Read Southern Kisi Pu̍lɔ̍wāā 30 Bible Online

Pu̍lɔ̍wāā 30 - Southern Kisi bible

Pu̍lɔ̍wāā 30

¹Po̍ pi᷅lɛ̍ wa̍ dīōla̍ŋ āā A̍kɔ̄ɔ̄, po̍ Cha̍kɛ̄ɛ̄ wo̍, dīōmndā o̍ so̍ō, mi̍ lā wā māā lāyōōŋgū la̍ŋ, la̍ŋ la̍ cho̍ la᷅ŋ ni̍. Wānāā o̍ di̍mu̍l dīōmnda̍ŋ nda᷅ŋ nda̍ nda̍ cho̍ I̍tīɛ̄l nda̍ Yu̍kāl ni̍. Dīōmndā la̍ŋ la̍ cho̍ la᷅ŋ.

²Dīɔ̄mīī ya̍ I̍ nɔ̍ ve̍, I̍ bɛ̍nda̍ bɛ̍ɛ̍ mī wa̍ ō vēēlāā māā wāna̍ chi̍e̍e̍ le̍. Sīnā pɛ̄ŋgu̍ wāna̍ chi̍o̍o̍ ō nɔ̄ wo̍, ya̍ I̍ nɔ̍ ndu̍ kpo̍so̍ŋ te̍.

³I̍ pɛ̍ɛ̍ku̍ i̍sɔ̍ɔ̍ o̍ īsɔ̄ɔ̍ kɔ̄l kālu̍ le̍. Ndu̍yɛ̍ I̍ si̍nā nyɛ᷅ o̍ nyɛ̄ a̍ Mɛ̄lɛ̄ka̍ Dīāndāa̍ o̍kɔ̄ɔ̄ le̍.

⁴Kāni̍ bɛ̍ɛ̍, ō nɛ̄ɛ̍nɛ̍ he̍l lɛ̄ ni᷅ŋ o̍ fo̍nda᷄ŋ Mɛ̄lɛ̄ka̍a̍, ndu̍yɛ̍ mbo̍ tūāl vɛ̄lɛ̄ lɛ̄ŋ na̍nu᷄ŋ? Ō nɛ̄ɛ̍nɛ̍ nɔ̍lā yɛ̍, mbō chūūŋgi̍a̍a̍ hūēīye̍, mbō bīī ndi̍ o̍ bā? Ō nɛ̄ɛ̍nɛ̍ nɔ̍lā yɛ̍, mbō sīmbū mɛ̄ŋnda̍ŋ o̍ dōmāa̍ ni᷄ŋ? Ō nɛ̄ɛ̍nɛ̍ ha̍ndu̍ yɛ̄ pɛ̄ŋgu̍la̍ŋ chɛ̍ chɛ̍ nāa̍ chi̍e̍ēŋndo̍ ho̍ō ō nɔ̄ mbō mɛ̄ɛ̄lu̍ wa̍? Ɔ̍ɔ̄ wānā ko̍ŋ dīōla̍ŋ, kɛ̄lɛ̄ŋgāāle̍ ɔ̍ɔ̄ po̍ ndɔ̄ɔ̍ dīōla̍ŋ? Lā chɔ᷄m ndɔ̍ ya̍, tē lā sīnā pɛ̍.

⁵Dīōm o̍ di̍o̍m fu̍la̍ Mɛ̄lɛ̄ka̍ o̍ sōndō, tōnya̍a̍ o̍ wa᷅ ni̍. Ndu̍yɛ̍ wānāa̍ hu᷅ŋ nāa̍ ndu̍ chu̍a̍ le̍ nda̍ māndāa̍ wa̍, māndāa̍ o̍ ma̍ndā nda̍ ni̍, mɛ̄ɛ̍ nyɛ̄ pūa̍a̍ chɔ̄ūwa̍ ā sɔ̄ŋgā o̍ bā māā bōo̍ bɛ̍ndū wo̍, ō māndā nda̍ nu̍a̍ā o̍ chɔ̄ūwo̍ ni᷄ŋ yɛ̍.

⁶Lā ha̍ndū nyɛ̄ o̍ nyɛ̄ o̍ nyɛ̄ Mɛ̄lɛ̄ka̍ ō dīmi̍ wo̍ chōo̍ le̍. Tē lā hāndu̍ nyɛ̄ o̍ nyɛ̄ o̍ nyɛ̄ lēchōo̍ pɛ̍, ō chō nya̍ mīŋgī o̍ nɛ̄ī, ndu̍yɛ̍ mbō chɔ᷄m māā lā chō wānāā lāchōōwā.

