Read Southern Kisi Īkīlīsi̍a̍a̍tīī 1 Bible Online

Īkīlīsi̍a̍a̍tīī 1 - Southern Kisi bible

Īkīlīsi̍a̍a̍tīī 1

¹Wānā si̍nāā dɛ̍nɛ̍ bɛ̍ndōo̍, po̍ Dēēve̍ wo̍, o̍ wa̍ māsāa̍ Chūlu̍sɛ̄lɛ̄m chīe̍e̍ wo̍, dīōmndā o̍ so̍ō la̍ŋ, la̍ cho̍ la᷅ŋ ni̍.

²Mbo̍ dīmī āā, “Yōōmōo̍, ō cho̍ nyɛ᷅ wānā si̍na̍ pɛ̄ŋgu̍ le̍ o̍ cho̍ le̍, wānā si̍nā ndu̍ pɛ̄ŋgu̍ le̍.

³Mɛ̄ɛ̍ mɛ̄ɛ̍ wāna̍ chi̍o̍o̍ yɔ̄kpa̍ bɛ̍ɛ̍ o̍ chi̍e̍ēŋndo̍ chōo̍, ō sɔ̍lā tɔ̍nɔ̄ o̍ tɔ̄nɔ̄ lēni᷄ŋ te̍.

⁴Yu̍ŋgu̍la̍ŋ la̍ hu᷅ŋ ko̍ lā hīāū, la̍ hu᷅ŋ ko̍ lā hīāū, kɛ̍ chi̍e̍ēŋndo̍ ndu̍ ndu̍, ō fe̍ŋāŋ le̍cho̍ō le̍. Le̍ fɛ̍ɛ̍ŋ a̍ fɛ̍ɛ̍ŋ ō chōnu̍ŋ mɛ̄ɛ̍ o̍ wa̍ŋnu̍ŋ o̍ kāndɔ᷄ŋndo̍ yɛ̍ ko̍ni̍.

⁵Pāa̍le̍ŋ kāndɔ̄ɔ̍ fūlāa̍ īdīi̍yo̍, mī lē kɔ̍ de᷄l īchɔ̄llo̍. Tē lē de᷄l pɛ̍ lē mīīŋgu̍ vɛ̄lɛ̄ chɔ̍chɔ̍ lē kɔ̍ ka̍ndū fūlāa̍ nāa̍ le̍ fu̍lā lɔ̍ɔ̍ lɔ̍ɔ̍ wa̍.

⁶Hūēīye̍ chɔ̄nɔ᷄ŋndo̍ a̍ hɔ̄ŋndo̍ mī ī tūūsu̍, mī ī chɛ᷄ŋ vɛ̍lɛ̄ le̍nde̍, mī ī hēēlu̍ bā lūāŋndo̍ a̍ hɔ̄ŋndo̍. Bālɔ̄ɔ̍ le̍nde̍, i̍ chɛ᷄ŋ pɛ̍ ba̍ā ī hīōū ba̍ā ī mīīŋgu̍ vɛ̄lɛ̄ nāa̍ pi᷅li̍a̍a̍ kāŋ kpe̍.

⁷Mɛ̄ŋnda̍ŋ o̍ pēēla̍ pɔ̍mbɔ̄la̍ŋ kpo̍u̍, o̍ Pēe̍ Mɛ̄ŋmā Īhɛ᷄llo̍ chōo̍ ma̍ ku̍ā dēlɔ̄ɔ̍ ni̍. Kɛ̍ a̍ ko̍ŋ kpo̍u̍ Pēe̍ Mɛ̄ŋmā Īhɛ᷄llo̍ ō pe᷅ mbō hīōū mɛ̄ɛ̍ o̍ nɔ̍ le̍ wāa̍ yɛ̍ le̍. Mɛ̄ŋnda̍ŋ ma᷅ŋ mā chɛ᷄ŋ pɛ̍ mā kɔ̍ de᷅l o̍ pēe̍ mɛ̄ŋmā īhɛ᷄llo̍ chōo̍, mā mīīŋgu̍ vɛ̄lɛ̄ pi̍la̍ nāa̍ pēēla̍ŋ nda᷅ŋ lā kāndu̍ŋ nda̍.

