Read Southern Kisi Pu̍lɔ̍wāā 10 Bible Online

Pu̍lɔ̍wāā 10 - Southern Kisi bible

Pu̍lɔ̍wāā 10

¹Tāle̍lā Sɔ̍lɔ̍mɔ̄ŋ o̍ di̍mi̍ la̍ŋ, la̍ŋ la̍ cho̍ lāŋ ni̍. Chūā kɔ̄l kālo̍o̍, le̍ te̍le̍ŋ o̍ te̍le̍ŋ kɔ̄llo̍ fi̍nyā ndɔ̄ na᷅ŋ a̍ ndu̍ ni̍. Kɛ̍ chūā dīɔ̄mndo̍ ndu̍ kɔ̄l tāmbɛ̍i̍yo̍ o̍ chu̍ū ka̍la̍ ndɔ̍ le̍ te̍le̍ŋ o̍ te̍le̍ŋ ni̍.

²Nyɔ̄ɔ̍ŋ nūūwāa̍ o̍ ka̍fāla̍ŋ ni̍ŋ mā su̍l a̍ mu̍ŋ, sūl kōŋ ō nɔ̍ tɔ̍nɔ̄ o̍ tɔ̄nɔ̄ le̍. Kɛ̍ wāa̍ sa̍kpō ō nɔ̄lā mbō chīīndi̍a̍a̍ nu̍m, nāa̍ nūm o̍o̍ sɔ̍lā pi̍ɔ̍m a̍ sɔ̍lā pi̍ɔ̍m te̍.

³Wānā o̍ wāna̍ cho̍ sa̍kpō, Mɛ̄lɛ̄ka̍ Ya̍a̍wɛ̄ɛ̄ to̍fā ndu̍ mbō wa̍ a̍ yīa̍a̍ŋ te̍. Kɛ̍ wānāā dɛ̍nɛ̍ wɔ̍ɔ̍ŋnda̍ nda̍ nda̍, le̍ te̍le̍ŋ o̍ te̍le̍ŋ o̍ bā hāvɛ̍i̍yo̍ ni᷄ŋ nda̍ wā ni̍.

⁴Wāna̍ sīɛ̄lɛ̍i̍yo̍ o̍ tāmbe̍i̍ ni᷄ŋ o̍ mɛ̍ɛ̍lū ni̍. Kɛ̍ wānā o̍ wāna̍ cho̍ wānā to̍sāā nyɔ̄ɔ̍, wānā su̍lāa̍ o̍ mɛ̍ɛ̍lū ni̍.

⁵Wānāā kɔ̄l kālu̍a̍a̍, nda̍ ku̍a̍ū chi̍ɔ̍ɔ̍ŋ nda᷄ŋ a̍ te̍le̍ŋndo̍ ni̍. Kɛ̍ wānāa̍ lo̍lnūŋ ha̍ā hīni̍ŋnda̍ŋ chi̍e̍e̍ mī te̍le̍ŋ chīɔ̄ɔ̄ŋ ku̍a̍u̍wāa̍ ō hīōūnu᷄ŋ nda̍, si̍ɔ̍mbu̍la̍ŋ la̍ wa᷅ le̍ nda̍ ni̍.

⁶Wānāa̍ to̍sā sɔ̍ɔ̍ŋ tōnya̍ŋ nda̍, sa̍lāla̍ŋ Mɛ̄lɛ̄ka̍ ō dūāū nda̍ ni̍. Kɛ̍ wānāā dɛ̍nɛ̍ wɔ̍ɔ̍ŋnda̍ nda̍, kāŋgālāa̍ nda̍ tōsāl wa᷅ŋnda̍ a̍ lāsōndō le̍ wāŋnda̍ nyɛ̄ pālāa̍ tūsīo̍o̍ cho̍o̍ ni̍.

⁷Tē wānā tōnya̍a̍ ō vī pɛ̍, ō wā bɔ̍ɔ̍ su̍ɛ̍i̍ tɔ̄nūɛ̄ī bɛ̄ndū le̍ lōōnɔ᷄ŋndo̍ a̍ ndu̍ o̍kɔ̄ɔ̄. Kɛ̍ wāna̍ dɛ̍nɛ̍ wɔ̍ɔ̍ŋndo̍ ndu̍, tē ō vī dɔ̍ɔ̍ pɛ̍, wāŋnda̍ pūɛ̄ɛ̄nu̍ŋ bɛ̍ɛ̍ a̍ ndu̍ o̍kɔ̄ɔ̄.

