Read Southern Kisi Pu̍lɔ̍wāā 27 Bible Online

Pu̍lɔ̍wāā 27 - Southern Kisi bible

Pu̍lɔ̍wāā 27

¹Wānā o̍ wānā ki̍a̍lū yōŋgāa̍ a̍ pāa̍le̍ sīɔ̄dīi̍le̍ŋ o̍kɔ̄ɔ̄ le̍, fo̍ndōle̍, a̍ si̍nā mɛ̄ɛ̍ pāa̍le̍ sīɔ̄dīi̍le̍ŋ lē wā ni̍ŋ yɛ̍ le̍.

²Ō bɛ̄ndā mī wa̍nā che᷅le̍ŋ ō sāŋga̍la̍ nu̍m, mbo̍ hīāū nūm pi̍la̍ sāŋgāla᷄ŋndo̍. Wānā che᷅le̍ŋ pɔ̍, o̍ cho̍ mīāllo̍ a̍ nu̍m ndo̍, ndu̍ sa̍ŋga̍la̍ nu̍m, kɛ̍ nūm pi̍la̍ sa̍ŋgāla᷄ŋ te̍.

³Pōūwo̍, nyɛ̄ lūsu̍lɛ̍i̍yo̍ o̍ cho̍ ni̍, si̍o̍ōŋnde̍ bɛ̍ɛ̍ le̍nde̍ ko̍ni̍, nyɛ̄ lūsu̍lɛ̍i̍yo̍ i̍ cho̍ ni̍. Kɛ̍ māmɔ̄ɔ̄ dīɔ̄mndo̍ ō mām wa̍nā wo̍, nyɛ̄ kōŋ ō lūsu̍l ō hīōū nyɛ̄m sālā tīɔ̍ɔ̍ŋ mu᷅ŋ.

⁴Tu̍mbo̍o̍ wɔ̄ūle̍ŋ pi̍la̍ o̍ wɔ̍u̍ ni̍. Kɔ̄l tūūwo̍, mɛ̄ɛ̍ mɛ̄ŋmā hūna᷄ŋ mā chō nu̍a̍ā nyɛ̄ tɛ̄ɛ̄mbāā yɛ̍, le̍nde̍ o̍ cho̍ ni̍. Kɛ̍ sɔ̄ɔ̍ŋ sa̍lā tīɔ̍ɔ̍ŋndo̍ŋ mu᷅ŋ kpo̍u̍, nyɛ̍ wɔ̍u̍ mbo̍ hīāū kpo̍u̍ wo̍ cho̍ pāŋālāa̍ ni̍.

⁵Wāŋndo̍ sūɛ̍i̍ wɔ̍ɔ̍ŋnde̍ tōsāa̍ mā mi̍ŋgi̍ ndu̍ o̍ nɛ̄ī wāŋnda̍ kpo̍u̍ o̍ hɔ̄l, ndu̍ hi̍o̍ū nāŋɔ̄ɔ̄ a̍ wāŋndo̍ kāālāa̍ o̍ kɔ̄l ni̍ŋ, kɛ̍ a̍ chɔ᷅m wa̍nā ko̍ŋ māā a̍ ka̍a̍la̍ ndu̍ le̍.

⁶Chāa̍ŋ nūm kpe̍e̍kpe̍i̍yo̍, ō yɔ̄ŋu̍l nu̍m bɛ̍ɛ̍, a̍ chu̍ē ndi̍ bɛ̍ɛ̍ māā īsɔ̄ɔ̍ le̍, kɛ̍ ya̍a̍mɔ̍ɔ̍nɔ̍ nu̍m ndo̍ ndu̍, ā yɔ̍ŋ bɛ̍ɛ̍ mbō wa̍ nu̍m kɔ̄mā kɔ̄mīa̍ŋndo̍, le̍ nu̍m chɔ̄mndo̍ māā ō kāāla̍ nu̍m, pu̍ɛ̍ɛ̍nu̍ŋ a̍ ndu̍ le̍.

