Read Southern Kisi Pu̍lɔ̍wāā 28 Bible Online

Pu̍lɔ̍wāā 28 - Southern Kisi bible

Pu̍lɔ̍wāā 28

¹Wāna̍ dɛ̍nɛ̍ wɔ̍ɔ̍ŋndo̍, mī wānā o̍ wānā o̍ ve̍ ndu̍ bɛ̍ɛ̍ tōūwɔ̄ɔ̄ le̍, mbō nyāānu̍ŋ. Kɛ̍ wāna̍ tōnya̍a̍ ndu̍, mɛ̄ɛ̍ kpɔ̍kūŋndo̍ ō chō nu̍a̍ā vīsī kɔ̄l sīmūlāā yɛ̍, le̍nde̍ o̍ cho̍ ni̍.

²Tē lɛ̄ŋnde̍ŋ lē wa̍ lɛ̄ŋndē yɔ̄ŋ wɔ̄ɔ̍ŋ pɛ̍, māsāā yɛ̍ yi̍a̍a̍ nda̍ ke̍e̍kū lɛ̍ŋndē lēŋ chōo̍ ni̍. Kɛ̍ tē wāna̍ nɔ̍ kɔ̄l kālo̍o̍ ndu̍yɛ̍ mbo̍ nɔ̄ tāāsi̍o̍o̍ wo̍ ō wa̍ lɛ̄ŋnde̍ŋ chīla̍ŋ pɛ̍, lɛ̄ŋndē lēŋ kpāāyāa̍ le̍ sɔ̍lā ni̍, ndu̍yɛ̍ mī lē hīōū lāchī a̍ wāa̍ lɛ̄ŋndē kpāāyā.

³Tē wānā ta̍mbɛ̍i̍yo̍ ō sīmnu᷄ŋ ma̍sāa̍ pɛ̍, mbō tūsi̍ wānāā tāmbɛ̍i̍ya̍ nyɛ̄ pālāa̍ chōo̍, ō chō mā chūāā mɛ̄ɛ̍ pīɔ̍ɔ̍ ō hūŋ nu̍a̍ā a̍ kpāāyā bɛ̍ndōo̍ mbō tɛ̄ɛ̄mbu̍u̍ tɔ̄lɔ̄ɔ̄la̍ŋ yɛ̍.

⁴Wānāa̍ kɛ̍ɛ̄ le̍ sāwāa̍ chūa̍a̍ wa̍, nda̍ sa̍ŋgālā wa̍nāā dɛ̍nɛ̍ wɔ̍ɔ̍ŋnda̍ ni̍. Kɛ̍ wānā o̍ wāna̍ chu̍ā sa̍wāa̍, sīmūllo̍ nda̍ sīmūl wa̍nāā dɛ̍nɛ̍ wɔ̍ɔ̍ŋnda̍ ni̍.

⁵Wānāā dɛ̍nɛ̍ wɔ̍ɔ̍ŋnda̍, ā nɔ̍ si̍nā pɛ̄ŋgu̍ a̍ sa̍kpōyɛ̍ī o̍kɔ̄ɔ̄ le̍. Kɛ̍ wānāa̍ so̍o̍lūū Mɛ̍lɛ̄ka̍ Ya̍a̍wɛ̄ɛ̄ wa̍, nda̍ nɔ̄ sīnā pɛ̄ŋgo̍o̍ a̍ sa̍kpōyɛ̍ī o̍kɔ̄ɔ̄ nyɛ̄ kɛ̄ndɛ̄ kɛ̍ndɛ̄.

⁶Ō bɛ̄ndā mī wānā wa̍ ō tāmbɛ̍i̍ kɛ̍ mī kēlālā nūmnda̍ lā wa̍ sa̍kpō, mbo̍ hīāū wāa̍ ō sūlāā kɛ̍ ndu̍yɛ̍ kēlālā nūmnda̍ lā ve᷅ sa̍kpō le̍.

⁷Chūā o̍ chūā nu̍m to̍sa̍ nyɛ̄ sāwāa̍ ō dīmi̍ wo̍ pɛ̍, mɛ̄ɛ̍ chūā kɔ̄l kālo̍o̍ cho̍ ko̍ŋ ni̍. Kɛ̍ chūā o̍ chu̍a̍ yɛ̍ɛ̄ nāāŋa᷅ŋndo̍ a̍ wānāā mālāā lākpūndi̍a̍a̍ pɛ̍, chūā kōŋ ō ke̍ fi̍nyā ndɔ̍ si̍ɔ̍mbu̍la̍ŋ.

