Read Southern Kisi Pu̍lɔ̍wāā 3 Bible Online

Pu̍lɔ̍wāā 3 - Southern Kisi bible

Pu̍lɔ̍wāā 3

¹Po̍ nūu̍, pu̍ɛ̍ɛ̍nu᷄ŋ nyɛ᷅ ya̍ I̍ pɛ̍ɛ̍ku̍ nu̍m ndo̍ le̍. Nyɛ̄ o̍ nyɛ̄ ya̍ I̍ di̍mu̍l nu̍m le̍ tōsāa̍, kɛ̍si̍ŋ ndu̍ o̍ kɔ̄l.

²Ko̍ŋ to̍sā ni̍ mā sɔ̍la̍ yōōmū vīlɛ̄īyo̍, ndu̍yɛ̍ mā sɔ̍la̍ dɛ̍nɛ̍ kɛ̍ndɔ̄ɔ̍ o̍ yōōmū nūmndo̍ ni᷄ŋ.

³Chɛ᷅l mī dīīkɔ᷄ŋndo̍ ndu̍yɛ̍ a̍ sa̍kpōyɛ̍i̍ ŋ̄ hɛ̄lu᷄ŋ nu̍m te̍. Ba̍a̍nu̍ŋ mu̍ŋ o̍ lābo̍lō māā ŋ̄yɔ̄lɔ̄ le̍ te̍le̍ŋ o̍ te̍le̍ŋ. Ŋ̄ wa̍ nu̍m ŋ̄ pōōnyīāā o̍ kɔ̄l.

⁴Tē a̍ to̍sa̍ le̍nde̍ pɛ̍, nyīnā cha̍a̍ a̍ dīōlā kɛ̄ndɛ̄la̍ŋ ŋ̄ sɔ̄lā te̍le̍ŋ o̍ te̍le̍ŋ Mɛ̍lɛ̄ka̍ a̍ ŋ̄wāŋndā chīe̍e̍ o̍ bā ni̍.

⁵Dɔ̍u̍ ti̍i̍nda᷄ŋ nu̍mndo̍ kpo̍u̍ o̍ Mɛ̄lɛ̄ka̍ Ya̍a̍wɛ̄ɛ̄ ni̍ŋ. Ti̍i̍nda᷄ŋ si̍nā nūmndo̍ le̍.

⁶O̍ nyɛ̄ o̍ nyɛ̄ ŋ̄ wa̍ to̍sāa̍ ni᷄ŋ, pu̍ɛ̍ɛ̍nu᷄ŋ a̍ Mɛ̄lɛ̄ka̍ Ya̍a̍wɛ̄ɛ̄ le̍. Ō nɔ̄lā mbō tōsa̍ mī nyɛ̄ o̍ nyɛ̄ wa̍ ō kɛ̄ndɛ̄ a̍ nūm.

⁷Chu̍ā nūm pi̍la̍ māā ā chō wāna̍ kɔ̄l kālu̍ mbō hīōū mɛ̄ɛ̍ ŋ̄ chō yɛ̍ le̍. Nɔ̍ si̍o̍o̍ŋīi̍ Mɛ̄lɛ̄ka̍ Ya̍a̍wɛ̄ɛ̄ ve̍, ndu̍yɛ̍ mā kɛ̍ɛ̍ yɔ̄ŋ wɔ̄ɔ̍ŋndo̍.

⁸Ko̍ŋ to̍sā ni̍, mā sɔ̍la̍ kɛ̍ndi̍a̍a̍ o̍ dīāllūŋ nūmndo̍ŋ ni᷄ŋ, ndu̍yɛ̍ mā sɔ̍la̍ dīāllūŋ kāla᷄ŋ.

⁹Ke̍ Mɛ̍lɛ̄ka̍ Ya̍a̍wɛ̄ɛ̍ bɛ̄ɛ̄le̍ŋ sa̍na̍a̍ a̍ nyɛ̄m nūm su̍la᷄ŋ yɔ̄ŋgōo̍ o̍ ndu̍ lo̍ māā kē. Ndu̍yɛ̍, tɔ̄lɔ̄ɔ̄lā tāse̍la̍ tɔ̄lɔ̄ɔ̄lā nūmnda̍ŋ lā kūām nda̍ŋ ki̍nɛ̍i̍, mā hīŋ a̍ la̍ŋ o̍ ndu̍ lo̍ māā kē.

