Read Southern Kisi Pu̍lɔ̍wāā 22 Bible Online

Pu̍lɔ̍wāā 22 - Southern Kisi bible

Pu̍lɔ̍wāā 22

¹Dīōlā kɛ̄ndɛ̄la̍ŋ la̍ hi̍o̍ū nāŋɔ̄ɔ̄ a̍ sūllo̍. Wāŋnda̍ nu̍m bɛ̄ɛ̄le̍ŋ kīo̍o̍, ndu̍ hi̍o̍ū nāŋɔ̄ɔ̄ a̍ ko̍o̍līi̍yo̍ŋ nɔ̄ɔ̍ ndu̍yɛ̍ a̍ ka̍ni̍ŋ hu̍mbo᷄ŋ.

²Wānā su̍lāā ni̍, wānā ta̍mbɛ̍i̍ ni̍, nyɛ̄ pīlɛ̍ kpe̍ nda̍ chō ni̍, nda̍ ŋi̍ɔ̍ɔ̍ŋ fa̍ū, Mɛ̄lɛ̄ka̍ Ya̍a̍wɛ̄ɛ̍ to̍o̍si̍a̍a̍ nda̍ ni̍.

³Wāna̍ kɔ̄l kālo̍o̍, mbō nɔ̄la̍ mbō chē kpūndɔ̍ɔ̍ ndu̍ lāchī, mbō kpɛ̄kpɛ̍la̍ ndu̍. Kɛ̍ dīɔ̄mndo̍ ndu̍ ndu̍, ō lō kɔ᷅la̍ŋ mbō kɔ̍ de᷅l o̍ kpūndɔ̍ɔ̍ ni᷄ŋ.

⁴Wāna̍ ye̍e̍ma̍ sūllo̍, a̍ bɛ̄ɛ̄le̍ŋ ndu̍yɛ̍ a̍ yōōmū vīlɛ̄īyo̍ pɛ̍, wa̍ wa̍nā tu̍sīa̍ŋ to̍o̍lō, ndu̍yɛ̍ mā nɔ̄ sīōōŋnde̍ le̍ Mɛ̄lɛ̄ka̍ Ya̍a̍wɛ̄ɛ̄.

⁵Wāna̍ dɛ̍nɛ̍ wɔ̍ɔ̍ŋndo̍ nɛ̄i̍ ndɔ̄ɔ̍ ō sāāmba᷅ŋ kpo̍u̍ o̍ wa᷅ a̍ yɔ̄ɔ̍ŋ ni̍, a̍ yāŋɔ̄ɔ̄la̍ŋ lā tīūwāā ndu̍ lāchī sɔ̍. Wāna̍ ma̍ndā ho̍ō ndu̍ pi̍la̍ a̍ mɛ̄ɛ̍ o̍ to̍sā sɔ̍ɔ̍ŋ yɛ̍ wo̍, ō ku̍ē o̍ nɛ̄ī wa̍ā le̍nde̍ cho̍o̍ le̍.

⁶Ō bɛ̄ndā mī wānā ma̍nda̍ chūā nūmndo̍ lɔ̍ɔ̍ o̍ cho̍ ō pɔ̄mbɔ̄ wo̍ mɛ̄ɛ̍ o̍ nɔ̍ le̍ wāa̍ yɛ̍. Ā yɔ̍ŋ bɛ̍ɛ̍ mbō hu᷄ŋ su᷅l ni᷅ŋ ka̍a̍so̍ŋnɔ̍, ō fe̍ŋāŋ o̍ bā kōŋ chōo̍ le̍.

⁷Wānāā su̍lāa̍, nda̍ wa᷅ ma̍sāa̍ wānāā tāmbɛ̍i̍ya̍ chōo̍ ni̍. Tē a̍ ye̍e̍ma̍ mā sīmnu᷄ŋ māā bu̍ɛ̍ī le̍ wāŋndo̍ pɛ̍, bi̍i̍ ndu̍ kūo̍o̍ o̍ bā.