⁸Wāna̍ kɔ̄l kālo̍o̍ ndu̍ ya᷅ŋ ni᷅la̍ŋ o̍ nyɛ̄ nda̍ dīmūl ndu̍ wo̍ ni̍, mbō tōsa̍ nyɛ̄ nda̍ dīmūl ndu̍ wo̍. Kɛ̍ wānāa̍ su̍a̍ā ha̍ā sɔ̄ɔ̍ŋ ŋ̄dīɔ̄mndo̍ŋ nda̍, dɛ̍nɛ̍ pa̍lāa̍ ndu̍ ko̍māl nda̍ ni̍.

⁹Wāna̍ cho̍ ho̍ō sa̍kpō o̍ kēlālā ndɔ̄la̍ŋ ni᷄ŋ ndo̍, le̍ te̍le̍ŋ o̍ te̍le̍ŋ, wānɔ᷄ŋndo̍ o̍ wa̍nūŋ o̍ bā ndɔ̄ɔ̍ chōo̍ yɛ̍lɛ̍kɛ̍lɛ̍ɛ̍ ni̍, nyɛ̄ o̍ nyɛ̄ wɔ̄ɔ̍ŋ ko̍māl ndu̍ le̍. Kɛ̍ wāna̍ cho̍ ho̍ō o̍ ka̍fāla̍ŋ ni᷄ŋ ndo̍, fūlāa̍ o̍ fu̍lā kɔ̍lū chōo̍ lɔ̍ɔ̍ lɔ̍ɔ̍ ni̍.

¹⁰Wāna̍ kɛ̍ɛ̄ ho̍ō tōnya̍a̍ dīmīo̍o̍ o̍ sūɛ̍i̍ ni᷄ŋ ndo̍, dɛ̍nɛ̍ pa̍lāa̍ o̍ chu̍ū wāŋnda̍ ni̍. Kɛ̍ wāna̍ si᷅m ho̍ō mbō dīmi̍ tōnya̍a̍ kpe̍nde̍ke̍le̍ wo̍, kɔ̄l nyūlōo̍ o̍ hu᷅ŋ wa᷅ŋnda̍ tɛ̄ɛ̄ŋ ni̍.

¹¹Wāna̍ tōnya̍a̍, dīōmnda̍ fu̍lā ndu̍ o̍ sōndō la̍ŋ, lā chō māchūāā mɛ̄ɛ̍ mɛ̄ŋma̍ yɔ̍ŋgū yo̍o̍mōo̍ wa̍ŋ mā chō yɛ̍. Kɛ̍ wānāā dɛ̍nɛ̍ wɔ̍ɔ̍ŋnda̍ nda̍, kāŋgālāa̍ nda̍ tōsāl wa᷅ŋnda̍ a̍ lāsōndō le̍ wāŋnda̍ nyɛ̄ pālāa̍ tūsīo̍o̍ chōo̍ ni̍.

¹²Yɛ̄lē tūlāāle̍ŋ, sɔ̍ŋgɔ̄ɔ̍ le̍ hu᷅ŋ ni̍. Kɛ̍ kāālāa̍ ndu̍ ndu̍, kūmbɔ̄ɔ̍ o̍ ku̍mbū sɔ̍ɔ̍ŋ wɔ̍ɔ̍ŋ wāŋndo̍ ō tōsāl nu̍m ndo̍ŋ ni̍.

¹³Wāna̍ kɔ̄l kālo̍o̍, sɔ̄ɔ̍ŋ kɔ̄l kālo̍ŋ mu̍ŋ fu̍lā ndu̍ o̍ sōndō ni̍. Kɛ̍ dīɔ̄mndo̍ ndu̍ ndu̍, dɛ̍nɛ̍ pa̍lāa̍ nda̍ tūsī ndu̍ chōo̍ lɔ̍ɔ̍ lɔ̍ɔ̍ ni̍.

¹⁴Wāna̍ kɔ̄l kālo̍o̍, sɔ̄ɔ̍ŋ kɔ̄l kālo̍ŋ o̍ kɛ̍sīŋ o̍ kɔ̄l ni̍. Kɛ̍ dīɔ̄mndo̍ ndu̍ ndu̍ tē ō sōō pɛ̍, kpūndɔ̍ɔ̍ ō ve᷅ le̍vi᷅l o̍ sūɛ̍i̍ ndūɛ̍i̍ ni᷄ŋ te̍.

¹⁵Wānā su̍lāa̍, sūl ndɔ̄ɔ̍ ndu̍ ma̍ndā ndu̍ ni̍. Wānā ta̍mbɛ̍i̍yo̍ yɛ̄, tāmbe̍i̍ ndi̍ tɛ̍ɛ̍mbūū ndu̍ ni̍.

