Read Southern Kisi Pu̍lɔ̍wāā 25 Bible Online

Pu̍lɔ̍wāā 25 - Southern Kisi bible

Pu̍lɔ̍wāā 25

¹Tāle̍lā chēle̍ŋndā Sɔ̍lɔ̍mɔ̄ŋ o̍ di̍mi̍ vɛ̄lɛ̄ la̍ŋ, la̍ŋ la̍ cho̍ la᷅ŋ ni̍. Māsāa̍ Hɛ̄sɛ̄ki̍yā, o̍ wa̍ Chu̍dā wo̍ pūa̍a̍ nda̍ a̍a̍ to̍sā wa̍llo̍ o̍ tōŋgo̍ ndɔ̍ kɔ̍ɔ̍sɔ̍ɔ̍ ni᷄ŋ nda̍, nda̍ po̍o̍nyi̍a̍a̍ tāle̍la̍ŋ nda᷅ŋ ni̍.

²Mɛ̄lɛ̄ka̍, bɛ̄ɛ̄le̍ŋ wāŋnda̍ ā kē ndu̍ ni̍, le̍ mɛ̄ɛ̍ o̍ cha̍ā sɔ̍ɔ̍ŋ vi̍o̍ŋɔ̄ɔ̍ yɛ̍. Māsāā bɛ̍ndūa̍a̍ yɛ̄, bɛ̄ɛ̄le̍ wāŋnda̍ kē nda̍ le̍ŋ, le̍ mɛ̄ɛ̍ nda̍ nɔ̄lā mā sīna̍ sɔ̄ɔ̍ŋ wa᷅ ŋ̍ vi̍a̍ŋna᷄ŋndo̍ŋ pɛ̄ŋgu̍ yɛ̍.

³Wānā o̍ wānā nɔ̍lā mā si̍na̍ nyɛ̍ wa᷅ ma̍sā bɛ̍ndōo̍ o̍ kɔ̄l lo̍ le̍. Wānā o̍ wāna̍ nɔ̍la̍ pɛ̍ mā si̍na̍ mɛ̄ɛ̍ ha̍la̍a̍ ō chō hēlɔ̄ɔ̍ yɛ̍, ndu̍yɛ̍ mā si̍na̍ mɛ̄ɛ̍ lūmūŋ bɛ̄ndo᷄ŋ o̍ Pēe̍ Mɛ̄ŋmā Īhɛ᷄llo̍ ŋ̄ yīŋgi̍la̍ yɛ̍, mɛ̄ɛ̍ ā nɔ̄lā mā si̍na̍ nyɛ̍ wa᷅ ma̍sā bɛ̍ndōo̍ o̍ kɔ̄l lo̍.

⁴Le̍ mī wāna̍ to̍sā wa̍llo̍ a̍ ka̍ni̍i̍ hu̍mbūe̍i̍ yo̍ ō tōsa̍ nyɛ̄ o̍ nyɛ̄ a̍ ka̍ni̍i̍ hu̍mbūe̍i̍, mī nyɛ̄ kōŋ ō dēndū nyɛ̄ kɛ̍ndɛ̄ kɛ̍ndɛ̄, mɛ̄ɛ̍ mā dīndi̍ ka̍ni̍i̍ hu̍mbūī kēŋ mā sōli̍ nɔ̍ɔ̍ lēni᷄ŋ kpo̍u̍.

⁵Tē lā yēēma̍ pɛ̍, mī māsa̍ nyā bɛ̍ndōo̍, māsāle̍ ndɔ̄le̍ŋ lē wa̍ māsāle̍ tōnya̍, mɛ̄ɛ̍ lā fāŋa̍ wa̍nāā dɛ̍nɛ̍ wɔ̄ɔ̍ŋnda̍ ndu̍ īkɛ̄i̍.

⁶Tē a̍ si̍m māsā bɛ̍ndōo̍ o̍ hɔ̄l pɛ̍, ku̍ā nūm pi̍la̍ hēēlū bɛ̄ndū ndu̍ o̍ hɔ̄l te̍. Chu̍a̍nu᷄ŋ māā ā chō wānā bɛ̍ndū bɛ̄ndū le̍.

