Read Southern Kisi Pu̍lɔ̍wāā 5 Bible Online

Pu̍lɔ̍wāā 5 - Southern Kisi bible

Pu̍lɔ̍wāā 5

¹Po̍ nūu̍, kɛ̍si̍ŋ sɔ̍ɔ̍ŋ kɔ̄l kālu̍ŋ ya̍ I̍ cho̍ nu̍m dīmūllo̍ wo̍ŋ o̍ kɔ̄l. Ya̍ŋ ni᷅la̍ŋ nyɛ̄ kɛ̄ndɛ̄ ye̍ke̍ŋ, o̍ sɔ̄ɔ̍ŋ sīnā pɛ̄ŋgu̍ŋ ya̍ I̍ cho̍ nu̍m chɔ̄mndo̍ wo̍ŋ.

²Ko̍ŋ to̍sā ni̍, mā wa̍ wāna̍ kɔ̄l kālu̍ bɛ̍ndū, ndu̍yɛ̍ nyɛ̄ o̍ nyɛ̄ ŋ̄ sōō pɛ̍, wāŋnda̍ sīna̍ māā wāna̍ kɔ̄l kālo̍o̍ ŋ̄ chō ni̍.

³Wānā la̍nɔ̍ ti̍a̍māa̍, dīōmndā ndɔ̄la̍ŋ, mɛ̄ɛ̍ līa̍a̍ŋ mā yēēla̍ nu̍a̍ā yɛ̍, le̍nde̍ la̍ ye̍e̍la̍ ni̍. Dīōmndā ndɔ̄la̍ŋ lā nīŋgīlā wa̍nā, lā hīōū mɛ̄ɛ̍ chūɛ̄īmā ɔ̄li̍fīi̍ya̍ŋ mā nīŋgīlā nu̍a̍ā wānā yɛ̍.

⁴Kɛ̍ mɛ̄ɛ̄lu̍la̍ŋ kpɔ̍ŋ, mɛ̄ɛ̍ lo̍lō kūīyo̍ ō wɔ̄u̍ nu̍a̍ā yɛ̍, le̍nde̍ nyɛ̍ fu̍lā o̍ dīōmndā lāŋ ni᷄ŋ ndo̍ ō wɔ̄u̍ ni̍. Mɛ̄ɛ̍ mūɛ̄ī fāŋīī sōndōlā tīɔ̍ɔ̍nde̍ ī kīālū nu̍a̍ā yɛ̍, le̍nde̍ nyɛ̍ fu̍lā o̍ dīōmndā lāŋ ni᷅ŋ ndo̍ ō kīālū ni̍.

⁵Wānā pɔ̍nɔ̍ o̍ wānā pɔ̍nɔ̍ to᷅l ndu̍ kɔ̄ɔ̄lī pɛ̍, chi̍e̍e̍ pīɔ̍m o̍ ya̍ā nu̍m ni̍. Nɛ̄i̍ ndɔ̄ɔ̍, nɛ̄i̍ ku̍ɛ̄ pīɔ̍m ndo̍ o̍ cho̍ ni̍.

⁶Ō būūla̍ŋ bɛ̍ɛ̍ a̍ nɛ̄i̍ wānā wā cho̍o̍ mā sɔ̍la̍ yōōmōo̍ wo̍ le̍. Nɛ̄i̍ o̍ cho̍ chōo̍ wo̍, ō si̍nā bɛ̍ɛ̍ māā nɛ̄ī wɔ̍ɔ̍ŋndo̍ pīla̍ le̍ o̍ cho̍ le̍.

⁷Le̍la̍ŋ ya̍ŋ ni᷅la̍ŋ o̍ nyɛ̄ ya̍ I̍ cho̍ nu̍m dīmūllo̍ wo̍ po̍ nūu̍. Pu̍ɛ̍ɛ̍nu̍ŋ nyɛ̄ ya̍ I̍ cho̍ nu̍m ho̍ō dīmūllo̍ wo̍ le̍. Kɛ̍si̍ŋ ndu̍ o̍ kɔ̄l.

