Read Southern Kisi Īkīlīsi̍a̍a̍tīī 10 Bible Online

Īkīlīsi̍a̍a̍tīī 10 - Southern Kisi bible

Īkīlīsi̍a̍a̍tīī 10

¹Tē pēŋge̍ vi̍lɛ̍i̍yo̍ ō de᷄l o̍ chūɛ̄īmā chūŋ kɛ̄ndīa̍ŋ ni᷄ŋ pɛ̍, mbō tōsa̍ mī chūɛ̄īmā māŋ kpo̍u̍ ma̍ chu᷅ŋ chūŋ wɔ̄ɔ̍ŋndo̍. Le̍nde̍ ko̍ni̍, dīɔ̄mīī tāa̍ni̍ŋnde̍ mī ī tōsa̍ mī kɔ̄l kālo̍o̍ ō sīmnu᷄ŋ nyɛ᷅ fo̍ndō fu̍u̍.

²Wāna̍ kɔ̄l kālo̍o̍, kɔ̄l ndɔ̄ɔ̍ lɔ̍ɔ̍ o̍ lɔ̍ɔ̍ o̍ sɔ̄ɔ̍ŋ kɛ̍ndɔ̍ŋ tōsāa̍ o̍ wa᷅ ni̍, dīɔ̄mndo̍ yɛ̍ ndu̍ le̍ te̍le̍ŋ o̍ te̍le̍ŋ o̍ sɔ̄ɔ̍ŋ wɔ̍ɔ̍ŋndo̍ŋ tōsāa̍ kɔ̄l ndɔ̄ɔ̍ ō wā ni̍.

³Tē wāŋndo̍ ō wa̍ dīɔ̄mndo̍ pɛ̍ o̍ kɔ̄lā o̍ wa᷅ la̍ŋ wānā si̍nā ni̍. Tē ō wa̍ kɔ̄la̍ŋ pɛ̍, chɔ̄mndo̍ wānā o̍ wānā māā dīɔ̄mndo̍ o̍ cho̍ ni̍.

⁴Tē wānā nu̍m bānāa̍ ō dɔ̄ɔ̍ŋ tu̍mbe̍ a̍ nūm pɛ̍, ma᷅l wa̍llo̍ le̍ ke̍ŋ te̍. Tē a̍ tu̍si̍ŋ to̍o̍lō o̍ ndu̍ lo̍ pɛ̍, mɛ̄ɛ̍ o̍ mɛ̄ɛ̍ ndu̍ o̍o̍ dɔ̍u̍nu̍ŋ tu̍mbe̍ a̍ nūm kɔ̄l lo̍ o̍ nyu̍lūl ni̍.

⁵I̍ che᷅ vɛ̄lɛ̄ sūɛ̍i̍ wɔ̍ɔ̍ŋīī pūm mī ī yɔ̄nūŋ o̍ chi̍e̍ēŋndo̍ ho̍ō ni᷄ŋ. Bīōndɔ᷄ŋ bɛ̍ndōo̍ pīla̍ wānāa̍ cho̍ wāŋnda̍ chīla̍ŋnda̍ ā tōsā ko̍ŋ ni̍.

⁶Dīɔ̄mnda̍, nda̍ nda̍ kē fo̍ndāŋndā bɛ̄ndūla̍ŋ o̍ lɛ̄ŋnde̍ŋ ni᷄ŋ ni̍, o̍ ko̍ŋ kɔ̍ɔ̍lī, wānāa̍ pɛ̍lnu᷄ŋ la̍di̍o̍ wa̍ mā ke̍ ka̍ŋ fo̍ndāŋndā pɔ̄mbɔ̄la̍ŋ.

⁷Ndu̍yɛ̍, I̍ che᷅ ni᷅ŋ wānāa̍ cho̍ bu̍ɛ̍īle̍ŋ wāŋnda̍ o̍ lābā wa̍ bālɔ̄ɔ̍ o̍ su̍a̍a̍ chōo̍, o̍ ko̍ŋ kɔ̍ɔ̍lī mī wānāā tɔ̍ɔ̍wa̍ nda̍ bālū a̍ ŋ̄pēlū.