⁸Tē wānā sa̍ŋ ka̍fāla̍ŋ pɛ̍, dɛ̍nɛ̍ pa̍lāa̍ ŋ̄ kūāū ni̍. Kpāāya̍ nūm o̍o̍ nɔ̍ le̍ wāŋnda̍ nyɛ̄ kīndīlāa̍ hāndɔ̄ɔ̍ chōo̍ wo̍ kpo̍u̍ mbō mɛ̄ɛ̄lu̍.

⁹Wāna̍ īkɛ̄ndɔ̄ɔ̍ sa̍lāa̍ Mɛ̄lɛ̄ka̍ ō dūāū ndu̍ ni̍, fo̍ndōle̍, le̍ mɛ̄ɛ̍ o̍ ke᷅ wa̍nāā tāmbɛ̍i̍ya̍ nyɛ̄ dīa̍a̍ yɛ̍.

¹⁰Le̍ sɔ̍ŋgɔ̄la̍ŋ chīīyo̍, a̍ sɛ̄ɛ̄ŋgi̍āŋnda̍ŋ, a̍ yīōūwa᷅ŋnda̍ŋ, wa᷅na̍ ma᷅m chāāŋnda̍ mbō hūŋ a̍ sɔ̄ɔ̍ŋ mu̍ŋ ndo̍, lā to̍ū ndu̍, mbō fūla̍ nya̍ tɛ̄ɛ̄ŋ.

¹¹Wāna̍ ye̍e̍mā ho̍ō kɔ̄l dīāndāa̍ nɔ̄ɔ̍ ndu̍yɛ̍ mbō yēēmā di̍o̍mndā kɛ̄ndɛ̄la̍ŋ sūɛ̍i̍ yo̍, māsā bɛ̍ndōo̍ bɛ̍ɛ̍, mbō wa̍ ndi̍a̍a̍mɔ̍ɔ̍ ndɔ̄ɔ̍.

¹²Dīōmndā kɔ̄l kālu̍ la̍ŋ, māndāa̍ Mɛ̄lɛ̄ka̍ Ya̍a̍wɛ̄ɛ̄ o̍ ma̍ndā la̍ŋ ni̍, kɛ̍ dīōmndā lāchōōwā la̍ŋ nda̍ŋ, mbō tɛ̄ɛ̄mbu̍u̍ la̍ŋ.

¹³Wāna̍ sīɛ̄lɛ̍i̍yo̍ ndu̍ nɔ̍ chālnɔ᷄ŋndo̍ chīɛ̄ī ni̍ŋ ni̍, mbō dīmi̍ āā, “Kpɔ̍kūŋndo̍ chō bālɔ̄ɔ̍. Tē I̍ fu̍la̍ o̍ bɛ̍ɛ̄ pɛ̍, ō dīī ya̍.”

¹⁴Wānā la̍nɔ̍ su̍u̍ndɛ̍i̍yo̍, dīōmndā ndɔ̄la̍ŋ, yāŋɔ̄ɔ̄lē wɔ̄ɔ̍ŋnde̍ŋ pi̍la̍ la̍ cho̍ ni̍. Wāna̍ Mɛ̄lɛ̄ka̍ Ya̍a̍wɛ̄ɛ̄ o̍ dūāūnūŋ tu̍mbe̍ a̍ ndu̍ wo̍, ndu̍ nɔ̍ hāūwo̍ o̍ yāŋɔ̄ɔ̄lē ndɔ̄le̍ŋ ni̍.

¹⁵Chɛ̄lɛ̄kpɛ̍ le̍nde̍ o̍ chɛ̄lɛ̄kpɛ̍ le̍nde̍, mɛ̄ɛ̍ mbō nɔ̄ dīɔ̄mnde̍, nyɛ̍ to̍sā mī dīɔ̄mnde̍ chūū o̍ kɔ̄l ndɔ̄ɔ̍ ni᷄ŋ ndo̍ mɛ̄ɛ̍ sīlāa̍ ndu̍, kpɔ̄ndāa̍ a̍ lɔ̄ɔ̍.

