Read Southern Kisi Pu̍lɔ̍wāā 31 Bible Online

Pu̍lɔ̍wāā 31 - Southern Kisi bible

Pu̍lɔ̍wāā 31

¹Māsā Bɛ̍ndōo̍ Lɛ̍mūɛ̄l, dīōmndā sīlāā kāla̍ ndɔ̄ o̍ di̍mu̍l ndu̍ la̍ŋ la̍ŋ la̍ cho̍ la᷅ŋ ni̍. Mbo̍ dīmī āā,

²“Po̍ nūu̍, ya̍ so̍li̍ŋ nu̍m o̍ īpūlu̍ ni̍. Po̍ ni̍ ya̍ I̍ chu̍e̍l Mɛ̄lɛ̄ka̍ būŋgɛ̄i̍ mi̍ me̍na᷄ŋ, ndu̍yɛ̍ mbo̍ kē ya̍ ndu̍ wo̍ ŋ̄ chō ni̍. Ya̍ŋ ni᷅la̍ŋ mā tūēī nyɛ̄ ya̍ I̍ cho̍ nu̍m dīmūllo̍.

³Tu̍āl wāŋ lāāndūa̍a̍ kɔ̄ɔ̄lī, ndu̍yɛ̍ mā chi̍i̍ kpāā nu̍mndo̍ o̍ sūɛ̍i̍ wānā la̍nɔ̍ɔ̍ ni᷄ŋ te̍. Wāŋ lāāndūa̍a̍ ā tɛ̄ɛ̄mbu̍u̍ ni᷅ŋ māsāā bɛ̍ndūāā fāŋā.

⁴Po̍ nūu̍ Lɛ̍mūɛ̄l, māsā bɛ̍ndōo̍, a̍ nɔ̍ mā wa̍ wānā ko̍lāā māmūɛ̄ī le̍. Wānā o̍ wāna̍ cho̍ wāŋnda̍ chīla̍ŋ, ā nɔ̍ mā ko̍l mūɛ̄īmā kālā ka̍lā le̍.

⁵Māsā bɛ̍ndōo̍ tē a̍ ko̍l pɛ̍, ā kūɛ̄ le̍ nyɛ̄ sāwāa̍ ō dīmi̍ wo̍ pūɛ̍ɛ̍ŋndo̍. O̍ ko̍ŋ, wānāā nda̍ wā nyɛ᷅ pālāa̍ tūsīo̍o̍ chōo̍ wa̍, a̍ ke᷅ nda̍ di̍la̍ ndāla̍ŋ te̍.

⁶Wānāa̍ wa᷅ ni᷅ŋ le̍ pīɔ̍mndo̍ sɔ̄lāa̍ wa̍, le̍ nda̍ mūɛ̄īmā kālā ka̍la̍ŋ mā chō ni̍. Ndu̍yɛ̍ wāna̍ cho̍ a̍ kɔ̄l tāmbɛ̍i̍ bɛ̍ndōo̍ wo̍, ndu̍ nɔ̍ mbō ko᷄l mūɛ̄īya̍ŋ ni̍.

⁷Wāŋnda̍ ha̍ā, nda̍ ko᷅l ni̍ le̍ mā pūɛ̄ɛ̄nu̍ŋ nyɛ̍ ndā pa̍lāa̍, ko̍ŋ to̍sā ni̍, ā lo̍o̍nūŋ a̍ nyɛ̄ pālāa̍ cho̍ nda̍ chōo̍ wo̍ o̍kɔ̄ɔ̄ le̍.

⁸“Wānāa̍ nɔ̍lā mā sōō le̍ nda̍ pi̍la̍ le̍ wa̍, so̍o̍ le̍ nda̍. Wānāa̍ nɔ̍ nyɛ᷅ o̍ nyɛ̄ o̍ lābā le̍ wa̍, su̍ŋgu̍ le̍ nda̍, mā to̍sa̍ mā sɔ̄la̍ di̍la̍ ndāla̍ŋ.

