Read Southern Kisi Pu̍lɔ̍wāā 2 Bible Online

Pu̍lɔ̍wāā 2 - Southern Kisi bible

Pu̍lɔ̍wāā 2

¹Ya̍ŋ ya̍ nīla̍ŋ po̍ nūu̍, ndu̍yɛ̍ mā kɛ̍si̍ŋ nyɛ̄ ya̍ I̍ cho̍ nu̍m dīmūllo̍ o̍ kɔ̄l

²Ya̍ŋ ni᷅la̍ŋ nyɛ̄ kɛ̄ndɛ̍ī o̍ sɔ̄ɔ̍ŋ kɔ̄l kālo̍ŋ, ndu̍yɛ̍ mā la̍ndu̍ŋ kɔ̄l le̍ sɔ̄ɔ̍ŋ sīnā pɛ̄ŋgo̍ŋ sīnāa̍.

³Tē ī tōsā nu̍m pɛ̍ mā cha̍ŋ, mɛ̄ɛ̍ cha̍ŋ cho̍o̍ cho̍o̍ kpe̍le̍ŋ le̍ kɔ̄l kālo̍o̍. Nyɔ̍ɔ̍lu̍ le̍ mā sɔ̍la̍ sīnā pɛ̄ŋgo̍o̍.

⁴Nu̍u̍va̍ kɔ̍l kālo̍o̍ mɛ̄ɛ̍ wāŋndo̍ ō nūūwā nu̍a̍ā ka̍ni̍i̍ hu̍mbūe̍i̍ yɛ̍. Nu̍u̍va̍ ndu̍ mɛ̄ɛ̍ wāŋndo̍ ō nūūwā nu̍a̍ā nyɛ̄m ba̍āŋ kāla᷄ŋ yɛ̍.

⁵Ko̍ŋ to̍sā ni̍ mā sɔ̍la̍ sīnā pɛ̄ŋgo̍o̍ le̍ sīōōŋnde̍ nɔ̄ɔ̍ le̍ Mɛ̄lɛ̄ka̍ Ya̍a̍wɛ̄ɛ̄, ndu̍yɛ̍ o̍ ko̍ŋ kɔ̍ɔ̍lī, mā si̍na̍ vɛ̄lɛ̄ a̍ ndu̍ Mɛ̍lɛ̄ka̍ o̍kɔ̄ɔ̄.

⁶Mɛ̄lɛ̄ka̍ Ya̍a̍wɛ̄ɛ̄ ndu̍ pīlɛ̍ kpe̍ ke᷅ wa̍nā kɔ̍l kālo̍o̍ ni̍. Ndu̍ ke᷅ wa̍nā ta̍āsi̍o̍o̍ a̍ sīnā pɛ̄ŋgo̍o̍ ni̍.

⁷Kɔ̄l kālo̍o̍ chō ndu̍ o̍ bā ō kɛ̄sīāā le̍ wānāa̍ wa᷅ ndu̍ o̍ hɔ̄l sa̍kpō wa̍ kīo̍o̍. Wānāa̍ to̍sā sɔ̍ɔ̍ŋ o̍ nɛ̄ī sa̍kpōo̍ chōo̍ wa̍, māndāa̍ o̍ ma̍ndā nda̍ ni̍, mɛ̄ɛ̍ nyɛ̄la̍ cho̍ māā bōo̍la̍ bɛ̍ndū mī pūa̍a̍ chɔ̄ūwa̍ sɔ̄ŋgā a̍ la̍ŋ o̍ lābā la̍ŋ lā māndā nu̍a̍ā pūa̍a̍ chɔ̄ūwa̍ yɛ̍.

⁸Wānāa̍ bi̍ī wāŋnda̍ o̍ nɛ̄ī sa̍kpōo̍ chōo̍ wa̍, māndāa̍ o̍ ma̍ndā nda̍ ni̍, o̍ ko̍ŋ kɔ̍ɔ̍lī, wānāa̍ yɔ̍ŋgu̍ŋ kpo̍u̍ o̍ ndu̍ lo̍ wa̍, mbō hāndu̍ nda̍ hɔ̄lte̍ŋ chōo̍, nyɛ̄ o̍ nyɛ̄ yɔ̍nūŋ a̍ nda̍ le̍.

⁹Tē a̍ ya̍ŋ nīla̍ŋ o̍ nyɛ̄ ya̍ I̍ cho̍ nu̍m dīmūllo̍ pɛ̍, ā chō sīnā pɛ̄ŋgo̍o̍ sɔ̄lā a̍ nyɛ̍ bɛ̍nda̍ le̍ tōsāa̍ wo̍ o̍kɔ̄ɔ̄, ndu̍yɛ̍ mā si̍na̍ mɛ̄ɛ̍ wānā wā sa̍kpō, ndu̍yɛ̍ mā wa̍ wānā to̍sāā sɔ̄ɔ̍ŋ kɛ̍ndɛ̄ yɛ̍.

¹⁰Ā chō kɔ̄l kālo̍o̍ sɔ̄lā, ndu̍yɛ̍ mī tāāsi̍ ŋ̄ nɔ̄ ni̍ŋ ndo̍ tōsa̍ mā nɔ̄ kɔ̄l hīnīa̍a̍.

¹¹Kɔ̄l kālu̍ nu̍mndo̍ a̍ sīnā nūm pɛ̍ŋgo̍o̍, la̍ŋ la̍ wa᷅ ni̍ŋ nu̍m māndāa̍ ni̍.