¹⁶Wānā o̍ wāna̍ ha̍ndu̍ wānāā tāmbɛ̍i̍ya̍ nyɛ̄ kīndīlāa̍ chōo̍ pɛ̍ le̍ mbō chɔ̄ɔ̄lu̍ sūllo̍ sɔ̄lā, ɔ̄ɔ̄ wānā o̍ wāna̍ di̍mi̍ pɛ̍ māā wānāa̍ cho̍ ni᷅ŋ ā sūlāā wa̍, māā nda̍ o̍ ke᷅ nyɔ̍ɔ̍ŋ ni̍, o̍ tāmbe̍i̍ ni᷄ŋ wānā ko̍ŋ ō mɛ̄ɛ̄lū ni̍.

¹⁷Ya̍ŋ ni᷅la̍ŋ nyɛ̄ kɛ̄ndɛ̄ kɛ̍ndɛ̄, mā tūēī sɔ̄ɔ̍ŋ kɔ̄l kālu̍ŋ wānāā kɔ̄l kālu̍a̍a̍ ā dīmi̍ wo̍ŋ. Nyɛ̄ o̍ nyɛ̄ ya̍ I̍ cho̍ nu̍m pɛ̄ɛ̄kū, dɔ̍u̍ kɔ̍l nūmndo̍ nyɛ̍ kɛ̄ndɛ̄ kɛ̍ndɛ̄, o̍ ndu̍ nīla̍ŋ yāŋɔ̄ɔ̍.

¹⁸Tē a̍ kɛ̍si̍ŋ sɔ̍ɔ̍ŋ mu᷅ŋ o̍ kɔ̄l pɛ̍, ndu̍yɛ̍ mā nɔ̍la̍ mā to̍mbo̍la̍ mu̍ŋ kpo̍u̍, ā nɔ̄lā mā sɔ̍la̍ kɔ̄l hīnīa̍a̍.

¹⁹I̍ cho̍ nu̍m pɔ̍ɔ̍ sɔ̄ɔ̍ŋ mu᷅ŋ pɛ̄ɛ̄kōo̍, le̍ mā lo̍ o̍ ko̍ŋ mā dɔ̄ū tīīnda᷄ŋ nu̍mndo̍ o̍ Mɛ̄lɛ̄ka̍ Ya̍a̍wɛ̄ɛ̄ ni̍ŋ.

²⁰I̍ po̍o̍nyi̍a̍l nu̍m sɔ̄ɔ̍ŋ be̍le̍-ya̍a̍. Sɔ̄ɔ̍ŋ nɔ̍lā mī ŋ̄ ke̍ nu̍m kɔ̄l kālo̍o̍ a̍ sīlāa̍ wo̍ŋ.

²¹Ŋ̄ nɔ̄lā mī ŋ̄ pɛ̄ɛ̄ku̍ nu̍m sɔ̄ɔ̍ŋ cho̍ sa̍kpō wo̍ŋ, ndu̍yɛ̍ a̍ tōnya̍a̍. Ko̍ŋ to̍sā ni̍, tē ā vēm nu̍m le̍ īsɔ̄ɔ̍ o̍ īsɔ̄ɔ̍ la̍kɔ̍ fūlā kɔ̄ɔ̄lī pɛ̍, ā nɔ̄lā mā chu̍u̍ wāna̍ ve᷅m nu̍mndo̍ mūlī tōnya̍a̍.

