Read Southern Kisi Pu̍lɔ̍wāā 21 Bible Online

Pu̍lɔ̍wāā 21 - Southern Kisi bible

Pu̍lɔ̍wāā 21

¹Mɛ̄lɛ̄ka̍ Ya̍a̍wɛ̄ɛ̄, ndu̍ nɔ̍ yīya᷄ŋ māsā bɛ̍ndōo̍ o̍ bā ni̍. Mɛ̄ɛ̍ Mɛ̄lɛ̄ka̍ nɔ̄ nu̍a̍ā kpāāyāa̍ mɛ̄ŋnda̍ŋ o̍ pēēlo̍ chōo̍, bā o̍ ye̍e̍mā ma̍ŋ mī mā kūɛ̄ wo̍ lo̍ŋ ma̍ ku̍ā ni̍ yɛ̍, le̍nde̍ o̍ nɔ̍ kpāāyāa̍ yīya᷄ŋ māsā bɛ̍ndōo̍ chōo̍ ni̍.

²Wāŋndo̍ mbō wa̍ sūɛ̍i̍ tōsāa̍, mbō yīya̍ŋ māā sūɛ̍i̍ kɛ̍ndɛ̄i̍ o̍ cho̍ tōsāa̍ ni̍, kɛ̍ Mɛ̄lɛ̄ka̍ Ya̍a̍wɛ̄ɛ̄ ndu̍ nɔ̍lā ni̍ mbō kēlū yāmɛ̍i̍ a̍ yīya᷄ŋ wānā ko̍ŋ o̍kɔ̄ɔ̄.

³Nyɛ̍ cho̍ tōnya̍a̍ wo̍ tōsāa̍ ndu̍yɛ̍ mā wa̍ sa̍kpō, ō hīnī Mɛ̍lɛ̄ka̍ Ya̍a̍wɛ̄ɛ̄ kɔ̄l mbo̍ hīāū sa̍lāla̍ŋ sōlīo̍o̍ o̍ ndu̍ lo̍.

⁴Nūā yōŋgāa̍, a̍ yīya᷄ŋ yōŋgāa̍, ndu̍yɛ̍ a̍ nīīlūlā dɛ̍nɛ̍ wɔ̍ɔ̍ŋnda̍ŋ, kpo̍u̍ yɔ̄ŋ wɔ̄ɔ̍ŋ pīlɔ̍ɔ̍ kpe̍ la̍ cho̍ ni̍.

⁵Tē wānā cha̍a̍ kɛ̄ɛ̄sīa̍a̍ pɛ̍, a̍ sɔ̍la̍ ta̍u̍. Kɛ̍ tē wānā la̍u̍ o̍ dɛ̍nɔ̍ɔ̍ tōsāa̍ ni᷄ŋ pɛ̍, a̍ fu̍lā o̍ bā hāvɛ̍i̍yo̍ ni᷄ŋ te̍.

⁶Sūl wāŋndo̍ sɔ̄lā ho̍ō o̍ chōōla̍ŋ ni᷄ŋ ndo̍, mɛ̄ɛ̍ mɔ᷄mndo̍ ō kīōlū nu̍a̍ā o̍ lē pīlɛ̍ ni᷄ŋ yɛ̍, le̍nde̍ o̍ ku̍a̍ŋnūŋ ni̍. Ndu̍yɛ̍ sūl wāā le̍nde̍, yāŋɔ̄ɔ̄lē pīɔ̍mnde̍ŋ o̍ wa᷅ le̍ wānā ko̍ŋ ni̍.

⁷Wānāā dɛ̍nɛ̍ wɔ̍ɔ̍ŋnda̍, sɔ̍ŋgɔ̄lā nda̍ kīālū la̍ŋ, mī lā tɛ̄ɛ̄mbu̍u̍ nda̍. Kāni̍ fo̍ndōle̍, ā chɛ᷅l mā tōsa̍ nyɛ̍ cho̍ sa̍kpō le̍ tōsāa̍ wo̍ le̍.

⁸Wāna̍ dɛ̍nɛ̍ wɔ̍ɔ̍ŋndo̍, nɛ̄i̍ ndɔ̄ɔ̍, ō ve᷅ sa̍kpō le̍, ō tūūndu̍ɛ̍i̍. Kɛ̍ wānā kɛ̍ndɔ̄ɔ̍ ndu̍ ndu̍, ka̍ā kɛ̄ndɔ̄ɔ̍ o̍ nɔ᷅ ni̍.