⁸Nyɛ̄ o̍ nyɛ̄ wānā to̍sa̍ o̍ chi̍e̍ēŋndo̍ ho̍ō chōo̍ sāŋgāa̍ kpo̍sōŋ. Sɔ̄ɔ̍ŋ yɔ̍nūŋ ndo̍ŋ ŋ̄ chu̍ū di̍mī le̍. Hɔ̄lte̍ŋ lē pe᷅ a̍ chɔ̄ɔ̍ le̍. Nīle̍ŋ bɛ̍ɛ̍ le̍nde̍ ko̍ni̍, mɛ̄ɛ̍ mɛ̄ɛ̍ le̍ tu̍e̍i̍ lē sa̍ŋga̍ a̍ tūēīyɔ̄ɔ̍ le̍.

⁹Nyɛ̄ o̍ nyɛ̄ yɔ̍nūŋ, ō yɔ̄nu̍ŋ ni᷅ŋ pāāndū. Nyɛ̄ o̍ nyɛ̍ yɔ̍nu̍ŋ pa̍a̍ndū, ō nɔ̄ vɛ̄lɛ̄ le̍ yɔ̄nɔ᷄ŋndo̍. Nyɛ̄ o̍ nyɛ̄ cho̍ o̍ sɛ̍nɛ̄ī o̍ chi̍e̍ēŋndo̍ ho̍ō chōo̍ le̍.

¹⁰O̍ yɛ̄ɛ̍nɛ̍ cho̍ yɛ̍ ō chi̍e̍ēŋndo̍ ho̍ō chōo̍ mī wānā di̍mi̍ māā ho̍ō ndu̍ ndu̍ ō sɛ̄nɛ̄ī o̍ cho̍ ni̍? Ō cho̍ le̍. Nyɛ̄ o̍ nyɛ̄ na̍a̍ ŋ̄ chō chɔ̄ɔ̍, ō wa̍ ni᷅ŋ pāāndū, ō wa̍ ni᷅ŋ lɔ̍ɔ̍ pa̍ bɛ̍ɛ̍ na̍a̍ ŋ̄ wā.

¹¹Sɔ̄ɔ̍ŋ yɔ̍nu̍ŋ si̍ndɛ̄ wo̍ŋ ŋ̄ nɔ̍lā mī ŋ̄ chīi̍ mu̍ŋ lōōnɔ᷄ŋ te̍. Ndu̍yɛ̍ nyɛ̄ o̍ nyɛ̍ cho̍ yɔ̍nɔ᷄ŋndo̍ pɛ̄ŋgo̍o̍ ho̍ō, wāŋnda̍ o̍ sīɔ̄dīi̍ lāchīo̍o̍ ni᷄ŋ bɛ̍ɛ̍ ā nɔ̍lā mā hu᷄ŋ chi̍ī mu̍ŋ lōōnɔ᷄ŋ o̍ sīɔ̄dīi̍ lāchīo̍o̍ ni᷄ŋ te̍.”

¹²“Ya̍ wa̍nā si̍nāā dɛ̍nɛ̍ bɛ̍ndōo̍, ya̍ wa̍ māsā bɛ̍ndōo̍ Chūlu̍sɛ̄lɛ̄m chi̍e̍ē le̍ lɛ̄ŋndē I̍sɔ̄lūɛ̍i̍le̍ŋ kpo̍u̍ ni̍.

¹³Nyɛ̄ o̍ nyɛ̍ cho̍ yɔ̄nɔ᷄ŋndo̍ o̍ chi̍e̍ēŋndo̍ ho̍ō ni᷄ŋ, mi̍ lo̍ o̍ ko̍ŋ mi̍ du̍a̍ū kɔ̄l nūu̍ kpo̍u̍, le̍ mī nu̍u̍wa̍ tɛ̍ɛ̍ tɛ̍ɛ̍, ndu̍yɛ̍ mī ya̍a̍si̍a̍a̍ fɛ̍sɛ̄ fɛ̍sɛ̄ le̍ mi̍ si̍na̍ a̍ ndu̍ o̍kɔ̄ɔ̄. “Wōlɔ̄ɔ̄lā Mɛ̄lɛ̄ka̍ hāndu̍ wāna̍ chi̍o̍o̍ chōo̍ la̍ŋ lā lūsu̍l bɔ̄ɔ̍.

