋ̄ kɔ̄ŋnu᷅ŋ. Tē ŋ̄ kɔ̍ pu̍ŋgā nyɔ̄ɔ̍ŋ pɛ̍, ŋ̄ pīɔ̄vi̍āŋ na̍a̍ nya̍ā.”

¹⁵Ā dīmu̍l nu̍m bɛ̍ɛ̍ le̍nde̍ po̍ nūu̍ tu̍āl nda̍ kɔ̄ɔ̄lī le̍. Chu̍ā ka̍ā ndāa̍ le̍.

¹⁶Wāŋnda̍ ha̍ā le̍ yɔ̄ŋ wɔ̄ɔ̍ŋndo̍ tōsāa̍ kɔ̄la̍ŋ a̍ kīlta̍ŋ. Le̍ te̍le̍ŋ o̍ te̍le̍ŋ ā chō ā bɛ̄ɛ̄ndīa̍ŋ le̍ yōōmūlā wāŋndā chīe̍e̍ya̍ tɛ̄ɛ̄mbūūwo̍.

¹⁷Tē a̍ wa̍ yōūwa̍ yālāa̍ tōndūllo̍ pɛ̍ le̍ mā hāu̍, mī yōūwāā kāŋ ā wa̍ nu̍m chɔ̄ɔ̍ o̍ yālāā ko̍ŋ tōndɔ̄ɔ̍, yōūwāā kāŋ ā he̍ū le̍.

¹⁸Kɛ̍ wānāā yɔ̄ŋ wɔ̄ɔ̍ŋnda̍ ha̍ā nda̍, nda̍ pi̍la̍ cho̍ yāŋɔ̄ɔ̄le̍ŋ yēŋnɔ᷄ŋndo̍ le̍ mā hāu̍ ni̍. Ā chō hāū o̍ yāŋɔ̄ɔ̄lē nda̍ pi̍la̍ ā ya᷄ŋ nde̍ŋ mā vī.

¹⁹Wānāā lēhɔ̄l la̍ nda̍, le̍ te̍le̍ŋ o̍ te̍le̍ŋ nu̍a̍ā mɛ̄ɛ̄lu̍la̍ ndāla̍ŋ lā chō ni̍. Hɔ̄lte̍ŋ le̍ŋ le̍ di̍ī nda̍ ni̍.

²⁰Kɔ̄l kālo̍o̍ chō vēēlōo̍ chōo̍ kpe̍le̍ŋ o̍ lu᷅ŋ, le̍ wāna̍ ku̍ā mā sɔ̍la̍ ndu̍ wo̍. Ō chō vēēlōo̍ chōo̍ cho̍o̍ kpe̍le̍ŋ o̍ fo̍ndāŋ ndā lālɔ̍ɔ̍la̍ŋ ni᷄ŋ.

²¹Ō chō vēēlōo̍ o̍ dīōlā sāāsāla̍ŋ sōndōla̍ŋ, ndu̍yɛ̍ mbo̍ wā sūɛ̍i̍ o̍ fo̍ndāŋndā wāŋnda̍ ā bɔ̄ɔ̄ŋi̍āŋ nda̍ŋ.

²²Nya̍ dīɔ̄mnda̍ ha̍ā, vɛ̄ɛ̍nɛ̍ kpɛ̍ nya̍ chō yɛ̄ hīōūwɔ̄ɔ̄ lāchī a̍ wāa̍ lādīɔ̄m? Vɛ̄ɛ̍nɛ̍ kpɛ̍ nya̍ chō yɛ̄ hīōūwɔ̄ɔ̄ lāchī a̍ kɔ̄l kālo̍o̍ māmɔ̄ɔ̍ ndu̍yɛ̍ mī lā tūl si̍nā pɛ̄ŋgo̍o̍ lēyɛ̄?

²³Tē lā tɛ̄ɛ̄mbu̍u̍ sūɛ̍i̍ pɛ̍, mī wa̍ nya̍ sīlāa̍ le̍ nya̍ mīŋgīo̍o̍ o̍ nɛ̄ī, lā ya᷄ŋ ya̍ nīla̍ŋ. Tē lā ya᷄ŋ ya̍ nīla̍ŋ pɛ̍, I̍ nɔ̍lā mī chɔ̍m nya̍ sɔ̄ɔ̍ŋ kɛ̍ndɛ̄ŋ cho̍ ya̍ o̍ kɔ̄l lo̍ŋ, ndu̍yɛ̍ mī chɔ̍m nya̍ yīya᷄ŋ nūu̍.

²⁴I̍ lo̍ o̍ ko̍ŋ mi̍ ve̍e̍lū nya̍, kɛ̍ lā ye᷄ŋ ya̍ lānī le̍. Mi̍ si̍ɛ̍ndūl nya̍ bāa̍ le̍ mī lā hīŋ, kɛ̍ lā sāāla̍ŋ ya̍ le̍.

