Read Southern Kisi Pu̍lɔ̍wāā 26 Bible Online

Pu̍lɔ̍wāā 26 - Southern Kisi bible

Pu̍lɔ̍wāā 26

¹Wānā o̍ wāna̍ cho̍ wāna̍ kɔ̄l kālu̍, a̍ yi̍yāŋ māā lōo̍ŋ ŋ̄ dēlī a̍ wɔ̄ɔ̄lē kālā ka̍lā le̍ŋ te̍, kɛ̄lɛ̄ŋgāā le̍ mā yi̍ya̍ŋ māā pīɔ̍ɔ̍ sīā a̍ wɔ̄ɔ̄lē kālā ka̍lā le̍ŋ. Mɛ̄ɛ̍ le̍nde̍ ko̍ni̍, wānā o̍ wa᷅na̍ cho̍ wāna̍ kɔ̄l kālu̍, a̍ yi̍yāŋ māā dīɔ̄mndo̍ ō sɔ̄lā bɛ̍ɛ̄le̍ŋ te̍.

²Tē a̍ tɛ̍ɛ̍mbu̍u̍ i̍sɔ̍ɔ̍ o̍ īsɔ̄ɔ̍ a̍ wāŋndo̍ le̍, ō mēna̍ nu̍m bɛ̍ɛ̍, sēndi̍ kōŋ ō bi̍ī nu̍m te̍. Sēndi̍ kōŋ, mɛ̄ɛ̍ yōūwa̍ ā hīāūnūŋ nu̍a̍ā o̍ hūēīye̍ ni̍ŋ cho̍o̍ cho̍o̍ mā wa̍ nyāānɔ᷄ŋ bɛ̍ndōo̍ ā che᷅l te̍ yɛ̍, le̍nde̍ o̍ hi̍a̍ū nu̍m chōo̍ ni̍.

³So̍o̍, sīōndōōle̍ŋ le̍ cho̍ le̍ ndu̍ ni̍. Sōfɛ̍lɔ̍ɔ̍ nyɔ̄ɔ̍ nda̍ bāā ndu̍ o̍ sōndō ni̍, le̍ ndu̍ nyūmbɔ̄ɔ̍ bā o̍ nɔ̍ le̍ kɔ̄la̍ŋ ndo̍. Mɛ̄ɛ̍ le̍nde̍ ko̍ni̍, dīɔ̄mndo̍ bɛ̍ɛ̍, sīōndōōle̍ŋ le̍ cho̍ le̍ ndu̍ ni̍.

⁴Tē dīɔ̄mndo̍ ō nyūna̍ nu̍m nyūnā īdīɔ̄mndo̍ pɛ̍, mu̍lūl ndu̍ mūlī īdīɔ̄mndo̍ le̍, nūm bɛ̍ɛ̍, yɔ̄ŋi̍ wāŋnda̍ ā chūa̍ nu̍m māā dīɔ̄mndo̍ ŋ̄ chō ni̍.

⁵Tē dīɔ̄mndo̍ ō nyūna̍ nu̍m pɛ̍, mu̍li̍ ndu̍ dīōm, mɛ̄ɛ̍ o̍ si̍nā pɛ̍ŋgu̍ yɛ̍, yɔ̄ŋi̍ o̍ chu̍a̍nūŋ māā ō chō wāna̍ kɔ̄l kālu̍.

⁶Wāna̍ o̍ wāna̍ ve᷅m dīɔ̄mndo̍ a̍ yōōŋgōo̍ pɛ̍, mɛ̄ɛ̍ ā chō māchūāā pēlūŋ nūmndo̍ŋ kīlī kīlīo̍o̍, tē ko̍ŋ te̍, ā chō māchūāā nyɛ̍ di̍ī wa̍nā wo̍ kōlɔ̄ɔ̍.

