Read Southern Kisi Pu̍lɔ̍wāā 24 Bible Online

Pu̍lɔ̍wāā 24 - Southern Kisi bible

Pu̍lɔ̍wāā 24

¹Nɔ᷅ nɛ̄īyɔ᷄ŋ wānāā dɛ̍nɛ̍ wɔ̍ɔ̍ŋnda̍ o̍ kɔ̄l te̍. Ndu̍yɛ̍ vɛ̍lɛ̄, ya̍ā nāāŋa᷅ŋ a̍ nda̍ le̍.

²Kāni̍ fo̍ndōle̍, wānāā dɛ̍nɛ̍ wɔ̍ɔ̍ŋnda̍, yīya᷄ŋ ndāa̍ kpo̍u̍ le̍ sɔ̍ŋgɔ̄la̍ŋ mālɔ̄ɔ̍. Sɔ̄ɔ̍ŋ fu̍lā nda̍ o̍ lāsōndō wo̍ŋ kpo̍u̍, sɔ̄ɔ̍ŋ lākpūndɔ̍ŋ.

³Le̍ mī wānā nɔ̍la̍ mā ta̍ŋgu̍l chīɛ̄īyo̍, mɛ̄ɛ̍ mā nɔ̄ kɔ̄l kālo̍o̍. Ndu̍yɛ̍ le̍ mī chīɛ̄ī nūmndo̍ ō si᷄m yi̍, mɛ̄ɛ̍ mā nɔ̄ tāāsi̍o̍o̍.

⁴Tē wānā nɔ̍ kɔ̄l kālo̍o̍ pɛ̍, a̍ nɔ̍la̍ a̍ kɛ̍si̍ nyɛ̄m ba̍ā kāla᷄ŋ a̍ nyɛ̄m sūla᷄ŋ chīɛ̄ī ni᷄ŋ.

⁵Wānā nɔ̍ ho̍ō kɔ̄l kālo̍o̍ wo̍ ō nɔ̄ kpāāyāa̍, ō hīōū wa᷅na̍ nɔ̍ kpāāyā yɔ̍ŋāa̍ ho̍ō wo̍. Ndu̍yɛ̍ tāāsi̍o̍o̍ nɔ̄ɔ̍ ō hīōū dīāllūŋ kāla᷄ŋ nɔ̄ɔ̍.

⁶Le̍ chɔ̄ūwo̍ kīōlɔ̄ɔ̍ mɛ̄ɛ̍ mā nɔ̄ wānāā si̍lāā kɔ̄l kālu̍a̍a̍. Tē ā nɔ̄ wānāā si̍lāā kɔ̄l kālu̍a̍a̍ pɛ̍, mā wa̍ ta̍u̍ yōmɔ̄ɔ̍ ŋ̄ yām chɔ̍ūwo̍ ni̍.

⁷Dīɔ̄mndo̍ ō chē bɔ̍ɔ̍ kɔ̍l kālo̍o̍ sūɛ̍i̍ bɛ̍ndū bɛ̍ndū. Ō kɔ̍ bɛ̍ɛ̍ o̍ bɔ̄ŋa᷅ŋ o̍ dīō sāāsāa̍ sōndōo̍, ō nɔ̍lā mbō dīmi̍ nyɛ̄ o̍ nyɛ̄ o̍ bɔ̄ŋa᷅ŋ kōŋ ni᷄ŋ te̍.

⁸Wānā tu̍ū ho̍ō tūūlā wɔ̄ɔ̍ŋnda̍ŋ lɔ̍ɔ̍ o̍ lɔ̍ɔ̍ a̍ wāŋnda̍ wo̍, wānā ma̍lāā lākpūndɔ̍ɔ̍ wāŋnda̍ ā chā ndu̍ ni̍.

