Read Southern Kisi Pu̍lɔ̍wāā 15 Bible Online

Pu̍lɔ̍wāā 15 - Southern Kisi bible

Pu̍lɔ̍wāā 15

¹Dīōmndo̍ wāŋndo̍ mūlīo̍o̍ o̍ sōndō ō kɛ̄ndɛ̄, ō nɔ̄lā mbō nyūlu̍l wāŋndo̍ kɔ̄llo̍, ā yɔ᷄ŋ bɛ̍ɛ̍ mbō dɔ̄ɔ̄nu᷄ŋ tu̍mbe̍. Kɛ̍ dīōmndo̍ wāŋndo̍ mūlīo̍o̍ o̍ sōndō ō wɔ̄ɔ̍ŋ, ō nɔ̄lā mbō tōsa̍ mī wāŋndo̍ chɔ̄ɔ̄lu̍ tu̍mbe̍ dɔ̍u̍nɔ᷄ŋ.

²Wāna̍ kɔ̄l kālo̍o̍, sɔ̄ɔ̍ŋ wāŋnda̍ ā sɔ̄lā ta̍āsi̍o̍o̍ lēni᷄ŋ ndo̍ŋ mu̍ŋ o̍ su̍a̍ā ni̍. Kɛ̍ dīɔ̄mndo̍ ndu̍, sɔ̄ɔ̍ŋ ŋ̄dīɔ̄mndo̍ŋ ko̍ni̍ ŋ̍ fu̍lā ndu̍ o̍ sōndō ni̍.

³Hɔ̄lte̍ Mɛ̄lɛ̄ka̍ Ya̍a̍wɛ̄ɛ̄ le̍ŋ lē chā ba᷅ o̍ bā fe̍e̍. Wāna̍ dɛ̍nɛ̍ wɔ̍ɔ̍ŋ ni̍, wānā kɛ̍ndɛ̄ ni̍, kpo̍u̍ ō chō nda̍ mɛ̄ɛ̄nda᷄ŋndo̍ mbō chā.

⁴Dīōmndā kɛ̄ndɛ̄la̍ fu̍lā la᷅ŋ wāŋndo̍ o̍ sōndō la̍ŋ, lā chō māchūāā māā yɔ᷄m yɔ̍ŋgū yo̍o̍mōo̍ wo̍. Kɛ̍ dīōmndā wɔ̄ɔ̍ŋnda̍ŋ nda̍ŋ, nyi̍nā wāna̍ chi̍o̍o̍ la̍ tɛ̍ɛ̍mbūū ni̍.

⁵Wānā o̍ wāna̍ kɛ̍ɛ̍ sīla̍ fi̍nyā ndɔ̄ɔ̍ nīla̍ŋ yāŋɔ̄ɔ̍ pɛ̍, dīɔ̄mndo̍ o̍ cho̍ ni̍. Kɛ̍ wānā o̍ wāna̍ ya̍ŋ sīlāa̍ nīla̍ŋ pɛ̍, mɛ̄ɛ̍ wāna̍ kɔ̄l kālo̍o̍ o̍ cho̍ ni̍.

⁶Wānāā tōnya̍a̍, chīɛ̄īlā ndāla̍ŋ, mī lā wa̍ lā pīāā a̍ nyɛ̄m sūla᷄ŋ cha̍ cha̍. Kɛ̍ wānāā dɛ̍nɛ̍ wɔ̍ɔ̍ŋnda̍ nda̍, nyɛ̄ nda̍ sɔ̄lā o̍ nūūwā ndāa̍ ni᷄ŋ ndo̍, kpūndɔ̍ɔ̍ wa᷅ kɔ̍ɔ̍lī.

⁷Wānāā kɔ̄l kālu̍a̍a̍ nda̍ to̍sā ni̍, mī kɔ̄l kālo̍o̍ ō tīu̍ wāŋnda̍ tɛ̄ɛ̄ŋ. Kɛ̍ dīɔ̄mnda̍ nda̍, ā cho᷄ le̍nde̍ le̍.

⁸Wānāā dɛ̍nɛ̍ wɔ̍ɔ̍ŋnda̍, Mɛ̄lɛ̄ka̍ Ya̍a̍wɛ̄ɛ̄ o̍ ye̍e̍mā bɛ̍ɛ̍ mbō chē sa̍lālā nda̍ sōlī o̍ ndu̍ lo̍ la̍ŋ te̍. Kɛ̍ wānāā sa̍kpūa̍a̍ nda̍ mī Mɛ̄lɛ̄ka̍ Ya̍a̍wɛ̄ɛ̄ o̍ hi̍ni̍ kɔ̄l a̍ pīɛ̄īlē ndāle̍ŋ.

