Read Southern Kisi Pu̍lɔ̍wāā 19 Bible Online

Pu̍lɔ̍wāā 19 - Southern Kisi bible

Pu̍lɔ̍wāā 19

¹Ō bɛ̄nda̍ mī wānā wa̍ ō tāmbɛ̍i̍, kɛ̍ ndu̍yɛ̍ mā wa̍ sa̍kpō, mbo̍ hīāū wāa̍ dīɔ̄m dīmīāā lāchōōwā.

²Ō bɛ̄nda̍ mī wānā wa̍ a̍ nɔ᷅ kɔ̍l kālu̍ le̍ le̍. Tē wānā hi̍u̍ kēlēŋāa̍ pɛ̍ te̍, a̍ to̍sa̍ bīōndɔ᷄ŋndo̍.

³Wāŋndo̍, mī dīɔ̄mīī ndūɛ̍i̍ ndu̍ pi̍lɛ̍i̍ ī tɛ̄ɛ̄mbu̍u̍ yōōmū ndɔ̄ɔ̍, kɛ̍ ndu̍yɛ̍ mbō bīī Mɛ̄lɛ̄ka̍ Ya̍a̍wɛ̄ɛ̄ tɛ̄ɛ̄.

⁴Wānā su̍lāa̍, le̍ te̍le̍ŋ o̍ te̍le̍ŋ ndi̍a̍a̍mɔ̍ɔ̍wa̍a̍ sɛ̍nɛ̄īya̍ o̍ sɔ̍lā ni̍. Kɛ̍ tē wānā ta̍mbu̍ pɛ̍, chāāŋāā nūmnda̍ bɛ̍ɛ̍ kpo̍u̍, mā kɛ̄ɛ̍ nu̍m.

⁵Se̍ī lāka̍fāa̍, dɛ̍nɛ̍ pa̍lāa̍ o̍ sɔ̍lā ni̍. Wānā o̍ wāna̍ cho̍ wānā di̍mīāā lāchōōwā, ō he̍lūŋ dɛ̍nɛ̍ pa̍lāa̍ le̍.

⁶Wānā o̍ wānā ye̍e̍ma̍ mī wānā bɛ̍ndōo̍ ō chē ndu̍ nyīnā. Ndu̍yɛ̍ wānā o̍ wānā ye̍e̍ma̍ mbō wa̍ ndi̍a̍a̍mɔ̍ɔ̍ wāna̍ īkɛ̄ndɔ̄ɔ̍.

⁷Tē wānā ta̍mbu̍ pɛ̍, wānāā nūmnda̍ bɛ̍ɛ̍, mā kɛ̄ɛ̍ nu̍m. Ndi̍a̍a̍mɔ̍ɔ̍wa̍a̍ nu̍mnda̍ bɛ̍ɛ̍, ā ho̍lnūŋ nu̍m te̍. Ba̍lu̍ nda̍ bɛ̍ɛ̍ kɔ̍ɔ̍lī, le̍ nāāŋa᷅ŋndo̍, ā sɔ̍lā nda̍ le̍.

⁸Wānā o̍ wāna̍ ki̍ndi̍ pɛ̍ ma̍ sɔ̄lā kɔ̄l kālo̍o̍, mɛ̄ɛ̍ a̍ ka̍a̍la̍ yōōmū nūmndo̍. Wānā o̍ wāna̍ kɛ̍si̍ŋ nyɛ᷅ o̍ si̍na̍ pɛ̄ŋgu̍ wo̍ o̍ kɔ̄l pɛ̍, dɛ̍nɛ̍ kɛ̍ndɔ̄ɔ̍ wa᷅ le̍ ndu̍ ni̍.

⁹Se̍ī lāka̍fāa̍, dɛ̍nɛ̍ pa̍lāa̍ o̍ sɔ̍lā ni̍. Wānā o̍ wāna̍ cho̍ wānā di̍mīāā lāchōōwā dɛ̍nɛ̍ pa̍lāa̍ o̍ sɔ̍lā ni̍.

¹⁰Dīɔ̄mndo̍ ve᷅ o̍ yōōmū su̍lāa̍ ni᷄ŋ te̍. Chīa̍a̍ ā ve᷅ wa̍nāā bɛ̄ndūa̍a̍ chōo̍ la̍ma̍sā le̍.

¹¹Wānā o̍ wāna̍ cho̍ wāna̍ kɔ̄l kālu̍, ō cho̍ wa᷅na̍ dɔ̍ɔ̍ŋnu᷄ŋ ko̍ tu̍mbe̍ chɔ̍ chɔ̍ le̍. Ndu̍yɛ̍ bɛ̄ɛ̄le̍ŋ pīla̍ o̍ sɔ̍lā ni̍, tē wāŋndo̍ tōsa̍l ndu̍ sūɛ̍i̍ pɛ̍, mbō chɔ᷄m māā ā tōsa̍l ndu̍ bɛ̍ɛ̍ su̍ɛ̍i̍ wɔ̍ɔ̍ŋ te̍.