⁷Kāni̍ fo̍ndōle̍, ō bɛ̄ndā mā dīmu̍l nu̍m wāŋ bɛ̄ndūa̍a̍ o̍ hɔ̄l āā, “He̍l na̍nu᷄ŋ,” mbo̍ hīāū nu̍m tūsīo̍o̍ tōōlō. Ke̍lēŋā kɔ̄la̍ŋ sūɛ̍i̍ wāŋndo̍ chɔ̄mndo̍ o̍ tōŋgo̍ kɔ̍ɔ̍sɔ̍ɔ̍ ni᷄ŋ le̍ nyɛ̄ ŋ̄ chē wo̍ le̍. Tē ō lo̍ o̍ ko̍ŋ pɛ̍, mī wāna̍ nya̍ chīɛ̄ɛ̄li̍āŋndo̍ ō hu᷄ŋ tɛ̍ndāl nu̍m se̍īle̍ŋ māā a̍ wɔ̍u̍, mbō tūsi̍ nu̍m si̍ɔ̍mbu̍la̍ŋ wāŋnda̍ o̍ hɔ̄l, ō yɛ̄ɛ̍nɛ̍ ŋ̄ yɔ̄ŋ yɛ̍?

⁹2Tē sūɛ̍i̍ ī kēēka᷅ŋ nya̍ tɛ̄ɛ̄ŋ nya̍ wāŋndo̍ pɛ̍, lā lo᷅ o̍ sūɛ̍i̍ ke̍ŋ chōo̍ mā ma̍l wānā che᷅le̍ŋ o̍ sūɛ̍i̍ ni᷄ŋ te̍.

¹⁰Tē a̍ to̍sa̍ le̍nde̍ pɛ̍, tē wānā o̍ wānā tu̍e̍ī a̍ ndi̍ o̍kɔ̄ɔ̄ pɛ̍, si̍ɔ̍mbu̍la̍ŋ lā chō nu̍m bīyɔ̄ɔ̄ a̍ wānā ko̍ŋ. Ndu̍yɛ̍ bɛ̄ɛ̄le̍ wāŋnda̍ nda̍ a̍a̍ nɔ̍ le̍ nūm nde̍ŋ bɛ̍ɛ̍, ā ke᷅ lɛ̍ nu̍m le̍ŋ te̍.

¹¹Sūɛ̍i̍ tōnyɛ̍i̍ dīmīo̍o̍ a̍ te̍le̍ŋ i̍ nɔ̍ le̍ dīmi᷄ŋndo̍ wo̍, ō chō māchūāā mɛ̄ɛ̍ nda̍ bɛ̄ɛ̄ndīāā nu̍a̍ā nyɔ̄ɔ̍ ō kɛ̄ndɛ̄ kɛ̍ndɛ̄ a̍ ko̍o̍līi̍ye̍ mā kɛ̄si̍ ndu̍ o̍ nyɛ̄ nda̍ bɛ̄ɛ̄ndi̍a̍a̍ a̍ ka̍ni̍i̍ hu̍mbūe̍i̍yo̍ ni᷄ŋ yɛ̍.

¹²Sīlā wāna̍ kɔ̄l kālo̍o̍, wānā o̍ wāna̍ ya̍ŋ ndu̍ nīla̍ŋ pɛ̍, ō chō nyɛ̄ kpe̍e̍kpe̍i̍ ō hīōū kēla̍ŋ lānīŋ ŋ̄ko̍o̍līi̍yo̍ŋ, ō hīōū nyɛ̄m yīīna᷄ŋ ba̍ā kālāŋ nda̍ tōōsīāā a̍ ko̍o̍līi̍ŋ kɛ̍ndɛ̄ kɛ̍ndɔ̍ŋ ndo̍ŋ.

¹³Ki̍i̍la̍nɔ̍ wānā nɔ̍lā ho̍ō mā ti̍i̍nda̍ŋ ndo̍, mɛ̄ɛ̍ pāa̍le̍ ku̍a̍u̍wāā ŋ̄mālte̍ŋ lē wā nu̍a̍ā fūlāa̍ mā ke̍ wāŋnda̍ mɛ̄ŋmā nyūlūa̍ŋ mā sɔ̄la̍ yōōmūa̍ŋ yɛ̍, le̍nde̍ o̍ to̍sā ni̍ mī wānāa̍ ve᷅m ndu̍ wa̍ ā sɔ̄la̍ yōōmūa̍ŋ. Ki̍i̍la̍nɔ̍ wa̍ā le̍nde̍, mbō tōsa̍, mī māsānɔ̍ ndɔ̄ɔ̍ ō sɔ̄la̍ yōōmūa̍ŋ.

¹⁴Wāna̍ pɛ̍ɛ̍lūŋ ho̍ō pɛ̄ɛ̄lɔ᷄ŋ fo̍ndōo̍, māā ō chō wānā ki̍a̍ā wāŋnda̍ nyɛ̄, kɛ̍ ō ke᷅ wa̍nā nyɛ᷅ le̍ wo̍, mɛ̄ɛ̍ pīɔ̍ɔ̍ ō hēl nu̍a̍ā kɛ̍ mī hūēīye̍ ī sūŋgū hɔ̄ŋndo̍ pīɔ̄ɔ̄ kōŋ ō se᷅ le̍ yɛ̍, le̍nde̍ wānā wa̍ā le̍nde̍ o̍ cho̍ ni̍.