⁸Wānā o̍ wa᷅na̍ nu̍u̍wa̍ sūllo̍ o̍ wāŋnda̍ ka̍fāla̍ŋ tōsāllo̍ o̍ wɔ̄ŋgūla̍ŋ ni᷄ŋ pɛ̍, wāŋnda̍ wɔ̄ŋgūla̍ŋ ba̍a̍ kīlūllo̍ mbō hīōū mɛ̄ɛ̍ o̍ nɔ̍ le̍ nda̍ kīlūllo̍ yɛ̍ pɛ̍, sūl wāā le̍nde̍, wānāa̍ ma̍lā wa̍nāā tāmbɛ̍i̍ya̍ wa̍, nda̍ wānā ko̍ŋ ō chūūŋgi̍a̍l su̍l kōŋ ni̍.

⁹Wānā o̍ wāna̍ kɛ̍ɛ̍ le̍ nyɛ̄ sāwāa̍ ō dīmi̍ wo̍ tōsāa̍ pɛ̍, wānā wa̍ā le̍nde̍ pīɛ̄īlē ndɔ̄le̍ŋ, Mɛ̄lɛ̄ka̍ ye̍e̍mā bɛ̍ɛ̍ mbō ya᷄ŋ nde̍ŋ lānī le̍.

¹⁰Wānā o̍ wāna̍ to̍sa̍ pɛ̍, mi̍ wāna̍ tōnya̍a̍ ō fāŋa̍ŋ o̍ nɛ̄i̍ tōnya̍a̍ chōo̍ mbō tōsa̍ yɔ̄ŋ wɔ̄ɔ̍ŋndo̍, wānā ko̍ŋ dēlɔ̄ɔ̍ o̍ de᷅l o̍ so̍o̍ŋ ndu̍ pi̍la̍ o̍ tu̍u̍nu̍ŋ ndo̍ ni᷄ŋ ni̍. Kɛ̍ wāna̍ cho̍ ho̍ō, ō nɔ̍ sɔ᷅ŋ o̍ sɔ̄ŋ te̍ wo̍, dɛ̍nɛ̍ kɛ̍ndɔ̄ɔ̍ ndu̍ cho̍ nyɛ̄m ke᷅ŋ o̍ sɔ̍lā wo̍ŋ ni̍.

¹¹Wānā su̍lāa̍ mbō chūānu̍ŋ māā ō chō wāna̍ kɔ̄l kālu̍. Kɛ̍ wānā ta̍mbɛ̍i̍ nɔ̍ ho̍ō kɔ̄l kālo̍o̍ wo̍, mbō nɔ̄la̍ mbō fūla̍ kɔ̄l kālu̍ wānā su̍lāā kōŋ kɔ̄ɔ̄lī.

¹²Tē wānāā kɛ̄ndīa̍a̍ ā sīmnu᷄ŋ wa̍nāā kpāāyā pɛ̍, wānā o̍ wānā o̍ dɔ̍u̍nu᷄ŋ nya̍a̍le̍. Kɛ̍ tē wānāā dɛ̍nɛ̍ wɔ̍ɔ̍ŋnda̍ ā su᷄l o̍ lēmāsā pɛ̍, sɔ̄ɔ̄ndīa̍ŋndo̍ wāŋnda̍ ā sɔ̄ɔ̄ndi̍a̍ŋ ni̍.

¹³Wānā o̍ wāna̍ ve᷅ŋ yɔ̄ŋndɔ̄ wɔ̍ɔ̍ŋndo̍ pɛ̍, mbō kɛ̍ɛ̍ ndu̍ chɔ̄ɔ̄mūūwo̍, ō sɔ̍lā dɛ̍nɛ̍ kɛ̍ndɔ̄ɔ̍ o̍ yōōmū ndɔ̄ɔ̍ ni᷄ŋ te̍. Kɛ̍ wānā o̍ wāna̍ chɔ̍ɔ̍mu̍u̍ yɔ̄ŋ ndɔ̄ wɔ̍ɔ̍ŋndo̍ pɛ̍ ndu̍yɛ̍ mbō pɛ̄ŋgi̍ ndu̍ tōsāa̍, tūīīnɔ᷄ŋndo̍ Mɛ̄lɛ̄ka̍ ō tūīīnūŋ ndu̍ īnyīɛ̍ɛ̍ ni̍, mbō ma᷄l ndu̍ le̍ ndu̍.

¹⁴Wānā o̍ wāna̍ ke̍ Mɛ̄lɛ̄ka̍ Ya̍a̍wɛ̄ɛ̍ bɛ̄ɛ̄le̍ŋ le̍ te̍le̍ŋ o̍ te̍le̍ŋ pɛ̍, wānā ko̍ŋ ō pɛ̄l tɔ̄nɔ̄. Kɛ̍ wānā o̍ wāna̍ to̍sa̍ bōllē kālāle̍ŋ pɛ̍, o̍ kpūndɔ̍ɔ̍ ni᷄ŋ wānā wa̍ā le̍nde̍ o̍ mɛ̍ɛ̍lū ni̍.