⁷Tē wāŋndo̍ ō pīm pɛ̍ nyɛ᷅ kɛ̄ndɛ̄ kɛ̍ndɛ̄, līa̍a̍ŋ bɛ̍ɛ̍, ō ye̍e̍mā mbō dē ma̍ŋ te̍. Kɛ̍ wāna̍ yīa̍a̍ŋ mā chō ho̍ō nɛ̄īyo̍ wo̍, nyɛ̄ dīāā lōlɛ̍i̍yo̍ bɛ̍ɛ̍, yēēlāa̍ o̍ ye̍e̍lā ndu̍ o̍ so̍ndō ni̍.

⁸Wāna̍ ma᷅l ho̍ō cha᷄lta̍ ndɔ̄la̍ŋ mbō kūɛ̄nu᷄ŋ na̍a̍ che᷅le̍ŋ ndo̍, ō chō māchūāā mɛ̄ɛ̍ yōūwo̍ ō mɛ̄ī nu̍a̍ā wāa̍ŋndē ndɔ̄le̍ŋ mbō kūɛ̄nu᷄ŋ na̍a̍ che᷅le̍ŋ yɛ̍.

⁹Mɛ̄ɛ̍ chūɛ̄īya̍ŋ a̍ si̍ɛ̍ndīi̍ya̍ŋ mā tōsā nu̍a̍ā mī wānā na̍ŋ kɔ̄l lɛ̍, le̍nde̍, sīlā chāa̍ŋ nūm o̍ si̍lā nu̍m a̍ kɔ̄l ndɔ̄ɔ̍ kpo̍u̍ wo̍ ō tōsā ni̍ mā na̍ŋ kɔ̄l ni̍.

¹⁰Kɛ̍ɛ̄ chāa̍ŋ nu̍m, kɛ̄lɛ̄ŋgāā fi̍nyā nūm chāa̍ŋ ndɔ̄, le̍ wānāyɛ̍i̍ nūmnde̍ le̍. Tē dɛ̍nɛ̍ pa̍lāa̍ ō kōma̍l nu̍m pɛ̍, ō bɛ̍ndā mā mɛ̍i̍ chāa̍ŋ nu̍m, mā kūɛ̄ o̍ wānāya᷅ŋ nu̍mndo̍ŋ ndo̍ le̍ mālāa̍ le̍. Chāa̍ŋ nu̍m nya̍ chīɛ̄ɛ̄li̍āŋndo̍, ō mālā nu̍m mbo̍ hīāū wānāyɛ̍ī nūmnde̍, i̍ cho̍ la̍nda̍ŋ a̍ nūmnde̍.

¹¹Wa̍ wa᷅na̍ kɔ̄l kālu̍ po̍ nūu̍, mā to̍sa̍ mī na̍ŋ kɔ̄l. Ko̍ŋ to̍sā ni̍, wānā o̍ wāna̍ ki̍ndi̍ le̍ ya̍ chūa̍a̍ chɔ̍dɔ̄ pɛ̍, I̍ sɔ̍la̍ nyɛ̄ ya̍ I̍ mu̍lī ndu̍ dīōm ndo̍.

¹²Wāna̍ kɔ̄l kālo̍o̍ ō nɔ̄lā mbō chēnu᷄ŋ kpūndɔ̍ɔ̍ ndu̍ lāchī, mbō kpɛ̄kpɛ̍la̍ ndu̍. Kɛ̍ wāna̍ nɔ̍ kɔ̍l kālu̍ bɔ̍ɔ̍ le̍ wo̍ ndu̍, ō lō kɔ᷅la̍ŋ mbō kɔ̍ de᷅l o̍ kpūndɔ̍ɔ̍ ni᷄ŋ.