⁹Dīɔ̄mndo̍ tūūlā ndɔ̄la̍ŋ, yɔ̄ŋ wɔ̄ɔ̍ŋndo̍ la̍ wa᷅ ni̍. Wāna̍ ma᷅m ho̍ō wāŋnda̍ wo̍, wānā o̍ wānā ye̍e̍mā sūɛ̍i̍ ndūɛ̍i̍ le̍.

¹⁰Tē dɛ̍nɛ̍ pa̍lāa̍ ō kōma̍l nu̍m pɛ̍, mā nɔ̍la̍ mā bi̍u̍nu̍ŋ mā si̍m yi̍ le̍, mɛ̄ɛ̍ a̍ nɔ̍ di̍a̍llūŋ kālā le̍.

¹¹Tē wāŋnda̍ kūɛ̄ a̍ wāŋndo̍ le̍ ndu̍ dīyɔ̄ɔ̍ o̍ fo̍ndō fu̍u̍wo̍ chōo̍ pɛ̍, mi̍ nūm nɔ̄ kpāāyāa̍ le̍ mā chi̍i̍ndi̍a̍a̍ wānā ko̍ŋ, chi̍i̍ndi̍a̍a̍ ndu̍. Ā yɔ᷄ŋ bɛ̍ɛ̍ mā wa᷅ ni᷅ŋ le̍ wāŋndo̍ dīyɔ̄ɔ̍, tē ā nɔ̄ kpāāyāa̍ le̍ yōōmū ndɔ̄ɔ̍ chīīndīa̍a̍ pɛ̍, chi̍i̍ndi̍a̍a̍ ndu̍.

¹²Di̍mī āā, “Ya̍ I̍ si̍nā nyɛ᷅ o̍ nyɛ̄ a̍ ndi̍ o̍kɔ̄ɔ̄ le̍,” le̍. Kāni̍ fo̍ndōle̍, Mɛ̄lɛ̄ka̍ sīnā nyɛ̄ o̍ nyɛ̍ cho̍ wāna̍ chi̍o̍o̍ o̍ kɔ̄l, ndu̍yɛ̍ ō chō nu̍m chɔ̄ɔ̍. Yōōmū ŋ̄ nɔ̄ wo̍ bɛ̍ɛ̍ ndu̍ cho̍ ndu̍ māndāa̍ ni̍, ndu̍yɛ̍ ō sīnā yi̍ya̍ŋnda̍ nāā la̍ŋ. Ndu̍yɛ̍ ō chō wānā o̍ wānā pa̍a̍wā mɛ̄ɛ̍ kūɛ̍ɛ̍la̍ nu̍mnda̍ŋ lā chō yɛ̍.

¹³Po̍ nūu̍, wa̍ li̍a̍a̍ŋ dīo̍o̍, fo̍ndōle̍ līa̍a̍ŋ mā na᷄ŋ. Wāa̍ mālīɔ̍ɔ̍, yēēlāa̍ pīla̍ o̍ ye̍e̍la̍ ni̍.

¹⁴Le̍nde̍ ko̍ni̍, kɔ̄l kālo̍o̍ ō chō nyɛ̄ kɛ̄ndɛ̄ le̍ nūm ni̍. Tē a̍ sɔ̍la̍ ndu̍ pɛ̍, ā nɔ̄ nyɛ̄ ŋ̄ wā le̍hɔ᷅l o̍ nɛ̄ī le̍ ndu̍ o̍ sīɔ̄dīi̍ lāchīo̍o̍ ni᷄ŋ ndo̍. Ndu̍yɛ̍ nyɛ̄ ŋ̄ wā ko̍ŋ le̍hɔ᷅l o̍ nɛ̄ī le̍ ndu̍ wo̍, ō ve᷅ nyɛ̍ ki̍o̍lu̍ kɔ̄ɔ̄ le̍.

