Read Southern Kisi Pu̍lɔ̍wāā 6 Bible Online

Pu̍lɔ̍wāā 6 - Southern Kisi bible

Pu̍lɔ̍wāā 6

¹Po̍ nūu̍, ma̍nda̍ŋ le̍ wāŋndo̍ tāānīo̍o̍, ndu̍ yɔ̍nūŋ ni̍ māā wāŋndo̍ kūo̍o̍ bīyɔ̄ɔ̍ wāŋndo̍ o̍ bā, mā chūe̍l wāna̍ o̍ bi̍ī kūo̍o̍ o̍ bā wo̍ būŋgɛ̄i̍ māā ā chō kūe̍e̍ ndɔ̄ɔ̍ pāāwā.

²Tē a̍ to̍sa̍ le̍nde̍ pɛ̍, mɛ̄ɛ̍ nūm pi̍la̍ yi̍i̍nu̍ŋ. Nu̍m pi̍la̍ lu̍ɛ̍ī o̍ yāŋɔ̄ɔ̄le̍ŋ ni᷅ŋ a̍ dīōmndā nūmnda̍ nūm pi̍la̍ la̍ŋ.

³Po̍ nūu̍, tē a̍ to̍sa̍ he̍ī pɛ̍, ma̍ lu̍e̍i̍ nūm pi̍la̍ wāŋndo̍ o̍ bā bɛ̄ŋgu̍ le̍ kūe̍e̍ ndɔ̄ɔ̍, mɛ̄ɛ̍ nyɛ̄ ŋ̄ tōsa̍ wo̍ cho̍ ho̍ō ni̍. Kɔ̍ chɔ̍chɔ̍ mā kɔ̍ tu̍si᷄ŋ nāa̍ wānā ko̍ŋ chūā. Kɔ̍ nyɔ̍ɔ̍lū ndu̍ mbō ma᷄l nu̍m le̍ būŋgɛ̄ī ŋ̄ chu̍a̍ ke̍ŋ nde̍.

⁴Būŋgɛ̄ī kēŋ ī lo᷅ nya̍ tɛ̄ɛ̄ŋ mā hi̍ni̍ mā lɔ̍l te̍. Hɔ̄lte̍ŋ bɛ̍ɛ̍ hi̍nī mā kūmbū le̍ŋ te̍.

⁵So̍li̍ nu᷅m pi̍la̍ o̍ yāŋɔ̄ɔ̄le̍ŋ, mɛ̄ɛ̍ kīa̍llo̍ ō chā nu̍a̍ā dōōsūnɔ̍ɔ̍ mbō wa̍ ndu̍ nyāānɔ᷄ŋndo̍ yɛ̍, ɔ̄ɔ̄ mɛ̄ɛ̍ yōūwo̍ ō hāū nu̍a̍ā o̍ yāla̍ yōūwa̍ mbō lo̍ kīndīo̍o̍ mbō hɛ̄lu᷄ŋ yɛ̍.

⁶Nya̍ wānāā sīɛ̄lɛ̍i̍ya̍, lā kɔ̍ mī lā kɔ̍ mɛ̍ɛ̍nda̍ŋ si̍si̍ŋnda̍ lɛ̄ŋ. Lā kɔ̍ mɛ̍ɛ̍nda̍ŋ mī lā chē mɛ̄ɛ̍ si̍si̍ŋnda̍ ā tōsā yɛ̍, mī lā sɔ̍lā kɔ̄l kālo̍o̍.

⁷Sīsi̍ŋnda̍, ā nɔ̍ ma̍sā nda̍ chōo̍ le̍, ā nɔ̍ wa̍nā bɛ̍ndū mbō wa̍ nda̍ chōo̍, ɔ̄ɔ̄ mbō si᷄m nda̍ la̍chi̍ mbō wa̍ nda̍ bōlle̍ŋ te̍.

⁸Kɛ̍ tē wɔ̄ɔ̄le̍ŋ lē hīŋ pɛ̍, ā nūūwa̍ nyɛ̄ dīa̍a̍ ā kɛ̄si̍ le̍ sīālte̍ cho̍ hūnɔ̄ɔ̍ le̍ŋ.

⁹Tē sīsi̍ŋnda̍ ā nɔ̄lā pɛ̍ mā tōsa̍ nu̍a̍ā, ɔ̍ɔ̄ nya̍? Bōōndi̍i̍ kūɛ̍ɛ̍nɛ̍ nya̍ chō yɛ̄ sāŋgā a̍ hi̍ni̍la̍ŋ mī lā chɛ᷄ŋ, nya̍ wānāā sīɛ̄lɛ̍i̍ya̍ ha̍ā? Bōōndi̍i̍ kūɛ̍ɛ̍nɛ̍ nya̍ chō yɛ̄ tīōndɔ̄ɔ̄ o̍ lūa̍ŋ?