¹²Tē Māsā Bɛ̍ndōo̍ ō dɔ̄ɔ̄nu᷄ŋ tu̍mbe̍ pɛ̍, mɛ̄ɛ̍ kpɔ̍kūŋndo̍ ō bālū nu̍a̍ā vīsīa̍a̍ kɔ̄ɔ̄lī a̍ pɛ̄ɛ̄līa̍a̍ le̍ nda̍ bīyɔ̄ɔ̍ yɛ̍, le̍nde̍ o̍ wa᷅ ni̍. Kɛ̍ ndu̍yɛ̍, nyi̍nā Māsā Bɛ̍ndōo̍ ō chā wa̍nā wo̍, mɛ̄ɛ̍ mɔ᷄mndo̍ ō chūchū nu̍a̍ā o̍ bīllo̍ chōo̍ mbō pɔ̄ɔ̄li̍a̍a̍ ndu̍ yɛ̍, le̍nde̍ o̍ wa᷅ ni̍.

¹³Chūā dīɔ̄mndo̍, le̍ te̍le̍ŋ o̍ te̍le̍ŋ ō chō fi̍nyāa̍ tɛ̄ɛ̄mbūūwo̍. Wānā la̍nɔ̍ lāsɛ̄ɛ̄ŋgi̍āŋndo̍, mɛ̄ɛ̍ to̍ŋto̍ŋma̍ pīɔ̍ɔ̍ mā wa̍ nu̍a̍ā dēlīo̍o̍ mā ki̍o̍lū kɔ̍ɔ̍lī le̍ yɛ̍, le̍nde̍ o̍ to̍sā le̍ te̍le̍ŋ o̍ te̍le̍ŋ ni̍ mī pɔ̍nɔ̍ɔ̍ ō dūāūnūŋ tu̍mbe̍.

¹⁴Wāŋndo̍ mbō lōo̍ chīɛ̄īlā wānāa̍ ve̍lū ndu̍ wa̍ ā mɛ̄i̍ la̍ŋ, a̍ sūllo̍ māā nyɛ̄m kɛ᷅. Kɛ̍ la̍nɔ̍ kɔ̄lōo̍ ndu̍ ndu̍, Mɛ̄lɛ̄ka̍ Ya̍a̍wɛ̄ɛ̍ ke᷅ wa̍nā ni̍.

¹⁵Wāna̍ sīɛ̄lɛ̍i̍yo̍, tē ō hīni̍ lūa̍a̍ŋ pɛ̍, ō ye̍e̍mā bɛ̍ɛ̍ mbō chɛ᷄ŋ te̍. Wāna̍ ītāa̍nīya̍a̍, le̍ te̍le̍ŋ o̍ te̍le̍ŋ yīa̍a̍ŋ ma̍ wa᷅ ndu̍ chōo̍ ni̍.

¹⁶Wānā o̍ wāna̍ to̍sa̍ nyɛ̄ sāwāla̍ŋ lā dīmi̍ wo̍ pɛ̍, ō mānda̍ yōōmū ndɔ̄ɔ̍. Kɛ̍ wāna̍ o̍ wāna̍ kɛ̍ɛ̍ la̍ŋ pɛ̍, pīɔ̍mndo̍ o̍ sɔ̍lā ni̍.

¹⁷Wānā o̍ wāna̍ to̍sa̍l wānā ta̍mbɛ̍i̍yo̍ tōnya̍a̍ pɛ̍, mɛ̄ɛ̍ ā chō māchūāā Mɛ̄lɛ̄ka̍ Ya̍a̍wɛ̄ɛ̄ kūo̍o̍ wūūwo̍. Mɛ̄lɛ̄ka̍ Ya̍a̍wɛ̄ɛ̄ o̍ cho̍ nu̍m mīŋgī pāāwā.

¹⁸Si̍la̍ chu̍a̍ nūmndo̍, bōōndi̍i̍ o̍ nɔ̍lā wɔ̍ mbō chūa̍ sīlāa̍ ve̍. Tē a̍ to̍sa̍ le̍nde̍ le̍, mɛ̄ɛ̍ nu̍m cho̍ ndu̍ mālāa̍ yōōmū ndɔ̄ɔ̍ tɛ̄ɛ̄mbūūwo̍ ni̍.

¹⁹Wāna̍ kɔ̄l bɛ̄ndōo̍, mɛ̄ɛ̍ mī wānā ma̍l ndu̍ mbō sɔ̄la̍ sāŋgā o̍ nɔ̄ le̍ sɔ̄lāa̍ le̍ kɔ̄l ndɔ̄ bɛ̍ndōo̍ wo̍. Tē wānā ma̍la̍ ndu̍ pɛ̍ ma̍ pi̍ŋi̍ ndu̍, mɛ̄ɛ̍ si̍m ni̍ko̍ kɔ᷅l le̍ ndu̍ mālāa̍ le̍ te̍le̍ŋ o̍ te̍le̍ŋ.