¹⁵Tē wānā wa̍ pɛ̍ wa̍nā bi̍u̍wa᷄ŋ, ā nɔ̄lā mā mu̍li̍ māsāa̍ kɔ̄llo̍ mbō tōsa̍ nyɛ̄ ŋ̄ dīmūl ndu̍ wo̍. Mɛ̄ɛ̍ o̍ mɛ̄ɛ̍ wāŋndo̍ ō wa̍ wa᷅na̍ ke̍ndū īsɔ̄ɔ̍ di̍mu̍l, dīōmndā kɛ̄ndɛ̄la̍ŋ ndu̍ dīmūllo̍, lā nɔ̄lā mī lā tōsa̍ mbō ya᷄ŋ nu̍m nīla̍ŋ.

¹⁶Līa̍a̍ŋ yēēlāa̍ pi̍la̍ ma̍ ye̍e̍la̍ ni̍, kɛ̍ tē wānā wa̍ ma̍ŋ dīo̍o̍ pɛ̍, ā dē ma̍ŋ tūu̍le̍ŋ. Tē ā hi̍u̍ ma̍ŋ dīo̍o̍ pɛ̍, a̍ ku̍i̍si̍ ma̍ŋ.

¹⁷Wāna̍ nya̍ chīɛ̄ɛ̄li̍āŋndo̍ kɔ̄la̍ŋ yīlɔ̄ɔ̍ bɛ̍ɛ̍, ō nɔ̄ tūu̍le̍ŋ. Tē a̍ hi̍u̍ ndu̍ kɔ̄la̍ŋ yīlɔ̄ɔ̍ chu̍ɛ̍i̍ chu̍ɛ̍i̍ pɛ̍, ō sāŋga̍ a̍ nūm, ndu̍yɛ̍ mbō tu᷄l nu̍m lēyɛ̄.

¹⁸Se̍īlē lāka̍fāle̍ŋ wāŋndo̍ tɛ̄ndāllo̍ ō chō māchūāā mɛ̄ɛ̍ nda̍ lūāā nu̍a̍ā wāŋndo̍ a̍ yɔ̄m bīŋgīo̍o̍, kɛ̄lɛ̄ŋgāā mɛ̄ɛ̍ nda̍ lɔ̄wa̍ nu̍a̍ā wāŋndo̍ a̍ mūɛ̄ī fāŋnde̍, ɔ̄ɔ̄ mā vɛ̄ ndu̍ a̍ chīŋɔ̍le̍ sɛ̍ɛ̍mbīāā le̍ŋ le̍ ndu̍ dīyɔ̄ɔ̍ yɛ̍.

¹⁹Wāna̍ wānā nɔ̍lā mā ti̍i̍nda̍ŋ te̍ wo̍ tīīnda᷄ŋndo̍ o̍ te̍le̍ŋ dɛ̍nɛ̍ pa̍lāa̍ ni᷄ŋ, ō chō māchūāā mɛ̄ɛ̍ wāŋndo̍ ō nɔ̄ nu̍a̍ā chīŋīī nɛ̄īyɛ̄i̍ mbō wa̍ kīndīo̍o̍ le̍ nyɛ̄ dīa̍a̍ tīāāmūū wo̍ yɛ̍, ɔ̄ɔ̄ mɛ̄ɛ̍ wāŋndo̍ pēlēi̍ ī yōm ndu̍ nu̍a̍ā mbō wa̍ kīndīo̍o̍ le̍ kɔ̄la̍ŋ a̍ pēlīī yōmi̍ɛ̍i̍ ke̍ŋ yɛ̍.

²⁰Wāŋndo̍ chō a̍ kɔ̄l tāmbɛ̍i̍yo̍, tē a̍ kɔ̍ che᷅l ndu̍ chōndu̍ŋ kɔ̄l kɛ̄ndɔ̍ŋ sōlūllo̍ pɛ̍, mɛ̄ɛ̍ ā chō māchūāā mɛ̄ɛ̍ hūēīyīī bɛ̄ndūe̍i̍ ī wā nu̍a̍ā wāŋndo̍ lēkɔ̄ɔ̍ a̍ te̍le̍ŋ īhūēīyo̍ mā sōli̍ ndu̍ dōmāa̍ lēkɔ̄ɔ̍ yɛ̍, ɔ̄ɔ̄ mɛ̄ɛ̍ nda̍ dūāū nu̍a̍ā wāŋndo̍ kōo̍ma̍ nɛ̍ya̍ŋ o̍ pāūwo̍ yɛ̍.

