Read Southern Kisi Pu̍lɔ̍wāā 17 Bible Online

Pu̍lɔ̍wāā 17 - Southern Kisi bible

Pu̍lɔ̍wāā 17

¹Ō bɛ̄nda̍ mī wānā de᷅ mālūŋ cha̍ŋ kɛ̍ ndu̍yɛ̍ mā wa̍ a̍ kɔ̄l nyūlū, mbo̍ hīāū nyɛ̄ dīāā bɔ̄ŋa᷅ŋ bɛ̄ndōo̍ dīo̍o̍ o̍ chīɛ̄ī lāsɛ̄ɛ̄ŋgi̍āŋndo̍ ni᷄ŋ.

²Bu̍ɛ̍ī kɔ̄l kālo̍o̍, tē po̍ māsānɔ̍ ndɔ̄ɔ̍ ō bīīnu̍ŋ bi̍lā le̍, bu̍ɛ̍ī kōŋ ndu̍ nɔ᷅ po̍ ko̍ŋ kpāāyāa̍ chōo̍. Nyɛ̄m kɛ̄ŋ māsānɔ̍ ndɔ̄ɔ̍ ō mɛ̄ī yo̍ŋ, ndu̍ bɛ̍ɛ̍ sɔ̄lāa̍ o̍ sɔ̍lā ŋ̍ ndɔ̍ŋ ni̍ māā po̍ vi̍a̍lāā.

³Ko̍o̍līi̍ye̍ a̍ ka̍ni̍i̍ hu̍mbūe̍i̍, a̍ yīŋnde̍ŋ nda̍ tōfā mu̍ŋ ni̍, le̍ sīnāa̍ tē ŋ̄ chō ka̍ni̍ŋ kɛ̍ndɛ̄, ɔ̄ɔ̄ tē ŋ̄ cho̍ ka̍ni̍ŋ kɛ̍ndɛ̄ le̍. Wāna̍ chi̍o̍o̍ yɛ̍, kɔ̄l ndɔ̄ɔ̍, Mɛ̄lɛ̄ka̍ Ya̍a̍wɛ̄ɛ̄ to̍fā ni̍, mbō sīna̍ mɛ̄ɛ̍ o̍ cho̍ yɛ̍.

⁴Wāna̍ dɛ̍nɛ̍ wɔ̍ɔ̍ŋndo̍ ndu̍ ya᷅ŋ sɔ̍ɔ̍ŋ dɛ̍nɛ̍ wɔ̍ɔ̍ŋndo̍ nīla̍ŋ ni̍. Ndu̍yɛ̍ wāna̍ lāchōōwāa̍, ndu̍ ya᷅ŋ cho̍ōla̍ŋ nīla̍ŋ ni̍.

⁵Wānā o̍ wāna̍ ma̍m wānā ta̍mbɛ̍i̍yo̍ pɛ̍, mɛ̄ɛ̍ wāna̍ to̍o̍si̍a̍a̍ ndu̍ wo̍ ŋ̄ pɛ̄ɛ̄sa̍ ni̍. Wānā o̍ wāna̍ dɔ̍u̍nu̍ŋ nya̍a̍le̍ le̍ dɛ̍nɛ̍ pa̍lāā ko̍ma̍l chāa̍ŋ nu᷄m ndo̍ pɛ̍, nūm bɛ̍ɛ̍ dɛ̍nɛ̍ pa̍lāa̍ ŋ̄ sɔ̄lā ni̍.

⁶Bɛ̄ndūa̍a̍, kɔ̄llo̍ pīla̍ nda̍ nāŋ a̍ chūāūwāā ndāā ma̍māa̍ ni̍. Ndu̍yɛ̍ chūāūwa̍ bɛ̍ɛ̍, kɔ̄llo̍ pīla̍ nda̍ nāŋ a̍ wānāa̍ ve̍lū nda̍ wa̍ ni̍.

⁷Wānā o̍ wāna̍ cho̍ wāna̍ lēbɛ̄ɛ̄, ō bɛ̄nda̍ mbō dīmi̍ lāchōō le̍. Dīɔ̄mndo̍ nyɛ̄ o̍ nyɛ̄ kɛ̄ndɛ̄ fu̍lā ndu̍ o̍ sōndō le̍.