¹⁵Mɛ̄ɛ̍ kpɔ̍kūŋndo̍, ɔ̄ɔ̄ vīsī bīyāa̍ ō bālū nu̍a̍ā vīsīa̍a̍ kɔ̄ɔ̄lī hɛ̍ū hɛ̄ū le̍ nda̍ bīyɔ̄ɔ̍ yɛ̍, le̍nde̍ wāna̍ kɔ̄l vēsɛ̍i̍yo̍ o̍ wa᷅ ho̍ō wāŋnda̍ chōo̍ ma̍sāa̍ wo̍, ō wā wa̍nāā tāmbɛ̍i̍ya̍ chōo̍ ni̍.

¹⁶Wāna̍ cho̍ wāŋnda̍ chōo̍ ma̍sāa̍ wo̍, tē ō kɛ̄ɛ̍ kɔ̄l kālo̍o̍ nɔ̄ɔ̍ pɛ̍, māsa̍ kɔ̄l vēsɛ̍i̍ tu̍sī wa᷅ŋnda̍ nyɛ̄ pālāa̍ chōo̍ wo̍ o̍ wa᷅ ni̍. Wānā o̍ wāna̍ wo̍ le̍ nyɛ̄ sɔ̄lāā lāka̍fāa̍ dīo̍o̍ wāŋndo̍ o̍ bā pɛ̍, vīōūwɔ̄ɔ̍ o̍ vi̍a̍ū yo̍o̍mū ni̍.

¹⁷Wānā o̍ wāna̍ tɛ̍ɛ̍mbu̍u̍ sāwa̍ di̍mi̍ māā wānā di̍ī wa᷅na̍ chi̍o̍o̍ le̍ wo̍ pɛ̍, mbo̍ nyāānu᷄ŋ, wānā ko̍ŋ ō lo̍ o̍ nyāānɔ᷄ŋ ko̍ŋ ni᷄ŋ mbō vī, wānā o̍ wānā ma̍lā ndu̍ le̍.

¹⁸Wānā o̍ wānā kēlālā ndɔ̄la̍ŋ lā chō sa̍kpō, mbo̍ wā ō nɔ̍ sɔ᷅ŋ o̍ sɔ̄ŋ te̍, chīndāa̍ wānā wa̍ā le̍nde̍ o̍ sɔ̍lā ni̍. Kɛ̍ wānā o̍ wānā kēlālā ndɔ̄la̍ŋ lā sēndu̍ le̍, dɛ̍nɛ̍ pa̍lāa̍ wānā wa̍ā le̍nde̍ o̍ sɔ̍lā o̍ lēpīlɛ̍ ni᷄ŋ ni̍.

¹⁹Wānā o̍ wāna̍ cho̍ wānā to̍sāā wa̍li̍ īchīɔ̍ɔ̍ ō kālā ka̍lā, wāna̍ nɔ᷅ nyɛ̄ dīa̍a̍ ta̍u̍ o̍ ko̍nda̍ wo̍ o̍ wa᷅ ni̍. Kɛ̍ wānāa̍ ba̍lūŋ ha̍ā bālɔ᷄ŋ fo̍ndōo̍ ā to̍sā nyɛ᷅ o̍ nyɛ̄ le̍ wa̍, o̍ tāmbe̍i̍ ni᷄ŋ nda̍ mɛ̍ɛ̍lū ni̍.

²⁰Wāna̍ cho̍ ho̍ō sa̍kpō o̍ nyɛ̄ o̍ nyɛ̄ ni᷄ŋ ndo̍, sa̍lā bɛ̄ndōo̍ pīla̍ Mɛ̄lɛ̄ka̍ ō dūāū ndu̍ ni̍. Kɛ̍ wānāa̍ ye̍e̍mā ha̍ā yēēmā bɛ̄ndōo̍ le̍ sūllo̍ sɔ̄lāa̍ o̍ chɔ̍ chɔ̍ ni̍ŋ nda̍, dɛ̍nɛ̍ pa̍lāa̍ nda̍ sɔ̄lā ni̍.

²¹Yɛ̍ yi̍ɔ̍ɔ̍ chɔ̄mndo̍ wāŋnda̍ tɛ̄ɛ̄ŋ o̍ sūɛ̍i̍ ni᷄ŋ mā si̍m wāŋndo̍ ō pīlɛ̍ kɔ̄ɔ̄lī, ō bɛ̄nda̍ le̍. Kɛ̍ wāŋnda̍ ā pūm, mī nyɛ̄ dīāā tāa̍ni̍ŋndo̍ ō tōsa̍ mā tōsa̍ sūɛ̍i̍ wɔ̍ɔ̍ŋnde̍.