²⁰Ō bɛ̄ndā mī wānā ya̍ŋ nīla̍ŋ o̍ sīlāa̍, ndu̍yɛ̍ mā chu̍a̍ nyɛ̄ nda̍ dīmūl nu̍m ndo̍. Ko̍ŋ to̍sā ni̍, mā sīmnu᷄ŋ wa᷅na̍ kɔ̄l kālu̍ o̍ sīɔ̄dīi̍ lāchīo̍o̍ ni᷄ŋ.

²¹Wāna̍ chi̍o̍o̍, mā tu̍u̍nu̍ŋ sɔ̍ɔ̍ŋ o̍ kɔ̄l ta̍u̍ le̍ tōsāa̍. Kɛ̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ tu̍ū wo̍, ndu̍ yɔ̍nūŋ ni̍.

²²Wāna̍ chi̍o̍o̍, nyɛ̄ wāŋndā chīe̍e̍ya̍ ā yēēmā nu̍m o̍ bā wo̍, ndu̍ cho̍ tūsi᷄ŋndo̍ ni̍. Le̍la̍ŋ ā bɛ̄ndā mī wānā wa̍ ō tāmbɛ̍i̍, mbo̍ hīāū wāa̍ wāna̍ lāchōōwā.

²³Wānā o̍ wāna̍ ke̍ Mɛ̄lɛ̄ka̍ Ya̍a̍wɛ̄ɛ̄ bɛ̄ɛ̄le̍ŋ pɛ̍, a̍ sɔ̍la̍ yōōmū vīlɛ̄īyo̍ a̍ kɔ̄l hīnīa̍a̍. Ndu̍yɛ̍ kpūndɔ̍ɔ̍ ō hu᷄ŋ bɛ̍ɛ̍, ō nɔ̍lā mbō pīla̍ŋ nu̍m te̍.

²⁴Wāŋndo̍ ō pūm, mbō nɔ̄ sīɛ̄lɛ̍i̍yo̍ ha̍a̍a̍, nyɛ̄ dīa̍a̍ wa̍ ndu̍ īkɛ̄i̍, le̍ mbō chūa̍ ndu̍ bɛ̍ɛ̍ mbō dē ō nɔ̍lā le̍.

²⁵Wāna̍ yōŋgāa̍ ō nɔ̄ mbō sɔ̄la̍ dɛ̍nɛ̍ pa̍lāa̍. O̍ ko̍ŋ, tē wānāa̍ nɔ̍ kɔ̍l kālu̍ bɔ̍ɔ̍ le̍ wa̍ ā chē pɛ̍, ko̍ŋ wa᷅ si̍lāa̍ le̍ nda̍.

²⁶Chūā vīālāa̍ bi̍ī fi̍nyā ndɔ̍ bīyɔ̄ɔ̄ wɔ̄ɔ̍ŋndo̍ pɛ̍, ndu̍yɛ̍ mbō tōū kāla̍ ndɔ̍ chīɛ̄ī ni᷄ŋ, chūā vīālāā kōŋ ō vēēlu̍ŋ si̍ɔ̍mbu̍la̍ŋ chōo̍, ndu̍yɛ̍ a̍ bɛ̄ɛ̄la̍ ta̍mbɛ̍i̍la̍ŋ.

²⁷Pɛ̍ŋgī a̍ nīla̍ŋ yāŋɔ̄ɔ̍ o̍ sīlāa̍ le̍ po̍ nūu̍, yɔ̄ŋi̍ ŋ̄ pūɛ̄ɛ̄nu̍ŋ nyɛ᷅ nda̍ pɛ̄ɛ̄ku̍ nu̍m ndo̍.

²⁸Se̍ī lāchōōwāa̍, māmɔ̄ɔ̍ pɛ̍ɛ̍ŋ o̍ ma᷅ŋ nyɛ̍ cho̍ sa̍kpōyɛ̍ī yo̍ ni̍. Wānāā dɛ̍nɛ̍ wɔ̍ɔ̍ŋnda̍, mɛ̄ɛ̍ wāŋndo̍ ō tūɛ̄ī nu̍a̍ā nyɛ̄ dīa̍a̍ yēēlā yɛ̍, le̍nde̍ nda̍ tūēī ni᷅ŋ yɔ̄ŋ wɔ̄ɔ̍ŋndo̍ yēēlā ni̍.

²⁹Wānāa̍ che᷅ kɔ̄l kālo̍o̍ sūɛ̍i̍ ma̍māā wa̍, nyɛ̄ pālāa̍ wa᷅ le̍ nda̍ ni̍. Ndu̍yɛ̍ dīɔ̄mnda̍ nda̍, lɔ̄ɔ̍ cho̍ mīāl ndā ni̍.