⁸Wāŋnda̍ ā pūm ā chu̍a̍ lūɛ̄īyɔ̄ɔ̄ ni᷄ŋndo̍ māā māŋgālāa̍ o̍ cho̍ ni̍. Ā yīya̍ŋ māā lūɛ̄īyɔ̄ɔ̄ ni᷄ŋndo̍ nɔ̄lā mbō tōsa̍ nyɛ̄ o̍ nyɛ̄.

⁹Wānā o̍ wāna̍ ma̍l chāa̍ŋ ndɔ̍ le̍ nyɛ̄ o̍ to̍sa̍l ndu̍ wo̍ pɛ̍, kāālāa̍ hīōū lāchī a̍ nda̍ wāa̍ tɛ̄ɛ̄ŋ nda̍ chāa̍ŋ ndɔ̄ ko̍ŋ. Sūɛ̍i̍ wɔ̍ɔ̍ŋīī wāŋndo̍ tōsāl nu̍mnde̍ kɛ̄si᷄ŋndo̍ o̍ kɔ̄l, tɛ̄ɛ̄mbūūwo̍ i̍ tɛ̍ɛ̍mbūū na̍āŋa᷅ŋndo̍ ni̍.

¹⁰Wāna̍ kɔ̄l kālo̍o̍ sīlāa̍ ndu̍ lēpīlɛ̍ kpe̍, mbō tūēī sīlāa̍ nyɛ̄ kɛ̄ndɛ̄ kɛ̍ndɛ̄. Kɛ̍ dīɔ̄mndo̍ ndu̍, lɔ̍ɔ̍ ndu̍ bɛ̍ɛ̍ kɛ̍mɛ̄, le̍ sīlāa̍ chūa̍a̍ ō chu̍ē le̍.

¹¹Wāna̍ dɛ̍nɛ̍ wɔ̍ɔ̍ŋndo̍ le̍ te̍le̍ŋ o̍ te̍le̍ŋ nɛ̄īla̍ŋ o̍ nūūwā le̍ wāŋnda̍ sīmūllo̍ ni̍. Wānā wa̍ā le̍nde̍, ki̍i̍la̍nɔ̍ kɔ̄l vēsɛ̍i̍yo̍ ndu̍ nda̍ vīm ndu̍ ni̍.

¹²Ō bɛ̄ndā mī wānā ko̍ma̍l su̍lu̍ku̍ nda̍ kūānūŋ a̍ chūālē ndɔ̄le̍ŋ mbō wa̍ a̍ yōlɛ̄ī ke̍ŋ ndo̍, mbo̍ hīāū dīɔ̄mndo̍ kōmāllo̍ sɔ̄ɔ̍ŋ ŋ̄dīɔ̄mndo̍ŋ tōsāa̍.

¹³Wānā o̍ wānā, tē wāŋndo̍ to̍sa̍l nu̍m dɛ̍nɛ̍ kɛ̍ndɔ̄ɔ̍ pɛ̍, mā mīŋgūl wānā ko̍ŋ a̍ īwɔ̄ɔ̍ŋnde̍, fɛ̍ɛ̍ŋ a̍ fɛ̍ɛ̍ŋ nyɛ̄ pālāa̍ ō chu̍ū o̍ nūmndo̍ chi̍ɛ̍ī ni̍ŋ te̍.

¹⁴Sɛ̄ɛ̄ŋgi̍āŋndo̍ kāndɔ̄ɔ̍, ō chō māchūāā mɛ̄ɛ̍ mɛ̄ŋmā kānda̍ŋ mā būlī nu̍a̍ā sɛ̄nɛ̄ī yɛ̍. Ō bɛ̄ndā mī wānā ke̍le̍ŋa̍ ndu̍ kpāā, yɔ̄ŋi̍ o̍ si̍mnu᷄ŋ sɔ̍ŋgɔ̄ bɛ̄ndū.