²²Po̍o̍ndā wānā ta̍mbɛ̍i̍yo̍ nyɛ̄ ndɔ̄ɔ̍ o̍ bā a̍ wāŋta̍ndā, le̍ mɛ̄ɛ̍ o̍ cho̍ ō tāmbɛ̍i̍ yɛ̍ le̍. To̍sāl wāna̍ bā hāvɛ̍i̍yo̍ ka̍fāla̍ŋ o̍ tōŋgo̍ kɔ̍ɔ̍sɔ̍ɔ̍ ni᷄ŋ mā tūŋ ndu̍ di̍ ndɔ̄ɔ̍ le̍.

²³Kāni̍ fo̍ndōle̍, wānāā wāā le̍nde̍, Mɛ̄lɛ̄ka̍ Ya̍a̍wɛ̄ɛ̄ ndu̍ su̍ŋgū le̍ nda̍ ni̍, mbō pōōndi̍a̍a̍ wānāa̍ tɛ̍ɛ̍mbūū yo̍o̍mūlā wānāā bā hāvɛ̍i̍ya̍a̍ wa̍ā le̍nde̍ wa̍ nyɔ̄ɔ̍ŋ o̍ bā.

²⁴To̍sā nāāŋa᷅ŋndo̍ a̍ wāna̍ nɔ̍ ho̍ō kɔ̄l bīŋgīo̍o̍ wo̍ le̍. Wāna̍ nɛ̍ī ho̍ō a̍ tu̍mbe̍ dɔ̍u̍nɔ᷄ŋ te̍ wo̍, ya̍ā nāāŋa᷅ŋ a̍ ndu̍ le̍.

²⁵Tē ā yɛ̄ɛ̄ nāāŋa᷅ŋndo̍ a̍ ndu̍ pɛ̍ nūm bɛ̍ɛ̍ ā chō ka̍ā ndɔ̄ɔ̍ chūā. O̍ ko̍ŋ, mā ha̍u̍ o̍ yāŋɔ̄ɔ̄le̍ŋ a̍ nɔ̍lā lɛ̍ mā hɛ̄lu᷄ŋ mā fu̍la̍ o̍ ka̍ā wāā le̍nde̍ ni̍ŋ te̍.

²⁶Wo̍ū lābā o̍ wāŋndo̍ tāānīo̍o̍ ni᷄ŋ fɛ̍ɛ̍ŋ a̍ fɛ̍ɛ̍ŋ te̍. Si᷅m le̍ wāŋndo̍ fɛ̍ɛ̍ŋ a̍ fɛ̍ɛ̍ŋ mā chu̍a̍ būŋgɛ̄i̍ le̍ kūe̍e̍ wānā ko̍ŋ ō bīī yo̍ pāāwā le̍.

²⁷Tē a̍ ta̍a̍ni̍ wāŋndo̍ pɛ̍, mā nɔ̍la̍ ku̍e̍e̍ ŋ̄ tāāni̍ ndu̍ le̍ ndu̍ wo̍ pāāwā le̍, ā kūɛ̄nu᷄ŋ a̍ kpēlē nu̍mndo̍ le̍ kūe̍e̍ pi̍la̍a̍.

²⁸Tē lā sālu̍ pɛ̄ŋgu̍la̍ŋ nya̍ wāŋndo̍ pɛ̍, hi̍a̍ū pɛ̄ŋgu̍la̍ māsīndɛ̄lā ŋ̄ kōma̍l mi̍ fi̍nyāā nyāā ma̍māa̍ ā kɛ̄sī la̍ŋ mā lūɛ̄ī o̍ fo̍ndāŋ wāŋndo̍ ni᷄ŋ te̍.

²⁹Wāna̍ si̍nā ho̍ō wa̍li̍ ndɔ̄ɔ̍ nyɛ̄ kɛ̄ndɛ̄ kɛ̍ndɛ̄ wo̍, le̍ māsāā bɛ̍ndūa̍a̍ o̍ to̍sā wa̍llo̍ ni̍, ō to̍sā wa̍llo̍ le̍ wānāā yɔ̄ŋāa̍ le̍.