Read Southern Kisi Pu̍lɔ̍wāā 14 Bible Online

Pu̍lɔ̍wāā 14 - Southern Kisi bible

Pu̍lɔ̍wāā 14

¹Wānā la̍nɔ̍ kɔ̄l kālo̍o̍, bɛ̄ɛ̄ndīa̍a̍ o̍ bɛ̍ɛ̍ndīāā chi̍ɛ̍ī ndɔ̄ɔ̍ nyɛ̄ kɛ̄ndɛ̄ kɛ̍ndɛ̄ ni̍. Kɛ̍ wānā la̍nɔ̍ dīɔ̄mndo̍ ndu̍, tɛ̄ɛ̄mbūūwo̍ o̍ tɛ̍ɛ̍mbūū chi̍ɛ̍ī ndɔ̄ɔ̍ ni̍.

²Wāna̍ kēlālā ndɔ̄la̍ŋ lā wā ho̍ō sa̍kpō wo̍, bɛ̄ɛ̄le̍ŋ o̍ nɔ᷅ le̍ Mɛ̄lɛ̄ka̍ Ya̍a̍wɛ̄ɛ̄ ni̍. Kɛ̍ wāna̍ kēlālā ndɔ̄la̍ŋ lā sēndu̍ ho̍ō le̍ wo̍, ō nɔ᷅ le̍bɛ̍ɛ̄ le̍ ndu̍ le̍.

³Dīɔ̄mndo̍ nyɛ̍ fu̍lā ndu̍ o̍ sōndō wo̍, mbō chūu̍ ndu̍ sāŋgāa̍. Kɛ̍ wāna̍ kɔ̄l kālo̍o̍ ndu̍, mī dīōmnda̍ fu̍lā ndu̍ o̍ sōndō la̍ŋ lā mānda̍ ndu̍.

⁴Nāa̍ nāūwāa̍ wa̍ā wa̍ ā ve̍ le̍, nyɛ̄ dīāā lēpɛ̄ŋndo̍ wa᷅ lo̍ŋ ni̍. Kɛ̍ bā o̍ bā nāūwāa̍ dīāllūŋ kālāa̍ wa̍ā wa̍ ā wa̍ pɛ̍, nyɛ̄ dīa̍a̍ wa᷅ lo̍ŋ ta̍u̍ ni̍.

⁵Se̍ī tōnya̍a̍, ndu̍ tɛ̍ndā se̍īlē tōnya̍le̍ŋ ni̍. Kɛ̍ se̍ī lāka̍fāa̍ ndu̍, chōo̍ la̍ŋ o̍ di̍mī ni̍.

⁶Wāna̍ chi᷅ ho̍ō kɔ̄l kālo̍o̍ nyɛ̄ o̍ nyɛ̄ le̍ wo̍, ō nūūwa̍ ndu̍ bɛ̍ɛ̍ ō sɔ̍lā ndu̍ le̍. Kɛ̍ wāna̍ nɔ̍ ho̍ō tāāsi̍o̍o̍ wo̍, ō nɛ̍ī a̍ nyɛ̄ o̍ nyɛ̄ pɛ̄ɛ̄kū le̍.

⁷Ō bɛ̄nda̍ mī wānā ke̍la̍ dīɔ̄mndo̍ kɔ̄ɔ̄lī le̍, kāni̍ fo̍ndōle̍, a̍ sɔ̍lā pɛ̍ɛ̍kū o̍ pɛ̄ɛ̄kū kɔ̄l kālu̍ ndu̍ o̍ bā le̍.

⁸Wāna̍ kɔ̄l kālo̍o̍ kɔ̄l kālu̍ ndɔ̄ɔ̍ ndu̍ chɔ᷅m ndu̍ nɛ̄i̍ o̍ wa᷅ cho̍o̍ wo̍ ni̍. Kɛ̍ dīɔ̄mndo̍ ndu̍, dīɔ̄mīī ndūɛ̍i̍ ndi̍ hu̍ī ndu̍ ni̍.