²²Wāna̍ ye̍e̍mā ho̍ō nyɛ̄ o̍ nyɛ̄ le̍ ndu̍ pīlɛ̍ wo̍, ō yēēmā mbō sɔ̄la̍ sūllo̍ o̍ chɔ̍chɔ̍ bɛ̍ndū ni᷄ŋ. Mbō pūɛ̄ɛ̄nu̍ŋ le̍ sīnāa̍ māā tāmbe̍i̍ ī chō ndu̍ chūmndo̍.

²³Tē wāŋndo̍ tɛ̄ɛ̄mbu̍u̍ sūɛ̍i̍ pɛ̍ mā mi̍ŋgi̍ ndu̍ o̍ nɛ̄ī, mā chɔ̍m ndu̍ nyɛ̄ o̍ nɔ̍ le̍ tōsāa̍ wo̍, nūm wāna̍ mi̍ŋgī ndu̍ ko̍ŋ o̍ nɛ̄ī yo̍, nyīnā cha̍a̍ ŋ̄ sɔ̄lā ta̍u̍ ta̍u̍ ni̍. Ndu̍ hi̍o̍ū bɛ̄ndā, a̍ wāŋndo̍ sāŋgālāa̍ sāŋgālā lāchōōwāa̍.

²⁴Wānā o̍ wāna̍ yɔ̍ŋ fi̍nyā ndɔ̍ kɛ̄lɛ̄ŋgāā kāla̍ ndɔ̍ vīīle̍ŋ pɛ̍, mbō dīmi̍ māā ō cho̍ su̍ɛ̍i̍ wɔ̍ɔ̍ŋ te̍ o̍ to̍sa̍ le̍ pɛ̍, wānā wa̍ā le̍nde̍, nda̍ wānāa̍ ke̍ī ha̍ā nyɛ̄m wāŋnda̍ tɛ̄ɛ̄mbūūwo̍ wa̍, wānāā pīli̍a̍a̍ nda̍ chō ni̍.

²⁵Wāna̍ lēhɔ̄llo̍, sɔ̍ŋgɔ̄la̍ŋ o̍ ma᷅l wa᷅ŋnda̍ tɛ̄ɛ̄ŋ ni̍. Kɛ̍ wāna̍ du̍a̍ū ho̍ō tīīnda᷄ŋ ndɔ̄ɔ̍ o̍ Mɛ̍lɛ̄ka̍ Ya̍a̍wɛ̄ɛ̄ ni̍ŋ ndo̍, dɛ̍nɛ̍ kɛ̍ndɔ̄ɔ̍ o̍ sɔ̍lā ni̍.

²⁶Wānā o̍ wāna̍ dɔ̍ū tīīnda᷄ŋndo̍ o̍ ndu̍ pi̍la̍ ni̍ŋ pɛ̍, dīɔ̄mndo̍ wānā ko̍ŋ ō chō ni̍. Kɛ̍ wānā o̍ wāna̍ ba̍lu̍ o̍ kɔ̄l kālo̍o̍ ni᷄ŋ pɛ̍, chīndāa̍ yōōmū ndɔ̄ɔ̍ ō chīndā ni̍.

²⁷Wānā o̍ wāna̍ ke̍ wānā ta̍mbɛ̍i̍yo̍ pɛ̍, a̍ ve᷅ o̍ bā hāvɛ̍i̍ ni̍ŋ le̍ nyɛ̄ o̍ nyɛ̄ le̍. Kɛ̍ wānā o̍ wāna̍ che᷅ wānā ta̍mbɛ̍i̍yo̍ pɛ̍, ma̍ mūlī hɔ̄lāā nūmnda̍ īkɛ̄i̍, yɔ̄ŋi̍ ŋ̄ māla̍ ndu̍, sēndi̍la̍ŋ la̍ŋ la̍ wa᷅ nu̍m chōo̍ ni̍.

²⁸Tē wānāā dɛ̍nɛ̍ wɔ̍ɔ̍ŋnda̍ ā su᷄l o̍ lēmāsā pɛ̍, sɔ̄ɔ̄ndīa̍ŋndo̍ wāŋnda̍ ā sɔ̄ɔ̄ndi̍a̍ŋ ni̍. Kɛ̍ tē wānāā dɛ̍nɛ̍ wɔ̍ɔ̍ŋāā kāŋ ā vī pɛ̍, wānāā tōnya̍a̍ ā kūi̍ ta̍u̍ ta̍u̍.