Read Southern Kisi Pu̍lɔ̍wāā 23 Bible Online

Pu̍lɔ̍wāā 23 - Southern Kisi bible

Pu̍lɔ̍wāā 23

¹Tē lā cha᷄l nyɛ̄ dīa̍a̍ dīo̍o̍ nya̍ māsāa̍ pɛ̍, mɛ̍ɛ̍nda̍ŋ nyɛ̍ dīāā nya̍ chō dīo̍o̍ wo̍, mā chē mɛ̄ɛ̍ o̍ cho̍ nyɛ̄ dīāā lēbɛ̄ɛ̄ yɛ̍.

²Wa̍ bɛ̍ɛ̍ wa᷅na̍ lēpūlu̍, kɛ̍si̍ pu̍lu̍le̍ le̍ŋ, mā si̍na̍ mɛ̄ɛ̍ ŋ̄ dīā nyɛ̍ dīāā kōŋ yɛ̍.

³Ā yɔ᷄ŋ bɛ̍ɛ̍ mī nyɛ̄ dīāā kōŋ ō wa̍ nyɛ̄ dīāā kɛ̄ndɛ̄ bɛ̄ndū, to̍sā pūlu̍le̍ŋ o̍ ndu̍ dīo̍o̍ ni᷄ŋ te̍. Mbō wa̍ dɔ̍ɔ̍ māā kāŋgālāa̍ māsā ko̍ŋ ō chō nu̍m tōsāllo̍ ni̍, le̍ mbō chē wāna̍ ŋ̄ chō wo̍.

⁴Yɔ̍ɔ̍kpīāā nūm pi̍la̍ le̍ chīēī chīēīyo̍ le̍ sūllo̍ sɔ̄lāa̍ le̍. Wa̍ wa᷅na̍ kɔ̍l kālu̍, to̍sā ī wāā le̍nde̍ le̍.

⁵Kāni̍ fo̍ndōle̍, sūllo̍, o̍ te̍le̍ŋ bi̍ŋgī bɛ̄ŋgu̍ mbō kūɛ̄nu᷄ŋ kpo̍u̍. Mɛ̄ɛ̍ kōwɔ̍ɔ̍ ō chāŋ nu̍a̍ā o̍ lē pīlɛ̍ ni᷄ŋ mbō kūɛ̄nu᷄ŋ yɛ̍, le̍nde̍ o̍ ku̍a̍ŋnūŋ ni̍.

⁶Tē wāna̍ sɔ̄ŋgbɔ̍ɔ̍ŋndo̍ ō vēēlu̍ nu̍m le̍ nyɛ̄ dīa̍a̍ pɛ̍, sɔ̍ɔ̍ŋgūū le̍. Mɛ̄ɛ̍ o̍ mɛ̄ɛ̍ nyɛ̄ dīāā kōŋ ō na᷄ŋ, yēēmɛ̍i̍ bi̍ī nu̍m le̍ ndu̍ mā sɔ̍ɔ̍ŋgu̍u̍ le̍.

⁷Wāna̍ sɔ̄ŋgbɔ̍ɔ̍ŋndo̍, tē ō bɛ̄ɛ̄ndi̍a̍a̍ nyɛ̄ dīa̍a̍ pɛ̍, ō wā yi̍ya᷄ŋndo̍, nyɛ̄ o̍ pi̍si̍ le̍ nyɛ̄ dīāā kōŋ bɛ̄ɛ̄ndīa̍a̍ kpɛ̍ wo̍. Tē ō vēēlu̍ nu̍m le̍ nyɛ̄ dīa̍a̍ pɛ̍, lā wā di̍o̍o̍ mbō dīmūl nu̍m āā, “Di̍o̍ nyɛ̍ dīa̍a̍ ndu̍yɛ̍ mā ko̍l vɛ̄lɛ̄ mūɛ̄īya̍ŋ.” Kɛ̍ nyɛ̍ o̍ wa᷅ nu̍m ko̍ŋ di̍mūllo̍ wo̍, nyɛ̄ chēle̍ŋ pɔ̍ wa᷅ o̍ kɔ̄l ndɔ̄ɔ̍ ni᷄ŋ ni̍.