¹⁰Tē a̍ to̍sa̍ he̍ī pɛ̍, ā sɔ̄lā ni̍ŋ nyɛ̍ dīa̍a̍ o̍ chīɔ̄ɔ̄ŋ nūmndo̍ŋ ni᷄ŋ ta̍u̍ ta̍u̍ mā pe̍i̍ ko̍nda̍la̍ nu̍mnda̍ŋ. O̍ ko̍ŋ kɔ̍ɔ̍lī, mūɛ̄īmā mākīle̍pīi̍ya̍ŋ mā wā ni̍ŋ nu̍m fūlāa̍ o̍ bā ha̍a̍a̍, a̍ nɔ᷅ ni̍ŋ nyɛ᷅m lāāndūŋ lētūu̍ le̍ ma̍ŋ dɔ̄wɔ̄ɔ̄ le̍.

¹¹Po̍ nūu̍, tē Mɛ̄lɛ̄ka̍ Ya̍a̍wɛ̄ɛ̄ o̍ mi̍ŋgi̍ nu̍m o̍ nɛ̄ī pɛ̍, kɛ̍si̍ŋ ndi̍ o̍ kɔ̄l nyɛ̄ kɛ̄ndɛ̍ī. Tē ō hāndu̍ nu̍m nyɛ̄ pālāa̍ chōo̍ pɛ̍ le̍ nyɛ̄ ŋ̄ tōsa̍ wo̍, ta̍mbū kɔ̄l te̍.

¹²Si̍na̍ pɛ̍ŋgu̍ māā Mɛ̄lɛ̄ka̍ Ya̍a̍wɛ̄ɛ̄ ndu̍ ndu̍, wāna̍ o̍ ka̍a̍lā wo̍, nūm o̍ mi̍ŋgī o̍ nɛ̄ī ni̍. Mɛ̄ɛ̍ fi̍nyāa̍ ō mīŋgī nu̍a̍ā chūā ndɔ̍ o̍ ka̍a̍la̍ wo̍ o̍ nɛ̄ī yɛ̍, le̍nde̍ Mɛ̄lɛ̄ka̍ mīŋgī wa᷅na̍ o̍ ka̍a̍la̍ wo̍ o̍ nɛ̄ī ni̍.

¹³Wāna̍ sɔ̍lā ho̍ō kɔ̄l kālo̍o̍, ndu̍yɛ̍ mbō nɔ̄ sīnā pɛ̄ŋgo̍o̍ wo̍, ō pɛ̄l tɔ̄nɔ̄ɔ̍.

¹⁴Kɔ̄l kālo̍o̍ ō nɔ̄ tɔ̄nɔ̄ɔ̍ ō hīōū ka̍ni̍i̍ hu̍mbūe̍i̍. Ō kē wa̍nā tɔ̍nɔ̄ɔ̍ ō hīōū bɛ̍ɛ̍ tɔ̍nɔ̍ ko̍o̍līi̍ye̍ ī kē nu̍m ndo̍.

¹⁵Kɔ̄l kālo̍o̍ ō nɔ̄ ba̍a̍, ō hīōū nyɛ̄m ba̍ā kāla᷄ŋ. Nyɛ̄ o̍ nyɛ̄ cho̍ mī wānā nɔ̍ mā ye̍e̍ma̍ ndu̍ mbō sīīma᷅ŋ a̍ kɔ̄l kālo̍o̍ le̍.

¹⁶Kɔ̄l kālo̍o̍ ndu̍ ndu̍, bā o̍ bā o̍ mu̍li̍ nu̍m, tɔ̄nɔ̄ɔ̍ ŋ̄ sɔ̄lā le̍ni̍ŋ ni̍, tē ō mu̍li̍ nu̍m o̍ bā kɛ̄ndɔ̄ɔ̍ chōo̍ pɛ̍, a̍ sɔ̍la̍ yōōmū vīlɛ̄īyo̍, yālāā o̍ mu̍lī nu̍m ō bā mīāllo̍ chōo̍ le̍, a̍ sɔ̍la̍ sūllo̍ a̍ bɛ̄ɛ̄le̍ŋ.