¹⁰Lā bīī pɛ̍, lā hīni̍ŋ lā dīmi̍ māā lā sīɛ̄ndīŋ ndɔ̍ nyɛ̄ pɔ̄mbɔ̄. Bāla̍ŋ kāfālāa̍ mī lā lūām pe̍lo᷄ŋ chōo̍, mī lā dīmī māā lā pɛ̄ŋgī wɔ̍ nyɛ̄ pɔ̄mbɔ̄.

¹¹Kɛ̍ bōōndi̍i̍ nya̍ hīnī lɔ̍mā māŋ nde̍, bōōndi̍i̍ ke̍ŋ tāmbe̍i̍ ī kpūwā nya̍ ni̍, mɛ̄ɛ̍ wānā wɔ̍ɔ̍ŋndo̍ ō dēl nu̍a̍ā wāŋndo̍ chōo̍ le̍ ndu̍ nyɛ̄m ndɔ̍ŋ pōōndīa̍a̍ o̍ bā yɛ̍. Mɛ̄ɛ̍ wānā wɔ̍ɔ̍ŋndo̍ ō chīŋālāŋ nu̍a̍ā wāŋndo̍ a̍ nyɛ̄ īpīāāndūe̍i̍ o̍ bā le̍ ndu̍ nyɛ̄m ndɔ̍ŋ pōōndīa̍a̍ o̍ bā yɛ̍, le̍nde̍ bā hāvɛ̍i̍yo̍ ō kpūwā nya̍ ni̍.

¹²Wānāā dɛ̍nɛ̍ wɔ̍ɔ̍ŋnda̍, a̍ chōŋnu᷄ŋ wa̍nāā fo̍ndō fu̍u̍ wa᷅ŋnda̍ tɛ̄ɛ̄ŋ nda̍, ka̍ālā ndāla̍ŋ la̍ cho̍ la̍ŋ ni̍. Wānāa̍ ba̍lū wāŋnda̍ chōōla̍ŋ dīmūllo̍ wa̍ nda̍ chō ni̍.

¹³Tē ā wa̍ wāŋndo̍ chōŋgōo̍ le̍ ndu̍ sūɛ̍i̍ wɔ̍ɔ̍ŋnde̍ tōsāllo̍ pɛ̍, ā sūūki̍āŋ a̍ lāhɔ̄l, ā sūūki̍āŋ a̍ ŋ̄pēlu̍, ā sūūki̍āŋ a̍ ŋ̄sū.

¹⁴Le̍ te̍le̍ŋ o̍ te̍le̍ŋ, sɔ̄ɔ̍ŋ lāka̍fa᷄ŋ, a̍ sɔ̄ɔ̍ŋ dɛ̍nɛ̍ wɔ̍ɔ̍ŋndo̍ŋ mu̍ŋ nda̍ tūūnūŋ o̍ lākɔ̄l le̍ wāŋnda̍ tōsāllo̍ ni̍. Bā o̍ bā nda̍ kɔ̍, wāŋnda̍ dɛ̍nɛ̍ pa̍lāa̍ nūūvīāllo̍.

¹⁵Le̍ he̍ī, dɛ̍nɛ̍ pa̍lāa̍ chō nda̍ hūnɔ̄ɔ̄ tōlɔ̄ɔ̄ chōo̍ o̍ lē pīlɛ̍ ni᷅ŋ. Ā chō hūnɔ̄ɔ̄ wā ā yɔ̄ŋūlāā o̍ te̍le̍ŋ bi̍ŋgi̍i̍ni̍i̍ bɛ̍ŋgu̍, ndu̍yɛ̍ ā sɔ̍lā ni̍ŋ chi̍ɔ̍ū o̍ chīɔ̄ū le̍.

¹⁶Sɔ̄ɔ̍ŋ chō ŋ̄ ŋɔ̍mpu᷅m, kɛ̄lɛ̄ŋgāā ŋ̄ ŋɔ᷄mmɛ̍ū bɛ̍ɛ̍, ŋ̄ Mɛ̄lɛ̄ka̍ Ya̍a̍wɛ̄ɛ̄ o̍ tu̍l yɛ̄le̍ŋ tūl bɛ̄ndōo̍ wo̍ŋ. Sɔ̄ɔ̍ŋ mu̍ŋ ŋ̍ cho̍ mu᷅ŋ ni̍.