⁸Wānā tu̍a̍u̍wāā lāso̍o̍ŋndo̍ ndu̍ de᷅l o̍ so̍o̍ŋndo̍ ni᷄ŋ ni̍. Wāna̍ pe̍sī kpa̍kīla̍ŋ ndo̍ ndu̍ kɛ̄ūwo̍ lɔ̄wā ni̍.

⁹Wāna̍ ka̍lā po̍ūta̍ŋ ndo̍, ndu̍ pōūwo̍ ō yɔ̄ŋūl ni̍. Wānā tɛ̍ɛ̍ndīāā īyɔ̄mndo̍, ndu̍ yɔ̄mndo̍ ō yɔ̄ŋūl ni̍.

¹⁰Yɔ̄mndo̍ kīo̍ŋndo̍ a̍ chūēī būmbu̍lɛ̍i̍ye̍ mɛ̄ɛ̍ mā mɔ̍sɔ̍ŋa̍ a̍ kpāāyā nu̍mndo̍ kpo̍u̍. Kɛ̍ tē wānā nɔ̍ tāāsi̍ tōsāā nyɔ̄ɔ̍ pɛ̍, nyɛ̄ o̍ nyɛ̄ ŋ̄ yɔ̄ɔ̍ ba᷅ le̍ tōsāa̍ bāa̍ ŋ̄ tīū ni̍.

¹¹Wāna̍ ŋ̄kɛ̄ūwo̍ tē kɛ̄ū ŋ̄ chō kīndīo̍o̍ le̍ mbō wa̍ o̍ kpāāyā nu̍mndo̍ bɛ̄ŋgu̍ wo̍ ō lɔ̄wa̍ nu̍m fɛ̍lɛ̍ŋ pɛ̍, tɔ̄nɔ̍ yɛ̄ɛ̍nɛ̍ ŋ̄ yēēma̍ yɛ̍ vɛ̄lɛ̄ sɔ̄lā o̍ kɛ̄ū kōŋ ni᷄ŋ?

¹²Wāna̍ kɔ̄l kālo̍o̍ dīōmnda̍ fu̍lā ndu̍ o̍ sōndō la̍ŋ, mī lā tōsa̍ mbō sɔ̄la̍ nyīnā cha̍a̍. Kɛ̍ dīɔ̄mndo̍ ndu̍ ndu̍ dīōmnda̍ fu̍lā ndu̍ o̍ sōndōla̍ŋ, dɛ̍nɛ̍ pa̍lāa̍ la̍ chu̍ū ndu̍ ni̍.

¹³Nyɛ̄ o̍ nyɛ̍ fu̍lā di̍ɔ̄mndo̍ o̍ sōndō dīɔ̄mndo̍ŋ kpo̍sōŋ ko̍ni̍ o̍ wa̍ ni̍, su̍ɛ̍i̍ ndūɛ̍i̍ kāndɔ̄ɔ̍ a̍ chīīyo̍ wānā chi᷅ le̍bo̍l te̍ a̍ chi᷅ tu̍m te̍.

¹⁴Dīɔ̄mndo̍ tē ō kāndu̍ sūɛ̍i̍ pɛ̍, mīīŋga᷅ŋ bɛ̍ɛ̍ ō mi̍īŋga᷅ŋ kɔ̍ɔ̍lī le̍, sūɛ̍i̍ tu̍ŋ. Kɛ̍ wānā o̍ wānā si̍nā nyɛ᷅ cho̍ yɔ̄nɔ᷄ŋ o̍ sīɔ̄dīi̍ yo̍ ni᷄ŋ te̍. Tē ŋ̄ vī pɛ̍ wānā o̍ wānā si̍nā nyɛ̍ cho̍ na̍a̍ lāchī wo̍ le̍.

¹⁵Dīɔ̄mndo̍, ndu̍ nɔ̍ yɔ̄kpā bɛ̄ndōo̍ a̍ wa̍llo̍ ni̍, tē ō yɔ̄kpa̍ pɛ̍ te̍i̍, le̍ mīīŋgōo̍ chīe̍e̍ bɛ̍ɛ̍ i̍chɔ᷅l ō ku̍ē le̍ nɛ̄īyo̍ chɔ̄ le̍.