¹⁶Wānāa̍ to̍sā sɔ̍ɔ̍ŋ tōnya̍ŋ nda̍, tɔ̄nɔ̍ nda̍ sɔ̄lā wo̍ ndu̍ cho̍ yōōmōo̍ ni̍. Kɛ̍ wānāā dɛ̍nɛ̍ wɔ̍ɔ̍ŋnda̍ nda̍, tɔ̄nɔ̍ ndāa̍ ndu̍ cho̍ dɛ̍nɛ̍ pa̍lāa̍ ni̍.

¹⁷Wānā o̍ wāna̍ be̍ndu᷄ŋ pɛ̍ mbo̍ chɛ᷄l ma̍ mīŋgi̍ ndu̍ o̍ nɛ̄ī, wānā ko̍ŋ ō hīōū lāchī a̍ wāa̍ yōōmū. Kɛ̍ wānāa̍ chɛ᷅l ha̍ā mā mīŋgi̍ nda̍ o̍ nɛ̄ī le̍ wa̍ nda̍, kpūndɔ̍ɔ̍ wa᷅ le̍ nda̍ ni̍.

¹⁸Wānā o̍ wāna̍ tu̍l wāŋndo̍ lēyɛ̄ pɛ̍, mbo̍ bīī sūɛ̍i̍ wānā ko̍ŋ o̍ kɔ̄l, wāna̍ lāchōōwāa̍ wānā ko̍ŋ ō wā ni̍. Wāna̍ ba̍lū ho̍ō a̍ chāāŋnda̍ o̍ sōndō wo̍, dīɔ̄mndo̍ o̍ cho̍ ni̍.

¹⁹Tē wānā hi̍u̍ sūɛ̍i̍ pɛ̍ te̍i̍, a̍ to̍sa̍ yɔ̄ŋ wɔ̄ɔ̍ŋndo̍ a̍ sōndō. Le̍la̍ŋ tē a̍ wa̍ wāna̍ kɔ̄l kālu̍ pɛ̍, mɛ̄ɛ̍ ma̍nda̍ so̍ndō nūmndo̍.

²⁰Wāna̍ tōnya̍a̍, dīōmndā ndɔ̄la̍ŋ, mɛ̄ɛ̍ ka̍ni̍i̍ hu̍mbūī kɛ̄ndɛ̄ kɛ̍ndɛ̄i̍ ī wā nu̍a̍ā yɛ̍, le̍nde̍ la̍ wa᷅ ni̍. Kɛ̍ wāna̍ dɛ̍nɛ̍ wɔ̍ɔ̍ŋndo̍ ndu̍, yīya᷄ŋnda̍ ndɔ̄la̍ŋ kpo̍u̍, yīya᷄ŋnda̍ nɔ̍ tɔ̍nɔ̄ kpe̍e̍kpe̍i̍ le̍ la̍ŋ la̍ cho̍ ni̍.

²¹Wāna̍ tōnya̍a̍, dīōmndā ndɔ̄la̍ŋ, mī lā māla̍ wānāā bɔ̄ɔ̍ bɔ̍ɔ̍. Kɛ̍ dīōmndo̍ ndu̍ mbō vī le̍ kɔ̄l kālu̍ le̍pɛ᷅ŋndo̍.

²²Tē Mɛ̄lɛ̄ka̍ Ya̍a̍wɛ̄ɛ̄ o̍ dɔ̍ū nu̍m sa̍lā pɛ̍, sūllo̍ ndu̍ wa᷅ mi̍āl nūm ni̍. Ndu̍yɛ̍ sūl nūm ko̍ŋ, ō nɔ᷅ kɔ᷅l tāmbɛ̍i̍ o̍ kɔ̄l tāmbɛ̍i̍ kɔ̍ɔ̍lī le̍.

²³Dīɔ̄mndo̍ ndu̍ tu̍ɛ̍ī yɔ̄ŋ wɔ̄ɔ̍ŋndo̍ tōsāa̍ yēēlā ni̍. Kɛ̍ wāna̍ kɔ̄l kālo̍o̍ ndu̍ ndu̍, sɔ̄ɔ̍ŋ kɔ̄l kālo̍ŋ mu̍ŋ o̍ na᷅ŋ kɔ̍l le̍ tōsāa̍ ni̍.

²⁴Wāna̍ dɛ̍nɛ̍ wɔ̍ɔ̍ŋndo̍, nyɛ̄ o̍ wo̍ wō bɛ̄ndōo̍ māā ō ko̍māl ndu̍ le̍ wo̍, ndu̍ ko̍māl ndu̍ ni̍ŋ ni̍. Kɛ̍ wānā kɛ̍ndɔ̄ɔ̍ ndu̍ ndu̍, nyɛ̄ o̍ ye̍e̍ma̍ yēēmā bɛ̄ndōo̍ wo̍, ndu̍ o̍ sɔ̍lā ni̍ŋ ni̍.

