Read Southern Kisi Pu̍lɔ̍wāā 29 Bible Online

Pu̍lɔ̍wāā 29 - Southern Kisi bible

Pu̍lɔ̍wāā 29

¹Wānā o̍ wānā wāŋnda̍ kīndi̍ pɛ̍ le̍ ndu̍ mīŋgīo̍o̍ o̍ nɛ̄ī le̍ te̍le̍ŋnda̍ fa̍ŋgā fa̍ŋgā, kɛ̍ mbō tōsa̍ bōllē kālāle̍ŋ mbō kɛ̄ɛ̍ wāŋnda̍ dīōm pɛ̍, wānā wa̍ā le̍nde̍, nyɛ̄ pālāa̍ o̍ sɔ̍lā o̍ lē pīlɛ̍ ni᷄ŋ ni̍. Ndu̍yɛ̍ nyɛ̄ ndɔ̄ pa̍lāa̍ ō nɔ᷅ chi̍e̍i̍ chīēī le̍.

²Tē wānāā tōnya̍a̍ ā su᷄l o̍ lēmāsā pɛ̍, wāŋnda̍ ā dɔ̄ɔ̄nu᷄ŋ nya̍a̍le̍. Kɛ̍ tē wānāā dɛ̍nɛ̍ wɔ̍ɔ̍ŋnda̍ ā wa̍ wāŋnda̍ chōo̍ la̍ma̍sā pɛ̍, wāŋnda̍ bīī mɔ̍nɛ̍i̍.

³Wānā o̍ wānā ka̍a̍la̍ kɔ̄l kālo̍o̍ pɛ̍, wānā wāā le̍nde̍, kɔ̄llo̍ fi̍nyā ndɔ̄ o̍ na᷅ŋ a̍ ndu̍ ni̍. Wānā o̍ wāna̍ di̍mi̍ pɛ̍ māā wānāā tīāmāa̍, nda̍ cho̍ nāāŋa᷅ŋāā ndūa̍a̍ ni̍, nyɛ̄ o̍ nyɛ̄ wānā ko̍ŋ ō nūūwa̍, ō che᷅l ndu̍ o̍ bā le̍, hīōūwɔ᷄ŋndo̍ o̍ hi̍a̍u̍nūŋ wa̍nāā tīāmāā kāŋ kɔ̄ɔ̄lī ni̍.

⁴Māsa̍ cho̍ lɛ̄ŋnde̍ŋ chīla̍ŋndo̍ tē ō wa̍ pɛ̍ sa̍kpō, kpāāyāa̍ lɛ̄ŋndē ndɔ̄le̍ŋ lē sɔ̄lā ni̍. Kɛ̍ tē ō wa̍ māsā bi̍yāā lālūɛ̄īyɔ̄ɔ̄ ni᷄ŋ wa᷅ŋnda̍ o̍ lābā pɛ̍, tɛ̄ɛ̄mbūūwo̍ o̍ tɛ̍ɛ̍mbūū lɛ̍ŋndē lēŋ ni̍.

⁵Wānā o̍ wāna̍ sa̍ŋga̍la̍ chāa̍ŋ ndɔ̍ sāŋgālā lāchōōwāa̍ pɛ̍, yāŋɔ̄ɔ̄le̍ŋ o̍ cho̍ chāa̍ŋ ndɔ̄ ko̍ŋ yēŋ ndo̍ ni̍.

⁶Wānāā dɛ̍nɛ̍ wɔ̍ɔ̍ŋnda̍, mī yɔ̄ŋ nda̍ wɔ̍ɔ̍ŋndo̍ ō ye᷄ŋ nda̍ yāŋɔ̄ɔ̄le̍ŋ. Kɛ̍ wānāā kɛ̄ndīa̍a̍ nda̍ nda̍, mā wānu᷄ŋ a̍ kɔ̄ltā kɛ̄ndɛ̄, mā sōli̍ chōndu̍ŋ kɔ̄l kɛ̄ndɔ᷄ŋ.

⁷Wāna̍ tōnya̍a̍ ndu̍ bu̍u̍lāŋ ni̍, māā wānā ta̍mbɛ̍i̍yo̍ ō sɔ̍la̍ di̍ ndɔ̄ɔ̍. Kɛ̍ wāna̍ dɛ̍nɛ̍ wɔ̍ɔ̍ŋndo̍ ndu̍ bu̍u̍la̍ŋ bɛ̍ɛ̍ a̍ ī wāā le̍nde̍ o̍kɔ̄ɔ̄ le̍.