¹⁴Nyɛ̄ o̍ nyɛ̍ cho̍ yɔ̄nɔ᷄ŋndo̍ o̍ chi̍e̍ēŋndo̍ chōo̍ kpo̍u̍ I̍ che᷅. Ndu̍yɛ̍ nyɛ̄ o̍ nyɛ̍ cho̍ yɔ̄nɔ᷄ŋndo̍ kpo̍u̍ nyɛ̄ fo̍ndō fu̍u̍ o̍ cho̍ ni̍. Ō chō māchūāā mɛ̄ɛ̍ wāŋndo̍ wa᷅ nu̍a̍ā hūēīye̍ nyāānɔ᷄ŋndo̍ kɔ̄ɔ̄lī le̍ ndi̍ bīyɔ̄ɔ̍ yɛ̍.

¹⁵Nyɔ̄ɔ̍ tūndu᷄ŋ pɛ̍ wānā nɔ̍lā ndu̍ sīɛ̄ndī le̍. Nyɛ̍ cho̍ le̍ wo̍, wānā nɔ̍lā ndu̍ chɔ̄m bōllē pīlɛ̍ le̍.

¹⁶“Mɛ̄ɛ̍ ya̍ I̍ mɛ̍ɛ̍nda᷄ŋ kɔ̍l kālu̍ ya̍ I̍ nɔ̍ wo̍, mi̍ di̍mī o̍ kɔ̄l ni᷄ŋ a̍a̍, ‘Kɔ̄l kālu̍ ya̍ I̍ nɔ̍ wo̍ ō chō ō bɔ̄ɔ̍. I̍ nɔ̍ kɔ̄l kālo̍o̍ I̍ hi̍o̍ū māsāa̍ ke̍e̍ku̍ ya̍ lāchī Chūlu̍sɛ̄lɛ̄m nda̍ kpo̍u̍. I̍ nɔ̍la̍ mi̍ si̍nā a̍ kɔ̄l kālo̍o̍ o̍kɔ̄ɔ̄ ta̍u̍ ta̍u̍, ndu̍yɛ̍ a̍ sīnā pɛ̄ŋgo̍o̍.’

¹⁷Mi̍ lo᷅ o̍ ko̍ŋ mi̍ ki̍ndī kpo᷅ke̍ le̍ mī si̍na̍ yɛ̍ yi̍ɔ̍ɔ̍ tāāsi̍o̍o̍ tɛ̄ɛ̄ŋ a̍ dīɔ̄mnde̍, le̍ mī si̍na̍ vɛ̄lɛ̄ yɛ̍ yi̍ɔ̍ɔ̍ kɔ̄l kālo̍o̍ tɛ̄ɛ̄ŋ a̍ sēēmāa̍. Kɛ̍ ko̍ŋ bɛ̍ɛ̍ mi̍ sa̍a̍lu᷄ŋ māā nyɛ̄ fo̍ndō fu̍u̍, ō chō māchūāā mɛ̄ɛ̍ wāŋndo̍ o̍ wā nu̍a̍ā hūēīye̍ nyāānɔ᷄ŋndo̍ kɔ̄ɔ̄lī le̍ ndi̍ bīyɔ̄ɔ̍ yɛ̍.

¹⁸Mɛ̄ɛ̍ ŋ̄ nɔ̄ kɔ̍l kālo̍o̍ ta̍u̍ yɛ̍, le̍nde̍ ko̍ni̍ ŋ̄ nɔ̄ vɛ̍lɛ̄ būūla᷄ŋndo̍ ni̍. Mɛ̄ɛ̍ ŋ̄ chɔ̄ɔ̄lū kɔ᷅l kālo̍o̍ sɔ̄lā kpo̍u̍, le̍nde̍ ko̍ni̍ ŋ̄ chɔ̄ɔ̄lū vɛ̍lɛ̄ kɔ̄l tāmbɛ̍i̍yo̍ sɔ̄lā ni̍.”