Read Southern Kisi Pu̍lɔ̍wāā 4 Bible Online

Pu̍lɔ̍wāā 4 - Southern Kisi bible

Pu̍lɔ̍wāā 4

¹Pūa̍a̍ nīa̍a̍, tē fi̍nyā nyā o̍ wa̍ nya̍ pɛ̄ɛ̄kōo̍ pɛ̍, lā ni᷅la̍ŋ. Lā ya᷄ŋ ni᷅la̍ŋ ye̍ke̍ŋ, mī lā sɔ̍la̍ sīnā pɛ̄ŋgo̍o̍.

²Nyɛ̄ o̍ nyɛ̄ ya̍ I̍ cho̍ nya̍ pɛ̄ɛ̄kōo̍, ō chō ō kɛ̄ndɛ̄ le̍ nyā. Le̍la̍ŋ nyɛ̄ o̍ nyɛ̄ ya̍ I̍ cho̍ nya̍ pɛ̄ɛ̄kōo̍ lā kɛ̄si̍ŋ ndu̍ o̍ kɔ̄l.

³Bōōndi̍i̍ ya̍ I̍ wa̍ chūāāmbɔ̄, ndu̍yɛ̍ mi̍ wa᷅ kāla̍ nūu̍ o̍ bā māā po̍le̍ pi᷅lɛ̍ ve̍,

⁴tē kɛ̄kɛ̍ nūu̍ ndu̍ o̍o̍ wa̍ ya̍ pɛ̄ɛ̄kōo̍ pɛ̍, ō dīmu̍l la̍ āā, “Nyɛ̄ o̍ nyɛ̄ ya̍ I̍ cho̍ nu̍m dīmūl po̍ nūu̍, kɛ̍si̍ŋ ndu̍ o̍ kɔ̄l nyɛ̄ kɛ̄ndɛ̄ kpi̍ŋ. To̍sa̍ nyɛ̄ o̍ nyɛ̄ ya̍ I̍ cho̍ nu̍m dīmūl le̍ tōsāa̍. Ko̍ŋ to̍sā ni̍, mā wa̍ yōōmū.

⁵Wa̍ wa᷅na̍ kɔ̄l kālu̍ ndu̍yɛ̍ mā nɔ̄ sīnā pɛ̄ŋgo̍o̍. Pu̍ɛ̍ɛ̍nu᷄ŋ di̍o̍mndā ya̍ I̍ cho̍ nu̍m dīmūllo̍ la̍ŋ te̍. Ndu̍yɛ̍ fa̍ŋa̍ŋ o̍ la̍ŋ cho̍o̍ le̍.

⁶Bi̍i̍ kɔ̍l kālo̍o̍ nyɛ̄ kɛ̄ndɛ̄ kpi̍ŋ, ō nɔ̄lā mbō mānda̍ nu̍m. Ka̍a̍la̍ ndu̍, ō chō nu̍m māndā nyɛ̄ o̍ nyɛ̄ yɔ̍nūŋ a̍ nūm te̍.

⁷Kɔ̄l kālo̍o̍ chō nyɛ̄ kpe̍e̍kpe̍i̍ o̍ yōōmū wāna̍ chi̍o̍o̍ ni᷄ŋ mbo̍ hīāū nyɛ̄ o̍ nyɛ̄. Le̍la̍ŋ ki̍ndi̍ŋ mā sɔ̍la̍ ndu̍. Nyɛ̄ o̍ nyɛ̄ cho̍ mā sɔ̍la̍ ndu̍ mbō na᷄ŋ mbō sūla᷅ŋ a̍ sīnā pɛ̄ŋgo̍o̍ le̍.

⁸Le̍la̍ŋ tē a̍ sɔ̍la̍ kɔ̄l kālo̍o̍ pɛ̍, bi̍i̍ ndu̍ kpi̍ŋ, ō nɔ̄lā mbō hēēlu̍ nu̍m te̍mā. Sa̍a̍ ndu̍ nyɛ̄ kɛ̄ndɛ̄ kpi̍ŋ, ō nɔ̄lā mbō tōsa̍ mā sɔ̍la̍ bɛ̄ɛ̄le̍ŋ.