⁸Wānāa̍ cho̍ ha̍ā ā nɔ̍ bu̍u̍la̍ŋ le̍ wānā o̍ wānā le̍ wa̍, mā tōsa̍ mī chi̍o̍o̍ kpo̍u̍ o̍ hi̍i̍lu̍ŋ. Kɛ̍ wānāa̍ nɔ̍ kɔ̄l kālo̍o̍ wa̍ nda̍, mɛ̄ɛ̍ o̍ mɛ̄ɛ̍ wāŋnda̍ ā dɔ̄ɔ̄nu̍ŋ tu̍mbe̍, tōsāa̍ nda̍ tōsā ni̍ mā pɔ̄lu̍l lākɔ̄l.

⁹Tē wāna̍ kɔ̄l kālo̍o̍ ō bīī se̍ī dīɔ̄mndo̍ pɛ̍ mā kūɛ̄ kɔ̍ɔ̍sɔ̍ ko̍ŋ, dēŋīo̍o̍ ko̍ni̍ dīɔ̄mndo̍ ō chō wā ni̍, mbō mām wa᷅na̍ kɔ̄l kālo̍o̍, o̍ ko̍ŋ, kɔ̄l nyūlū o̍ kɔ̄l nyūlū ō lu̍e̍ī nda̍ tɛ̄ɛ̄ŋ te̍.

¹⁰Wānā o̍ wāna̍ cho̍ wānā di̍yāā ŋ̄wāŋndā chīe̍e̍, yɛ̄le̍ŋ o̍ tu᷅l wa̍nāa̍ cho̍ sa̍kpō wa̍ ni̍, ndu̍yɛ̍ nɛ̄īla̍ŋ o̍ nu̍u̍wā le̍ wānāa̍ to̍sā sɔ̍ɔ̍ŋ kɛ̍ndɔ᷄ŋ nda̍ dīūwo̍ ni̍.

¹¹Dīɔ̄mndo̍ tē ō dɔ̄ɔ̄nu᷄ŋ tu̍mbe̍ pɛ̍, ō nɔ̍lā mbō tīu̍ kɔ̄l ndɔ̄ɔ̍ bā le̍. Kɛ̍ wāna̍ kɔ̄l kālo̍o̍ ndu̍ ndu̍, ō dɔ̄ɔ̄nu̍ŋ bɛ̍ɛ̍ tu̍mbe̍, ō nɔ̄lā mbō tīu̍ kɔ̄l ndɔ̄ɔ̍ bā.

¹²Tē wāna̍ cho̍ wāŋnda̍ chīla̍ŋ ndo̍ ō ya᷄ŋ chōōlā wāŋnda̍ ā dīmūl ndu̍ la̍ŋ nīla̍ŋ pɛ̍, wāŋ bɛ̄ndūa̍a̍ wa᷅ ndu̍ wa̍llo̍ o̍ bā bɛ̄ŋgu̍ wa̍ kpo̍u̍, wānāā dɛ̍nɛ̍ wɔ̍ɔ̍ŋnda̍ nda̍ sīmnūŋ ni̍.

¹³Wānāā tāmbɛ̍i̍ya̍ ni̍, wānāa̍ tu̍sī wa̍nāā tāmbɛ̍i̍ya̍ nyɛ̄ pālāa̍ chōo̍ wa̍ ni̍, nda̍ vēllāa̍ vēllē kpo̍u̍, ā nɔ̄ nyɛ̄ pīlɔ̍ɔ̍ ho̍ō kpe̍. Ndu̍ yɔ̍nūŋ ni̍, māā nda̍ kpo̍u̍, Mɛ̄lɛ̄ka̍ Ya̍a̍wɛ̄ɛ̄ o̍ ke̍ nda̍ hɔ̄lta̍ŋ le̍ chɔ̄ɔ̍.