¹³Tē mīāllo̍ nɔ̄ le̍ nu̍m pāāwāa̍ pɛ̍, mī wāŋndo̍ tāāni̍ ndu̍, di̍mu̍l wa̍nā ta̍a̍nīāā kōŋ mbō ke̍ nu̍m dōma̍ ndɔ̄ le̍cho̍ō wo̍ lāndēi̍. Dōmā ko̍ŋ ō lo̍ nu̍m o̍ bā ha̍a̍a̍ mī wānā ko̍ŋ ō pāāwa̍ nu̍m nyɛ̄ mīāl kōŋ ō nɔ̄ le̍ nu̍m pāāwāa̍ wo̍.

¹⁴Wāna̍ nya̍ chīɛ̄ɛ̄li̍āŋndo̍ pēnāa̍ sa̍lāa̍ dɔ̄wɔ̄ɔ̍ chōo̍ cho̍o̍ kpe̍le̍ŋ kpe̍le̍ŋ, nu̍a̍ā o̍ yi̍yāŋ ni̍ māā mēnāa̍ ŋ̄ chō ndu̍ ni̍.

¹⁵Wānā la̍nɔ̍ lāsɛ̄ɛ̄ŋi̍āŋndo̍ chīɛ̄ī ni̍ŋ, mɛ̄ɛ̍ pīɔ̍ɔ̍ ō wā nu̍a̍ā sīa̍a̍ mī to̍ŋto̍ŋnda̍ŋ mā wa̍ dēlīo̍o̍, mā ki̍o̍lū kɔ̍ɔ̄ le̍ yɛ̍, le̍nde̍ sɛ̄ɛ̄ŋgi̍āŋndā o̍ chu̍ū pɔ̍nɔ̍ɔ̍ la̍ŋ lā ki̍o̍lū kɔ̍ɔ̍lī le̍ ni̍.

¹⁶Tē wānā nɔ̍lā hu̍e̍īye̍ kpāā pɛ̍, māā ī hɔ᷅ŋ te̍, ɔ̄ɔ̄ mā nɔ̍la̍ mā pe̍e̍ŋ chu̍ɛ̍īya̍ŋ o̍ bā cha̍ mā cho᷅ŋ te̍ pɛ̍, mɛ̄ɛ̍ ā nɔ̄lā mā kpa̍a̍ ndu̍.

¹⁷Chīli̍ŋnde̍ ndi̍ chi̍ɛ̍ɛ̍ŋā chi̍li̍ŋnde̍ chāa̍ŋ ndɔ̍ ni̍. Le̍nde̍ ko̍ni̍, wāŋndo̍ pɛ̍ɛ̍kū wa᷅ŋndo̍ ni̍.

¹⁸Tē wānā cha̍a̍ yɔ̄m māfi̍kīi̍yo̍ bīyɔ̄ɔ̄ pɛ̍, ā dē fi̍kīi̍ma̍ ndūa̍ŋ. Bu̍ɛ̍īyo̍, tē a̍ cha̍a̍ māsānɔ̄ nu̍mndo̍ bīyɔ̄ɔ̄ pɛ̍, nūm bu̍ɛ̍ī kōŋ a̍ sɔ̍la̍ bɛ̄ɛ̄le̍ŋ.

¹⁹Mɛ̄ɛ̍ ŋ̄ tōfāŋ nu̍a̍ā o̍ mɛ̄ŋnda̍ŋ ni᷄ŋ, mā chēnu᷄ŋ nu᷅m pi̍la̍ yɛ̍, le̍nde̍ kɔ̄l nūmndo̍ ō chɔ̄m nu̍m wāna̍ su̍u̍ ŋ̄ chō wo̍ ni̍.

²⁰Mɛ̄ɛ̍ chi̍e̍e̍ pi̍ɔ̍m o̍ cho̍ nu̍a̍ā ō pe᷅ a̍ wāŋ vīlɛ̍i̍ya̍ le̍ yɛ̍, le̍nde̍ yēēmɛ̍i̍ wāna̍ chi̍o̍o̍ ī chō ni̍, mɛ̄ɛ̍ mɛ̄ɛ̍ wāŋndo̍ ō sɔ̄la̍, hīōūwɔ̄ɔ̍ lāchī a̍ yēēmāa̍ kɛ᷅.