⁷Dīōm kɔ̄l kālu̍ fu̍lā di̍ɔ̄mndo̍ o̍ sōndō wo̍, ō chō māchūāā nyɛ̄ fo̍ndō fu̍u̍ le̍ dīɔ̄m kōŋ, to̍fa̍ wɔ̍ ko̍, mɛ̄ɛ̍ nda̍ kīālū nu̍a̍ā wāŋndo̍ pēlēi̍ mī pēlīī bīŋgīī kēŋ ī wa̍ ī mālāā lɛ̄ŋ, ī nɔ̍ lɛ̍ kpe̍ku̍ o̍ kpe̍ku̍ le̍ yɛ̍.

⁸Dīɔ̄mndo̍ bɛ̄ɛ̄le̍ŋ kīo̍o̍ ō chō māchūāā mɛ̄ɛ̍ wāŋndo̍ ō yīī nu̍a̍ā pōūwo̍ o̍ fa̍āŋnda̍a̍ ni᷄ŋ mbō kīndi̍ le̍ pōū kōŋ wūūwo̍, kɛ̍ ō ku̍ē le̍ yɛ̍.

⁹Le̍ mī dīɔ̄mndo̍ ō sōō sūɛ̍i̍ kɔ̄l kālu̍e̍i̍, ō chō māchūāā mɛ̄ɛ̍ yūɛ̍i̍ ī hūāū nu̍a̍ā wānā ko̍lāā māmūɛ̄īyo̍ mī ī lūɛ̄ī ndu̍ o̍ bā yɛ̍.

¹⁰Wānā ko̍lāa̍, kɛ̄lɛ̄ŋgāā wānā hi̍a̍u̍wa᷄ŋndo̍, wānā o̍ wāna̍ chu̍a̍ ndu̍ le̍ wa̍llo̍ pɛ̍, ō chō māchūāā mɛ̄ɛ̍ wāŋndo̍ ō wūū nu̍a̍ā chīŋɔ̍le̍ŋ o̍ hūēīye̍ ni᷄ŋ ō ve᷅ wa̍nā chɔ᷅ le̍ mī chīŋɔ̍le̍ le̍ŋ lē kɔ̍ yɔ̍ŋūl wāŋndo̍ yɛ̍.

¹¹Dīɔ̄mndo̍ mīŋgīo̍o̍ dīɔ̄mīī pīlɛ̍i̍ tōsāa̍, ō chō māchūāā mɛ̄ɛ̍ tūŋndo̍ ō kūīsī nu̍a̍ā mbō mīīŋgu̍ vɛ̄lɛ̄ kūīsī kālāa̍ dēēmbūūwo̍ yɛ̍.

¹²Wānā o̍ wāna̍ chu̍a̍nu̍ŋ pɛ̍ māā ō chō wāna̍ kɔ̄l kālu̍, kɛ̍ ndu̍yɛ̍ ō cho̍ yɛ̍ wa᷅na̍ kɔ̄l kālu̍ le̍, wānā wa̍ā le̍nde̍, dīɔ̄mndo̍ ō nɔ̄ bɛ̍ɛ̍ ti̍i̍nda᷄ŋndo̍ mbo̍ hīāū ndu̍.

¹³Wāna̍ sīɛ̄lɛ̍i̍yo̍ o̍ ye̍e̍mā ho̍ō kpe̍ku̍ le̍ wo̍, ndu̍ nɔ̍ dīmīo̍o̍ ni̍ āā, “Kpɔ̍kūŋndo̍ ō kūŋgu̍la̍ŋ wa̍a̍li̍o̍ō o̍ nɛ̄ī nda̍, wānā ku̍ē i̍nɛ̍ le̍. O̍ bɛ̍ɛ̄la̍ŋ bɛ̍ɛ̍ o̍ chō bālɔ̄ɔ̍, wānā fu̍lā o̍ bɛ̍ɛ̄ le̍.”

