Read Southern Kisi Pu̍lɔ̍wāā 9 Bible Online

Pu̍lɔ̍wāā 9 - Southern Kisi bible

Pu̍lɔ̍wāā 9

¹Kɔ̄l kālo̍o̍ tāŋgu̍l chīɛ̄ī ndɔ̄ɔ̍. Sūŋgbu̍a̍ŋ mā ŋɔ᷄mmɛ̍ū o̍ ha̍ndu̍ o̍ chīɛ̄ī ndɔ̄ɔ̍ ho̍ō ni̍.

²Ō dīī chɔ̄lōo̍ mbo̍ tōōsīāā nyɛ̄ dīa̍a̍, ndu̍yɛ̍ mbo̍ bɛ̄ɛ̄ndīāā mūɛ̄īya̍ŋ. Ō bɛ̄ɛ̄ndi̍a̍a̍ ti̍bīi̍ ndɔ̄ɔ̍ le̍ hūnɔ̄ɔ̍ nyɛ̄ dīa̍a̍ dīo̍o̍ lēcho̍ō.

³Ō vēm bu̍ɛ̍i̍yāā ndūāā la̍a̍ndūa̍a̍ le̍ mā vēēlu̍ wāŋnda̍ mā hīŋ le̍ nyɛ̄ dīa̍a̍ dīo̍o̍. Fo̍ndāŋ vīlɛ̄ī bɛ̄ndu̍ cho̍ o̍ chi̍o̍o̍ ni᷄ŋ te̍mā wo̍, lo̍ŋ nda̍ he̍l ni̍, ma̍ wā wāŋnda̍ vēēlōo̍ cho̍o̍. Ā chō yōndāa̍ māā kɔ̄l kālo̍o̍ dīmi̍ āā,

⁴“Nya̍ wānāa̍ si̍nā nyɛ̄ o̍ nyɛ̄ le̍ wa̍, lā hu᷄ŋ.” Ndu̍yɛ̍ ma̍ wā dīɔ̄mnda̍ dīmūllo̍ māā kɔ̄l kālo̍o̍ dīmi̍ āā,

⁵“Lā hu᷄ŋ mī lā hu᷄ŋ di̍ō nyɛ̄ dīāā ya̍ I̍ bɛ̍ɛ̍ndi̍a̍a̍ wo̍, ndu̍yɛ̍ mī lā ko᷄l mūɛ̄īmā mākīle̍pīi̍ma̍ ya̍ I̍ bɛ̍ɛ̍ndi̍a̍a̍ wa̍ŋ.

⁶Lā ma᷄l di̍ɔ̍mnde̍, ko̍ŋ to̍sā ni̍ mī lā wa̍ yōōmū. Lā to᷄l nɛ̍i̍ sīnā pɛ̄ŋgo̍o̍ kɔ̄ɔ̄lī.”

⁷Wānā o̍ wāna̍ ki̍ndi̍ pɛ̍ le̍ wāna̍ ma᷅m wāŋnda̍ wo̍ mīŋgīo̍o̍ o̍ nɛ̄ī, mɛ̄ɛ̍ nūm pi̍la̍ ye̍e̍ma̍ yēīyo̍ ni̍. Wānā o̍ wāna̍ ki̍ndi̍ pɛ̍ le̍ wāna̍ dɛ̍nɛ̍ wɔ̍ɔ̍ŋndo̍ mīŋgīo̍o̍ o̍ nɛ̄ī, mɛ̄ɛ̍ nūm pi̍la̍ nu̍u̍wa̍ bɛ̄ɛ̄la̍ ta̍mbɛ̍i̍la̍ŋ.

⁸Lā ki̍ndī le̍ wānāa̍ ma᷅m ha̍ā wāŋnda̍ wa̍ mīŋgīo̍o̍ o̍ nɛ̄ī le̍. Tē lā kīndi̍ le̍ nda̍ mīŋgīo̍o̍ o̍ nɛ̄ī pɛ̍, ā chō nya̍ yɛ̄le̍ŋ tūl. Wāna̍ kɔ̄l kālo̍o̍ ndu̍ bi̍a̍ndūŋ ni̍ mī wānā mi̍ŋgi̍ ndu̍ o̍ nɛ̄ī. O̍ ko̍ŋ, ō nɔ̄lā mbō kāāla̍ nu̍m.

⁹Wāna̍ tāāsi̍o̍o̍ ndu̍ wānā si̍lā ni̍, ō nɔ̄lā mbō chɔ̄ɔ̄lu̍ tāāsi̍o̍o̍ sɔ̄lā o̍ tāāsi̍ o̍ nɔ̍ wo̍ chōo̍. Wānāa̍ to̍sā sɔ̍ɔ̍ŋ kɛ̍ndɔ̍ŋ nda̍, nda̍ wānā pɛ̍ɛ̍kū ni̍, ā nɔ̄lā mā chɔ̄ɔ̄lu̍ pɛ̄ɛ̄kū o̍ pɛ̄ɛ̄kū nda̍ nɔ̄ wo̍ chōo̍.