¹⁶Dɛ̍nɛ̍ pa̍lāa̍ ō chō le̍ lɛ̄ŋnde̍ŋ nde᷅ŋ, le̍ fe̍le̍ŋgu̍nɔ̍ɔ̍ ō wā le᷅ŋ chōo̍ ma̍sā bɛ̍ndōo̍, ndu̍yɛ̍ mī wānāā bɛ̄ndūa̍a̍ ā lāndu̍ŋ kɔ̍l le̍ bɔ̄ŋa᷅ŋndā nyɛ̄ dīāā bɛ̄ndūla̍ŋ su̍e̍e̍ wo̍.

¹⁷Kɛ̍ lēlɛ̄ŋ o̍ lēlɛ̄ŋ wāna̍ kɔ̄l kālo̍o̍ ō wa̍ chīla̍ŋ pɛ̍, ndu̍yɛ̍ mī wāŋ bɛ̄ndūa̍a̍ o̍ lɛ̄ŋndē lēŋ ni᷄ŋ a̍ wa̍, wānā chi᷅ nda̍ bɔ̄ŋa᷅ŋndā bɛ̄ndū dīāā nyɛ̄ dīāā vēēlū lɔ̍ɔ̍ o̍ lɔ̍ɔ̍ le̍, ndu̍yɛ̍ o̍ ko̍ŋ kɔ̍ɔ̍lī, nyɛ̄ ndā di̍a̍a̍ ō ve᷅ le̍ mā dē ndu̍yɛ̍ mā ko᷄l mī mā bīī nda̍ le̍, kɛ̍ le̍ mā sɔ̄la̍ dīāllūŋ kāla᷄ŋ ko̍ni̍ pɛ̍, lɛ̄ŋndē wāā le̍nde̍ dɛ̍nɛ̍ kɛ̍ndɔ̄ɔ̍ o̍ wa᷅ le̍ni̍ŋ ni̍.

¹⁸Wāna̍ sīɛ̄lɛ̍i̍yo̍ tē a̍ de̍ma̍ chīɛ̄ī nūmndo̍ sɔ̄ɔ̄lūūwo̍ pɛ̍, ō lu᷄l, o̍ ko̍ŋ mī chīɛ̄ī kōŋ ō de᷄l.

¹⁹Bɔ̄ŋa᷅ŋ dīāā nyɛ̄ dīāā bɛ̄ndōo̍ mbō tōsa̍ wānā mā na̍ŋ kɔ̄l ta̍u̍. Ndu̍yɛ̍, mūɛ̄īya̍ŋ mī mā tōsa̍ mā dɔ̄ɔ̄nu᷄ŋ nya̍a̍le̍ o̍ yōōmū nūmndo̍ ni᷄ŋ. Kɛ̍ nyɛ̄m mu᷅ŋ kpo̍u̍ ka̍ni̍e̍i̍ ndi̍ hu᷅ŋ a̍ mu̍ŋ ni̍.

²⁰Wānā o̍ wānā di̍mī dīōmndē wɔ̄ɔ̍ŋ a̍ māsā bɛ̍ndōo̍ le̍, ye̍ī ndu̍ o̍ kɔ̄l ni᷄ŋ te̍. Di̍mī vɛ̄lɛ̄ dīōmndē wɔ̄ɔ̍ŋ a̍ wānā su̍lāa̍ le̍, ā yɔ᷄ŋ bɛ̍ɛ̍ mā wa̍ nu᷄m pīlɛ̍ kpe̍ o̍ nūmndo̍ chi̍ɛ̍ī ni̍ŋ, fo̍ndōle̍ a̍ si̍nā yo̍u̍ cho̍ wā hīōūwɔ̄ɔ̍ chōo̍ cho̍o̍ mbō tūēī dīōmndē lēŋ mbō kɔ̍ di̍mī wo̍ le̍.