¹⁷Tōfā yōŋgāa̍, a̍ chōōla̍ŋ dīmīo̍o̍, a̍ wāna̍ tɛ̍ɛ̍mbu̍u̍ i̍sɔ̍ɔ̍ le̍ wo̍ dīyɔ̄ɔ̍,

¹⁸a̍ sɔ̄ɔ̍ŋ wɔ̍ɔ̍ŋndo̍ŋ tūūnɔ᷄ŋndo̍ o̍ kɔ̄l le̍ wāŋndo̍, a̍ kēlēŋā wāŋndo̍ kēlēŋā ho̍ō a̍ ŋ̄pēlū le̍ kɔ̄la̍ŋ yɔ̄ŋ wɔ̄ɔ̍ŋndo̍ tōsāa̍ wo̍,

¹⁹a̍ se̍īlē lāka̍fāle̍ŋ wāŋndo̍ tɛ̄ndāllo̍, a̍ kpūndɛ̍la̍ŋ mālɔ̄ɔ̍ wāŋnda̍ tɛ̄ɛ̄ŋ.

²⁰Po̍ nūu̍, nyɛ̄ o̍ nyɛ̄ fi̍nyā nūm di̍mu̍l nu̍m pɛ̍ le̍ tōsāa̍, tu̍si̍ŋ o̍ dīōm ndɔ̄ɔ̍ bɛ̄ŋgu̍ mā to̍sa̍ ndu̍. Ndu̍yɛ̍ nyɛ̄ o̍ nyɛ̄ kālā nu̍m ō pɛ̄ɛ̄ku̍ nu̍m pɛ̍, pu̍ɛ̍ɛ̍nu᷄ŋ ndu̍ le̍.

²¹Kɛ̍si̍ŋ si̍lālā ndāla̍ŋ o̍ kɔ̄l mī lā wa̍ nu̍m o̍ kɔ̄l le̍ fɛ̍ɛ̍ŋ a̍ fɛ̍ɛ̍ŋ. Ba̍a̍nu̍ŋ nda̍ŋ o̍ lābo̍lō le̍ wāa̍ lōōnɔ᷄ŋndo̍ a̍ la̍ŋ.

²²Lā nɔ̄lā mī lā chɔ᷄m nu̍m nɛ̄īyo̍ o̍ kēlāa̍ ni᷄ŋ, ndu̍yɛ̍ mī lā mānda̍ nu̍m tē a̍ hi̍ni̍ lūa̍ŋ pɛ̍, o̍ ko̍ŋ kɔ̍ɔ̍lī, tē ā tēndū pɛ̍, lā sōō nāa̍ nūm chu̍a̍.

²³Sīlālā ndāla̍ŋ, nyɛ̄ wa̍wo̍ŋ la̍mbūi̍yo̍ la̍ cho̍ ni̍. Sīlā nda̍ sīla̍ nu̍m le̍ nu̍m mīŋgīo̍o̍ o̍ nɛ̄ī yo̍, ō nɔ̄lā mbō pɛ̄ɛ̄ku̍ nu̍m mɛ̄ɛ̍ ŋ̄ wā o̍ yōōmū nūmndo̍ ni᷄ŋ yɛ̍.

²⁴Sīlālā ndāla̍ŋ lā nɔ̄lā mī lā tōsa̍, a̍ tu᷅l wa̍ŋ lāāndūāā yɔ̄ŋ wɔ̄ɔ̍ŋnda̍ kɔ̄ɔ̄lī le̍. Lā nɔ̄lā mī lā tōsa̍, wāŋ lāāndūa̍a̍ cho̍ o̍ nɔ̄la̍ŋ, kɛ̍ mā bālū pu̍a̍a̍ che̍le̍ŋ nda̍ kɔ̄ɔ̄lī a̍ sōndōlā yēēlɛ̍i̍ la̍ŋ nda̍, ā nɔ̍lā nu̍m a̍ sōndōlā ndāla̍ ye̍e̍lɛ̍i̍la̍ŋ te̍.

²⁵Wāŋ lāāndūa̍a̍ ha̍ā, mɛ̄ɛ̍ o̍ mɛ̄ɛ̍ nda̍ na᷄ŋ chɛ᷅l mī nāŋɔ̄ɔ̄ ndā ko̍ŋ ō tōsa̍ mā lūɛ̄ī hɔ̄lte̍ŋ o̍ nda̍ le̍. Ā mūlu̍ mu̍lu̍u̍ bɛ̍ɛ̍ hɔ̄lta̍ŋ mɛ̄ɛ̍ o̍ mɛ̄ɛ̍, chɛ᷅l mā nɔ̄la̍ nu̍m mā ti̍sa̍ nda̍ kɔ̄ɔ̄lī le̍.

²⁶Wāŋ lāāndūa̍a̍ ba̍lū ha̍ā tīɔ̄mɔ̄ɔ̍ le̍ nyɛ̄ sɔ̄lāa̍ wa̍, tē ā tōl ō pīlɛ̍ kɔ̄ɔ̄lī pɛ̍, o̍ kūɛ̍i̍ ni̍ŋ o̍ mɛ̍ī nu̍m ni̍. A̍ sūūndāa̍ nya̍ la̍nɔ̍ pi̍la̍a̍ o̍kɔ̄ɔ̄ ndu̍ ndu̍, yōōmū nūmndo̍ ndu̍ ta̍mbū ni̍.

