Read Southern Kisi Pu̍lɔ̍wāā 20 Bible Online

Pu̍lɔ̍wāā 20 - Southern Kisi bible

Pu̍lɔ̍wāā 20

¹Mūɛ̄īya̍ŋ, nyɛ̄ sōlīāā wānā o̍ ba̍a̍ ni᷄ŋ ma̍ cho̍ ni̍. Mūɛ̄īmā kālā ka̍la̍ŋ kōlɔ̄ɔ̍, mī mā tōsa̍ mā sīmnu᷄ŋ māā dīɔ̄m. Wānā o̍ wāna̍ to᷅l mūɛ̄īya̍ŋ kɔ̄ɔ̄lī pɛ̍ ā sīmnu᷄ŋ dīɔ̄mndo̍.

²Tē Māsā Bɛ̍ndōo̍ ō dɔ̄ɔ̄nu᷄ŋ tu̍mbe̍ pɛ̍, mɛ̄ɛ̍ kpɔ̍kūŋndo̍ ō wā nu̍a̍ā vīsīa̍a̍ bālɔ̄ɔ̍ kɔ̄ɔ̄lī a̍ pɛ̄ɛ̄līa̍a̍ le̍ nda̍ bīyɔ̄ɔ̍ yɛ̍, le̍nde̍ o̍ yɔ̍nūŋ ni̍. Le̍la̍ŋ wānā o̍ wāna̍ to̍sa̍ pɛ̍, mī Māsā Bɛ̍ndōo̍ ō dɔ̄ɔ̄nu᷄ŋ tu̍mbe̍ a̍ nūm, a̍ pi̍si̍ yōōmū nūmndo̍.

³Ō wā bɔ̍ɔ̍ su̍ɛ̍i̍ lēbɛ̄ɛ̄ bɛ̄ndū le̍ sɔ̍ŋgɔ̄ɔ̍ wōo̍. Dīɔ̄mnda̍ ko̍ni̍ ye̍e̍mā sɔ̍ŋgɔ̄ɔ̍ le̍ te̍le̍ŋ o̍ te̍le̍ŋ ni̍.

⁴Wānāā sīɛ̄lɛ̍i̍ya̍, te̍le̍ŋ chāānda̍ wā chīɔ̄ɔ̄ŋ nda̍ŋ wāāyīa̍a̍ wo̍ ki̍nɛ̍i̍ ā sa̍a̍lāŋ te̍. Tē te̍le̍ŋ ku̍a̍u̍wāā ŋ̄chīɔ̍ɔ̍ ō fūūlu̍u̍ ni᷅ŋ pɛ̍, nda̍ bɛ̍ɛ̍ ā yēēmā mā kōū māā chāānda̍, kɛ̍ ā nɔ᷅ nyɛ᷅ o̍ nyɛ̄ le̍ kōūwɔ̄ɔ̄ le̍.

⁵Wāŋndo̍ mī yīya᷄ŋnda̍ ndɔ̄la̍ŋ lā yīŋgi̍la̍, to̍fa̍ wɔ̍ ko̍ mɛ̄ɛ̍ so̍o̍ŋ māmɛ̄ŋndo̍ ō yīŋgi̍la̍ nu̍a̍ā yɛ̍, kɛ̍ wāna̍ nɔ̍ kɔ̄l kālo̍o̍ wo̍, mbō nɔ̄la̍ mbō sīna̍ nyɛ̄ wānā ko̍ŋ ō yīya̍ŋndo̍ pɛ̄ŋgu̍.

⁶Wānāā bɔ̄ɔ̍ bɔ̍ɔ̍ mā dīmi̍ a̍ sōndōlā ndāla̍ŋ māā ā chō wānāā tūsīa̍ŋ. Kɛ̍ le̍ wānā wa̍ā le̍nde̍ sa̍a̍lɔ᷄ŋndo̍, ō cho̍ nu̍a̍ā sa̍kpō wo̍, ō kēndū.

⁷Wāna̍ cho̍ ho̍ō mbō tōsā sɔ̍ɔ̍ŋ tōnya̍ŋ, ndu̍yɛ̍ yōōmū ndɔ̄ɔ̍ ō nɔ̍ sɔ᷅ŋ o̍ sɔ̄ŋ te̍ wo̍, wānā wa̍ā le̍nde̍, chūāūwāā ndūa̍a̍ ā pɛ̄l tɔ̄nɔ̍.