⁹Yɔ̄ŋi̍ ŋ̄ wa̍ a̍ wānā la̍nɔ̍ lāsɛ̄ɛ̄ŋi̍āŋndo̍ chīɛ̄ī ni̍ŋ yɛ̍, ō bɛ̄ndā mā wa̍ŋnu̍ŋ o̍ chīɛ̄ī chōo̍ cho̍o̍ wo̍ chōo̍ mā wa̍ŋnu̍ŋ ndo̍ŋ nu᷄m pīlɛ̍.

¹⁰Wānāā dɛ̍nɛ̍ wɔ̍ɔ̍ŋnda̍, le̍ te̍le̍ŋ o̍ te̍le̍ŋ ā wā a̍ yēēmɛ̍i̍ le̍ wāŋnda̍ īwɔ̄ɔ̍ŋnde̍ tōsāllo̍. Wānāā nda̍ chīɛ̄ɛ̄li̍āŋ nda̍ nda̍ā wa̍ bɛ̍ɛ̍, ā nɔ᷅ i̍nyi̍ɛ̍ɛ̍ o̍ īnyīɛ̍ɛ̍ le̍ nda̍ le̍.

¹¹Tē wāna̍ chu̍a̍ ho̍ō kɔ̄l kālo̍o̍ nyɛ̄ ndɔ̄ ma̍māā wo̍ ō tɛ̄ɛ̄mbu̍u̍ sūɛ̍i̍ pɛ̍, mbō sɔ̄la̍ dɛ̍nɛ̍ pa̍lāa̍ le̍ ndi̍, wāna̍ nɔ̍ ho̍ō kɔ̄l kālu̍ bɔ̍ɔ̍ le̍ wo̍, tē ō chē nyɛ̍ yɔ̍nu̍ŋ ndo̍ pɛ̍, ō nɔ̄lā mbō sɔ̄la̍ kɔ̄l kālo̍o̍. Wāna̍ kɔ̄l kālo̍o̍, tē ā si̍la̍ ndu̍ pɛ̍, ō chɔ̄ɔ̄lu̍ kɔ̄l kālo̍o̍ sɔ̄lā.

¹²Mɛ̄lɛ̄ka̍, o̍ cho̍ wānā sa̍kpōo̍ wo̍, ō sīnā nyɛ̍ o̍ nyɛ̍ yɔ̍nūŋ o̍ chīɛ̄īlā wānāā dɛ̍nɛ̍ wɔ̍ɔ̍ŋnda̍ ni᷄ŋ. Ndu̍yɛ̍ ō chō wānāā dɛ̍nɛ̍ wɔ̍ɔ̍ŋnda̍ nyɛ̄ pālāā bɛ̄ndōo̍ tūsī chōo̍.

¹³Wānā o̍ wānā, tē wānā ta̍mbɛ̍i̍yo̍ ō cha᷄ŋ nāa̍ nūm chu̍a̍ pɛ̍ le̍ mālāa̍, mā ye̍ŋ ndu̍ lānī le̍, nūm bɛ̍ɛ̍ tē a̍ wa̍ o̍ bā hāvɛ̍i̍yo̍ ni᷄ŋ pɛ̍ mā cha̍ŋ le̍ mālāa̍, a̍ sɔ̍lā wa᷅na̍ ya̍ŋ nu̍m lānī le̍.

¹⁴Tē wāŋndo̍ ō dɔ̄ɔ̄nu᷄ŋ tu̍mbe̍ a̍ nūm pɛ̍, mā bīī nyɛ̄ mā ko̍ma̍l ndu̍ nya̍ ŋi̍ɔ̍ɔ̍ŋ kpe̍, mā kɔ̍ so̍ō nāa̍ ndu̍ chu̍a̍, wānā ko̍ŋ ō dɔ̄ɔ̄nu̍ŋ bɛ̍ɛ̍ tu̍mbe̍ a̍ nūm mɛ̍ɛ̍ o̍ mɛ̄ɛ̍, kɔ̄llo̍ o̍ pɔ̍lūl ni̍. Wāŋndo̍ ō tūūlu̍ bɛ̍ɛ̍ kɔ᷅l ta̍u̍ ta̍u̍, nyɔ̄ɔ̍ chūa̍a̍ mā ko̍ma̍l ndu̍ nya̍ ŋi̍ɔ̍ɔ̍ŋ kpe̍ mā sōō nāa̍ ndu̍ chu̍a̍, ō nɔ̄lā mbō tōsa̍ mī wānā ko̍ŋ ō pɔ̄lu̍l kɔ̄l.

¹⁵Tē tōnya̍a̍ ō dīmi̍ŋ o̍ sūɛ̍i̍ ni᷄ŋ pɛ̍, wānāā kɛ̄ndīa̍a̍ nya̍a̍lo̍o̍ nda̍ dūāūnūŋ ni̍. Kɛ̍ wānāā tōsāā dɛ̍nɛ̍ wɔ̍ɔ̍ŋnda̍ nda̍, kɔ̄l tāmbɛ̍i̍ bɛ̍ndōo̍ nda̍ sɔ̄lā ni̍.