²⁷Wānā chu̍ā yi᷅ŋnde̍ŋ o̍ dōmāa̍ ni᷄ŋ dōmā ko̍ŋ ō ŋu̍ē le̍?

²⁸Ā nɛ̍ī o̍ dɛ̄ŋgūlta̍ŋ chōo̍ a̍ ŋu̍ē le̍?

²⁹Mɛ̄ɛ̍ le̍nde̍ ko̍ni̍ i̍ cho̍ o̍ wāna̍ su̍u̍ndā ho̍ō a̍ la̍nɔ̍ pi̍la̍a̍ wo̍ ni̍. Wānā o̍ wāna̍ su̍u̍nda̍ a̍ la̍nɔ̍ pi̍la̍a̍ pɛ̍, dɛ̍nɛ̍ pa̍lāa̍ ŋ̄ sɔ̄lā ni̍.

³⁰Tē yīa̍a̍ŋ mā wa̍ vīīnɔ̄ɔ̍ nɛ̄īyo̍ pɛ̍ mbo̍ chīīmbūū nyɛ̄ dīa̍a̍ le̍ mbō dē, wāŋnda̍ chi᷅ ndi̍ māā īsɔ̄ɔ̍ le̍.

³¹Kɛ̍ tē wāna̍ nyɔ̄ɔ̍ ō bīī vīīnɔ̄ ko̍ŋ pɛ̍, nyɛ̄ o̍ chi̍i̍mbu̍u̍ ko̍ŋ ndo̍ mɛ̄ɛ̍ mī vīīnɔ̄ ko̍ŋ ō pāāwa̍ le̍ ndu̍ sa̍lā ŋɔ᷄mmɛ̍ū. Ā yɔ᷄ŋ bɛ̍ɛ̍ māā vīīnɔ̄ ko̍ŋ nyɛ̄m ndɔ̍ŋ kpo̍u̍ ŋ̄ nɔ̄ le̍ hīōūwɔ̄ɔ̍ o̍ sūɛ̍i̍ lēvīī ke̍ŋ ni᷄ŋ, hīōūwɔ̄ɔ̍ ŋ̍ hi̍a̍ū kpo̍u̍ ni̍.

³²Wānāa̍ su̍u̍ndā ha̍ā a̍ lāāndāā pi̍la̍a̍ wa̍, ā nɔ̍ kɔ̍l kālu̍ le̍. Ā si̍nā nu̍a̍ā māā nda̍ pi̍la̍ le̍ nda̍ wā ko̍ŋ tɛ̍ɛ̍mbūūwo̍ le̍.

³³Wānāa̍ su̍u̍ndā ha̍ā a̍ lāāndāā pi̍la̍a̍ wa̍, lɔ̄ɔ̍ a̍ bɛ̄ɛ̄la̍ ta̍mbɛ̍i̍la̍ŋ la̍ cho̍ mīāl ndā ni̍. Ndu̍yɛ̍ si̍ɔ̍mbu̍la̍ nda̍ sɔ̄lā la̍ŋ, ō cho̍ si̍ɔ̍mbu̍la̍ chu̍ū le̍.

³⁴Wānā pɔ̍nɔ̍ pa̍ŋa̍lɛ̍i̍yo̍, kɔ̄llo̍ pīla̍ o̍ tu̍u̍lu̍ ni̍. Tē ō bīī la̍a̍ ndɔ̍ o̍ tīɔ̄mɔ̄ɔ̍ pɛ̍, īnyīɛ̍ɛ̍ bɛ̍ɛ̍ ve᷅ ndu̍ o̍ sūɛ̍i̍ ke̍ŋ ni᷄ŋ te̍.

³⁵Po̍ tɛ᷅m a̍ la̍a̍ndɔ̄ wo̍, ō yɔ̄ŋgu̍ bɛ̍ɛ̍ nyɛ̍ sɔ̄lāa̍ le̍ sūɛ̍i̍ la̍nu̍ɛ̍i̍, ō bi̍ī nyɛ̄ ndɔ̄ sɔ̍lāā kōŋ te̍. Mɛ̄ɛ̍ mɛ̍ɛ̍ wa᷅na̍ tɛ᷅m a̍ la̍a̍ndɔ̄ wo̍ ō chu̍a̍ nyɛ̍ sɔ̄lāa̍ mbō lūɛ̄ī ndu̍ chōo̍ le̍ ndu̍ nyɔ̄ɔ̄lōo̍, ō chɛ᷅l te̍.