¹⁴Mɛ̄ɛ̍ dīo̍o̍ ō wā nu̍a̍ā ō lāndāā a̍ ko̍ŋnjīi̍yo̍ŋ, ō kūā la̍chi̍ ō mīīŋgū kɔ̍ɔ̍lī yɛ̍, le̍nde̍ wāna̍ sīɛ̄lɛ̍i̍yo̍ ō mūlū mūlūŋ o̍ kpēlē ni̍.

¹⁵Wāŋndo̍ ō pūm, mbō nɔ̄ sīɛ̄lɛ̍i̍yo̍ ha̍a̍a̍, nyɛ̄ dīa̍a̍ wa̍ ndu̍ īkɛ̄i̍, le̍ mbō chūa̍ ndu̍ bɛ̍ɛ̍ mbō dē ō nɔ̍lā le̍.

¹⁶Wāna̍ sīɛ̄lɛ̍i̍yo̍ mbō yīya̍ŋ māā ō nɔ̄ kɔ̄l kālo̍o̍ mbo̍ hīāū wānāa̍ si̍lā ha̍ā wāŋnda̍ sīlālā kɔ̄l kālu̍la̍ŋ nda̍ ā ŋɔ̍mmɛ̍ū bɛ̍ɛ̍.

¹⁷Sɛ̄ɛ̄ŋgi̍āŋ pi̍la̍a̍ kōmāllo̍ mā wo̍u̍ sōndōo̍ lēni᷄ŋ, ō chō māchūāā mɛ̄ɛ̍ wāŋndo̍ ō kōmāl nu̍a̍ā tūŋ o̍ si̍nā le̍ wo̍ mbō sāa̍ ndu̍ nīla̍ŋ yɛ̍.

¹⁸Wāna̍ to̍sāl ho̍ō chāa̍ŋ ndɔ̍ kāŋgālāa̍ mbō dīmi̍ māā pīsu̍lta̍ŋ o̍ wa̍ ni̍ wo̍, ō chō māchūāā māā wānā se̍e̍mɛ̍i̍yo̍ o̍ chu̍ā ho̍ō chīŋɔ̍ma̍ lēyīŋnda̍ŋ mbō wūu̍ ma̍ŋ wāŋndā tɛ̄ɛ̄ŋ ndo̍.

²⁰Tē yɔ̄mnde̍ ve̍ o̍ yīŋ te̍, nyūmndo̍ yīŋndē lēŋ lē nyūm ni̍. Le̍nde̍ ko̍ni̍, nāa̍ chōŋgūlā cho̍ le̍, sɛ̄ɛ̄ŋgi̍āŋndā hi̍ū la̍chi̍ a̍ wāa̍ lo̍ŋ te̍.

²¹Mɛ̄ɛ̍ yīŋnde̍ŋ lē wā nu̍a̍ā o̍ dɛ̄ŋgūltē pɔ̄mbu̍i̍i̍ni̍i̍, mī yīŋndē lēŋ lē bīī o̍ sūɛ̍ɛ̍ŋnde̍, mī lē sīmnu᷄ŋ yīŋndē bɛ̄ndū yɛ̍, ɔ̄ɔ̄ mɛ̄ɛ̍ yīŋnde̍ŋ lē bīī nu̍a̍ā o̍ yɔ̄mnde̍, mī lē sīmnu᷄ŋ yīŋndē cha̍la̍ŋ yɛ̍, le̍nde̍ wāna̍ lāsɛ̄ɛ̄ŋi̍āŋndo̍ ō kāndū sɔ̍ŋgɔ̄ɔ̍ ō pɔ̄mbɔ̄ ni̍, mī sɔ̍ŋgɔ̄ kōŋ ō sīmnu᷄ŋ o̍ bɛ̍ndū.