⁹So̍o̍ le̍ wāŋnda̍ ha̍ā mā wa̍ sa̍kpō o̍ yāma᷅ŋ nda᷄ŋ kīōlɔ̄ɔ̍ ni᷄ŋ. To̍sa̍ a̍ sa̍bū, di̍la̍ wānā tāmbɛ̍i̍ya̍ a̍ wānāā bālā hāvɛ̍i̍ya̍ ā nɔ̄ le̍ sɔ̄lāa̍ la̍ŋ, mā sɔ̄la̍ la̍ŋ.”

¹⁰La̍nɔ̍ ka̍ā kɛ̄ndɔ̄ɔ̍ ō kēndū sɔ̄lā. Kāni̍ fo̍ndōle̍, ō nɔ̄ ba̍a̍, ō hīōū nyɛ̄m ba̍āŋ kālāŋ bɛ̄ndo᷄ŋ po̍lo̍ŋ.

¹¹Tē wānā pɔ̍nɔ̍ɔ̍ ō nɔ̄ la̍nɔ̍ ka̍ā kɛ̄ndɔ̄ɔ̍ pɛ̍, po̍ ko̍ŋ tīīnda᷄ŋ ndɔ̄ɔ̍ kpo̍u̍ o̍ chūā kōŋ ni᷄ŋ o̍ wa᷅ ni̍. Ndu̍yɛ̍ o̍ sa̍bū chūā kōŋ ni᷄ŋ, wānā pɔ̍nɔ̍ wa̍ā le̍nde̍ nyɛ̄ o̍ nyɛ̄ ve᷅ ndu̍ lēpɛ̄ŋ te̍.

¹²Kāni̍ fo̍ndōle̍, chūā kōŋ ha̍a̍a̍ a̍ yōōmū ndɔ̄ɔ̍ mɛ̄ɛ̄lu̍la̍ŋ, le̍ te̍le̍ŋ o̍ te̍le̍ŋ sɔ̄ɔ̍ŋ kɛ̍ndɔ᷄ŋ o̍ to̍sāl po̍ ko̍ŋ ni̍, ō to̍sā i̍sɔ̍ɔ̍ o̍ īsɔ̄ɔ̍ i̍ tɛ̍ɛ̍mbūū ndu̍ le̍.

¹³Le̍ te̍le̍ŋ o̍ te̍le̍ŋ ō chō kōlāla̍ kɛ̍ndɛ̄ kɛ̍ndɛ̄la̍ŋ tōōsīa̍a̍ a̍ yīīŋīī chɔ̄lūāā ndu̍yɛ̍ a̍ fi̍la̍ki̍sīi̍yo̍.

¹⁴Mɛ̄ɛ̍ wānāā lēyākūa̍a̍ dɛ̄ndɛ̄la̍ ndāla̍ bɛ̍ndūla̍ ku̍ā o̍ mɛ̄ŋnda̍ŋ chōo̍ la̍ŋ lā tōsā nu̍a̍ā, kɔ̄la̍ŋ nyɛ̄ dīa̍a̍ chūa̍a̍ o̍ fo̍ndāŋndā lēvīlta̍ŋ mī lā hūŋ a̍ ndu̍ yɛ̍, le̍nde̍ o̍ hu᷅ŋ a̍ nyɛ̄ dīa̍a̍ chīɛ̄ī ni̍ŋ ni̍.

¹⁵Wāŋnda̍ lō o̍ lūa̍a̍ŋ mbō chɛ᷄ŋ, mbō bɛ̄ɛ̄ndi̍a̍a̍ nyɛ̄ dīa̍a̍ le̍ yu̍ŋgu̍ ndɔ̄ɔ̍, ndu̍yɛ̍ mbō dīmu̍l bu̍ɛ̍ī ndɔ̄ la̍a̍ndōo̍ nyɛ̄ bu̍ɛ̍ī kōŋ nɔ̄ le̍ tōsāa̍ wo̍.