²¹Tē yīa̍a̍ŋ mā wa̍ ya̍a̍mɔ̍ɔ̍ nu̍mndo̍ nɛ̄īyo̍ pɛ̍, ke̍ ndu̍ nyɛ̄ dīa̍a̍ mbō dē. Tē ō wa̍ a̍ bo̍lōlā vēsɛ̍i̍la̍ŋ pɛ̍, ke̍ ndu̍ ō ko᷄l.

²²Tē a̍ to̍sa̍ le̍nde̍ pɛ̍, si̍ɔ̍mbu̍la̍ŋ lā bīī ndu̍ ta̍u̍. Ndu̍yɛ̍ mī Mɛ̄lɛ̄ka̍ Ya̍a̍wɛ̄ɛ̄ o̍ fa̍nda̍ nu̍m le̍ nyɛ̄ ŋ̄ tōsa̍ ko̍ŋ ndo̍.

²³Mɛ̄ɛ̍ i̍ yɔ̍nūŋ nu̍a̍ā tē hūēīye̍ ī chɛ᷄ŋ ba᷅ lūāŋndo̍ pɛ̍ mī ī wa̍ tūūsōo̍, ī hīŋ a̍ pīɔ̍ɔ̍ kɔ̄ɔ̄lī yɛ̍, le̍nde̍ chōŋgūla̍ŋ lā hūŋ a̍ tu̍mbo̍o̍ kɔ̄ɔ̄lī ni̍.

²⁴Yɔ̄ŋi̍ ŋ̄ wa̍ a̍ wānā la̍nɔ̍ lāsɛ̄ɛ̄ŋi̍āŋndo̍ chīɛ̄ī ni̍ŋ yɛ̍, ō bɛ̄ndā mā wa̍ŋnu̍ŋ o̍ chīɛ̄ī chōo̍ cho̍o̍ wo̍ chōo̍ mā wa̍ŋnu̍ŋ ndo̍ŋ nu᷄m pīlɛ̍.

²⁵Yōōŋgū kɛ̄ndɛ̍ cha̍ŋ ho̍ō o̍ lɛ̄ŋnde̍ ni᷄ŋ la̍nda̍ŋ mbō kōma̍l wāŋndo̍ ndo̍, ō chō māchūāā mɛ̄ɛ̍ wāŋndo̍ ō wā nu̍a̍ā a̍ kōlɔ̄ɔ̄ īyēēma̍a̍ mbō sɔ̄la̍ mɛ̄ŋmā nyūlūa̍ŋ le̍ kōlɔ̄ɔ̍ yɛ̍.

²⁶Wāna̍ tōnya̍a̍ fāŋa᷄ŋndo̍ o̍ nɛ̄i̍ tōnya̍a̍ chōo̍, mbō tōl wānāā dɛ̍nɛ̍ wɔ̍ɔ̍ŋnda̍ kɔ̄ɔ̄lī, ō chō māchūāā mɛ̄ɛ̍ nda̍ dūāū nu̍a̍ā lōōlīo̍o̍ o̍ pēē pɔ̍mbɔ̄ɔ̍ mbō līnda̍ŋ li̍u̍ yɛ̍, ɔ̄ɔ̄ mɛ̄ɛ̍ nda̍ dūāū nu̍a̍ā nyɛ̄ wɔ̄ɔ̍ŋndo̍ o̍ so̍o̍ŋ māmɛ̄ŋndo̍ ni᷄ŋ, mī mɛ̄ŋmā māŋ mā tāmbu̍ yɛ̍.

²⁷Līa̍a̍ŋ yēēlāa̍ pi̍la̍ ma̍ ye̍e̍la̍ ni̍, kɛ̍ ō bɛ̄nda̍ mī wānā de᷅ vɛ̄lɛ̄ ma̍ŋ dīo̍ bɛ̍ndōo̍ mā hīōū bā le̍. Le̍nde̍ ko̍ni̍, bɛ̄ɛ̄le̍ŋ nāŋɔ̄ɔ̍ pi̍la̍ le̍ na̍ŋ ni̍, kɛ̍ ō bɛ̍ndā vɛ̍lɛ̄ mā hi̍u̍ chūānɔ᷄ŋ māā ā chō wāna̍ lēbɛ̄ɛ̄ bɛ̄ndū le̍.

²⁸Wāna̍ cho̍ ho̍ō, ō ti̍ū kɔ᷅l ndɔ̄ɔ̍ bā le̍ wo̍, ō chō māchūāā mɛ̄ɛ̍ chi̍o̍o̍ ō wā nu̍a̍ā a̍ sāāsāla̍ŋ lā bālāā kɛ̍ mā pēsi̍ pe̍si̍ sāāsāla̍la̍ŋ mī chi̍e̍e̍ ko̍ŋ ō wa̍ ni᷅ŋ ō nɔ̍ lɛ̍ lāsāāsā le̍ ndu̍ māndā le̍ yɛ̍.