⁷Mɛ̄lɛ̄ka̍ Ya̍a̍wɛ̄ɛ̄, sɔ̄ɔ̍ŋ ŋ̄ mūu̍ŋ ya̍ I̍ ye̍e̍ma̍ ni̍ mā to̍sa̍l la̍. Ndu̍yɛ̍ yāndi̍i̍, lɔ̍ɔ̍pa̍ mī vi᷅, I̍ ye̍e̍ma̍ mā to̍sa̍l la̍ sɔ̄ɔ̍ŋ mu̍ŋ. Sɔ̄ɔ̍ŋ mu̍ŋ cho̍ mu᷅ŋ ni̍.

⁸To̍sa̍ I̍ wa᷅ wānā di̍mīāā lāchōō, ndu̍yɛ̍ mī wa̍ wāna̍ lāka̍fā le̍. O̍ ko̍ŋ kɔ̍ɔ̍lī, mā to̍sa̍ I̍ wa᷅ wānā su̍lāā le̍, ndu̍yɛ̍ I̍ wa᷅ vɛ̄lɛ̄ wānā ta̍mbɛ̍i̍ le̍. Kɛ̍ mā ke̍ ya̍ ō ya̍ I̍ di̍ā o̍ pāa̍le̍ŋ ni᷄ŋ ndo̍.

⁹Kāni̍ tē I̍ hi̍u̍ nɔ̄ɔ̍ pɛ̍ ta̍u̍, I̍ ku̍ɛ̄ le̍ nu̍m kīɔ̍ɔ̍, I̍ di̍mi̍ māā I̍ si̍nā nu̍m Mɛ̄lɛ̄ka̍ Ya̍a̍wɛ̄ɛ̄ le̍. Tē I̍ ta̍mbu̍ vɛ̄lɛ̄ pɛ̍, I̍ ku̍ɛ̄ le̍ vīīle̍ŋ yɔ̄ŋndo̍, o̍ ko̍ŋ, nūm Mɛ̄lɛ̄ka̍ nūu̍ I̍ to̍sa̍ dīōlā nūmnda̍ŋ lā tāmbu̍ lābɛ̄ɛ̄.

¹⁰Wānā o̍ wānā di̍mī dīōmndā wɔ̄ɔ̍ŋnda̍ŋ a̍ bu̍ɛ̍ī pi̍la̍a̍ o̍kɔ̄ɔ̄ nāa̍ māsānɔ̍ ndɔ̄ɔ̍ chūā le̍. Yɔ̄ŋi̍ bu̍ɛ̍ī kōŋ ō mēna̍ nu̍m mā sɔ̍la̍ sāŋgāa̍ le̍ nyɛ̄ ŋ̄ tōsa̍ wo̍.

¹¹Wāŋnda̍ ā pūm mā mēna̍ fi̍nyāa̍ ve̍lū nda̍ wa̍ po̍, ndu̍yɛ̍ kālāa̍ ndāa̍ bɛ̍ɛ̍ ā nɔ̍lā mā lōōnu̍ŋ a̍ kɛ̄ndɛ̄i̍ kālāa̍ ndāā ka̍ŋ mā dɔ̄ū nda̍ sa̍lā le̍.

¹²Wāŋnda̍ ā pūm mā chūānu̍ŋ māā ā chō ā dīāndāā wa̍la̍ŋ o̍ kāa̍la̍ ndāla̍ŋ ni̍ŋ. Kɛ̍ ā ve᷅ a̍ di̍a̍ndāā le̍, ā wānūŋ o̍ nɔ̍ɔ̍lɛ̍i̍ a̍ ka̍a̍lā ndālāŋ ni᷄ŋ.

¹³Wāŋnda̍ ā pūm tōfāa̍ o̍ yōŋgā bɛ̍ndōo̍ ni᷄ŋ. Chɔ̄ɔ̍ chāāŋāā ndāa̍ chɔ̍dɔ̄, ā chi᷅ nda̍ nyɛ̄ o̍ nyɛ̄ le̍.