¹⁷Kɔ̄l kālo̍o̍ mbō tōsa̍ mā sɔ̍la̍ yōōmū kɛ̄ndɔ̄ɔ̍, ndu̍yɛ̍ mbō ke̍ nu̍m vɛ̄lɛ̄ kɔ̄l nyūlōo̍ o̍ yōōmū nūmndo̍ ni᷄ŋ.

¹⁸Wānāa̍ chɛ᷅l kɔ̍l kālo̍o̍ wa̍, kɔ̄l kālo̍o̍ chō māchūāā yɔ᷄m yɔ̍ŋgū nda̍ yōōmōo̍ wo̍. Le̍la̍ŋ wānāa̍ sɔ̍lā kɔ̍l kālo̍o̍ mā bīī ndu̍ kpi̍ŋ nda̍, ā pɛ̄l tɔ̄nɔ̄ɔ̍.

¹⁹A̍ kɔ̄l kālo̍o̍ Mɛ̄lɛ̄ka̍ Ya̍a̍wɛ̄ɛ̄ o̍ to̍o̍si̍a̍a̍ chi̍e̍ēŋndo̍ ho̍ō ni̍. Sīnā ndɔ̄ pɛ̍ŋgo̍o̍ ndu̍ o̍ so̍li̍ŋ kpe̍ku̍ ni̍, mbo̍ tōōsīāā ha̍la̍a̍.

²⁰A̍ kɔ̄l kālu̍ ndɔ̄ɔ̍, mbo̍ tōsā, mi̍ pēēla̍ŋ lā wā hīōūwɔ̄ɔ̍, ndu̍yɛ̍ mi̍ ha̍la̍a̍ ō wā mɔ᷄mndo̍ yɔ̄ŋgōo̍ o̍ lɛ̄ŋnde̍ŋ chōo̍.

²¹Po̍ nūu̍, kɔ̄l kālu̍ ŋ̄ sɔ̍la̍ wo̍, a̍ sīnā pɛ̄ŋgu̍ ŋ̄ nɔ̄ wo̍, sa̍a̍ la̍ŋ kpi̍ŋ. Ma᷅l la̍ŋ mī lā hɛ̄lu᷄ŋ nu̍m te̍.

²²La̍ŋ la̍ cho̍ tōsā ni̍ŋ ni̍ mā vīōū yōōmū, ndu̍yɛ̍ mī lā tōsa̍ mā wa̍ o̍ yōōmū kɛ̄ndɛ̄ kɛ̍ndɛ̄ ni᷄ŋ.

²³Ā bālūŋ ni̍ŋ o̍ bā nūmndo̍ chōo̍ yɛ̍lɛ̍kɛ̍lɛ̍ɛ̍, bōŋndo̍ bɛ̍ɛ̍ a̍ bo᷅ŋ ni̍ŋ te̍.

²⁴Ā wānūŋ ni̍ŋ o̍ cha̍lna᷄ŋ, sīōōŋīī bi̍ī ni̍ŋ nu̍m le̍ nyɛ̄ o̍ nyɛ̄ le̍, ndu̍yɛ̍ a̍ hi̍ni̍ pɛ̍ a̍ lɔ̍lnu̍ŋ kpo̍o̍ŋ.

²⁵Sīōōŋīī bi̍ī ni̍ŋ nu̍m le̍ dɛ̍nɛ̍la̍ pa̍lāāla̍ ko̍māl wa᷅ŋnda̍ o̍ lēpīlɛ̍ ni᷄ŋ kpe̍ la̍ŋ te̍, ɔ̄ɔ̄ dɛ̍nɛ̍la̍ pa̍lāāla̍ ko̍māl wa̍nāā dɛ̍nɛ̍ wɔ̍ɔ̍ŋnda̍ mɛ̄ɛ̍ hūēīyīī bɛ̄ndūe̍i̍ ī hūŋ nu̍a̍ā yɛ̍ la̍ŋ.

²⁶Kāni̍ fo̍ndōle̍, Mɛ̄lɛ̄ka̍ Ya̍a̍wɛ̄ɛ̄ o̍ cho̍ nu̍m māndā, nyɛ̄ o̍ nyɛ̄ yɔ̍nūŋ a̍ nūm te̍. Ō chō nu̍m māndā, ā ye᷄ŋ nu̍m bɛ̍ɛ̍ ya̍ŋɔ̄ɔ̄le̍ŋ, a̍ he̍ū o̍ yāŋɔ̄ɔ̄lē lēŋ te̍.