⁸O̍ mɛ̄ɛ̄lu̍la̍ŋ kpɔ̍ŋ, nyɛ̄ dīāā ŋ̄ dē ko̍ŋ ndo̍ ā chō ndu̍ kūūsūū kpo̍u̍. O̍ ko̍ŋ, ba̍li̍ka̍ ŋ̄ me᷄l ndu̍ le̍ nyɛ̄ dīāā kōŋ ndo̍, mbō kūɛ̄nu᷄ŋ fo̍ndō fu̍u̍.

⁹Dīɔ̄mndo̍, wānā sa̍ŋgā so̍ndō nūm fu̍u̍ le̍ sūɛ̍i̍ nāa̍ ndu̍ chu̍a̍. Kāni̍ so̍o̍ bɛ̍ɛ̍ sɔ̍ɔ̍ŋ kɔ̄l kālo̍ŋ nāa̍ ndu̍ chu̍a̍, ō ye᷅ŋ nu̍m lānī le̍.

¹⁰Tē lā chīɛ̄ɛ̄li̍āŋ lɛ᷅ŋnde̍ŋ nya̍ wāŋndo̍ pɛ̍, pɛ̄ŋgu̍la̍ māsīndɛ̄lā nda̍ hāndu̍ nya̍ tɛ̄ɛ̄ŋ a̍ pōūta̍ŋ nda̍ŋ, fa̍ŋā pōūtā lāŋ mā hīōū o̍ lɛ̄ŋndē pi̍la̍le̍ŋ ni᷄ŋ te̍, kɛ̄lɛ̄ŋgāāle̍, mā po̍o̍nda̍ vīi̍ nɔ̍ fi̍nyā le̍ wo̍ lɛ̄ŋndē ndɔ̄le̍ŋ o̍ bā.

¹¹Kāni̍ fo̍ndōle̍, wāna̍ pi̍ŋī nda̍ wo̍, wāna̍ kpāāyāa̍ o̍ cho̍ ni̍. Ō chō sūŋgɔ̄ɔ̄ le̍ nda̍, mbō sīmu̍l nu̍m.

¹²Dɔ̍u̍ kɔ᷅l nūmndo̍ o̍ nīla̍ŋ yāŋɔ̄ɔ̍ o̍ sīlāla̍ŋ. Ya̍ŋ ni᷅la̍ŋ nyɛ̄ kɛ̄ndɛ̄ kɛ̍ndɛ̄ o̍ sɔ̄ɔ̍ŋ kɔ̄l kālo̍ŋ.

¹³Tē chūā nūmndo̍ tɛ̄ɛ̄mbu̍u̍ sūɛ̍i̍ pɛ̍, wo᷅ le̍ ndu̍ māndā kɛ̄ndɔ̄ɔ̍ le̍ ndu̍ mīŋgīo̍o̍ o̍ nɛ̄ī le̍. Sīōŋndē ŋ̄ chō chūā nūmndo̍ lɔ̄ɔ̄ le̍ ndu̍ sīlāa̍ le̍ŋ lē di̍ī ndu̍ le̍.

¹⁴Tē ō tɛ̄ɛ̄mbu̍u̍ sūɛ̍i̍ pɛ̍, ma̍ lūāā ndu̍ a̍ sīōŋnde̍ŋ, mɛ̄ɛ̍ a̍ ma̍nda̍ ndu̍ ō sɔ̍lā pīɔ̍m te̍.

¹⁵Po̍ nūu̍, tē ā sīmnu᷄ŋ chu̍ā kɔ̄l kālu̍ pɛ̍, I̍ na̍nu᷄ŋ kɔ̄l ta̍u̍.

¹⁶Tē I̍ tu̍e̍ī nu̍m sɔ̄ɔ̍ŋ kɔ̄l kālo̍ŋ dīmīo̍o̍ pɛ̍, kɔ̄l nūu̍ dɔ̄ɔ̄nu᷄ŋ nya̍a̍le̍ ta̍u̍ ta̍u̍.