¹⁵Mɛ̄lɛ̄ka̍ Ya̍a̍wɛ̄ɛ̄ o̍ tu̍l sɔ̄ɔ̍ŋ mūu̍ŋ ndo̍ŋ mu᷅ŋ kpo̍u̍ le̍yɛ̍, mu̍ŋ yɔ̍nūŋ ni̍ māā, wāna̍ to̍sā sūɛ̍i̍ wɔ̍ɔ̍ŋnde̍ wo̍ mālɔ̄ɔ̍ ō sɔ̍lā dɛ̍nɛ̍ pa̍lāā le̍, a̍ wāna̍ tɛ̍ɛ̍mbūū i̍sɔ̍ɔ̍ le̍ wo̍ nyɛ̄ pālāa̍ tūsīo̍o̍ chōo̍.

¹⁶Dīɔ̄mndo̍ yīya̍ŋ māā nyɛ̄ sɔ̄lāa̍ pīsīo̍o̍ le̍ dɛ̍nɛ̍ si̍nāa̍ sɔ̄lāa̍ ō nɔ̍ tɔ̍nɔ̄ o̍ tɔ̄nɔ̄ le̍, kāni̍ fo̍ndōle̍, ō nɔ̍ ye̍e̍mɛ̍i̍ ke̍ŋ le̍ kɔ̄l kālu̍ sɔ̍lā le̍.

¹⁷Chāa̍ŋ nu̍m nya̍ nāāŋa᷅ŋndo̍ ndu̍, kāālāa̍ o̍ ka̍a̍lā nu̍m le̍ te̍le̍ŋ o̍ te̍le̍ŋ ni̍. Kɛ̍ wānā nu̍mndo̍ ndu̍, tē a̍ sɔ̍la̍ dɛ̍nɛ̍ pa̍lāa̍ pɛ̍, dɛ̍nɛ̍ ndɔ̄ pa̍lāa̍ o̍ wā ni̍.

¹⁸Wāŋndo̍ tāānīo̍o̍, mā chu̍a̍ būŋgɛ̄i̍ le̍ kūe̍e̍ o̍ bi̍ī yo̍ pāāwāa̍, sūɛ̍i̍ dīɔ̄mnde̍ i̍ cho̍ ni̍.

¹⁹Wānā o̍ wāna̍ ka̍a̍la̍ sɛ̄ɛ̄ŋgi̍āŋndo̍ pɛ̍, mɛ̄ɛ̍ yɔ̄ŋ wɔ̄ɔ̍ŋndo̍ o̍ ka̍a̍la̍ ni̍. Wānā o̍ wāna̍ hi̍u̍ chɔ̄mnɔ᷄ŋndo̍ pɛ̍, dɛ̍nɛ̍ pa̍lāa̍ o̍ wa᷅ ve̍e̍lɔ᷄ŋndo̍ chōo̍ ni̍.

²⁰Wānā o̍ wāna̍ nɔ̍ kɔ̄l dɛ̍nɛ̍ wɔ̍ɔ̍ŋndo̍ ni᷄ŋ, ō sɔ̍lā dɛ̍nɛ̍ kɛ̍ndɛ̄ o̍ yōōmū ndɔ̄ɔ̍ ni᷅ŋ te̍. Ndu̍yɛ̍ wānāa̍ so̍līŋ di̍ōmndā wɔ̄ɔ̍ŋnda̍ŋ o̍ sōndō wa̍, dɛ̍nɛ̍ pa̍lāa̍ wa᷅ le̍ nda̍ ni̍.

²¹Wānā o̍ wāna̍ ve̍lū dīɔ̄mndo̍ pɛ̍, a̍ sɔ̍la̍ kɔ̄l tāmbɛ̍i̍yo̍ o̍ yōōmū nūmndo̍ ni᷅ŋ. Tē wānā ve̍lū dīɔ̄mndo̍ pɛ̍, a̍ nɔ᷅ kɔ᷅l kɛ̄ndɛ̄ o̍ yōōmū nu̍mndo̍ ni᷅ŋ te̍.