⁸Tē Māsā Bɛ̍ndōo̍ ō cha᷄l sɔ̄ɔ̍ŋ dīmīo̍o̍ wāŋnda̍ tɛ̄ɛ̄ŋ pɛ̍, bā o̍ bā yɔ̄ŋ wɔ̄ɔ̍ŋndo̍ ō sɔ̄ɔ̄ŋa̍ o̍ sūɛ̍i̍ ni᷄ŋ, ō nɔ̄lā mbō chē ndu̍, mbō sōli̍ ndu̍ po̍.

⁹Wānā o̍ wānā cho̍ mbō dīmi̍ māā kɔ̄l ndɔ̄ɔ̍ chō ō dīāndāā wa̍la̍ŋ, māā yōōmū ndɔ̄ɔ̍ ō chō dīāndāā, ō nɔ̍ yɔ᷅ŋ wɔ̄ɔ̍ŋ te̍ le̍.

¹⁰Wāŋnda̍ wɔ̄ŋgūla̍ŋ lēndūllo̍ lēndūl lāka̍fāa̍ o̍ sēke̍lēi̍yo̍ ni̍, a̍ wāŋnda̍ wɔ̄ŋgūla̍ŋ tūūlūllo̍ tūūlūl lāka̍fāa̍, sɔ̄ɔ̍ŋ sa̍lā tīɔ̍ɔ̍ŋ ndo̍ŋ mu᷅ŋ kpo̍u̍, Mɛ̄lɛ̄ka̍ Ya̍a̍wɛ̄ɛ̄ o̍ tu̍l mu̍ŋ lēyɛ̄.

¹¹Chɛ̄lɛ̄kpɔ̍ɔ̍ bɛ̍ɛ̍, wānā nɔ̍lā mā sīna̍ wāna̍ o̍ cho̍ wo̍, sa̍na̍a̍ a̍ ka̍ā ndɔ̄ɔ̍. Wānā nɔ̍lā mā sīna̍, tē ō chō wāna̍ sa̍ndu̍, ndu̍yɛ̍ mbo̍ wā wānā kɛ̍ndɛ̄.

¹²Mɛ̄lɛ̄ka̍ Ya̍a̍wɛ̄ɛ̄ o̍ ke̍ wāna̍ chi̍o̍o̍ nīla̍ŋ le̍ mbō tūēī, ndu̍yɛ̍, mbo̍ kē ndu̍ hɔ̄lta̍ŋ le̍ mbō chē a̍ la̍ŋ.

¹³Wānā o̍ wāna̍ ka̍a̍la̍ lūa̍ŋ pɛ̍, ō sōlī kpe̍ku̍ le̍, o̍ tāmbe̍i̍ ni᷄ŋ o̍ mɛ̍ɛ̍lū ni̍. Kɛ̍ wāna̍ kɛ̍ɛ̄ ho̍ō lūa̍ŋ le̍ kpe̍ko̍o̍ wo̍, wāna̍ nɔ᷅ nyɛ᷅ dīa̍a̍ ta̍u̍ ta̍u̍ wo̍ o̍ wa᷅ ni̍.

¹⁴Wānāā lēyākūa̍a̍, tē ā kūɛ̄ wāŋnda̍ wɔ̄ŋgūla̍ŋ pīōndɔ̄ɔ̍ o̍ bā le̍ kɔ̄la̍ŋ pīsīo̍o̍ pɛ̍, ā dīmu̍l wānāā nda̍ wā wɔ̍ŋgūla̍ŋ pīōndɔ̄ɔ̍ o̍ bā wa̍ māā, wɔ̄ŋgūla̍ŋ ndāŋ lā bɛ̄nda̍ le̍. Lā ni᷄ŋ te̍. Tē ā chi̍i̍ ni᷅ŋ pīōndɔ̄ɔ̄ pɛ̍, mā kūɛ̄nu᷄ŋ, ā kɔ̍ mu̍li̍ŋ pɛ̍ɛ̍lɔ᷄ŋndo̍ a̍ wɔ̄ŋgūlā nda̍ dīmi̍ māā lā bɛ̄nda̍ le̍ la̍ŋ.

¹⁵Ko̍o̍līi̍yo̍ŋ ŋ̄ chō ta̍u̍. O̍ ko̍ŋ kɔ̄ɔ̄lī, pōūtā ba̍ā kālālā chēle̍ŋ nda̍ŋ bɛ̍ɛ̍ lā chō ta̍u̍ ta̍u̍ bɛ̍ndū. Kɛ̍ dīōmndā kɔ̄l kālu̍la̍ fu̍lā wa᷅ŋndo̍ o̍ sōndō la̍ŋ, la̍ŋ la̍ hi̍o̍ū wā nyɛ̄ ba̍ā kālā.