¹⁰Tē wānā nɔ̍ sīōōŋīi̍ Mɛ̄lɛ̄ka̍ Ya̍a̍wɛ̄ɛ̄ ve̍ pɛ̍, mɛ̄ɛ̍ kɔ̄l kālo̍o̍ kāndɔ᷄ŋ ndɔ̄ɔ̍ cho̍ ko̍ŋ ni̍. Ndu̍yɛ̍, wāna̍ si̍na̍ Mɛ̄lɛ̄ka̍ Dīāndāa̍ pɛ̍, mɛ̄ɛ̍ a̍ chi̍i̍ sīnā pɛ̄ŋgo̍o̍ sɔ̄lā.

¹¹Kɔ̄l kālo̍o̍ to̍sā ni̍ mī wānā vi̍o̍ū yōōmū. Ō nɔ̄lā mbō chɔ̄ɔ̄lu̍ nu̍m wɔ̍sīlā ŋ̄ nɔ̄ le̍ chīīyo̍ o̍ chi̍e̍ēŋndo̍ chōo̍ la̍ŋ.

¹²Wāna̍ kɔ̄l kālo̍o̍, kɔ̄l kālu̍ ndɔ̄ɔ̍ ndu̍ cho̍ tɔ̄nɔ̍ ndɔ̄ɔ̍ ni̍. Kɛ̍ tē wānā chu̍e̍ kɔ̍l kālo̍o̍ nyɛ̄ o̍ nyɛ̄ le̍, mɛ̄ɛ̍ a̍ sa̍a̍ŋgi̍a̍a̍ nūm pi̍la̍.

¹³Dīɔ̄mnde̍ chō māchūāā mɛ̄ɛ̍ wānā la̍nɔ̍ hɔ̄lāā hēēlāa̍ ō chō nu̍a̍ā yɛ̍, wānā la̍nɔ̍ nɔ᷅ ho̍ō māndā le̍ wo̍, o̍ nɔ᷅ ho̍ō lāsi̍ɔ̍mbu̍ o̍ lāsi̍ɔ̍mbu̍ le̍ wo̍.

¹⁴Ō fūla̍ mbo̍ chāl o̍ chīɛ̄ī ndɔ̄ɔ̍ sōndōo̍, o̍ fo̍ndāŋ vīlɛ̄ī bɛ̄ndu̍ cho̍ o̍ chi̍o̍o̍ ni᷄ŋ te̍mā wo̍ īkɛ̄i̍.

¹⁵Ō chō wānāa̍ cho̍ hīōūnɔ᷄ŋndo̍, ma̍ wā kɔ̄la̍ŋ o̍ kpe̍ku̍la̍ ndāla̍ŋ ni᷄ŋ nda̍ vēēlōo̍, mbō dīmī āā,

¹⁶“Nya̍ wānāa̍ si̍nā nyɛ̄ o̍ nyɛ̄ le̍ wa̍, lā hu᷄ŋ lu̍ɛ̍ī o̍ ya̍ lo̍ chi̍ɛ̍ī ni̍ŋ.” Ndu̍yɛ̍, mbo̍ wā dīɔ̄mnda̍ dīmūllo̍ āā,

¹⁷“Mɛ̄ŋmā lēvīī ya̍ŋ, nāŋɔ̄ɔ̍ pi̍la̍ ma̍ na̍ŋ kōlɔ̄ɔ̍ ni̍. Ndu̍yɛ̍ nyɛ̄ dīāā wānā di̍ā ho̍ō o̍ sɔ̍ɔ̍sɔ̍ɔ̍ wo̍ ni᷄ŋ ndo̍, yēēlāa̍ pi̍la̍ o̍ ye̍e̍la̍ ni̍.”

¹⁸Kɛ̍ wānāā o̍ cho̍ ha̍ā vēēlōo̍ wa̍, ā si̍nā nu̍a̍ā māā wānā o̍ wāna̍ ku̍ɛ̄ o̍ chīɛ̄ī ndɔ̄ɔ̍ pɛ̍, a̍ sɔ̍la̍ pīɔ̍mndo̍ le̍ le̍. Ā si̍nā nu̍a̍ā māā wānāa̍ lu̍ɛ̍ī o̍ ndu̍ lo̍ chi̍ɛ̍ī ni̍ŋ nda̍ ki̍nɛ̍i̍, māā ā chō ni᷅ŋ o̍ fo̍ndāŋ yīŋgi̍lɛ̍i̍ bɛ̍ndo̍o̍ chi̍e̍e̍ pīɔ̍m te̍ le̍.