⁹Dīɔ̄mndo̍ ō tōsa̍ bɛ̍ɛ̍ yɔ̍ŋ wɔ̄ɔ̍ŋndo̍, ō bu̍u̍lāŋ mbō chūa̍ ndi̍ bɛ̍ɛ̍ māā īsɔ̄ɔ̍ le̍. Kɛ̍ wāna̍ nɔ̍ kɔ̄l īwāna̍ Mɛ̄lɛ̄ka̍ya̍a̍ ni᷄ŋ ndo̍ ndu̍, tē ō tōsa̍ yɔ̄ŋ wɔ̄ɔ̍ŋndo̍ pɛ̍, ō yēēmā mbō sɔ̄la̍ mālɔ̄ɔ̍.

¹⁰Tē wānā ta̍mbu̍ kɔ̄l pɛ̍, nūm pi̍la̍ si̍nā kɔ᷅l nūm ta̍mbɛ̍i̍yo̍ ni̍. Ndu̍yɛ̍ tē kɔ̄l nūmndo̍ ō dɔ̄ɔ̄nu̍ŋ vɛ̍lɛ̄ nya̍a̍le̍ pɛ̍, wānā che᷅le̍ŋ nɔ̍lā mbō māla̍ nu̍m nya̍a̍le̍ dɔ̍u̍nɔ᷄ŋ te̍.

¹¹Wāna̍ dɛ̍nɛ̍ wɔ̍ɔ̍ŋndo̍ mī chīɛ̍i̍ ndɔ̄ɔ̍ ō pīɔ̍l. Kɛ̍ wāna̍ tōnya̍a̍ ndu̍ mī chīɛ̄ī ndɔ̄ɔ̍ ō hīōū lāchī a̍ nāŋɔ̄ɔ̍, mɛ̄ɛ̍ bīllo̍ ō pūī nu̍a̍ā tɛ̍ɛ̍ tɛ̍ɛ̍ yɛ̍.

¹²Nɛ̄īyo̍ ō pūm chō mī wāŋndo̍ chu̍a̍ ndu̍ māā nɛ̄ī kɛ̍ndɔ̄ɔ̍ o̍ cho̍ kɔ̄la̍ŋ chōo̍ ni̍, kɛ̍ mɛ̄ɛ̄lu̍la̍ nɛ̄ī ko̍ŋ mī lā wa̍ pīɔ̍mndo̍.

¹³Wāŋndo̍ wā ma̍mɔ̄ɔ̍ mī kɔ̄l ndɔ̄ɔ̍ wa̍ ō tāmbɛ̍i̍. Ndu̍yɛ̍ nya̍a̍lo̍o̍, mbō mɛ̄ɛ̄lu̍ a̍ kɔ̄l tāmbɛ̍i̍yo̍.

¹⁴Wāna̍ dɛ̍nɛ̍ wɔ̍ɔ̍ŋndo̍, dɛ̍nɛ̍ pa̍lāa̍ o̍ sɔ̍lā le̍ dɛ̍nɛ̍ ndɔ̄ wɔ̍ɔ̍ŋndo̍ ni̍. Kɛ̍ wāna̍ tōnya̍a̍ ndu̍, dɛ̍nɛ̍ kɛ̍ndɔ̄ɔ̍ o̍ sɔ̍lā le̍ tōnya̍ ndɔ̄ɔ̍ ni̍.

¹⁵Dīɔ̄mndo̍, nyɛ̄ o̍ nyɛ̄ wānā di̍mu̍l ndu̍, lāāla᷄ŋndo̍ o̍ la̍a̍lāŋ ni̍. Kɛ̍ wāna̍ kɔ̄l kālo̍o̍ ndu̍, lɔ̍ɔ̍ pa̍ mbō tōsa̍ nyɛ̄ o̍ nyɛ̄, mɛ̄ɛ̍ mbō yīya̍ŋ nyɛ̍ kɛ̄ndɛ̍ī.