⁸Wānā la̍nɔ̍ ti̍a̍māā wāā le̍nde̍, tē ā chē ndu̍ pɛ̍, kpɛ̍kpɛ̍la̍ ndu̍. Sɔ̍ɔ̍ŋgūū bɛ̍ɛ̍ o̍ dīō ndɔ̄ɔ̍ īkɛ̄i̍ le̍.

⁹Tē ā tōl ndu̍ kɔ̄ɔ̄lī pɛ̍, mɛ̄ɛ̍ bɛ̄ɛ̄le̍ nu̍mnde̍ŋ lē chūū wāŋnda̍ o̍ bā. Ndu̍yɛ̍ wɔ̄sīlā nūmnda̍ tɔ̄la̍ŋ o̍ chi̍e̍ēŋndo̍ chōo̍, wānāā kɔ̄l vēsɛ̍i̍ya̍a̍ bɛ̍ndūa̍a̍ o̍ bā ŋ̄ sīōū la̍ŋ ni᷅ŋ ni̍.

¹⁰Sūl nūmndo̍ ki̍nɛ̍i̍, mīālla̍ di̍ā ndu̍ tɔ̄nɔ̄ ni̍. Wānāā chēle̍ŋnda̍, nda̍ ku̍a̍ŋnūŋ ni̍ŋ a̍ sāŋgā nu̍mndo̍ ni̍.

¹¹Mɛ̄ɛ̄lu̍la̍ yōōmū nūmndo̍, ā wā ni̍ŋ i̍hi̍ni̍ o̍ kpēlē mā kūŋ a̍ nyɛ̄ nɛ̄īyāa̍. Nāa̍ chō nu̍m sɔ̄ɔ̄sīāā kpo̍u̍ mā yɔ̍nu̍ŋ pa̍āla̍ŋ kpo̍so̍ŋ.

¹²Ā chō wā īchāli̍ mā nyu̍na̍ nūm pi̍la̍ āā, “Vɛ᷅ I̍ ye̍ŋ si̍lāa̍ lānī le̍? Vɛ᷅ ma̍ wā kīndīo̍o̍ le̍ ya̍ mīŋgīo̍o̍ o̍ nɛ̄ī, I̍ chɛ̍l mā mīŋgi̍ ya̍ o̍ nɛ̄ī le̍?

¹³Wānāā nīāā pɛ̍ɛ̍kāa̍ ā wa̍ ya̍ pɛ̄ɛ̄kōo̍, kɛ̍ I̍ ye̍ŋ nda̍ lānī le̍. Kɛ̄lɛ̄ŋgāā ni᷅ŋ te̍, mī I̍ chu̍a̍ sīlālā nda̍ wa̍ ya̍ la̍ŋ māā īsɔ̄ɔ̍.

¹⁴Ndu̍ o̍o̍ lo̍ ni᷅ŋ cho̍be̍, mī ya̍ i̍i̍ sɔ̍la̍ tɛ̄ɛ̄mbūūwo̍ fāŋgā bɛ̍ndu̍ chu̍u̍ŋgi̍āŋ ndo̍ tɛ̄ɛ̄ŋ.”

¹⁵Po̍ nūu̍, mɛ̄ŋnda̍ŋ o̍ so̍o̍ŋ nu̍m kōlāa̍ ni᷄ŋ ma̍ŋ ŋ̄ ko᷄l ni̍, ko᷅l mā chēle̍ŋ te̍. La̍a̍ nu̍m ndu̍ pīlɛ̍ kpe̍ ŋ̄ kāāla̍ ni̍, ka̍a̍lā wānā la̍nɔ̍ che᷅le̍ŋ te̍.