¹⁶Tē ō sāālu̍ŋ lɛ᷅ŋndē kɛ̄ndɛ̄le̍ŋ pɛ̍, ō pēndū. O̍ nūūwā ndɔ̄ɔ̍ ni᷄ŋ, nyɛ̄ sɔ̄lāa̍ chūa̍a̍ mbō tōsa̍ kpe̍le̍ mākīle̍pīi̍yo̍.

¹⁷Mbō yīīnu̍ŋ kōlā cho̍o̍le̍ŋ pe᷅ŋ, le̍ wa̍llo̍ tōsāa̍ ō kālā ka̍lā a̍ bālā ndɔ̄la̍ŋ.

¹⁸Nyɛ̄ o̍ nyɛ̄ o̍ to̍sa̍ mɛ̄ɛ̍ mbō chē māā tɔ̄nɔ̄ɔ̍ ō chō le̍ni̍ŋ. Mbō lo̍ wa̍lta̍ŋ īchɔ̄l a̍ la̍mbūi̍yo̍ ha̍a̍a̍, mī chi̍o̍o̍ kpo̍u̍ o̍ lɔ̍l.

¹⁹Ndu̍ pi̍la̍ cha᷄lle̍ mbō wōmu̍l, ndu̍yɛ̍ mbō lɔ̄ɔ̄ kōla̍ ndɔ̄ɔ̍ a̍ bā ndɔ̄.

²⁰Tē ō chē wānāā tāmbɛ̍i̍ya̍ a̍ wānāa̍ nɔ̍ ba̍lā hāvɛ̍i̍la̍ŋ nda̍ pɛ̍, ō māla̍ nda̍.

²¹Ā yɔ᷄ŋ bɛ̍ɛ̍ mī te̍le̍ŋ mɔ᷄m chu̍chū ho̍ō a̍ kpūŋgba᷄ŋ, mī hūēīye̍ ī wa̍ wā bɛ̄ndōo̍ wo̍ ō fūūlu̍u̍, ō būūla̍ŋ le̍ yu̍ŋgu̍ ndɔ̄ɔ̍ le̍. Kāni̍ fo̍ndōle̍, mbō tōōsi̍a̍a̍ nyɛ̄lā īhūēīlā yu̍ŋgu̍ŋ ndɔ̄ɔ̍ ō wōōnūŋ nda̍ŋ kpo̍u̍.

²²Kōlāla̍ kpēlēla̍ŋ kpo̍u̍, ndu̍ pi̍la̍ tōōsi̍a̍a̍. Ndu̍ pi̍la̍ nyɛ̄lā kɛ̄ndɛ̄ kɛ̍ndɛ̄lā bɛ̄ndūla̍ŋ, la̍ŋ o̍ wo̍u̍nūŋ ni̍.

²³Tē pɔ̍nɔ̍ ndɔ̄ o̍ ku̍ɛ̄ wāŋ bɛ̄ndūāā chi̍e̍e̍ya̍ tɛ̄ɛ̄ŋ pɛ̍, nāa̍ nda̍ kpo̍u̍ a̍ bɔ̍ɔ̄ŋi̍āŋ o̍ dīō sāāsa̍ chi̍o̍o̍ sōndōo̍ le̍ sɔ̄ɔ̍ŋ dīmīo̍o̍ wa̍, wāŋnda̍ kpo̍u̍ bɛ̄ɛ̄le̍ŋ nda̍ kē ndu̍ ni̍.

²⁴Chūa̍a̍ ho̍ō, dōmāla̍ kɛ̍ndɛ̄ kɛ̍ndɛ̄ la̍ŋ, a̍ yāu̍vi̍i̍ nda̍ yīīnūŋ o̍ chāŋ nde̍, ndi̍ o̍ to̍o̍sīāā ni̍ mbō pīsī wa̍nāā lēyākūa̍a̍ o̍ bā.