⁹Ō chō nu̍m bɛ̄ɛ̄le̍ŋ kē, nu̍a̍ wɔ̍ ko̍ mɛ̄ɛ̍ nda̍ hāndū nu̍a̍ā wāŋndo̍ nyɛ̄ nda̍ tōōsi̍a̍a̍ a̍ pe̍e̍ŋge̍la̍ŋ ndo̍ o̍ lēbōl le̍ ndu̍ bɛ̄ɛ̄le̍ŋ kīo̍o̍ yɛ̍. Ō wā ni̍ŋ ma̍wa̍ā māā mɔ̍si̍l lēbɛ̄ɛ̄ bɛ̄ndū nu̍m o̍ lēbōl.”

¹⁰Ya̍ŋ ni᷅la̍ŋ o̍ nyɛ̄ ya̍ I̍ cho̍ nu̍m dīmūllo̍ wo̍ po̍ nūu̍, ndu̍yɛ̍ mā chɛ̍l ndu̍ o̍ kɔ̄l nūmndo̍ ni᷄ŋ. Ko̍ŋ to̍sā ni̍ mā vīōū yōōmū.

¹¹Nɛ̄i̍ kɔ̄l kālo̍o̍ ya̍ I̍ cho̍ nu̍m ho̍ō chɔ̄mndo̍ ni̍, ndu̍yɛ̍ o̍ nɛ̄i̍ tōnya̍a̍ cho̍o̍ kpe̍e̍kpe̍i̍ ya̍ I̍ cho̍ nu̍m ho̍ō sīmīo̍o̍ ni̍.

¹²Tē a̍ ke̍la̍ a̍ kɔ̄l kālo̍o̍ pɛ̍, nyɛ̄ o̍ nyɛ̄ nɔ̍lā mbō si᷄m nu̍m o̍ nɛ̄ī le̍. Ndu̍yɛ̍ nya̍a̍nu̍ŋ bɛ̍ɛ̍ a̍ bo᷅ŋ te̍.

¹³Sīlā o̍ sīlā ya̍ I̍ cho̍ nu̍m, kɛ̍si̍ŋ ndu̍ o̍ kɔ̄l mā wa̍ lōōnɔ᷄ŋndo̍ a̍ ndu̍. Kɛ̍si̍ŋ ndu̍ o̍ kɔ̄l nyɛ̄ kɛ̄ndɛ̄ kɛ̍ndɛ̄, fo̍ndōle̍, yōōmū nūmndo̍ o̍ cho̍ ni̍.

¹⁴Bā o̍ bā wānāā dɛ̍nɛ̍ wɔ̍ɔ̍ŋnda̍ ā hīōū pɛ̍, ku̍ā lo̍ŋ te̍. Tu̍āl wānāā dɛ̍nɛ̍ wɔ̍ɔ̍ŋnda̍ kɔ̄ɔ̄lī mā chu̍a̍ ka̍ā ndāa̍ le̍.

¹⁵Kpɛ̍kpɛ̍la̍ nda̍, tu̍āl ka̍ālā ndāla̍ŋ kɔ̄ɔ̄lī le̍. Tu̍āl nɛ̄i̍ ndāa̍ kɔ̄ɔ̄lī le̍, wa̍ o̍ nɛ̄ī nu̍m ŋ̄ chō chōo̍ wo̍ chōo̍.

¹⁶Kāni̍ fo̍ndōle̍, wānāā dɛ̍nɛ̍ wɔ̍ɔ̍ŋnda̍ tē ā tōsa̍ yɔ᷅ŋ wɔ̄ɔ̍ŋndo̍ le̍, ā hīni̍ bɛ̍ɛ̍ ā lɔ᷅l te̍. Tē ā tōsa̍l wāŋndo̍ īwɔ̄ɔ̍ŋnde̍ le̍, ā hīni̍ bɛ̍ɛ̍ ā nɔ̍lā mā kūmbū hɔ̄lte̍ŋ te̍.

¹⁷Dɛ̍nɛ̍ wɔ̍ɔ̍ŋndo̍ a̍ ka̍fāla̍ŋ, la̍ŋ la̍ cho̍ ni᷅ŋ māchūāā māā nyɛ̄ ndā di̍a̍ā a̍ mūɛ̄īmā ndā ma̍ ko̍lāā.