¹⁶Chu̍ā mɛ̄ŋnda̍ŋ o̍ so̍o̍ŋ nu̍m kōlāa̍ ni᷄ŋ mā hūlū ma̍ŋ o̍ lu᷅ŋ te̍, ko̍ŋ cho̍ ni̍ kɔ̄la̍ŋ sūūndāa̍ a̍ wānā la̍nɔ̍ o̍ wānā la̍nɔ̍ ŋ̄ yēēma̍.

¹⁷Ma̍nda̍ ma̍ŋ le̍ nya̍ pi̍la̍. Pi̍ɔ̍ūwa᷅ŋ ma̍ŋ a̍ wāŋ lāāndūāā chēle̍ŋnda̍ le̍.

¹⁸Na̍ŋ kɔ̍l a̍ la̍a̍ nu̍m nya̍ cha᷄l bōōndi̍i̍ ŋ̄ wa̍ wɔ̄ chūā pīāāndū ve̍ wo̍. Chu̍a̍ ndu̍ māā pēē nu̍m sa̍lā.

¹⁹Mɛ̄ɛ̍ kīa̍llo̍ ō na᷅ŋ nu̍a̍ā ndu̍yɛ̍ mbo̍ wā wānā che᷅ ndu̍ dɔ̍ɔ̍ pɛ̍, a̍ ka̍a̍la̍ ndu̍ yɛ̍, le̍nde̍ la̍a̍ nu̍m ō nɔ̄ ni̍ mbō wa̍ nu̍m o̍ kɔ̄l. Kāālā ndɔ̄ɔ̍ ō tōsa̍ mā na̍ŋ kɔ̄l le̍ te̍le̍ŋ o̍ te̍le̍ŋ. Kāālā o̍ chɔ᷅m nu̍m ndo̍, ō tōsā mī kɔ̄l nūmndo̍ kpo̍u̍ o̍ wa̍ o̍ ndu̍ lo̍.

²⁰Po̍ nūu̍, wānā la̍nɔ̍ ti̍a̍māa̍ ō to̍sā nu̍m mā yɔ̍ŋgu̍ŋ kpo̍u̍ o̍ ndu̍ lo̍ le̍. Kɔ̍ma᷄ŋ la̍nɔ̍ pi̍la̍a̍ le̍.

²¹Nyɛ̄ o̍ nyɛ̄ ŋ̄ tōsa̍, Mɛ̄lɛ̄ka̍ Ya̍a̍wɛ̄ɛ̄ o̍ cho̍ nu̍m chɔ̄ɔ̍. Ndu̍yɛ̍ bā o̍ bā ŋ̄ kɔ̍, hɔ̄ltē ndɔ̄le̍ŋ lē chō nu̍m kɔ̄ɔ̄lī.

²²Wāna̍ dɛ̍nɛ̍ wɔ̍ɔ̍ŋndo̍, yāŋɔ̄ɔ̄lē o̍ ha̍ū lɔ̍ɔ̍ lɔ̍ɔ̍ le̍ŋ, le̍ cho̍ sɔ̄ɔ̍ŋ dɛ̍nɛ̍ wɔ̍ɔ̍ŋ ndu̍ pi̍la̍ o̍ to̍sā wo̍ŋ ni̍. Yɔ̄ŋndā ndɔ̄la̍ wɔ̍ɔ̍ŋnda̍ŋ la̍ŋ la̍ yi̍ī ndu̍ ni̍, mɛ̄ɛ̍ nda̍ yīī nu̍a̍ā wāŋndo̍ a̍ yūe̍i̍ yɛ̍.

²³Mbō sɔ̄la̍ pīɔ̍mndo̍ le̍ mɛ̄ɛ̍ o̍ kɛ̍ɛ̍ yēēmɛ̍i̍ ndūɛ̍i̍ kpāāyāa̍ nɔ̄ɔ̍ chōo̍ yɛ̍. Mī dīɔ̄mīī ndūɛ̍i̍ tōsa̍, mbō sɔ̄la̍ pīɔ̍mndo̍.