¹⁶Wāna̍ kɔ̄l kālo̍o̍ mbō chāa̍ hɛ̄lī hɛ̄li᷄ŋndo̍, mbō hɛ̄lu᷄ŋ o̍ kpūndɔ̍ɔ̍ ni᷄ŋ. Kɛ̍ dīɔ̄mndo̍ ndu̍ ndu̍, ō sa̍a̍lāŋ nyɛ̄ o̍ nyɛ̄ le̍, ndu̍yɛ̍ ō cho̍ wa᷅na̍ chu̍m īsɔ̄ɔ̍ le̍, tōsāa̍ sūɛ̍i̍ o̍ lēpīlɛ̍ ni᷄ŋ kpe̍.

¹⁷Tē wāŋndo̍ nɔ̄ kɔ̄l bīŋgīo̍o̍ pɛ̍, ō tōsa̍ sɔ̄ɔ̍ŋ ŋ̄dīɔ̄mndo̍ŋ. Kɛ̍ wāna̍ kɔ̄l kālo̍o̍ ndu̍ ndu̍, bīūwɔ᷄ŋndo̍ o̍ bi̍u̍nūŋ ni̍.

¹⁸Dīɔ̄mndo̍, dīɔ̄mnde̍ su̍u̍nūŋ ndu̍ ni̍. Kɛ̍ wāna̍ kɔ̄l kālo̍o̍ ndu̍, tāāsi̍o̍o̍ o̍ nɔ᷅ ni̍.

¹⁹Wānāā dɛ̍nɛ̍ wɔ̍ɔ̍ŋnda̍, mā tūndu᷄ŋ wa̍nāā tōnya̍a̍ o̍ lābɛ̄ŋgu̍ ni̍ŋ. Wānāā yɔ̄ŋ wɔ̄ɔ̍ŋnda̍, mā kɔ̍ tu̍ndu᷄ŋ wa̍nāā tōnya̍a̍ o̍ dīō.

²⁰Tē wānā ta̍mbu̍ pɛ̍, wānāā nya̍ chīɛ̄ɛ̄li̍āŋ nda̍ bɛ̍ɛ̍, ā ho̍lnūŋ nu̍m te̍. Kɛ̍ wāna̍ di̍ī ho̍ō dɛ̍nɛ̍ mbō su᷄l lo̍, chāānja̍ŋ pīla̍ o̍ nɔ᷅ ni̍.

²¹Wānā o̍ wāna̍ tu̍l wāna̍ nya̍ chīɛ̄ɛ̄li̍āŋndo̍ lēyɛ̄ pɛ̍, mɛ̄ɛ̍ wāna̍ yɔ̄ŋ wɔ̄ɔ̍ŋndo̍ ŋ̄ chō ni̍. Kɛ̍ wāna̍ to̍sāl ho̍ō wānāā tāmbɛ̍i̍ya̍ kɛ̄ndɛ̄i̍ yo̍ ndu̍ ō pɛ̄l tɔ̄nɔ̄ɔ̍.

²²Wānā o̍ wāna̍ tu̍u̍nu̍ŋ su̍ɛ̍i̍ wɔ̍ɔ̍ŋnde̍ o̍ kɔ̄l a̍ chāa̍ŋ ndɔ̄ pɛ̍, wānā ko̍ŋ ō bēndū nɛ̄īyo̍. Kɛ̍ wānā o̍ wāna̍ tu̍u̍nūŋ su̍ɛ̍i̍ kɛ̍ndɛ̄i̍ o̍ kɔ̄l a̍ chāa̍ŋāā ndūa̍a̍ pɛ̍, kāālāa̍ wāŋnda̍ ā kāālā wa̍nā wa̍ā le̍nde̍ ni̍, ndu̍yɛ̍ mā tīīnda̍ŋ ndu̍ o̍ īsɔ̄ɔ̍ o̍ īsɔ̄ɔ̍ ni̍ŋ.