²⁵Tē dɛ̍nɛ̍ pa̍lāa̍ ō tōl pɛ̍ mɛ̄ɛ̍ hūēīyīī bɛ̄ndūe̍i̍ ī hūŋ nu̍a̍ā yɛ̍, wānāā dɛ̍nɛ̍ wɔ̍ɔ̍ŋnda̍ nda̍, hīōūwɔ̄ɔ̍ dɛ̍nɛ̍ pa̍lāā kōŋ ō hīāū a̍ nda̍ ni̍. Kɛ̍ wānāā tōnya̍a̍ nda̍ nda̍, māndāa̍ nda̍ sɔ̄lā le̍ te̍le̍ŋ o̍ te̍le̍ŋ ni̍.

²⁶Wāna̍ sīɛ̄lɛ̍i̍yo̍ tē a̍ chu̍a̍ ndu̍ o̍ wa̍llo̍ ni᷄ŋ pɛ̍, a̍ chu̍a̍ sāŋgāa̍. Mɛ̄ɛ̍ mūɛ̄īmā wāālɛ̍i̍ya̍ŋ mā wā nu̍a̍ā wāŋnda̍ o̍ sōndō yɛ̍, le̍nde̍ o̍ wa᷅ nu̍m o̍ bā ni̍, ɔ̄ɔ̄ mɛ̄ɛ̍ ku᷄mnde̍ ī wā nu̍a̍ā wāŋndo̍ lūɛ̄īyɔ̄ɔ̍ o̍ lāhɔ̄l lɛ̍, le̍nde̍ o̍ wa᷅ nu̍m o̍ bā ni̍.

²⁷Wānā o̍ wāna̍ nɔ̍ sīōōŋīi̍ Mɛ̄lɛ̄ka̍ Ya̍a̍wɛ̄ɛ̄ ve̍ pɛ̍, yōōmū vīlɛ̄īyo̍ ŋ̄ sɔ̄lā ni̍. Kɛ̍ wāna̍ dɛ̍nɛ̍ wɔ̍ɔ̍ŋndo̍ ndu̍, yōōmū ndɔ̄ɔ̍ ō be̍ndū le̍.

²⁸Wānā kɛ̍ndɔ̄ɔ̍ ō nɔ̄lā mbō wa̍ lēhɔ̄l o̍ nɛ̄ī le̍ sūɛ̍i̍ kɔ̄l kɛ̄ndɛ̄i̍. Kɛ̍ wāna̍ dɛ̍nɛ̍ wɔ̍ɔ̍ŋndo̍ ndu̍, nyɛ̄ o̍ nyɛ̄ o̍ wā lēhɔ̄l o̍ nɛ̄ī le̍ ndu̍, ō sɔ̍lā ndu̍ le̍.

²⁹Wānāa̍ cho̍ sa̍kpō wa̍, māndāa̍ Mɛ̄lɛ̄ka̍ Ya̍a̍wɛ̄ɛ̄ o̍ ma̍ndā nda̍ ni̍. Kɛ̍ wānāa̍ dɛ̍nɛ̍ wɔ̍ɔ̍ŋnda̍ nda̍, tɛ̄ɛ̄mbūūwo̍ o̍ tɛ̍ɛ̍mbūū nda̍ ni̍.

³⁰Wānā kɛ̍ndɔ̄ɔ̍, nyɛ̄ o̍ nyɛ̄ nɔ̍lā mbō fāŋa̍ ndu̍ o̍ cha᷄lta̍ ndɔ̄la̍ŋ te̍. Kɛ̍ wānāā dɛ̍nɛ̍ wɔ̍ɔ̍ŋnda̍ nda̍, ā vi̍ū yo̍o̍mū o̍ lɛ̄ŋndē ndāle̍ŋ ni᷄ŋ te̍.

³¹Wānā kɛ̍ndɔ̄ɔ̍, sɔ̄ɔ̍ŋ kɔ̄l kālo̍ŋ mu̍ŋ fu̍lā ndu̍ o̍ sōndō ni̍. Kɛ̍ wānāa̍ so̍līŋ di̍o̍mndā wɔ̄ɔ̍ŋnda̍ŋ o̍ lāsōndō wa̍ nda̍, ā chō hūnɔ̄ɔ̄ chē; a̍ nda̍.

³²Wānā kɛ̍ndɔ̄ɔ̍ ō sīnā nyɛ̄ bɛ̍nda̍ le̍ sūɛ̍i̍ yo̍. Kɛ̍ wānāā dɛ̍nɛ̍ wɔ̍ɔ̍ŋnda̍ nda̍, dīōmndā wɔ̄ɔ̍ŋnda̍ŋ, la̍ŋ ko̍ni̍ la̍ fu̍lā nda̍ o̍ lāsōndō ni̍.