¹⁶Wānā o̍ wāna̍ fa̍ŋa̍ŋ pɛ̍ o̍ nɛ̄i̍ kɔ̄l kālo̍o̍ chōo̍, mɛ̄ɛ̄lu̍la̍ ndɔ̄la̍ŋ, chi̍e̍e̍ pīɔ̍m wāŋ vīlɛ̍i̍ya̍ tɛ̄ɛ̄ŋ.

¹⁷Wāna̍ o̍ wāna̍ ka̍a̍la̍ kɔ̄l kɛ̄ndɛ̄ chi̍e̍ēŋndo̍ ho̍ō pɛ̍, o̍ tāmbɛ̍i̍ ni᷄ŋ ŋ̄ wā ni̍. Wānā o̍ wa᷅na̍ lu̍e̍i̍ sōndōo̍ o̍ mūɛ̄īya̍ŋ ni᷄ŋ pɛ̍, ndu̍yɛ̍ mbō nɔ̄ sōndō yēēlɛ̍i̍yo̍ le̍ nyɛ̄ dīāā kɛ̄ndɛ̄ bɛ̄ndōo̍, ō di̍ī dɛ̍nɛ̍ le̍.

¹⁸Wānāā dɛ̍nɛ̍ wɔ̍ɔ̍ŋnda̍, nda̍ sɔ̍lā sa̍ŋgā wānāā kɛ̄ndīa̍a̍ nda̍a̍ a̍a̍ nɔ̍ le̍ sɔ̄lāa̍ wo̍ ni̍. Wānāa̍ se̍ndu̍ le̍ wa̍, nda̍ sa̍ŋgā le̍ sɔ̍ŋgɔ̍ wānāā tōnya̍a̍ ni̍.

¹⁹Yɔ̄ŋi̍ ŋ̄ cha᷄l a̍ wānā la̍nɔ̍ lāsɛ̄ɛ̄ŋi̍āŋndo̍ o̍ nɔ̍ kpɛ̍lɛ̍ kpɛ̍lɔ̍ɔ̍ wo̍ chīɛ̄ī ni̍ŋ yɛ̍, ō bɛ̄ndā mā cha̍lnu̍ŋ yo̍ndōo̍ ni᷄ŋ, mā wa̍ŋnu̍ŋ ndo̍ŋ nu̍m pīlɛ̍.

²⁰Wāna̍ nɔ̍ ho̍ō kɔ̄l kālo̍o̍ wo̍, ndu̍ nɔ᷅ nyɛ᷅m ba̍ā kāla᷄ŋ chīɛ̄ī ni̍ŋ ni̍. Kɛ̍ dīɔ̄mndo̍ ndu̍ ndu̍, nyɛ̄ o̍ nyɛ̄ o̍ sɔ̍la̍ chīīyo̍ tɛ̄ɛ̄mbūūwo̍ wo̍.

²¹Wānā o̍ wa᷅na̍ ki̍ndi̍ pɛ̍ le̍ wāa̍ wānā sa̍kpō, ndu̍yɛ̍ a̍ wāa̍ wāna̍ īkɛ̄ndɛ̄, yōōmū vīlɛ̄īyo̍, a̍ dɛ̍nɛ̍ kɛ̍ndɔ̄ɔ̍ ndu̍yɛ̍ a̍ bɛ̄ɛ̄le̍ŋ o̍ sɔ̍lā ni̍.

²²Wāna̍ nɔ̍ ho̍ō kɔ̄l kālo̍o̍ wo̍, ō nɔ̄lā mbō chīŋa̍la᷅ŋ chi̍e̍e̍ nɔ̍ ku̍u̍ba̍a̍ chɔ̄ūwa̍ wo̍ a̍ sɔ̍ŋgɔ̄ɔ̍ mbō yēm ndu̍, ndu̍yɛ̍ mbō tɛ̄ɛ̄mbu̍u̍ fo̍ndāŋndā kālā ka̍lālā wāŋnda̍ o̍ chi̍e̍e̍ ko̍ŋ ni᷄ŋ a̍ ti̍i̍nda̍ŋ le̍ nda̍ māndāa̍ la̍ŋ kpo̍u̍.

²³Wānā o̍ wāna̍ ma̍nda̍ sōndō ndɔ̄ɔ̍ a̍ dīɔ̄ɔ̄mūlē ndɔ̄le̍ŋ pɛ̍, ō de᷅l o̍ kpūndɛ̍ ni᷄ŋ te̍.