²³Tē wānā to̍sa̍ wa̍llo̍ ō kālā ka̍lā pɛ̍, a̍ sɔ̍la̍ tɔ̄nɔ̄ɔ̍ o̍ wa̍li̍ nu̍mndo̍ ni᷄ŋ. Kɛ̍ wānāa̍ cha̍lnūŋ ha̍ā ā tōsa̍ wa̍li̍ le̍, mɛ̄ɛ̍ sūɛ̍i̍ bɛ̍ndūe̍i̍ ya̍, o̍ tāmbe̍i̍ ni᷄ŋ nda̍ mɛ̄ɛ̄lū ni̍.

²⁴Wāna̍ kɔ̄l kālo̍o̍, tɔ̄nɔ̍ o̍ sɔ̍lā o̍ kɔ̄l kālu̍ ndɔ̄ɔ̍ ni᷄ŋ ndo̍ ndu̍ cho̍ sūllo̍ ni̍. Kɛ̍ dīɔ̄mndo̍ ndu̍, dīɔ̄mnde̍ ko̍ni̍ i̍ su̍u̍nūŋ ndu̍ ni̍.

²⁵Se̍i̍ di̍mī to᷅nya̍a̍ wo̍, yōōmūlā wāŋndā chīe̍e̍ya̍ o̍ chi̍i̍ndīāā ni̍. Kɛ̍ se̍i̍ di̍mī to᷅nya̍ le̍ wo̍ ndu̍, yōōmūla̍ŋ o̍ pi̍sī ni̍.

²⁶Wānā o̍ wāna̍ nɔ̍ sīōōŋīi̍ Mɛ̄lɛ̄ka̍ Ya̍a̍wɛ̄ɛ̄ ve̍ pɛ̍, māndāa̍ Mɛ̄lɛ̄ka̍ ō māndā ndu̍ ni̍, ndu̍yɛ̍ chūāā ndūa̍a̍ bɛ̍ɛ̍ mī Mɛ̄lɛ̄ka̍ mānda̍ nda̍.

²⁷Bɛ̄ɛ̄le̍ŋ nɔ̄ɔ̍ le̍ Mɛ̄lɛ̄ka̍ Ya̍a̍wɛ̄ɛ̄, ō chō māchūāā mɛ̄ɛ̍ pēe̍ mɛ̄ŋmā ndūa̍ŋ mā yɔ̄ŋgū yo̍o̍mōo̍ wo̍ ō chō nu̍a̍ā yɛ̍. Ō nɔ̄lā mbō sōli̍ wānā o̍ yāŋɔ̄ɔ̄lē pīɔ̍mnde̍ŋ ni᷄ŋ.

²⁸Tē māsāa̍ ō nɔ̄ wāŋnda̍ pɛ̍ ta̍u̍ ā o̍ cho̍ māsāa̍ chōo̍ wa̍, māsā ko̍ŋ ō nɔ̄ bɛ̄ɛ̄le̍ŋ. Kɛ̍ tē ō nɔ̍ wa̍nāā bɔ̄ɔ̍, a̍ o̍ wa᷅ ma̍sāa̍ chōo̍ le̍, pīɔ̄llo̍ māsāle̍ ndɔ̄le̍ŋ lē pīɔ̄l ni̍.

²⁹Wāna̍ bi̍u̍nūŋ ho̍ō o̍ sūɛ̍i̍ ni᷄ŋ ndo̍, sīnā pɛ̄ŋgo̍o̍ pīla̍ o̍ sɔ̍lā ni̍. Kɛ̍ wāna̍ kɔ̄l bīŋgīo̍o̍ ndu̍ ndu̍, mbō chɔ᷄m wāŋnda̍ kpe̍nde̍ke̍le̍ māā dīɔ̄mndo̍ o̍ cho̍ ni̍.