¹⁴Māsā o̍ māsā bɛ̍ndu̍ cho̍ lɛ̄ŋnde̍ŋ chīla̍ŋ, tē ō wa̍ pɛ̍ sa̍kpō o̍ māsāle̍ ndɔ̄le̍ŋ ni᷄ŋ, di̍la̍ wānāā tāmbɛ̍i̍ya̍ ā nɔ̄ le̍ sɔ̄lāa̍ la̍ŋ, mbō tōsa̍ mā sɔ̄la̍ la̍ŋ pɛ̍, māsā wa̍ā le̍nde̍, vīōūwɔ̄ɔ̍ o̍ vi̍a̍ū o̍ māsāle̍ŋ chōo̍ ni̍.

¹⁵Chūāāmbɔ̄ɔ̍ sūɛ̍i̍ wɔ̍ɔ̍ŋnde̍ tōsāa̍ mā lɔ̄ɔ̄ ndu̍, ndu̍yɛ̍ mā mi̍ŋgi̍ ndu̍ o̍ nɛ̄ī, ō tōsā mī chūāāmbɔ̄ kōŋ ō sɔ̄la̍ kɔ̄l kālo̍o̍. Kɛ̍ chūāāmbɔ̄ nda̍ māl ho̍ō o̍ bā ndɔ̄ɔ̍ chōo̍, nyɛ̄ o̍ ye̍e̍mā le̍ tōsāa̍ wo̍, ndu̍ o̍ to̍sā ni̍ wo̍, chūāāmbɔ̄ wāā le̍nde̍, si̍ɔ̍mbu̍la̍ŋ o̍ tu̍sī ka̍la̍ ndɔ̍ ni̍.

¹⁶Tē wānāā dɛ̍nɛ̍ wɔ̍ɔ̍ŋnda̍ ā su᷄l o̍ lēmāsā pɛ̍, dɛ̍nɛ̍ wɔ̍ɔ̍ŋndo̍ ō hīōū lāchī a̍ kūīyo̍. Kɛ̍ wānāā dɛ̍nɛ̍ wɔ̍ɔ̍ŋāā wāā le̍nde̍, chɔ̄ɔ̍ wānāā tōnya̍a̍ ā chā ni̍, mī dɛ̍nɛ̍ pa̍lāā ō kōma̍l nda̍.

¹⁷Tē chūā nūmndo̍ tōsa̍ sūɛ̍i̍ wɔ̍ɔ̍ŋnde̍ pɛ̍, tu̍si̍ ndu̍ nyɛ̄ pālāa̍ chōo̍ le̍ ndu̍ mīŋgīo̍o̍ o̍ nɛ̍i̍. Tē a̍ to̍sa̍ le̍nde̍ pɛ̍, ā nɔ̄lā mā kēlū yōŋgāa̍ a̍ chūā wāā le̍nde̍. Chūā wāā le̍nde̍, ō to̍sā mī si̍ɔ̍mbu̍la̍ bi̍ī nu̍m te̍.

¹⁸Bā o̍ bā wāŋnda̍ nɔ̍ wa᷅na̍ di̍mu̍l nda̍ yōōŋgu̍ cha᷅ŋ o̍ Mɛ̄lɛ̄ka̍ lo̍ wo̍ le̍, wānāa̍ wa᷅ o̍ fo̍ndāŋ kōŋ nda̍, bā nda̍ yēēmā le̍ wānɔ᷄ŋndo̍ chōo̍ wo̍, ndu̍ ko̍ni̍ nda̍ wānūŋ cho̍o̍ ni̍. Kɛ̍ wānā o̍ wāna̍ to̍sa̍ nyɛ̄ sāwāla̍ Mɛ̄lɛ̄ka̍la̍ŋ lā dīmi̍ le̍ tōsāa̍ wo̍ pɛ̍, wānā ko̍ŋ ō pɛ̄ tɔ̄nɔ̄ɔ̍.

¹⁹Bu̍ɛ̍īyo̍, sūɛ̍i̍ sōndūe̍i̍ su̍e̍e̍ nāa̍ ndu̍ chu̍a̍, ī nɔ̍lā mī ī mīŋgi̍ ndu̍ o̍ nɛ̄ī le̍. Mā sōō nāa̍ ndu̍ chu̍a̍ mbō sīna̍ nu̍m pɛ̄ŋgu̍, kɛ̍ ō tu̍i̍ī nu̍m dīōm te̍.

²⁰Wānā o̍ wāna̍ hi̍u̍ kēlēŋāa̍ a̍ sōndō pɛ̍ te̍i̍, wānā wa̍ā le̍nde̍, dīɔ̄mndo̍ ō nɔ̄ bɛ̍ɛ̍ ti̍i̍nda᷄ŋndo̍ mbo̍ hīāū ndu̍.