⁹Kēlālā wānāā dɛ̍nɛ̍ wɔ̍ɔ̍ŋnda̍ ā kēlā la̍ŋ, Mɛ̄lɛ̄ka̍ Ya̍a̍wɛ̄ɛ̄ o̍ ye̍e̍mā bɛ̍ɛ̍ mbō chē la̍ŋ te̍. Kɛ̍ wānāa̍ to̍sā sɔ̍ɔ̍ŋ kɛ̍ndɔ᷄ŋ nda̍, kāālāa̍ o̍ ka̍a̍lā nda̍ ni̍.

¹⁰Wānā o̍ wāna̍ ka̍ndu̍ nyɛ̍ bɛ̍nda̍ le̍ tōsāa̍ wo̍ tōsāa̍ pɛ̍, kɛ̍ mbo̍ ma᷄l, wānā ko̍ŋ dɛ̍nɛ̍ pa̍lāā bɛ̄ndōo̍ ndu̍ wā le̍ ndu̍ ni̍. Ndu̍yɛ̍ wānā o̍ wāna̍ nda̍ wa̍ mīŋgīo̍o̍ o̍ nɛ̄ī pɛ̍, mbo̍ kɛ̄ɛ̄ le̍ mā mīŋgi̍ ndu̍ o̍ nɛ̄ī, wānā wa̍ā le̍nde̍ pīɔ̍mndo̍ o̍ sɔ̍lā ni̍.

¹¹Sɔ̄ɔ̍ŋ yɔ̍nūŋ chi̍e̍e̍ pīɔ̍mndo̍ŋ bɛ̍ɛ̍, Mɛ̄lɛ̄ka̍ Ya̍a̍wɛ̄ɛ̄ o̍ si̍nā a̍ mu̍ŋ o̍kɔ̄ɔ̄. Tē ō nɔ̄la̍ pɛ̍ mbō sīna̍ mu̍ŋ, ɔ̍ɔ̄ ni᷅ŋ yīya᷄ŋ wa᷅ wa᷅na̍ chi̍o̍o̍ o̍ kɔ̄llo̍?

¹²Wāna̍ ma᷅m wa᷅ŋnda̍ wo̍, ō chɛ᷅l mā mīŋgi̍ ndu̍ o̍ nɛ̄ī le̍. Ō chɛ᷅l mbō nyūna̍ wāna̍ kɔ̄l kālo̍o̍ le̍ mbō kīndi̍ ndu̍ kɔ̄l o̍ īsɔ̄ɔ̍ o̍ īsɔ̄ɔ̍ ni̍ŋ te̍.

¹³Tē wāŋndo̍ ō dɔ̄ɔ̄nu᷄ŋ nya̍a̍le̍ pɛ̍, o̍ hɔ̄lla̍ wānā cha᷅ kɔ᷅l kɛ̄ndɔ̄ɔ̍ ni̍. Tē wāŋndo̍ tāmbu̍ vɛ̄lɛ̄ kɔ̄l pɛ̍, o̍ hɔ̄lla̍ wānā cha᷅ kɔ᷅l ndɔ̄ ta̍mbɛ̍i̍yo̍ ni̍.

¹⁴Wāna̍ kɔ̄l kālo̍o̍ ndu̍ ye̍e̍mā mbō chɔ̄ɔ̄lu̍ kɔ̄l kālo̍o̍ sɔ̄lā ni̍. Kɛ̍ dīɔ̄mndo̍ ndu̍, sɔ̄ɔ̍ŋ ŋ̄dīɔ̄mndo̍ŋ ko̍ni̍ o̍ ye̍e̍mā ni̍.

¹⁵Wānā ta̍mbɛ̍i̍yo̍, le̍ te̍le̍ŋ o̍ te̍le̍ŋ yōōmū ndɔ̄ɔ̍ chō o̍ sāŋgāa̍ ni᷄ŋ nu̍u̍vīa̍a̍. Kɛ̍ tē wāŋndo̍ wa̍ a̍ kɔ̄l kɛ̄ndɛ̄ pɛ̍, lēpāa̍ o̍ lēpāa̍ ō chā ko̍ bɛ̍ɛ̍ āā du̍nyɛ̍i̍ bɛ̍ndūe̍i̍ to᷅l ni̍.