¹⁴Wāŋnda̍ ā pūm chīŋūŋ nda᷄ŋ ŋ̄ yɔ̄nu̍ŋ ni᷅ŋ māā mɔ̄ɔ̄ŋ fāŋ a̍ nyɛ̄m lāka̍fa᷄ŋ dīo̍o̍, ŋ̄ yɔ̄nu̍ŋ ni᷅ŋ nda̍ o̍ lāsōndō māā mɔ̄ɔ̄ŋ ŋ̄lūɛ̄īyāā. Ā yēēma̍ mā lo̍ wānāā tāmbɛ̍i̍ya̍ nyɛ̄ pālāa̍ tūsīo̍o̍ chōo̍ mā fāŋa̍ nda̍ o̍ chi̍e̍ēŋndo̍ cho̍o̍ ba̍ū. Wānāā bālā hāvɛ̍i̍ya̍a̍ bɛ̍ndūa̍a̍, ā yēēma̍ mā chīi̍ a̍ nda̍ mā sōli̍ nda̍ ŋ̄wāŋndā chīe̍e̍ tɛ̍ɛ̄ŋ.

¹⁵Hɔ̄ltē wāŋndo̍ nɔ̄ le᷅ŋ le̍ wāŋndo̍ hōlnɔ᷄ŋndo̍ le̍ ndu̍ dīo̍o̍ le̍ŋ, lē chō māchūāā mɛ̄ɛ̍ hōōŋndo̍ ō chō yɛ̍. Lē nɔ̄ chūāūwāā lāāndūa̍a̍ ā ŋīɔ̍ɔ̍ŋ, ō pīlɔ̍ɔ̍ dīōla̍ŋ āā, “Ke̍ ya̍,” ō pīlɔ̍ɔ̍ bɛ̍ɛ̍ dīōla̍ŋ āā, “Ke̍ ya̍.” Nyɔ̄ɔ̍ŋ chō ŋ̄gāa̍ ŋ̍ nɔ̍lā mī ŋ̄ hīni̍ kɔ̄l kpo̍sōŋ te̍ wo̍ŋ. Kɛ̄lɛ̄ŋgāā ŋ̄ chō bɛ̍ɛ̍ mu̍ŋ hi̍ɔ̍ɔ̍lu̍, ŋ̍ nɔ̍lā mī ŋ̄ dīmi̍ māā ō wa̍ ni᷅ŋ nu̍a̍ā le̍ wo̍ŋ. Nyɛ̄m mu̍ŋ cho̍ mu᷅ŋ ni̍.

¹⁶Chi̍e̍e̍ pīɔ̍m, a̍ wānā la̍nɔ̍ vi̍lu̍ ho̍ō ŋ̄chūāū le̍ wo̍, a̍ lɛ̄ŋndē vēsɛ̍i̍le̍ ye̍e̍mā le᷅ŋ mɛ̄ŋnda̍ŋ yēēmā bɛ̄ndōo̍ le̍ŋ, a̍ yīŋnde̍ wa᷅ le᷅ŋ kɔ̄la̍ŋ a̍ nyɔ̄ɔ̍ŋ lōmɔ̄ɔ̍, lē pɛ̍ŋgī le̍ le̍ŋ.

¹⁷Wānā o̍ wāna̍ si̍i̍ŋgu̍u̍ fi̍nyā ndɔ̍ nyɛ̄ māmāā pɛ̍, ndu̍yɛ̍ mbō kɛ̄ɛ̍ le̍ kāla̍ ndɔ̍ dīōmndo̍ tūēīyɔ̄ɔ̍, bāsa̍bāsa̍kūēndi̍a̍a̍ wa᷅ o̍ lɛ̄ŋndē dɛ̍ŋgbɛ̍le̍ wa᷅ o̍ pēmbo᷄ŋ tɛ̄ɛ̄ŋ nda̍, nda̍ ka̍a̍līāā ndu̍ hɔ̄lta̍ŋ ō vīlɛ̍i̍yo̍ ni̍, ndu̍yɛ̍ mī yi̍bɛ̍i̍ya̍ ā dē dīāllūŋ ndɔ᷄ŋ.

¹⁸Sɔ̄ɔ̍ŋ chō ŋ̄ ŋgāa̍, ŋ̍ ke̍ndū pɛ̄ŋgu̍ si̍nā ya̍ o̍ bā wo̍ŋ. Kɛ̄lɛ̄ŋgāā ŋ̄ chō bɛ̍ɛ̍ ŋ̍ hi̍ɔ̍ɔ̍lu̍, ŋ̄ ya̍ I̍ si̍nā pɛ̍ŋgu̍ le̍ wo̍ŋ. Sɔ̄ɔ̍ŋ mu̍ŋ cho̍ mu᷅ŋ ni̍.