³⁰Wānā nɔ̍ kɔ̄l nyūlōo̍ pɛ̍, mɛ̄ɛ̍ ā nɔ̄ kɛ̍ndi̍a̍a̍. Kɛ̍ pāŋālāa̍ ndu̍ ndu̍, nyɛ̍ tɛ̍ɛ̍mbūū wa̍nā wo̍ o̍ cho̍ ni̍. Ō chō māchūāā mɛ̄ɛ̍ nāā mɛ̍lɛ̍ mɛ̍lɔ̍ɔ̍ ō lōōlōō nu̍a̍ā wāŋndo̍ o̍ pāāla̍ŋ ni᷄ŋ mī lā tūmu̍l lɛ̍.

³¹Wānā o̍ wāna̍ to̍sa̍l wānāā tāmbɛ̍i̍ya̍ yɔ̄ŋ wɔ̄ɔ̍ŋndo̍ pɛ̍, mɛ̄ɛ̍ Mɛ̄lɛ̄ka̍, o̍ to̍o̍si̍a̍a̍ nda̍ wo̍ ŋ̄ yēi̍ ni̍. Kɛ̍ wānā o̍ wāna̍ to̍sa̍l wāna̍ bā hāvɛ̍i̍yo̍ kɛ̄ndɛ̄i̍ pɛ̍, mɛ̄ɛ̍ Mɛ̄lɛ̄ka̍ ŋ̄ ke̍ bɛ̄ɛ̄le̍ŋ ni̍.

³²Wāna̍ dɛ̍nɛ̍ wɔ̍ɔ̍ŋndo̍, yɔ̄ŋ ndɔ̄ wɔ̍ɔ̍ŋndo̍ ndu̍ tɛ̄ɛ̄mbūū ndu̍ ni̍. Kɛ̍ wānāa̍ to̍sā sɔ̍ɔ̍ŋ tōnya̍ŋ nda̍ ā yɔ̍ŋ bɛ̍ɛ̍ mā vī, māndāa̍ Mɛ̄lɛ̄ka̍ māndā nda̍ chi̍e̍e̍ pīɔ̍m ni̍.

³³Wāna̍ tāāsi̍o̍o̍, yīya᷄ŋnda̍ ndɔ̄la̍ŋ kpo̍u̍, yīya᷄ŋnda̍ kɔ̄l kālu̍la̍ŋ la̍ wa᷅ ni̍. Kɛ̍ dīɔ̄mnda̍ nda̍, ā si̍nā a̍ kɔ̄l kālo̍o̍ o̍kɔ̄ɔ̄ le̍.

³⁴Sa̍kpōyɛ̍i̍ o̍ lɛ̄ŋnde̍ŋ ni᷄ŋ, mī ī tōsa̍ mī lɛ̄ŋnde̍ŋ lē wa̍ lɛ̄ŋndē kpāāyā. Kɛ̍ yɔ̄ŋ wɔ̄ɔ̍ŋndo̍ ndu̍ mbō tōsa̍ mī lɛ̄ŋnde̍ŋ lē tāmbu̍ lābɛ̄ɛ̄.

³⁵Bu̍ɛ̍ī kɔ̄l kālu̍ wa᷅ ho̍ō māsā bɛ̍ndōo̍ o̍ bā wo̍, hīni̍la̍ŋ māsā bɛ̍ndōo̍ ō hīnī kɔ̍l a̍ ndu̍ ni̍. Kɛ̍ bu̍ɛ̍ī to̍sāl ndu̍ sɔ̄ɔ̍ŋ lāsi̍ɔ̍mbo̍ŋ ndo̍ ndu̍, tu̍mbo̍o̍ o̍ du̍a̍u̍nūŋ a̍ bu̍ɛ̍ī wāā le̍nde̍ ni̍.