¹⁶Ō bɛ̄nda̍ mī wānā nɔ̍ o̍ bā ō pɔ̄mbɔ̄, kɛ̍ mā nɔ̄ sīōōŋīi̍ Mɛ̄lɛ̄ka̍ Ya̍a̍wɛ̄ɛ̄ ve̍, mbo̍ hīāū nɔ̄ɔ̍ o̍ bā ta̍u̍ ta̍u̍ kɛ̍ ndu̍yɛ̍, mī dɛ̍nɛ̍ pa̍lāa̍ wa̍ nu̍m chōo̍.

¹⁷Ō bɛ̄nda̍ mī wānā de᷅ lām lāpīo̍o̍ nya̍ wānāa̍ ka̍a̍la̍ nūm nda̍, mbo̍ hīāū nyɛ̄ dīāā ŋ̄vīsī kɛ̄ndɛ̄ kɛ̍ndɔ̄ɔ̍ dīo̍o̍ nya̍ ya̍a̍mɔ̍ɔ̍wa̍a̍ nu̍mnda̍.

¹⁸Kɔ̄l tūū bɛ̄ndōo̍, sɛ̄ɛ̄ŋgi̍āŋnda̍ŋ o̍ hu᷅ŋ ni̍. Kɛ̍ bīūwɔ᷄ŋndo̍ ndu̍, sɛ̄ɛ̄ŋgi̍āŋnda̍ŋ o̍ chi̍ī ni̍.

¹⁹Wāna̍ sīɛ̄lɛ̍i̍yo̍ yōōmū ndɔ̄ɔ̍, ō chō māchūāā mɛ̄ɛ̍ nɛ̄īyo̍ ō wā nu̍a̍ā a̍ yɔ̄ɔ̍ŋ mɔ̍ndɔ̍ mɔ̄ndɔ̄ yɛ̍. Kɛ̍ wāna̍ tōnya̍a̍ ndu̍ yōōmū ndɔ̄ɔ̍, mɛ̄ɛ̍ nɛ̄īyo̍ ō wānūŋ nu̍a̍ā wa̍kpā ō bɛ̄ɛ̄ndīāā nyɛ̄ kɛ̄ndɛ̍ī yɛ̍, le̍nde̍ o̍ wā ni̍.

²⁰Chūā kɔ̄l kālo̍o̍, kɔ̄llo̍ fi̍nyā ndɔ̄ o̍ na᷅ŋ a̍ ndu̍ ni̍. Kɛ̍ chu̍a̍ cho̍ chu̍ā kɔ̄l kālu̍ le̍ wo̍ ndu̍, yɛ̄le̍ŋ o̍ tu᷅l ka̍la̍ ndɔ̍ ni̍.

²¹Dīɔ̄mndo̍, tē ō wa̍ sɔ̄ɔ̍ŋ ŋ̄dīɔ̄mndo̍ŋ tōsāa̍ pɛ̍, kɔ̄llo̍ pīla̍ o̍ na᷅ŋ ni̍. Kɛ̍ wāna̍ kɔ̄l kālo̍o̍ ndu̍, sɔ̄ɔ̍ŋ tōnya̍ŋ mu̍ŋ o̍ to̍sā ni̍.

²²Tūūlā bɔ̄ɔ̍ bɔ̍ɔ̍ mī lā tāmbu̍, le̍ wānā si̍lāā lēpɛ̄ŋndo̍. Kɛ̍ tē wānāā sīlāa̍ ā wa̍ pɛ̍ ta̍u̍, sɔ̄ɔ̍ŋ tu̍u̍nūŋ le̍ tōsa᷄ŋndo̍ wo̍ŋ, ŋ̄ tōsa̍ŋ.

²³Tē wāŋndo̍ dīmi̍ nyɛ̍ nɔ̍ le̍ dīmi᷄ŋndo̍ wo̍ a̍ te̍le̍ŋ kpe̍e̍kpe̍i̍yo̍ pɛ̍, kɔ̄llo̍ pīla̍ o̍ na᷅ŋ ni̍.

²⁴Wāna̍ kɔ̄l kālo̍o̍, nɛ̄i̍ ke᷅ wa̍nā yo̍o̍mōo̍ wo̍, ndu̍ o̍ tu̍āl kɔ̍ɔ̍lī ni̍. Ō tu᷅l nɛ̍i̍ ya̍ā wa̍nā chi̍e̍e̍ pīɔ̍mndo̍ kɔ̄ɔ̄lī le̍.