²⁴Wāna̍ yōŋgāa̍, o̍ nɔ̍ ho̍ō wa̍su̍ bɛ̍ndōo̍, sɔ̄ɔ̍ŋ tōsāa̍ o̍ yōŋgā bɛ̍ndōo̍ ni᷄ŋ ndo̍, dīōlā nda̍ vēēlū ndu̍ la̍ŋ la̍ cho̍ ni̍ āā, wānā ma̍māā ŋ̄wāŋndā chīe̍e̍ wo̍.

²⁵Wāna̍ sīɛ̄lɛ̍i̍yo̍, yēēmɛ̍i̍ ndūɛ̍i̍ di̍ī ndu̍ ni̍, fo̍ndōle̍, ō yēēma̍ mbō tōsa̍ wa̍li̍ o̍ wa̍li̍ a̍ bālā ndɔ̄la̍ŋ te̍.

²⁶Tē pāa̍le̍ŋ lē sɛ̄ pɛ̍, chɔ̍ŋ i̍di̍i̍yo̍ ha̍a̍a̍ a̍ pāa̍le̍ŋ dēlɔ̄ɔ̍, ō wā kɔ᷅llo̍ kēēlāa̍ le̍ wāna̍ ke᷅ ndu̍ ta̍u̍ ta̍u̍ wo̍. Kɛ̍ wānāā kɛ̄ndīa̍a̍ nda̍ nda̍, kīo̍o̍ nda̍ kē wa᷅ŋnda̍ nyɔ̄ɔ̍ŋ ni̍, ndu̍yɛ̍ tē ā wa̍ yɔ̄ŋgōo̍ pɛ̍, yɔ̄ŋgōo̍ a̍ kɔ̄llo̍ kpo̍u̍.

²⁷Sa̍lālā wānāā dɛ̍nɛ̍ wɔ̍ɔ̍ŋnda̍ sōlī o̍ Mɛ̄lɛ̄ka̍ Ya̍a̍wɛ̄ɛ̄ lo̍ la̍ŋ, Mɛ̄lɛ̄ka̍ ye̍e̍mā bɛ̍ɛ̍ mbō chē la̍ŋ te̍, tāāma̍ fa̍ū sa̍lālā nda̍ sōlī o̍ ndu̍ lo̍ a̍ yīya᷄ŋnda̍ wɔ̍ɔ̍ŋnda̍ŋ o̍ lākɔ̄l ta̍ŋ.

²⁸Se̍ī lāka̍fāa̍, dɛ̍nɛ̍ pa̍lāa̍ o̍ sɔ̍lā ni̍. Kɛ̍ se̍ī tōnya̍a̍ ndu̍, hīōūwɔ̄ɔ̍ o̍ hi̍a̍ū la̍chi̍ a̍ se̍īle̍ŋ tɛ̄ndāa̍ wāŋnda̍ tɛ̄ɛ̄ŋ lɔ̍ɔ̍ o̍ lɔ̍ɔ̍ ni̍.

²⁹Wāna̍ dɛ̍nɛ̍ wɔ̍ɔ̍ŋndo̍, wāna̍ hɔ̄lāā hēēlāa̍ o̍ wa᷅ ni̍. Kɛ̍ wānā tōnya̍a̍ ndu̍, tē ō wa̍ nyɛ̄ o̍ nyɛ̄ tōsā pɛ̍, mɛ̄ɛ̍ mbō yīya̍ŋ fɛ̍lɛ̍ŋ nyɛ̍ kɛ̄ndɛ̄ kɛ̍ndɛ̄.

³⁰Mɛ̄ɛ̍ o̍ mɛ̄ɛ̍ wāna̍ chi̍o̍o̍ nɔ̍ tāāsi̍o̍o̍ a̍ sīnā pɛ̄ŋgo̍o̍, ndu̍yɛ̍ a̍ kɔ̄l kālo̍o̍, ō nɔ̍lā mbō yēm Mɛ̄lɛ̄ka̍ Ya̍a̍wɛ̄ɛ̄ le̍.

³¹Mī wāŋndo̍ ō bɛ̄ɛ̄ndi̍a̍ŋ a̍ su̍a̍ā ndūa̍a̍ chɔ̄ūwa̍ le̍ kɔ̄la̍ŋ ya̍a̍mɔ̍ɔ̍wa̍a̍ ndūa̍a̍ chīŋa̍la᷅ŋndo̍ a̍ sɔ̍ŋgɔ̄ɔ̍, kɛ̍ wānā ko̍ŋ, ō cho̍ kpa̍āya̍ ndɔ̄ɔ̍ le̍ tōsā mbō yēm te̍, Mɛ̄lɛ̄ka̍ Ya̍a̍wɛ̄ɛ̍ ke᷅ ndu̍ kpāāyāa̍ ni̍ mbō yēm.