¹⁸Wāna̍ tōnya̍a̍ nɛ̄i̍ ndɔ̄ɔ̍, ō chō māchūāā mɛ̄ɛ̍ pāa̍le̍ŋ lē fūlā nu̍a̍ā īdīi̍, mī lē lo̍ hēlɔ̄ɔ̍ a̍ dīōndɔ̄ɔ̍ ha̍a̍a̍ mī lē fūūlu̍u̍ o̍ bōlle̍ŋ chōo̍ a̍ dīōndɔ̄ɔ̍ bɛ̄ndōo̍ yɛ̍.

¹⁹Kɛ̍ wānāā dɛ̍nɛ̍ wɔ̍ɔ̍ŋnda̍ nda̍, nɛ̄i̍ ndāa̍, mɛ̄ɛ̍ nyūmnda̍ŋ mā wā nu̍a̍ā kpi᷅ŋgbi̍ yɛ̍, le̍nde̍ o̍ cho̍ ni̍. Mā bo᷄ŋ mā de᷄l, kɛ̍ ā si̍nā nyɛ̄ nda̍ bo᷄ŋ o̍ ndu̍ wo̍ le̍.

²⁰Kɛ̍si̍ŋ nyɛ̄ ya̍ I̍ cho̍ nu̍m dīmūllo̍ o̍ kɔ̄l po̍ nūu̍. Ya̍ŋ ni᷅la̍ŋ nyɛ̄ kɛ̄ndɛ̄ kɛ̍ndɛ̄ o̍ dīōmndā ya̍ I̍ cho̍ nu̍m dīmūllo̍ la̍ŋ.

²¹To̍sā mī lā fūla̍ nu̍m o̍ kɔ̄l fɛ̍ɛ̍ŋ a̍ fɛ̍ɛ̍ŋ te̍. Kɛ̍si̍ŋ nda̍ŋ o̍ kɔ̄l, mā wa̍ lōōnɔ᷄ŋndo̍ a̍ la̍ŋ le̍ te̍le̍ŋ o̍ te̍le̍ŋ.

²²Wānā o̍ wāna̍ ki̍ndi̍ ki̍ndi̍ pɛ̍ mā sɔ̍la̍ la̍ŋ, a̍ sɔ̍la̍ ki̍yīī yōōmōo̍. Ndu̍yɛ̍ lā tōsā mī dīāllūŋ nūmndo̍ŋ kpo̍u̍ ŋ̍ wa̍ kɛ̍ndi̍a̍a̍.

²³Ma̍nda̍ŋ a̍ nyɛ̄ ŋ̄ yīyāŋ o̍ kɔ̄l nūmndo̍ ni᷅ŋ ndo̍, fo̍ndōle̍, nyɛ̄ wāna̍ chi̍o̍o̍ ō yīyāŋ o̍ kɔ̄l ndɔ̄ɔ̍ ni᷄ŋ ndo̍, ndu̍ cho̍ yōōmū wāna̍ chi̍o̍o̍ ni̍.

²⁴Di̍mī lāchōōwā le̍. Īsɔ̄ɔ̍ o̍ īsɔ̄ɔ̍ cho̍ sūɛ̍i̍ lāchōōwā, so̍li̍ŋ ndi̍ o̍ sōndō le̍.

²⁵Ka̍ā nūmndo̍ wa̍ sa̍kpō. Sɔ̄ɔ̍ŋ cho̍ sɔ̄ɔ̍ŋ kɛ̍ndɔ᷄ŋ ndo̍ŋ, mu̍ŋ ŋ̄ lāndu̍ŋ kɔ̍l le̍ tōsāa̍ ni̍.

²⁶Nyɛ̄ o̍ nyɛ̄ ŋ̄ wa̍ tōsāa̍ pɛ̍, ma̍nda̍ŋ a̍ mɛ̄ɛ̍ ŋ̄ tōsā ndu̍ yɛ̄. Sɔ̄ɔ̍ŋ kɛ̍ndɔ᷄ŋ, mu̍ŋ ŋ̄ tōsa̍ lɔ̍ɔ̍ o̍ lɔ̍ɔ̍ ni̍.

²⁷Fa̍ŋa᷄ŋ o̍ nɛ̄i̍ tōnya̍a̍ chōo̍ le̍. Kpɛ̍kpɛ̍la̍ nɛ̍i̍ dɛ̍nɛ̍ wɔ̍ɔ̍ŋndo̍, mā wa̍ o̍ nɛ̄i̍ tōnya̍a̍ chōo̍.