²²Wāna̍ lāchōŋgōo̍, chōŋgōo̍ yēēlāa̍ ndu̍ o̍ sōndō, nu̍a̍ wɔ̍ ko̍ mɛ̄ɛ̍ nyɛ̄ dīāā yēēlɛ̍i̍yo̍ ō wā nu̍a̍ā yɛ̍. Mɛ̄ɛ̍ wāŋndo̍ ō dīā nu̍a̍ā nyɛ̄ dīa̍a̍ mbō tīu̍ ndu̍ o̍ dīāllo̍ŋ ni᷄ŋ kpo̍u̍ yɛ̍, le̍nde̍ chōŋgōo̍ ō lōōlōō ndu̍ o̍ ŋ̄dīāl ni̍.

²³Yīya᷄ŋ wɔ̄ɔ̍ŋndo̍ nɔ̄ɔ̍ o̍ kɔ̄l a̍ wāŋndo̍, mā vīāŋ mā dīmūl wa̍nā ko̍ŋ dīōmndā kɛ̄ndɛ̄la̍ŋ, ō chō māchūāā mɛ̄ɛ̍ wāŋndo̍ ō chūāū nu̍a̍ā kpɛ̍ɛ̍nɛ̍i̍ pūūlūīī fo̍ndūe̍i̍, mbō nīŋgi̍la̍ ndi̍ o̍ kɔ̄ɔ̍ cha̍le̍ŋ cha̍le̍ŋ bɛ̍ndū yɛ̍.

²⁴Ya̍a̍mɔ̍ɔ̍nɔ̍ nu̍mndo̍, tūūlā wɔ̄ɔ̍ŋnda̍ŋ lā wā ndu̍ o̍ kɔ̄l a̍ nūm mbō vēŋ kpi̍ŋ, mbō sūāā sɔ̍ɔ̍ŋ kɛ̍ndɔ᷄ŋ nāa̍ nūm chu̍a̍.

²⁵Le̍la̍ŋ, ā yɔ̍ŋ bɛ̍ɛ̍ mī wānā wa̍ā le̍nde̍ o̍ so̍ō sɔ̄ɔ̍ŋ kɛ̍ndɔ᷄ŋ nāa̍ nūm chu̍a̍, la̍a̍la̍ŋ a̍ ndu̍ le̍, yīya᷄ŋnda̍ dɛ̍nɛ̍ wɔ̍ɔ̍ŋnda̍ŋ lā wā ndu̍ lā pīāā o̍ kɔ̄l cha̍ a̍ nūm.

²⁶Yīya᷄ŋ wɔ̍ɔ̍ŋ wa᷅ ndu̍ o̍ kɔ̄l lo̍ mbō vēŋ ndu̍ kpi̍ŋ a̍ kāŋgālāa̍ tōsāa̍. Kɛ̍ dɛ̍nɛ̍ wɔ̍ɔ̍ŋ o̍ cho̍ tōsā wo̍ ndu̍, fūlāa̍ kpe̍nde̍ke̍le̍, mī wānā o̍ wānā che᷅.

²⁷Wānā o̍ wāna̍ tu̍u̍lu̍l chāa̍ŋ ndɔ̍ so̍o̍ŋ dɛ̍nɛ̍ wɔ̍ɔ̍ŋndo̍ pɛ̍, ndu̍ pi̍la̍ de᷅l le̍ni̍ŋ ni̍. Wānā o̍ wāna̍ ki̍ndi̍ pɛ̍ le̍ chāa̍ŋ nu̍m pōū lūsu̍lɛ̍i̍yo̍ nyīndɔ̄ɔ̍ chōo̍, ndu̍ pōū kōŋ ō mīīŋgū cho̍o̍ ni̍.

²⁸Lɔ̍ɔ̍pa̍ wāŋndo̍ ō dīmī cho̍ōla̍ŋ a̍ nūm o̍kɔ̄ɔ̄ mbō yɔ̄ŋu̍l nu̍m a̍ sōndō, ō tūl nu̍m fɛ̍lɛ̍ŋ le̍yɛ̍. Wāŋndo̍ ō wā nu̍m hēēlōo̍ a̍ sōndō mbō tɛ̄ɛ̄mbu̍u̍ nu̍m.