²¹Ko̍o̍līi̍ye̍ ni̍, ka̍ni̍i̍ hu̍mbūe̍i̍ ni̍, a̍ yīŋnde̍ŋ nda̍ tōfā mu̍ŋ ni̍, le̍ sīnāa̍ tē ŋ̄ chō ŋ̄ kɛ̄ndɛ̄. Wāna̍ chi̍o̍o̍ yɛ̄, sāŋgālā wāŋndā chīe̍e̍ya̍ ā sāŋgālā ndu̍ wo̍, ndu̍ cho̍ tōfā ndɔ̄ɔ̍ ni̍, tē ō chō wānā kɛ̍ndɛ̄, tē ō cho̍ wa̍nā kɛ̍ndɛ̄ le̍.

²²Dīɔ̄mndo̍, lɔ̍ɔ̍ ndu̍ bɛ̍ɛ̍ mā kūɛ̄ le̍ ndu̍ dīyɔ̄ɔ̍, a̍ nɔ̍lā mā to̍sa̍ mī dīɔ̄mīī ndūɛ̍i̍ ī chūū le̍.

²³Tē wānā ma̍ndāā lāchɔ̄lōo̍ ŋ̄ chō ni̍, ha̍ndu̍ sa̍ā nu̍mnda̍ a̍ nāūwāā nūmnda̍ hɔ̄lte̍ŋ kɔ̄ɔ̄lī, mā bīī nda̍ nyɛ̄ kɛ̄ndɛ̄ kɛ̍ndɛ̍.

²⁴Kāni̍ fo̍ndōle̍, sūllo̍ ndu̍ ndu̍, ō cho̍ nyɛ̍ cho̍ le̍ fɛ̍ɛ̍ŋ a̍ fɛ̍ɛ̍ŋ te̍. Le̍nde̍ ko̍ni̍, lēmāsā o̍ lēmāsā le̍ cho̍ le̍ fɛ̍ɛ̍ŋ a̍ fɛ̍ɛ̍ŋ te̍.

²⁵Tē a̍ chi̍i̍ bīl pūīyāa̍ kīōlɔ̄ɔ̄ le̍ chɔ̄lūāā nūmnda̍ mī ō sɛ̄nɛ̄īyo̍ ō wa̍ pūīyo̍ pɛ̍, a̍ kɔ̍ ki̍o̍lū ho̍ō o̍ pēmbo᷄ŋ hōlnɔ᷄ŋndo̍.

²⁶Tē a̍ chi̍i̍ pɛ̍, a̍ ki̍li̍ ni̍ko̍ sa̍ā nu̍mnda̍ yīīŋnde̍ le̍ nyɛ̄ chūɛ̄ɛ̄na᷄ŋndo̍ sɔ̄lāa̍ a̍ ndi̍, ndu̍yɛ̍ mā sɔ̍la̍ nyɛ̄ sɔ̄lāa̍ o̍ chūīŋāā nūmnda̍ ni᷄ŋ, o̍ ko̍ŋ, mā pēndū lɛ̄ŋnde̍ŋ a̍ nyɛ̄ sɔ̄lāā kōŋ.

²⁷Ndu̍yɛ̍ o̍ ko̍ŋ kɔ̍ɔ̍lī, ā nɔ̄lā mā sɔ̍la̍ mɛ̄ɛ̄mā chūīŋnda̍ŋ ta̍u̍ ta̍u̍ le̍ nyɛ̄ nyā di̍a̍a̍, nūm ni̍, a̍ yu̍ŋgu̍ nu̍mndo̍, ndu̍yɛ̍ a̍ bu̍ɛ̍i̍yāā nūm a̍ la̍a̍ndūa̍a̍.