¹⁷Nɔ᷅ nɛ̄īyɔ᷄ŋ wāna̍ yɔ̄ŋ wɔ̄ɔ̍ŋndo̍ o̍ kɔ̄l nūmndo̍ ni᷄ŋ te̍. Kɛ̍ nɔ̍ bɛ̍ɛ̄le̍ŋ le̍ Mɛ̄lɛ̄ka̍ Ya̍a̍wɛ̄ɛ̄ le̍ te̍le̍ŋ o̍ te̍le̍ŋ.

¹⁸Ko̍ŋ to̍sā ni̍, mā nɔ̄ nyɛ̄ ŋ̄ wā le̍hɔ᷅l o̍ nɛ̄ī le̍ ndu̍ o̍ sīɔ̄dīi̍ lāchīo̍o̍ ni᷄ŋ ndo̍. Ndu̍yɛ̍ nyɛ̄ ŋ̄ wā ko̍ŋ le̍hɔ᷅l o̍ nɛ̄ī le̍ ndu̍ wo̍ ō ve᷅ nyɛ̍ ki̍o̍lu̍ kɔ̄ɔ̄ le̍.

¹⁹Ya̍ŋ ni᷅la̍ŋ o̍ nyɛ̄ ya̍ I̍ cho̍ nu̍m dīmūllo̍ wo̍ po̍ nūu̍, mā sīmnu᷄ŋ chu̍ā kɔ̄l kālu̍. Ndu̍yɛ̍ dɔ̍u̍ kɔ̍l nūmndo̍ kpo̍u̍, o̍ wāa̍ o̍ nɛ̄i̍ tōnya̍a̍ chōo̍.

²⁰Wānāa̍ ko᷅l ha̍ā mūɛ̄īya̍ŋ kōlɔ̄ɔ̄ bɛ̄ndōo̍ wa̍, ɔ̄ɔ̄ wānāā lēpūlu̍a̍a̍ bɛ̍ndūa̍a̍ hɛ̍na̍ŋ ha̍ā vīsīo̍ŋ hɛ̄na᷄ŋ bɛ̍ndōo̍ wa̍, tu̍āl nda̍ kɔ̄ɔ̄lī mā sīmnu᷄ŋ māā nda̍ le̍.

²¹Kāni̍ fo̍ndōle̍, wānāa̍ ko᷅l ha̍ā mūɛ̄īya̍ŋ kōlɔ̄ɔ̄ bɛ̄ndōo̍ wa̍, a̍ wānāā lēpūlu̍a̍a̍, o̍ tāmbe̍i̍ ni᷄ŋ nda̍ mɛ̄ɛ̄lū ni̍. Wāŋnda̍ ha̍ā, lūa̍a̍ŋ ma̍ cho̍ wa̍li̍ ndāa̍ ni̍, le̍ he̍ī, le̍ te̍le̍ŋ o̍ te̍le̍ŋ nyɛ̄lā yūūlu̍la̍ŋ la̍ŋ la̍ wa᷅ nda̍ lēkɔ̄ɔ̍ ni̍.

²²Ya̍ŋ fi̍nyā nu̍m nīla̍ŋ, o̍ to̍sa̍ ma̍ wā yōōmū wo̍. Ndu̍yɛ̍ bōōndi̍i̍ kālā nu̍m ō wā o̍ yu̍wɛ̍i̍ ye̍, kɛ̍ɛ̄ ndu̍ le̍.

²³Pi̍o̍ndu̍ to᷅nya̍a̍, mā chu̍a̍ ndu̍ māā nyɛ̄ nūm, pi̍sī ndu̍ mbō fūla̍ nu̍m o̍ bā le̍. Ki̍ndi̍ mā sɔ̍la̍ kɔ̄l kālo̍o̍, a̍ pɛ̄ɛ̄kū kɛ̄ndɔ̄ɔ̍, ndu̍yɛ̍ a̍ sīnā pɛ̄ŋgo̍o̍.