¹⁹Mɛ̄ɛ̍ kōwɔ̍ɔ̍ ō lōōkū ba̍lɔ̄ɔ̍ o̍ hūēīye̍ ni᷄ŋ cho̍o̍ cho̍o̍ yɛ̍, a̍ mɛ̄ɛ̍ kɛ̄ūwo̍, ō lōōkū kɔ̍la̍ŋ o̍ ba̍ndi̍la̍a̍ chōo̍ yɛ̍, a̍ mɛ̄ɛ̍ dɛ̄ndɛ̄ bɛ̍ndu̍ ku̍ā o̍ Pēe̍ Mɛ̄ŋmā Īhɛ᷄llo̍ chōo̍ wo̍ ō lōōkū kɔ᷅la̍ŋ nāa̍ o̍ ye̍e̍mā wa̍ yɛ̍, ndu̍yɛ̍ a̍ mɛ̄ɛ̍ wānā pɔ̍nɔ̍ɔ̍ nda̍ wānā la̍nɔ̍ɔ̍ ā lōōkū ka̍āli̍āŋ yɛ̍.

²⁰Wānā la̍nɔ̍ ti̍a̍māa̍ kēlālā ndɔ̄la̍ŋ la̍ cho̍ la᷅ŋ ni̍. Tē ō bīī pɛ̍, ō mɛ̄i̍ pɔ̍nɔ̍ɔ̍ ō kūɛ̄nu᷄ŋ o̍ wānā pɔ̍nɔ̍ che᷅le̍ŋ ndo̍. Tē ō kɔ̍ chi̍ī kēlālā ndɔ̄la̍ŋ pɛ̍ kpo̍u̍, ō hu᷄ŋ pu̍lu̍ŋ fo̍, ō chālnu̍ŋ. Tē pɔ̍nɔ̍ɔ̍ ō nyūna̍ ndu̍ pɛ̍, ō dīmu̍l ndu̍ āā, “Kɛ̍ I̍ to̍sa̍ i̍sɔ̍ɔ̍ o̍ īsɔ̄ɔ̍ wɔ̍ɔ̍ŋ te̍.”

²¹Sɔ̄ɔ̍ŋ chō ŋ̄ ŋgāa̍, tē ŋ̄ yɔ̄nu̍ŋ pɛ̍, nyīīyāa̍ lɛ̄ŋnde̍ŋ lē nyīīyā ni̍. Kɛ̄lɛ̄ŋgāā ŋ̄ chō bɛ̍ɛ̍ mu̍ŋ hi̍ɔ̍ɔ̍lu̍, tē ŋ̄ yɔ̄nu̍ŋ pɛ̍, lɛ̄ŋnde̍ŋ lē nyīīya̍. Sɔ̄ɔ̍ŋ mu̍ŋ cho̍ mu᷅ŋ ni̍.

²²Bu̍ɛ̍īyo̍ sīmnɔ᷄ŋndo̍ māsā bɛ̍ndōo̍, a̍ dīɔ̄mndo̍ nyɛ̄ dīa̍a̍ sɔ̄lāa̍ ta̍u̍ ta̍u̍ le̍ dīo̍o̍ mɛ̄ɛ̍ o̍ ye̍e̍mā yɛ̍,

²³a̍ wānā la̍nɔ̍ wāŋnda̍ ā ka̍a̍lā ho̍ō le̍ wo̍ pɔ̍nɔ̍ɔ̍ sɔ̄lāa̍, a̍ wānā la̍nɔ̍ bu̍ɛ̍īyo̍ sīmnɔ᷄ŋndo̍ māā māsa̍ ndɔ̄ wa̍nā la̍nɔ̍ɔ̍, mbō mīīŋgu̍ o̍ fōōfo̍ ndɔ̄ɔ̍.

²⁴Nyāā yōōmāa̍ ā chō ku̍ndāla̍ŋ lā hīɔ̍ɔ̍lu̍. Nyāā yōōmāa̍ ha̍ā ā chō ā pɔ̄mbɔ̄, kɛ̍ ndu̍yɛ̍ kɔ̄ kālo̍o̍ pīla̍ nda̍ nɔ̍ ni̍. Nyāā yōōmāā ka̍ŋ nda̍ cho̍ ha̍ā ni̍.

²⁵Sīsi̍ŋnda̍, nya̍ā yōōmāa̍ ha̍ā ā nɔ̍ kpa̍a̍yā le̍. Kɛ̍ ndu̍yɛ̍ mā nɔ̄ kɔ̄l kālo̍o̍ mā mānda̍ nyɛ̄ dīa̍a̍ a̍ wɔ̄ɔ̄le̍ŋ le̍ sīālte̍ŋ.