¹²La̍ŋ la̍ ma̍lā nu̍m ni̍ŋ ni̍, a̍ wo̍ū ba̍ o̍ sɔ̄ɔ̍ŋ wɔ̍ɔ̍ŋndo̍ŋ tōsāa̍ ni᷄ŋ te̍. Lā mālā nu̍m ni̍ŋ, wānāa̍ ma᷅l wāŋnda̍ o̍ kpūndɛ̍la̍ŋ ni᷄ŋ a̍ lāsōndō wa̍, ā nɔ̍lā nu̍m te̍.

¹³Nda̍ yɔ̍nūŋ, māā wānāa̍ ma̍l nɛ̄i̍ tōnya̍a̍ ma̍ wānu᷄ŋ o̍ chi̍e̍ēŋ mānyūmndo̍ ho̍ō ni᷅ŋ nda̍ ni̍,

¹⁴a̍ tu̍e̍ī ha̍ā yɔ̄ŋ wɔ̄ɔ̍ŋndo̍ tōsāa̍ yēēlā, mā nāŋ kɔ̍l le̍ ka̍fāla̍ŋ ndu̍yɛ̍ a̍ dɛ̍nɛ̍ wɔ̍ɔ̍ŋndo̍ tōsāa̍ wa̍.

¹⁵Wāŋnda̍ ha̍ā, kēlālā ndāla̍ŋ kpo̍u̍ lā sēndu̍ le̍. Nyɛ̄ o̍ nyɛ̄ nda̍ tōsā, o̍ ka̍fāla̍ŋ ni᷄ŋ ko̍ni̍ nda̍ tōsā ndu̍ ni̍.

¹⁶Kɔ̄l kālu̍ nu̍mndo̍ a̍ sīnā nūm pɛ̍ŋgo̍o̍ ō chō nu̍m mālā, wāŋ lāāndūa̍a̍ mɛ̍ī ha̍ā pīāāndāā ndāa̍, mā bālū wa᷅ŋ pīāāndūāā chēle̍ŋnda̍ kɔ̄ɔ̄lī a̍ sōndōlā yēēlɛ̍i̍la̍ŋ le̍ tīɔ̄mɔ̄ɔ̍ a̍ nda̍ wa̍ ā ti̍ū nu̍m bā le̍.

¹⁷Wāŋ lāāndūa̍a̍ ha̍ā, pīāāndāā ndāa̍ nda̍ chō ni᷅ŋ o̍ lābā, chɔ̍ŋ o̍ chūā lāāndūyɛ̍ī ndɛ̄i̍ ni᷄ŋ nda̍, ā bīī pɛ̍ ā kɛ̄ɛ̍ pīāāndāā ndāā ka̍ŋ le̍ wāŋ pīāāndūāā chēle̍ŋnda̍, kpe̍ma̍la̍ nda̍ yi̍i̍ nda̍ pīāāndāā ndāa̍ Mɛ̄lɛ̄ka̍ o̍ hɔ̄l la̍ŋ, mā pūɛ̄ɛ̄nu̍ŋ a̍ la̍ŋ pɔ̍lī.

¹⁸Wāŋ lāāndūāā wāā le̍nde̍, tē ā tōl ō pīlɛ̍ kɔ̄ɔ̄lī pɛ̍, mā kūɛ̄ o̍ chīɛ̄ī ndɔ̄ɔ̍, a̍ chu̍a̍ nɛ̄i̍ pīɔ̍mndo̍. Wānāa̍ tu̍āl wa᷅ŋ lāāndūāā wāā le̍nde̍ kɔ̍ɔ̍lī wa̍ ki̍nɛ̍i̍, chi̍e̍e̍ pīɔ̍m mɛ̄ɛ̄lu̍la̍ ndāla̍ŋ lā wā ni̍.

¹⁹Wānā o̍ wānā ku̍ē o̍ wāŋ lāāndūāā wāā le̍nde̍ lo̍ ō pīlɛ̍ mā nɔ̍la̍ mā mi̍i̍ŋgu̍ le̍. Wānā o̍ wānā ku̍ɛ̄ o̍ ō pīlɛ̍ lo̍ pɛ̍, a̍ chi᷅ lɛ̍ nɛ̄īyo̍ le̍ mīīŋgōo̍ mā wa̍ yōōmū le̍.

²⁰Le̍la̍ŋ to̍l wa̍nāā ka̍ālā kɛ̄ndīa̍a̍ kɔ̄ɔ̄lī, mā chu̍a̍ ka̍ālā ndāla̍ kɛ̍ndɛ̄la̍ŋ, ndu̍yɛ̍ mā wa̍ wānā sa̍kpō.

²¹Wānāa̍ cho̍ sa̍kpō Mɛ̄lɛ̄ka̍ o̍ hɔ̄l la̍, nda̍ wa᷅ ni̍ŋ o̍ lɛ̄ŋnde̍ŋ nde᷅ŋ ni᷄ŋ ni̍. Wānāā ka̍ālā ndāla̍ŋ lā chō lā kɛ̄ndɛ̄ wa̍la̍ŋ Mɛ̍lɛ̄ka̍ o̍ hɔ̄l la̍, nda̍ ko̍ni̍ a̍ lo᷅ ni̍ŋ o̍ lɛ̄ŋnde̍ŋ nde᷅ŋ ni᷄ŋ ni̍.

²²Kɛ̍ wānāā dɛ̍nɛ̍ wɔ̍ɔ̍ŋnda̍ ki̍nɛ̍i̍, ā chō nda̍ hūnɔ̄ɔ̄ fāŋā o̍ lɛ̄ŋnde̍ŋ nde᷅ŋ ni᷄ŋ ba̍ū. Wānāā yɔ̄ŋ wɔ̄ɔ̍ŋnda̍ ki̍nɛ̍i̍, ā chō nda̍ hūnɔ̄ɔ̄ tɛ̄ɛ̄mbūū kpo̍u̍.