¹⁶Tē mīāllo̍ nɔ̄ le̍ nu̍m pāāwāa̍ pɛ̍, mī wāŋndo̍ tāāni̍ ndu̍, di̍mu̍l wa̍nā ta̍a̍nīāā kōŋ mbō ke̍ nu̍m dōma̍ ndɔ̄ le̍cho̍ō wo̍, lāndēi̍. Dōmā ko̍ŋ ō lo̍ nu̍m o̍ bā ha̍a̍a̍ mī wānā ko̍ŋ ō pāāwa̍ nu̍m nyɛ̄ mīāl kōŋ ō nɔ̄ le̍ nu̍m pāāwāa̍ wo̍.

¹⁷Nyɛ̄ dīāā lēvīīyo̍, yēēlāa̍ pīla̍ o̍ ye̍e̍lā wa᷅na̍ chi̍i̍mbu̍u̍ ndu̍ wo̍ o̍ sōndō ni̍, kɛ̍ mɛ̄ɛ̄lu̍ kpɔ̍ŋ, mī nyɛ̄ dīāā kōŋ ō yɔ̄nu̍ŋ ndu̍ o̍ sōndō, mɛ̄ɛ̍ tɛ̍nɔ̍ŋ ŋ̄ wā nu̍a̍ā wāŋndo̍ o̍ sōndō yɛ̍.

¹⁸Tē a̍ kɛ̍ɛ̍si̍a̍a̍ le̍ nyɛ̄ o̍ nyɛ̄ tōsā pɛ̍, nyu̍na̍ wa̍nāā kɔ̄l kālu̍a̍a̍ a̍ ndi̍ o̍kɔ̄ɔ̄ mā sīla̍ nu̍m, ā nɔ̄lā mā ti̍u̍ bā. Tē ā wa̍ kɔ̄la̍ŋ sɔ̍ŋgɔ̍ɔ̍ a̍ ya̍a̍mɔ̍ɔ̍wa̍a̍ nu̍mnda̍ pɛ̍, cha̍l lɔ̍ fɛ̍lɛ̍ŋ a̍ wānāā kɔ̄l kālu̍a̍a̍ mā sīla̍ nu̍m.

¹⁹Wānā o̍ wāna̍ cho̍ wāna̍ lāchōŋgū, ō cho̍ wāna̍ wānā di̍mu̍l īsɔ̄ɔ̍ mī ī lo̍ nya̍ tɛ̄ɛ̄ŋ nya̍ ŋi̍ɔ̍ɔ̍ŋ te̍. Le̍la̍ŋ wāna̍ o̍ wāna̍ cho̍ wānā su̍a̍ā bɛ̄ndū, ya̍ā nāāŋa᷅ŋ a̍ ndu̍ le̍.

²⁰Wānā o̍ wāna̍ ye̍i̍ fi̍nyā ndɔ̍, ɔ̄ɔ̄ kāla̍ ndɔ̍ pɛ̍, yōōmū wānā ko̍ŋ, kīōlōo̍ lē pīlɛ̍, mɛ̄ɛ̍ la̍mbūi̍yo̍ ō nyūm nu̍a̍ā o̍ nyūmnda̍ŋ ni᷄ŋ yɛ̍.

²¹Sūl wāŋndo̍ ō kēlēŋā ho̍ō sɔ̄lāa̍ o̍ chɔ̍chɔ̍ɔ̍ ni᷄ŋ ndo̍, ō cho̍ su̍l mɛ̍ɛ̍lu̍ a̍ sa̍lā kɔ̄ɔ̄lī le̍.

²²Tē wāŋndo̍ tōsa̍l nu̍m sūɛ̍i̍ wɔ̍ɔ̍ŋnde̍ pɛ̍, nūm pi̍la̍ di̍mī le̍ wānā ko̍ŋ māa̍ mi̍ŋgūl te̍. Chu̍m Mɛ̍lɛ̄ka̍ Ya̍a̍wɛ̄ɛ̄, ō nɔ̄lā mbō māla̍ nu̍m.