²⁵Wānā la̍nɔ̍ dīāllūŋ kālā bɛ̄ndōo̍ pīla̍ o̍ wa᷅ ni̍, ndu̍yɛ̍ wāŋnda̍ kpo̍u̍ mā ke̍ ndu̍ bɛ̄ɛ̄le̍ŋ. O̍ ko̍ŋ kɔ̍ɔ̍lī, sīɔ̄dīi̍ ndɔ̄ lāchīo̍o̍ bɛ̍ɛ̍, ō kɛ̄ndɛ̄ o̍ wa᷅ a̍ ndu̍ ni̍, ō bu̍u̍la̍ŋ bɛ̍ɛ̍ a̍ ndu̍ o̍kɔ̄ɔ̄ le̍.

²⁶Sɔ̄ɔ̍ŋ kɔ̄l kālo̍ŋ mu̍ŋ o̍ di̍mī ni̍, ndu̍yɛ̍, mbō pɛ̄ɛ̄kū wa᷅ŋnda̍ mɛ̄ɛ̍ nda̍ wā wa̍nāā īkɛ̄ndɛ̄ nāa̍ wāŋnda̍ chūā yɛ̍.

²⁷Le̍ te̍le̍ŋ o̍ te̍le̍ŋ ō chō chīɛ̄ī ndɔ̄ɔ̍ hɔ̄lte̍ŋ chōo̍, mbō sōlī ba̍lā hāvɛ̍i̍la̍ wa᷅ chi̍ɛ̍ī ni᷄ŋ nda̍ŋ. Ō chɛ᷅l mbō chālnu̍ŋ o̍ fo̍ndō fu̍u̍wo̍ chōo̍ ō ve᷅ kpe̍ku̍ le̍ le̍.

²⁸Chūāā ndūa̍a̍ kɔ̄llo̍ nāŋɔ̄ɔ̍ a̍ mɛ̄ɛ̍ o̍ cho̍ nda̍ bīyɔ̄ɔ̍ yɛ̍, mā dīmī sɔ̍ɔ̍ŋ kɛ̍ndɔ᷄ŋ a̍ ndu̍ o̍kɔ̄ɔ̄. Pɔ̍nɔ̍ ndɔ̄ bɛ̍ɛ̍ mbō na᷄ŋ kɔ̄l ta̍u̍ a̍ ndu̍, mbō sāŋga̍la̍ ndu̍.

²⁹Mbō dīmu̍l ndu̍ āā, “Wāŋ lāāndūāā kɛ̄ndīa̍a̍ ā cho̍ ta̍u̍, kɛ̍ nūm ā hīōū nda̍ kpo̍u̍.”

³⁰Nāŋɔ̄ɔ̄ wānā la̍nɔ̍ɔ̍ mbō hūi̍ wānā. Nāŋɔ̄ɔ̍ bɛ̍ɛ̍ mɛ̄ɛ̍ o̍ mɛ̄ɛ̍ wāŋndo̍ ō na᷄ŋ, ō lo᷅ le̍cho̍ō le̍. Kɛ̍ wānā la̍nɔ̍ nɔ̍ sīōōŋnde̍ le̍ Mɛ̄lɛ̄ka̍ Ya̍a̍wɛ̄ɛ̄ wo̍ ndu̍, ō nɔ̄ mbō sɔ̄la̍ sāŋgālāa̍.

³¹Ō nɔ̄ mbō sɔ̄la̍ fāndāa̍ le̍ wa̍li̍ o̍ wa̍li̍ kɛ̍ndɛ̄ o̍ to̍sa̍. Ndu̍yɛ̍ ō nɔ̄ vɛ̄lɛ̄ mbō sɔ̄la̍ chāndɔ̄ɔ̄la̍ŋ wāŋnda̍ o̍ hɔ̄l nāa̍ wāŋnda̍ ā chūūŋgi̍āŋ o̍ dīō sāāsāa̍ sōndōo̍ wa̍, le̍ wa̍li̍ ndɔ̄ kɛ̍ndɔ̄ɔ̍.