²²Kɔ̄l kɛ̄ndɔ̄ɔ̍, kōo̍ma̍ kɛ̍ndīa̍ŋ pi̍la̍ ma̍ cho̍ le̍ dīāllūŋ wāna̍ chi̍o̍o̍ ni̍. Kɛ̍ kɔ̄l tāmbɛ̍i̍yo̍ ndu̍, sɔ̄ɔ̄sīa̍a̍ o̍ sɔ̍ɔ̍sīāā di̍a̍llūŋ wāna̍ chi̍o̍o̍ ni̍, mbō chīī nu̍m yōōmūa̍ŋ.

²³Wānāā lāka̍fāa̍ nda̍ bi̍ī lu̍ɛ̍i̍yɔ̄ɔ̄lā ni᷄ŋnda̍ŋ o̍ sɔ̍ŋgi̍la̍ŋ ni̍. Tē ā bīī ni᷅ŋ lūɛ̄īyɔ̄ɔ̄lā ni᷄ŋnda̍ŋ wāŋnda̍ o̍ lābā pɛ̍, ā nɔ̍lā lɛ̍ mā dīmi̍ tōnya̍ o̍ tōnya̍ le̍.

²⁴Wāna̍ kɔ̄l kālo̍o̍, sɔ̄ɔ̍ŋ kɔ̄l kālo̍ŋ o̍ ha̍ndū hɔ̄lte̍ŋ chōo̍ ni̍. Kɛ̍ dīɔ̄mndo̍ ndu̍, bā o̍ bā fe̍e̍ ō yāā yi̍ya̍ŋ ndɔ̄ɔ̍.

²⁵Chūā dīɔ̄mndo̍ le̍ te̍le̍ŋ o̍ te̍le̍ŋ kɔ̄l tāmbɛ̍i̍yo̍ o̍ chu̍ū fi̍nyāa̍ ni̍, mbō tōsa̍ mī kālāa̍ bɛ̍ɛ̍ o̍ sa̍ŋga̍ o̍ kɔ̄llo̍ ni᷅ŋ.

²⁶Ō ve᷅ sūɛ̍i̍ kɛ̍ndɛ̄, le̍ wāna̍ tɛ̍ɛ̍mbu̍u̍ i̍sɔ̍ɔ̍ le̍ wo̍ nyɛ̄ sɔ̄lāa̍ vēēlōo̍ chōo̍ le̍ sūɛ̍i̍ o̍ tɛ̍ɛ̍mbu̍u̍ le̍ ve̍ le̍, kɛ̄lɛ̄ŋgāāle̍ wāŋndo̍ nyɛ̄ pālāa̍ tūsīo̍o̍ chōo̍ le̍ mɛ̄ɛ̍ o̍ to̍sa̍ sūɛ̍i̍ kɛ̍ndɛ̄i̍ yɛ̍.

²⁷Wāna̍ kɔ̄l kālo̍o̍ mānda᷄ŋndo̍ pīla̍ o̍ ma̍ndāŋ ni̍, tē ō wa̍ sūɛ̍i̍ pɛ̍, ō su̍ū ko̍ fa̍ŋ fa̍ŋ te̍. Wāna̍ kɛ̍sī ho̍ō kɔ̄l ndɔ̄ɔ̍ wo̍, wāna̍ nɔ̍ sīnā pɛ̄ŋgo̍o̍ wo̍ o̍ cho̍ ni̍.

²⁸Dīɔ̄mndo̍ bɛ̍ɛ̍ tē ō tīu̍ kɔ̄l ndɔ̄ɔ̍ bā pɛ̍, mbō wa̍ mēīyo̍ a̍ sɔ̄ɔ̍ŋ pūm, chūa̍a̍ wāŋnda̍ chūā ndu̍ ni̍ mɛ̄ɛ̍ nda̍ chūā wa᷅na̍ kɔ̄l kālo̍o̍ yɛ̍. Tē ō bīī sōndō ndɔ̄ɔ̍ pɛ̍, ndu̍ bɛ̍ɛ̍ chūa̍a̍ nda̍ chūā ndu̍ ni̍ māā wāna̍ lēbɛ̄ɛ̄.