²⁷Te̍le̍ŋ o̍ te̍le̍ŋ tē a̍ sɔ̍la̍ fo̍ndāa̍ le̍ wānāa̍ cho̍ o̍ bā hāvɛ̍i̍yo̍ ni᷅ŋ nda̍ kɛ̄ndɛ̄i̍ tōsāllo̍ pɛ̍, to̍sa̍l nda̍.

²⁸Tē wāna̍ nya̍ chīɛ̄ɛ̄li̍āŋndo̍ ō kōma̍l nu̍m le̍ nyɔ̄ɔ̍ pɛ̍, ndu̍yɛ̍ ma̍ nɔ̄ nyɛ̄ kōŋ o̍ bā, ke̍ ndu̍, di̍mūl ndu̍ āā, “Kɔ̍ hūŋ, sīɔ̄dīi̍ I̍ ke̍ nu̍m” te̍ le̍.

²⁹Chāa̍ŋ nu̍m nya̍ chīɛ̄ɛ̄li̍āŋ ndu̍yɛ̍ mbo̍ lāāla᷄ŋ a̍ nūmndo̍, nɔ᷅ tūū wɔ̄ɔ̍ŋ le̍ ndu̍ sūɛ̍i̍ wɔ̍ɔ̍ŋnde̍ tōsāllo̍ le̍.

³⁰Lā sɛ̍ɛ̄ŋgi̍āŋ nya̍ wāna̍ to̍sa̍l nu̍m īsɔ̄ɔ̍ o̍ īsɔ̄ɔ̍ wo̍ le̍.

³¹Pa̍ŋālā wāna̍ lāka̍fāa̍ le̍ nyɛ̄ ndɔ̄ kɛ̍ndɔ̄ɔ̍ le̍, ndu̍yɛ̍ vɛ̍lɛ̄ tu̍āl ka̍ālā ndɔ̄la̍ŋ kɔ̄ɔ̄lī le̍.

³²Kāni̍ fo̍ndōle̍, Mɛ̄lɛ̄ka̍ Ya̍a̍wɛ̄ɛ̄ o̍ tu̍l wānāa̍ to̍sā sɔ̍ɔ̍ŋ wɔ̍ɔ̍ŋndo̍ nda̍ lēyɛ̄. Kɛ̍ wānāa̍ to̍sā sɔ̍ɔ̍ŋ kɛ̍ndɔ̍ŋ nda̍ nda̍, kāālāa̍ o̍ ka̍a̍lā nda̍ ni̍.

³³Wānāā dɛ̍nɛ̍ wɔ̍ɔ̍ŋnda̍ chīɛ̄īlā ndāla̍ŋ, sēndi̍o̍o̍ Mɛ̄lɛ̄ka̍ Ya̍a̍wɛ̄ɛ̄ o̍ ha̍ndū la̍ŋ chōo̍ ni̍. Kɛ̍ wānāa̍ to̍sā sɔ̍ɔ̍ŋ kɛ̍ndɔ̍ŋ nda̍, nda̍ nda̍ mbō dɔ̄ū chīɛ̄īlā ndāla̍ŋ sa̍lā.

³⁴Wānāa̍ ma᷅m wa᷅ŋnda̍ wa̍, māmɔ̄ɔ̍ Mɛ̄lɛ̄ka̍ ō mām nda̍ ni̍. Kɛ̍ wānāa̍ tu̍si̍ŋ to̍o̍lō wa̍ nda̍, mbō chē nda̍ nyīnā.

³⁵Wānāā kɔ̄l kālu̍a̍a̍, bɛ̄ɛ̄le̍ŋ nda̍ sɔ̄lā te̍le̍ŋ o̍ te̍le̍ŋ ni̍. Kɛ̍ dīɔ̄mnda̍ nda̍, bɛ̄ɛ̄la̍ ta̍mbɛ̍i̍la̍ŋ nda̍ sɔ̄lā lɔ̍ɔ̍ lɔ̍ɔ̍ ni̍.