¹⁵Wa᷅ māā wānāā dɛ̍nɛ̍ wɔ̍ɔ̍ŋnda̍, a̍ cha᷅l mɛ̍ŋgɛ̄lāa̍ le̍ chīɛ̄īlā wānāā tōnya̍a̍ dēlɔ̄ɔ̍ chōo̍ wa̍ le̍. Wa᷅ wānā pu̍ŋgāā nyɛ̄m pi̍la̍ le̍.

¹⁶Wāna̍ cho̍ o̍ tōnya̍a̍ chōo̍ wo̍, mɛ̄ɛ̍ o̍ mɛ̄ɛ̍ nyɛ̄ pālāa̍ ō yīsi̍la̍ ndu̍ kōmāllo̍, mīīŋgōo̍ o̍ mi̍i̍ŋgū vɛ̍lɛ̄ ni̍ mbō si᷄m yi̍. Kɛ̍ wāna̍ dɛ̍nɛ̍ wɔ̍ɔ̍ŋndo̍ ndu̍, tē nyɛ̄ pālāa̍ ō kōma̍l ndu̍ pɛ̍, mɛ̄ɛ̄lu̍la̍ ndɔ̄la̍ŋ la̍ wa᷅ la̍ŋ ni̍.

¹⁷Tē dɛ̍nɛ̍ pa̍lāa̍ ō kōma̍l ya̍a̍mɔ̍ɔ̍nɔ̍ nu̍mndo̍ pɛ̍, na᷅ŋ kɔ̄l le̍ ke̍ŋ. Tē nyɛ̄ kīndīlāa̍ ō kōma̍l ndu̍ pɛ̍, du̍a̍u̍nu᷄ŋ nya̍a̍le̍ le̍ ke̍ŋ te̍.

¹⁸Tē a̍ to̍sa̍ ke̍ŋ pɛ̍, Mɛ̄lɛ̄ka̍ Ya̍a̍wɛ̄ɛ̄ o̍ cho̍ sīnā a̍ ndi̍ o̍kɔ̄ɔ̄. Ndu̍yɛ̍ ō hi̍nī kɔ᷅l a̍ ī wāā le̍nde̍ le̍. O̍ ko̍ŋ, dɛ̍nɛ̍ pa̍lāā ndu̍ o̍o̍ nɔ̍ le̍ ya̍a̍mɔ̍ɔ̍nɔ̍ nūm kōŋ tūsīo̍o̍ chōo̍ wo̍, ō tu̍sī lɛ̍ ndu̍ dɛ̍nɛ̍ pa̍lāā kōŋ chōo̍ le̍.

¹⁹Nɔ᷅ nɛ̄īyɔ᷄ŋ wāna̍ dɛ̍nɛ̍ wɔ̍ɔ̍ŋndo̍ le̍. Pa̍ŋālā wāna̍ yɔ̄ŋ wɔ̄ɔ̍ŋndo̍ le̍ nyɛ̄ ndɔ̄ɔ̍ le̍.

²⁰Kāni̍ fo̍ndōle̍, wāna̍ dɛ̍nɛ̍ wɔ̍ɔ̍ŋndo̍, ō nɔ̍ nyɛ᷅ o̍ nyɛ̄ kɛ̄ndɛ̄ o̍ sīɔ̄dīi̍ lāchīo̍o̍ ni̍ŋ te̍. Ndu̍yɛ̍ yōōmū ndɔ̄ɔ̍, kīōlōo̍ lē pīlɛ̍, mɛ̄ɛ̍ la̍mbūi̍yo̍ ō nyūm nu̍a̍ā yɛ̍.

²¹Po̍ nūu̍, nɔ̍ bɛ̍ɛ̄le̍ŋ le̍ Mɛ̄lɛ̄ka̍ Ya̍a̍wɛ̄ɛ̄, ndu̍yɛ̍ mā nɔ̄ bɛ̄ɛ̄le̍ŋ le̍ māsā bɛ̍ndōo̍. Wānā o̍ wāna̍ ki̍ndi̍ pɛ̍, le̍ nda̍ dīōmndo̍ sōlīo̍o̍, sɔ̍ɔ̍ŋgūū wānāā wāā le̍nde̍ cho̍o̍ le̍.