²¹Bu̍ɛ̍i̍ cho̍ nu̍m wa̍llo̍ o̍ bā wo̍, tē a̍ bi̍i̍lu̍ ndu̍ bōōndi̍i̍ o̍ cho̍ chūāāmbɔ̄ ve̍ pɛ̍, a̍ tɛ̍ɛ̍mbu̍u̍ ndu̍ tē ō hu᷄ŋ su᷅l pɛ̍, ō chūu̍ nu̍m kɔ̄l tāmbɛ̍i̍yo̍.

²²Wānā o̍ wāna̍ cho̍ wānā du̍a̍u̍na᷄ŋ tu̍mbe̍, kpūndɛ̍la̍ŋ o̍ ma᷅l ni̍. Ndu̍yɛ̍ wānā o̍ wāna̍ nɔ̍ kɔ̄l bīŋgīo̍o̍ pɛ̍, yɔ̄ŋndā wɔ̄ɔ̍ŋnda̍ŋ pīla̍ o̍ to̍sā ni̍.

²³Wāna̍ yōŋgāa̍, yōŋga̍ ndɔ̄ɔ̍ ndu̍ tu̍sī ndu̍ tōōlō ni̍. Kɛ̍ wānā o̍ wāna̍ tu̍si̍ŋ pɛ̍, bɛ̄ɛ̄le̍ŋ o̍ sɔ̍lā ni̍.

²⁴Wānā o̍ wāna̍ na̍a̍ŋa᷅ŋ a̍ vīīnɔ̄ɔ̍ pɛ̍, wānā ko̍ŋ, ō tu᷄l yōōmū ndɔ̍ ndu̍ pi̍la̍a̍ lēyɛ̄. Kāni̍ fo̍ndōle̍, tē vīīnɔ̄ ko̍ŋ ō tōsa̍ īsɔ̄ɔ̍ pɛ̍, mā lɔ̄ɔ̄ wānā ko̍ŋ se̍īle̍ŋ, wānā ko̍ŋ ō mēnāŋ ma̍ me̍na᷄ŋ, kɛ̍ ō fe̍ŋāŋ vi̍i̍nɔ̄ ko̍ŋ kɔ̄ɔ̄lī le̍.

²⁵Sīōōŋnde̍ nɔ̄ɔ̍ le̍ wāŋndo̍, nyɛ̄ kōŋ mbō sīmnu᷄ŋ ya̍ŋɔ̄ɔ̄le̍ŋ le̍ nūm. Kɛ̍ wānā o̍ wāna̍ dɔ̍ū tīīnda᷄ŋndo̍ o̍ Mɛ̄lɛ̄ka̍ Ya̍a̍wɛ̄ɛ̄ ni̍ŋ pɛ̍, wāa̍ ŋ̄ wānūŋ o̍ bā nūmndo̍ chōo̍ yɛ̍lɛ̍kɛ̍lɛ̍ɛ̍ ni̍, nyɛ̄ o̍ nyɛ̄ yɔ̍nūŋ a̍ nūm te̍.

²⁶Wānā o̍ wānā ye̍e̍ma̍ māā wāna̍ cho̍ wāŋnda̍ chīla̍ŋndo̍ ō chɔ̍ ndu̍ nyīnā. Kɛ̍ wāna̍ nɔ̍lā mbō wa̍ wāŋnda̍ tɛ̄ɛ̄ŋ sa̍kpō, di̍ wāŋnda̍ nɔ̄ le̍ sɔ̄lāa̍ wo̍ mbō ke̍ nda̍ wo̍, wānā ko̍ŋ ndu̍ pīlɛ̍ kpe̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

²⁷Wāna̍ cho̍ o̍ tōnya̍a̍ chōo̍ wo̍, yɛ̄le̍ŋ o̍ tu᷅l wa᷅na̍ lāka̍fāa̍ ni̍. Ndu̍yɛ̍ le̍nde̍ ko̍ni̍, wāna̍ dɛ̍nɛ̍ wɔ̍ɔ̍ŋndo̍, yɛ̄le̍ŋ o̍ tu᷅l wa᷅na̍ cho̍ sa̍kpō wo̍ ni̍.