²⁵Sīlālā ya̍ I̍ si̍la̍ nya̍ la̍ŋ, mi̍ lā kɛ̄ɛ̄ le̍ la̍ŋ chūa̍a̍, ndu̍yɛ̍ mi̍ kīndī kīndī le̍ mī mi̍ŋgi̍ nya̍ o̍ nɛ̄ī, kɛ̍ lā chɛ᷄l mī mi̍ŋgi̍ nya̍ o̍ nɛ̄ī le̍.

²⁶Le̍ he̍ī, tē dɛ̍nɛ̍ pa̍lāa̍ ō hu᷄ŋ to᷅l nya̍ chōo̍ pɛ̍, ya̍ bɛ̍ɛ̍ I̍ cho̍ nya̍ māmɔ̄ɔ̄. Tē sīōōŋīī bɛ̄ndūe̍i̍ ī hu᷄ŋ to᷅l nya̍ chōo̍ pɛ̍, mɛ̄ɛ̍ hūēīyīī tɔ̍ɔ̍mɛ̍i̍ bɛ̄ndūe̍i̍ ī hūŋ nu̍a̍ā yɛ̄ pɛ̍, mī hūēīyīī kpūndɛ̍i̍ bɛ̄ndūe̍i̍ ī kōma̍l nya̍, mī nyɛ̄ nɛ̄īyāa̍ a̍ sāŋgāa̍ ō tōl nya̍ chōo̍ pɛ̍, I̍ cho̍ nya̍ hūnɔ̄ɔ̄ māmɔ̄ɔ̄.

²⁸Lā vēēlū ni̍ŋ ya̍ a̍ te̍le̍ŋ ko̍ŋ, kɛ̍ I̍ mu̍lī ni̍ŋ nya̍ dīōm te̍. Lā nūūwā ni̍ŋ ya̍ a̍ kɔ̄ltā nyāla̍ŋ kpo̍u̍, kɛ̍ lā se̍e̍lūŋ ya̍ ni̍ŋ te̍.

²⁹Kāni̍ fo̍ndōle̍, le̍ mɛ̄ɛ̍ nya̍ tu᷄l sīnā pɛ̄ŋgo̍o̍ lēyɛ̄, ndu̍yɛ̍ mi̍ lā kɛ̄ɛ̄ le̍ sīōōŋīi̍ Mɛ̄lɛ̄ka̍ Ya̍a̍wɛ̄ɛ̄ ve̍ nɔ̄ɔ̍ yɛ̍.

³⁰Mi̍ si̍lā nya̍, kɛ̍ lā chɛ᷄l mī lā chūa̍ sīlā nūu̍ le̍. Mi̍ ki̍ndī le̍ nya̍ mīŋgīo̍o̍ o̍ nɛ̄ī, kɛ̍ lā chɛ᷄l mī mi̍ŋgi̍ nya̍ o̍ nɛ̄ī le̍.

³¹Le̍ he̍ī, nyɛ̄ nya̍ tōsa̍ wo̍, lā chō hūnɔ̄ɔ̄ pāāwā ndɔ̄ɔ̍ chūā. Nyɛ̄ nya̍ tūu̍ le̍ tōsāa̍ a̍ chāāŋnda̍ wo̍, ō chō hūnɔ̄ɔ̄ yɔ̄nɔ᷄ŋ a̍ nya̍.

³²Ō cho̍ fu̍u̍le̍ dīɔ̄mnda̍ ā wū le̍, le̍ mɛ̄ɛ̍ nda̍ māl nɛ̍ī kpe̍e̍kpe̍i̍yo̍ yɛ̍. Le̍ mɛ̄ɛ̍ nda̍ chu̍ē i̍sɔ̍ɔ̍ o̍ īsɔ̄ɔ̍ māā sūɛ̍i̍ kpe̍e̍kpe̍i̍ le̍ yɛ̍, nyɛ̄ kōŋ nda̍ nɔ̄ nda̍ tɛ̄ɛ̄mbūūwo̍ ni̍.

³³Kɛ̍ wānāa̍ tu̍e̍ī ya̍ dīōm nda̍ nda̍, le̍ te̍le̍ŋ o̍ te̍le̍ŋ wānɔ᷄ŋndo̍ nda̍ wānūŋ o̍ bā ndāa̍ chōo̍ yɛ̍lɛ̍kɛ̍lɛ̍ɛ̍ ni̍, nyɛ̄ o̍ nyɛ̄ yɔ̍nūŋ a̍ nda̍ le̍. Le̍ te̍le̍ŋ o̍ te̍le̍ŋ wānɔ᷄ŋndo̍ nda̍ wānūŋ a̍ kɔ̄l nyūlū ni̍, sīōōŋīī ve᷅ nda̍ māā wānā cho̍ nda̍ nyɛ̄ yɔ̄ŋ te̍.