²⁴Tē po̍ nu̍mndo̍ ō wa̍ wānā kɛ̍ndɔ̄ɔ̍ pɛ̍, nūm fi̍nyāa̍ kɔ̄llo̍ ŋ̄ nāŋ ni̍. Kāla̍ chu̍a̍ nɔ̍ ho̍ō chūā kɔ̄l kālo̍o̍ wo̍, kɔ̄llo̍ pīla̍ o̍ nāŋ a̍ chūā ndɔ̄ ko̍ŋ ni̍.

²⁵To̍sa̍ mī fi̍nyā nūm nda̍ kālā nu̍m ā na᷄ŋ kɔ̄l a̍ nūm. To̍sa̍ mī kālā nu̍m ō dɔ̄ɔ̄nu᷄ŋ nya̍a̍le̍.

²⁶Po̍ nūu̍, ya̍ŋ ya̍ nīla̍ŋ nyɛ̄ kɛ̄ndɛ̄ kɛ̍ndɛ̄, ndu̍yɛ̍ mā mɛ̍ɛ̍nda̍ŋ mɛ̄ɛ̍ kēlālā nīla̍ŋ lā chō yɛ̍.

²⁷Wānā la̍nɔ̍ ti̍a̍māa̍, so̍o̍ŋ yi̍ŋgi̍lɛ̍i̍ wānā pɔ̍nɔ̍ɔ̍ dēl le̍ni̍ŋ ō nɔ̍lā fu̍lā lēni᷄ŋ te̍ wo̍ o̍ cho̍ ni̍. Wānā la̍nɔ̍ wa᷅ ho̍ō o̍ nɔ̄ɔ̍, kɛ̍ mbō tūāl wa᷅ŋ pīāāndūāā chēle̍ŋnda̍ kɔ̄ɔ̄lī wo̍, ō chō māchūāā mɛ̄ɛ̍ so̍o̍ŋ ŋ̄kpa̍līo̍o̍ ō chō nu̍a̍ā yɛ̍.

²⁸Wāŋ lāāndūa̍a̍ ha̍ā, mɛ̄ɛ̍ vīīya̍ ā chāl nu̍a̍ā wāŋndo̍ mɛ̄ŋgɛ̄lāa̍ o̍ nɛ̄ī le̍ ndu̍ dēlɔ̄ɔ̍ chōo̍ yɛ̍, le̍nde̍ nda̍ chō a̍ wāŋ pīāāndūa̍a̍ ni̍. Ndu̍yɛ̍ mā tōsa̍ wāŋ pīāāndūāā bɔ̄ɔ̍ bɔ̍ɔ̍ ā ve᷅ sa̍kpō a̍ lāāndāā ndāa̍ le̍.

²⁹Wāna̍ chu̍a̍ ho̍ō mūɛ̄īya̍ŋ kōlɔ̄ɔ̍ māā wa̍li̍ ndɔ̄, mūɛ̄īmā sɛ̄nɛ̄īmā o̍ cha᷅ ko̍, mɛ̄ɛ̍ mbō ko᷄l ma̍ŋ mbō sīna̍ mɛ̄ɛ̍ ma̍ cho̍ yɛ̍ wo̍, mɛ̄ɛ̍ wānā ko̍ŋ ō wā o̍ yōōmū ndɔ̄ɔ̍ ni᷄ŋ yɛ̍, ndu̍ cho̍ ho̍ō ni̍. Wāŋndo̍ ho̍ō, nyɛ̄ pālāa̍ wa᷅ le̍ ndu̍ ni̍. Wāna̍ kɔ̄l tāmbɛ̍i̍yo̍ o̍ wa᷅ ni̍. Wāna̍ ma̍lāā lāsɔ̍ŋgɔ̄ɔ̍ o̍ wa᷅ ni̍, ndu̍yɛ̍ wānā ŋɔ̍ɔ̍chīa̍ŋndo̍ o̍ wa᷅ ni̍. Nāa̍ o̍ nɔ̍ mbō sɔ̄la̍ lābōōlɔ᷄ŋ te̍ wa̍, lo̍ŋ o̍ sɔ̍lā bo̍o̍lɔ᷄ŋnda̍ŋ ni̍. Le̍ te̍le̍ŋ o̍ te̍le̍ŋ hɔ̄lta̍ŋ ndu̍ lā dīūwāā yɔ̍ɔ̄.