²²Kāni̍ fo̍ndōle̍, wānā wāā le̍nde̍, o̍ lē pīlɛ̍ ni᷄ŋ kpe̍, mī wānāā ŋīɔ̍ɔ̍ŋnda̍ ha̍ā ā tūsi̍ nda̍ nyɛ̄ pālāā bɛ̄ndōo̍ chōo̍. Tē a̍ sɔ̍ɔ̍ŋgu̍u̍ wānāā wāā le̍nde̍ chōo̍ pɛ̍, a̍ si̍nā nyɛ᷅ pālāā Mɛ̄lɛ̄ka̍, ɔ̄ɔ̄ māsā bɛ̍ndōo̍ chō nda̍ tūsī chōo̍ wo̍?

²³Sɔ̄ɔ̍ŋ kɔ̄l kālu̍ŋ che᷅le̍ŋ wānāā kɔ̄l kālu̍a̍a̍ ā dīmi̍ wo̍ŋ mu̍ŋ cho̍ vɛ̄lɛ̄ mu᷅ŋ ni̍. Nūm māsāa̍, ō bɛ̄nda̍ mā si̍m wānā o̍ wānā kɔ̍ɔ̍lī o̍ sūɛ̍i̍ ni᷄ŋ te̍.

²⁴Tē wāŋndo̍ tɛ̄ɛ̄mbu̍u̍ sūɛ̍i̍ pɛ̍, ke᷅ ndu̍ di̍o̍o̍ mā ma̍l ndu̍ māā ō tɛ̄ɛ̄mbu̍u̍ i̍sɔ̍ɔ̍ le̍ le̍. Tē a̍ to̍sa̍ ke̍ŋ pɛ̍, wāŋnda̍ ā mēna̍ nu̍m, ndu̍yɛ̍ wāŋnda̍ o̍ lɛ̄ŋnde̍ ni̍ŋ bɛ̍ɛ̍ŋ mā tu᷄l nu̍m lēyɛ̄.

²⁵Kɛ̍ nūm māsa̍ cho̍ ho̍ō sa̍kpō, tē wāŋndo̍ ō tɛ̄ɛ̄mbu̍u̍ sūɛ̍i̍ pɛ̍, a̍ ha̍ndu̍ ndu̍ nyɛ̄ pālāa̍ chōo̍ le̍ ndi̍ wo̍, dɛ̍nɛ̍ kɛ̍ndɔ̄ɔ̍ ndu̍ wa᷅ le̍ nūm lɔ̍ɔ̍ o̍ lɔ̍ɔ̍ ni̍, ndu̍yɛ̍ mā sɔ̍la̍ vɛ̄lɛ̄ sa̍lāa̍ ta̍u̍ ta̍u̍.

²⁶Wāŋndo̍ dīōmndo̍ mūlīo̍o̍ o̍ nɛ̄ī sa̍kpō, ō chō māchūāā mɛ̄ɛ̍ wāŋndo̍ ō chɔ̄m nu̍a̍ā chāa̍ŋ ndɔ̍ kāālāa̍ a̍ ndu̍ kɔ̄ma᷄ŋndo̍ yɛ̍.

²⁷Tē a̍ ye̍e̍ma̍ tāŋgūllo̍ pɛ̍, lɔ̍ɔ̍pa̍ mā ta̍ŋgu̍l, bɛ̍ɛ̍ndi̍a̍ŋ fɛ̍ɛ̍ŋ nyɛ̍ kɛ̄ndɛ̄ kɛ̍ndɛ̄, ma̍ to̍sa̍ wa̍llo̍ mā sɔ̍la̍ nyɛ̄ dīa̍a̍. Tē ā nɔ̄ ni᷅ŋ nyɛ̄ dīa̍a̍ pɛ̍, a̍ ta̍ŋgu̍l chīɛ̄ī nūmndo̍.