²³Mɛ̄lɛ̄ka̍ Ya̍a̍wɛ̄ɛ̄ o̍ tu̍l wānāa̍ to̍sāl wa᷅ŋnda̍ ka̍fāla̍ŋ o̍ wɔ̄ŋgūla̍ŋ ni᷄ŋ a̍ sēke̍lēi̍la̍ŋ nda̍ lēyɛ̄. Ō hīni̍ kɔ̍l a̍ sēke̍lēi̍la̍ lāka̍fāla̍ŋ te̍.

²⁴Mɛ̄lɛ̄ka̍ Ya̍a̍wɛ̄ɛ̄, ndu̍ chɔ᷅m wa̍nā o̍ wānā nɛ̍i̍ ŋ̄ kūā cho̍o̍ wo̍ ni̍. Wānā o̍ wānā a̍ nɔ̍lā mā si̍na̍ nɛ̄i̍ ŋ̄ kūā cho̍o̍ wo̍ a̍ bā nūm te̍.

²⁵Wānā o̍ wānā tē a̍ yi̍ya̍ŋ fɛ̍lɛ̍ŋ te̍, mā la̍u̍ le̍ būŋgɛ̄i̍ chūa̍a̍, nūm pi̍la̍ a̍ ye̍ŋnu̍ŋ ya̍ŋɔ̄ɔ̄le̍ŋ. Tē a̍ cha̍l ni̍ŋ pɛ̍, mā yi̍ya̍ŋ a̍ ndi̍ o̍kɔ̄ɔ̄, ī wā ni᷅ŋ ī hīāvɛ̍i̍ ye̍.

²⁶Māsā bɛ̍ndū kɔ̄l kālo̍o̍, ndu̍ nɔ̍ wānāā dɛ̍nɛ̍ wɔ̍ɔ̍ŋnda̍ yɔ̄ɔ̄yāa̍ o̍ lɛ̄ŋnde̍ŋ ni᷄ŋ ni̍, mbō tūsi̍ nda̍ nyɛ̄ pālāa̍ chōo̍.

²⁷Mɛ̄ɛ̍ la̍mbūi̍yo̍ ō wā nu̍a̍ā dīōndɔ̄ɔ̍ mī wānā che᷅ wa̍la̍ŋ yɛ̍, le̍nde̍ Mɛ̄lɛ̄ka̍ Ya̍a̍wɛ̄ɛ̄ o̍ cha᷅ wa᷅na̍ chi̍o̍o̍ o̍ kɔ̄l ni̍. Ō nɔ̄lā mbō mɛ̄ɛ̄ndi̍a̍ŋ wa᷅na̍ chi̍o̍o̍ o̍ kɔ̄l, mbō sīna̍ yīya᷄ŋ wāna̍ chi̍o̍o̍.

²⁸Māsā bɛ̍ndu̍ ka̍a̍la̍ ho̍ō wāŋndā chīe̍e̍ya̍, ndu̍yɛ̍ mbo̍ wā sa̍kpō wo̍, vīōūwɔ̄ɔ̍ o̍ vi̍a̍ū o̍ lēmāsā ni̍. Tē ō wa̍ wāna̍ ka̍a̍la̍ wāŋndā chīe̍e̍ya̍ pɛ̍, hīōūwɔ̄ɔ̍ o̍ hi̍a̍ū la̍chi̍ a̍ wāa̍ wāŋnda̍ chōo̍ ma̍sā ni̍.

²⁹Chūāā pīāāndūa̍a̍, dīāllūŋ ndāŋ ka̍la̍ŋ mu̍ŋ cho̍ bɛ̄ɛ̄le̍ ndāle̍ŋ ni̍. Kɛ̍ bɛ̄ndūāā yūvɛ̍i̍ya̍ nda̍, yūlu̍ŋīī ndɛ̄i̍ ndi̍ cho̍ bɛ̄ɛ̄le̍ŋ ndāle̍ŋ ni̍.

³⁰Wāŋndo̍ lɔ̄ɔ̍, mā mɛ̄li̍ ndu̍ pāūve̍ lēkɔ̄ɔ̍, mbō tōsa̍, mī wānā ko̍ŋ ō sōli̍ bāla̍ŋ o̍ dɛ̍nɛ̍ wɔ̍ɔ̍ŋndo̍ tōsāa̍ ni᷄ŋ. Lɔ̄ɔ̍ nɔ̄lā mbō māŋga̍la̍ wāna̍ dɛ̍nɛ̍ wɔ̍ɔ̍ŋndo̍.