³⁰

³¹Chɛ᷅l mī mūɛ̄īya̍ŋ mā hūi̍ nu̍m te̍, chɔ̍ bɛ̍ɛ̍ ma̍ŋ mī mā wa̍ mā sīāŋā o̍ tāālāa̍ ni᷄ŋ, mī mā wa̍ hēlɔ̄ɔ̍ pe̍su̍ pe̍su̍, tē ā ko̍ŋ ma̍ŋ pɛ̍ mā tōl nu̍m o̍ lābo̍lō vi̍li̍ vi̍li̍.

³²O̍ mɛ̄ɛ̄lu̍la̍ŋ, mɛ̄ɛ̍ kɛ̄ū nyɛ̍ŋgi̍ wɔ̄ɔ̍ŋ wɔ̄ɔ̍ŋndo̍ ō lɔ̄wā nu̍a̍ā wānā yɛ̍, le̍nde̍ wa̍li̍ ma̍ to̍sā a̍ wānā wo̍ ō wā ni̍.

³³Tē a̍ ko̍l ma̍ŋ pɛ̍, nyɛ̄ ŋ̄ chi̍nūŋ bɛ̍ɛ̍ pa̍a̍ndū o̍ hɔ̄l te̍ wo̍, ndu̍ ŋ̄ chānūŋ o̍ hɔ̄l ni̍, ndu̍yɛ̍ mī nyɛ̄ o̍ nyɛ̄ ō lāāsi̍a̍ŋ nu̍m o̍ lēbōl kpo̍u̍, a̍ nɔ̍lā mā bīī nyɛ̄ o̍ nyɛ̄ bīlā le̍.

³⁴Dīāllo̍ŋ mī ŋ̄ vī nu̍m pɔ̍lī, mā yɔ̍nu̍ŋ mɛ̄ɛ̍ wāŋndo̍ ō wā nu̍a̍ā kɔ̄la̍ŋ o̍ dɛ̄ndɛ̄ bɛ̍ndu̍ ku̍ā o̍ mɛ̄ŋnda̍ŋ chōo̍ wo̍ ni᷄ŋ, mī dɛ̄ndɔ̄ɔ̍ ō fūūlu̍u̍ nāa̍ mɛ̄ŋnda̍ŋ mā wā nu̍a̍ā īkpōku̍ kpo᷅ku̍ bɛ̍ndūe̍i̍ ya̍, mī dɛ̄ndɔ̄ɔ̍ ō hi᷄ŋ ndu̍ hīŋ bɛ̄ndōo̍, mī dīāllo̍ŋ ŋ̄ vī ndu̍ pɔ̍lī pɔ̍lī bɛ̄ndū yɛ̍.

³⁵O̍ ko̍ŋ ŋ̄ nɔ̄ dīmīo̍o̍ ni̍ āā, “Lɔ̄ɔ̍ kpo̍sōŋ nda̍ lɔ̄ɔ̄ ya̍ nu̍a̍ā ni̍, ō chō māchūāā ā yɔ̄ŋu̍l la̍ le̍. Lɔ̄ɔ̍ nda̍ lɔ̄ɔ̄ ya̍ nu̍a̍ā ni̍, I̍ si̍na̍ŋ te̍. Kɛ̍ tē ya̍ i̍i̍ nɔ̍la̍ bɛ̍ɛ̍ pɛ̍ mī ya̍ i̍i̍ chɛ̍ŋ, I̍ wa̍ lākɔ̄ mā chēle̍ŋ chɔ̄ɔ̄lū kōlɔ̄ɔ̄.”