²⁸Tɛ̍ndāl wāna̍ nya̍ chīɛ̄ɛ̄li̍āŋndo̍ se̍īlē lāka̍fāle̍ŋ te̍. Dīōm o̍ dīōm hūīyāā o̍ fu̍lā nu̍m o̍ sōndō le̍.

²⁹Di̍mī māā nyɛ̄ wāŋndo̍ ō tōsa̍l nu̍m ndo̍, nūm bɛ̍ɛ̍ mɛ̄ɛ̍ mā to̍sa̍l ndu̍ le̍, māā mɛ̄ɛ̍ mā mi̍ŋgu̍l ndu̍ māa̍ ko̍ŋ.

³⁰Pāa̍le̍ pi᷅lɛ̍, I̍ wa̍ hīōūwɔ̄ɔ̍, mi̍ ke̍e̍kū o̍ chīɛ̄ī wāna̍ īsīɛ̄lɛ̍i̍ pi᷅lɛ̍ ni᷄ŋ, o̍ nɔ̍ ho̍ō kɔ̄l kālu̍ o̍ kɔ̄l kālu̍ le̍ wo̍, ndu̍yɛ̍ a̍ o̍ kpe̍le̍ ndɔ̍ mākīle̍pīi̍yo̍ ni᷄ŋ.

³¹Yɔ̄ɔ̍ŋ wa̍ ŋ̄ hīālāā chīɛ̍i̍ he̍ī a̍ kpe̍le̍ mākīle̍pīi̍yo̍ ho̍ō kpo̍u̍. Mi̍ bīllo̍ chūā chīɛ̍i̍ he̍ī a̍ kpe̍lo̍o̍ ho̍ō kpo̍u̍. Kpākīla̍ lāpōūla̍ wa̍ chīɛ̍i̍ he̍ī a̍ kpe̍le̍ mākīle̍pīi̍yo̍ ho̍ō lā bālāā la̍ŋ, lā wa̍ lā pūūsi̍ɛ̍i̍ kpo̍u̍.

³²Mɛ̄ɛ̍ ya̍ I̍ mɛ̍ɛ̍ndi̍a̍ŋ chi̍ɛ̍i̍ he̍ī, a̍ kpe̍lo̍o̍ ho̍ō, mi̍ sɔ̍lā pɛ̄ɛ̄kōo̍.

³³Tē wānā ye̍e̍ma̍ pɛ̍, hi̍ni̍ŋ mā di̍mi̍ āā, “I̍ lɔ᷅l lɔ̍ nyɛ̄ pɔ̄mbɔ̄.” Ka̍fa̍la̍ ba̍la̍ŋ mā lōm pēlo̍ŋ chōo̍ mā di̍mi̍ āā, “I̍ pɛ̍ŋgī wɔ̍.”

³⁴Bōōndi̍i̍ ŋ̄ chō wā īhīni̍ lɔ̍mā māŋ nde̍, bōōndi̍i̍ ke̍ŋ tāmbe̍i̍ ī chō nu̍m kpūwā ni̍, mɛ̄ɛ̍ wānā wɔ̍ɔ̍ŋndo̍ ō dēl nu̍a̍ā wāŋndo̍ chōo̍ le̍ ndu̍ nyɛ̄m ndɔ̍ŋ pōōndīa̍a̍ o̍ bā yɛ̍. Mɛ̄ɛ̍ wānā wɔ̍ɔ̍ŋndo̍ ō chīŋa̍la᷅ŋ nu̍a̍ā wāŋndo̍ a̍ nyɛ̄ī pīāāndūe̍i̍ o̍ bā le̍ ndu̍ nyɛ̄m ndɔ̍ŋ pōōndīa̍a̍ o̍ bā yɛ̍, le̍nde̍ bā hāvɛ̍i̍yo̍ ō kpūwā nu̍m ni̍.