²⁶Kɛ̄ɛ̍ŋa̍a̍ ba̍ndi̍la̍a̍, nda̍ bɛ̍ɛ̍ ā nɔ̍ kpa̍a̍yā le̍. Kɛ̍ ndu̍yɛ̍ mā nɔ̄ tāāsi̍o̍o̍, mā tōōsi̍a̍a̍ fo̍ndāŋndā nda̍ lɔ̄l la̍ŋ o̍ pōūta̍ŋ tɛ̄ɛ̄ŋ.

²⁷So̍o̍nu̍a̍a̍ ā nɔ̍ ma̍sā nda̍ chōo̍ le̍. Kɛ̍ ndu̍yɛ̍ tē ā wa̍ bālɔ̄ɔ̍ pɛ̍, a̍ ku̍ndāla̍ŋ nda̍ wā ni̍, ō kɛ᷅ o̍ kɛ᷅ nāa̍ o̍ nɔ̍ le̍ wāa̍ wa̍, lo̍ŋ o̍ wa᷅ ni̍.

²⁸Kpo̍o̍sīa̍a̍ nyāā yōōmāā wānā nɔ̍lā mā bīī a̍ bā wa̍ nda̍ chō ni̍. Kɛ̍ o̍ fo̍ndāŋndā lēmāsāla̍ŋ bɛ̍ɛ̍ wānā sa̍a̍lūŋ nda̍ lo̍ŋ.

²⁹Nyāā yōōmāa̍ chō ā yāa̍, tē ā wa̍ kɔ̄la̍ŋ pɛ̍, nɛ̄īyo̍ o̍ yōŋgā bɛ̍ndōo̍ ni᷄ŋ. Kɛ̄lɛ̄ŋgāā ā chō bɛ̍ɛ̍ a̍ hi̍ɔ̍ɔ̍lu̍, nda̍ nda̍ tē ā wa̍ kɔ̄la̍ŋ pɛ̍, chūānɔ᷄ŋndo̍ māā ā chō nyāā yōōmāā kpe̍e̍kpe̍i̍. Wānāā kāŋ nda̍ cho̍ ha̍ā ni̍.

³⁰Kpɔ̍kūŋndo̍ ō chō ō pīlɛ̍. Vīsīo̍o̍ ho̍ō ō chō vīsī kpāāyā bɛ̍ndū vīsīa̍a̍ tɛ̄ɛ̄ŋ. Tē ā wa̍ kɔ̄la̍ŋ pɛ̍, nyɛ̄ o̍ nyɛ̄ to̍sā mbō mūli̍ŋ mbō nyāānu̍ŋ te̍.

³¹Sɔ̄ɔ̍ ko̍ŋgīl bɛ̍ndōo̍, a̍ chūīŋ tōōyē bɛ̍ndōo̍ bɛ̍ɛ̍, tē ā wa̍ kɔ̄la̍ŋ pɛ̍, le̍nde̍ nda̍ nɛ̄ī ni̍. Ndu̍yɛ̍ māsā bɛ̍ndōo̍ bɛ̍ɛ̍, tē ō wa̍ kɔ̄la̍ŋ pɛ̍, mī pūa̍a̍ ndūa̍a̍ chɔ̄ūwa̍ ā wa̍ ndu̍ kɔ̄ɔ̄lī, le̍nde̍ o̍ nɛ̍ī ni̍.

³²Wānā o̍ wāna̍ wa̍ wānā to̍sāā īdīɔ̄m, ma̍ hēēlū nūm pi̍la̍, ɔ̄ɔ̄ mi̍ nūm o̍o̍ nɔ̍ tūū dɛ̍nɛ̍ wɔ̍ɔ̍ŋndo̍, mɛ̄ɛ̍ ō wā o̍ kɛ̍ndɛ̄ mā pɛ̍ŋgi̍ mā cha̍l mā yi̍ya̍ŋ.

³³Mi̍li̍kīi̍ya̍ŋ, tē ā bīŋu̍la᷅ŋ ma̍ŋ o̍ hɛ̄ŋgɛ̍i̍ nda̍ tōōsīāā bɔ̍tɛ̄i̍ya̍ŋ ndo̍ ni᷄ŋ pɛ̍, mā sīmnu᷄ŋ bɔ̍tɛ̄i̍ya̍ŋ. Tē ā lɔ̄ɔ̄ wāŋndo̍ mi᷄ŋndo̍ pɛ̍, kōo̍wa̍ŋ ma̍ fu̍lā ni̍. Le̍nde̍ ko̍ni̍, tē a̍ to̍sa̍ pɛ̍ mī wāŋndo̍ ō dɔ̄ɔ̄nu᷄ŋ tu̍mbe̍, kpūndɔ̍ɔ̍ ndu̍ fu̍lā le̍kɔ̍ɔ̍lī ni̍.