²⁵Wānāā yōŋgāa̍, mī Mɛ̄lɛ̄ka̍ Ya̍a̍wɛ̄ɛ̄ o̍ tɛ̍ɛ̍mbu̍u̍ chīɛ̄īlā ndāla̍ŋ. Kɛ̍ vīi̍ya̍ nɔ̍ ŋ̍pi̍a̍a̍ndū le̍ wa̍ nda̍ nda̍, mbō mānda̍ nyɛ̄m nda᷄ŋ ŋ̄ki̍ɔ̍ŋ, nyɛ̄ o̍ nyɛ̄ yɔ̍nūŋ a̍ mu̍ŋ te̍.

²⁶Mɛ̄lɛ̄ka̍ Ya̍a̍wɛ̄ɛ̄ o̍ tu̍l tūūlā dɛ̍nɛ̍ wɔ̍ɔ̍ŋnda̍ŋ lēyɛ̄. Kɛ̍ mbo̍ hīnī kɔ̄l a̍ dīōmndā kɛ̄ndɛ̄la̍ fu̍lā wa̍nā o̍ sōndō la̍ŋ.

²⁷Hɔ̄ltē bɛ̄ndūle̍ŋ nɔ̄ɔ̍ mī lē tōsa̍, mā hīŋ a̍ kpūndɔ̍ɔ̍ o̍ yu̍ŋgu̍ nu̍mndo̍ chōo̍. Wānāa̍ tu̍l ha̍ā lūɛ̄īyɔ̄ɔ̄lā ni᷄ŋ nda̍ŋ wāŋnda̍ bīyɔ̄ɔ̍ o̍ lābā lēyɛ̄ wa̍, vīōūwɔ̄ɔ̍ nda̍ vīāū yo̍o̍mū ni̍.

²⁸Wānā kɛ̍ndɔ̄ɔ̍ lɔ̍ɔ̍ lɔ̍ɔ̍, lɔ̍ɔ̍pa̍ mbō mūli̍ nyūnāa̍, ō yīyāŋ fɛ̍lɛ̍ŋ nyɛ᷅ o̍ cho̍ dīmī wo̍. Kɛ̍ wāna̍ dɛ̍nɛ̍ wɔ̍ɔ̍ŋndo̍ ndu̍, mūlīo̍o̍ chɔ̍ chɔ̍, tē ō mūli̍ yɛ̄ le̍nde̍ pɛ̍, ō ma᷄l kpūndɔ̍ɔ̍.

²⁹Wāna̍ dɛ̍nɛ̍ wɔ̍ɔ̍ŋndo̍, wāa̍ Mɛ̄lɛ̄ka̍ Ya̍a̍wɛ̄ɛ̄ o̍ wa᷅ a̍ ndu̍ la̍nda̍ŋ ni̍. Kɛ̍ wāna̍ tōnya̍a̍ ndu̍, tūēīyɔ̄ɔ̍ Mɛ̄lɛ̄ka̍ tūɛ̄ī pi̍ɛ̍i̍lē ndɔ̄le̍ŋ ni̍.

³⁰Wāŋndo̍ māmɔ̄ɔ̄ kɛ̄ndɔ̄ɔ̍ nāa̍ nūm chu̍a̍, mbō tōsa̍ mā na̍ŋ kɔ̄l. Ndu̍yɛ̍ yōōŋgū kɛ̄ndɔ̄ɔ̍ tūēīyɔ̄ɔ̍ mbō tōsa̍ mā sɔ̍la̍ yōōmūa̍ŋ.

³¹Wānā o̍ wāna̍ chɛ̍l sīlā kɛ̄ndɔ̄ɔ̍ pɛ̍, ō nɔ̄lā mbō wa̍ wānāā kɔ̄l kālu̍a̍a̍ tɛ̄ɛ̄ŋ.

³²Wānā o̍ wāna̍ kɛ̍ɛ̍ le̍ sīlāa̍ chūa̍a̍ pɛ̍, ndu̍ pi̍la̍ yɔ̍ŋu̍lu̍ŋ ni̍. Kāni̍ wānā o̍ wāna̍ chu̍a̍ sīlāa̍ pɛ̍, wāna̍ kɔ̄l kālo̍o̍ o̍ wa᷅ ni̍.

³³Sīōōŋnde̍ nɔ̄ɔ̍ le̍ Mɛ̄lɛ̄ka̍ Ya̍a̍wɛ̄ɛ̄, ō nɔ̄lā mbō tōsa̍ mī wānā sɔ̍la̍ kɔ̄l kālo̍o̍. Ndu̍yɛ̍ wānā o̍ wāna̍ ye̍e̍ma̍ pɛ̍ mī wāŋnda̍ ke̍ nu̍m bɛ̄ɛ̄le̍ŋ, mɛ̄ɛ̍ wa̍ wa̍nā tu̍sīa̍ŋ to̍o̍lō