Read Southern Kisi Īkīlīsi̍a̍a̍tīī 11 Bible Online

Īkīlīsi̍a̍a̍tīī 11 - Southern Kisi bible

Īkīlīsi̍a̍a̍tīī 11

¹Wānā o̍ wānā tē ā nɔ̄ o̍ bā pɛ̍, to̍sa̍ kɛ̍ndɛ̄i̍ a̍ nyɛ̄ ŋ̄ nɔ̄ wo̍, te̍le̍ŋ cho̍ fūūlūū nūm bɛ̍ɛ̍ mā mīŋgu̍l nu̍m kɛ̄ndɛ̄ī ke̍ŋ.

²Tē ā nɔ̄ o̍ bā pɛ̍, dɔ̍u̍ nyɛ᷅ nūm sɔ̍lāa̍ o̍ nɛ̄īla̍ yɛ̍ yɛ̍la̍ ŋ̄ sɔ̄lā tɔ̍nɔ̄ɔ̍ la̍ŋ ni᷄ŋ, fo̍ndōle̍ a̍ si̍nā pa̍a̍le̍ dɛ̍nɛ̍ pa̍lāā ō kōmāl nu̍m ni̍ŋ o̍ chi̍e̍ēŋndo̍ ho̍ō chōo̍ le̍.

³Tē pīɔ̍ɔ̍ ō he᷄l pɛ̍, sīa̍a̍ o̍ si̍ā ni̍. Bā o̍ bā yɔ̄mndo̍ ō hīŋ le̍ dēlɔ̄ɔ̍ pɛ̍, ō wa̍ ba᷅ tōūwo̍, ō wa̍ ba᷅ lūāŋndo̍ lo̍ŋ o̍ de᷅l ni̍, ndu̍yɛ̍ nāa̍ o̍ de᷅l la̍, lo̍ŋ o̍ wa᷅ i̍hi̍ni̍ ni̍.

⁴Wānā o̍ wāna̍ cha̍l chōo̍ mɛ̄ɛ̄nda᷄ŋ pɛ̍, le̍ mā si̍na̍ te̍le̍ŋ ŋ̄ tōsā wa̍li̍ nu̍m īchīɔ̍ɔ̍ wo̍ pɛ̍, a̍ ku̍ū nyɛ᷅ o̍ nyɛ̄ wɔ̍sī kōŋ te̍.

⁵Wānā o̍ wānā si̍nā mɛ̄ɛ̍ wānā la̍nɔ̍ɔ̍ ō lōōkū yo̍llo̍ chūā yɛ̍ le̍. Tē wānā nɔ̍la̍ he̍ī sīnā pɛ̍, mɛ̄ɛ̍ ā nɔ̄lā mā si̍na̍ mɛ̄ɛ̍ Mɛ̄lɛ̄ka̍ ō tōsā wa̍li̍ ndɔ̄ɔ̍ yɛ̍, mɛ̄ɛ̍ ā nɔ̄lā mā si̍na̍ mɛ̄ɛ̍ o̍ lo̍o̍ku̍ nyɛ̄ o̍ nyɛ̄ tōōsīāā yɛ̍.

⁶Tɔ̍l tɔ̍lɔ̄ɔ̄lā nūmnda̍ yɛ̍ yɛ̍la̍ŋ te̍le̍ŋ o̍ te̍le̍ŋ, īdīi̍ ni̍ īchɔ̄l ni̍, fo̍ndōle̍ a̍ si̍nā ō kpe̍e̍kpe̍i̍ cho̍ nāŋɔ̄ɔ̄ wo̍ le̍, kɛ̄lɛ̄ŋgāā mī lā na᷄ŋ dɔ̍ɔ̍ kpo̍u̍ a̍ si̍nā le̍.

⁷Nyɛ̄ wa̍wo̍ŋ lēpāla̍a̍ ō bɛ̄nda̍ bɔ̄ɔ̍, ō bɛ̄nda̍ bɔ̄ɔ̍ mī hɔ̄lte̍ŋ lē de᷄l nyɛ̄ wa̍wo̍ŋndo̍ lēhɔ̄l.

⁸Tē wānā vi̍o̍ū yōōmū pɛ̍, na̍ŋ kɔ᷅l. Kɛ̍ ndu̍yɛ̍ si̍na̍ pɛ̍ŋgu̍ māā mɛ̄ɛ̍ o̍ mɛ̄ɛ̍ ŋ̄ vi̍o̍u̍ yo̍o̍mū ā nɔ̄ le̍ wūo̍o̍. Ndu̍yɛ̍ pālɛ̍i̍ ŋ̄ nɔ̄ mā chi̍i̍ chīe̍e̍ pīɔ̍mnde̍, ndi̍ hi̍o̍ū a̍ pālɛ̍i̍ ŋ̄ chīī o̍ chi̍e̍ēŋndo̍ chōo̍ ve̍. Ndu̍yɛ̍ tē ā vī ni᷅ŋ pɛ̍ nyɛ̄ o̍ nyɛ̄ ve᷅ lɛ̍ mā wa̍ lēhɔ̄l o̍ nɛ̄ī le̍ ndu̍ le̍. Mu̍ŋ kpo̍u̍ nyɛ̄ fo̍ndō fu̍u̍ ŋ̍ cho̍ ni̍.

⁹Nya̍ fe̍le̍ŋgu̍a̍a̍, lā tūe̍i̍ yo̍o̍mōo̍ yēēlā bōōndi̍i̍ nya̍ chō ŋ̄fe̍le̍ŋgɔ̍ ve̍. Nyɛ̄ o̍ nyɛ̄ kɔ̄ltā nyāla̍ŋ lā dīmu̍l nya̍ pɛ̍ le̍ tōsāa̍ lā tōsa̍. Lā tōsa̍ nyɛ᷅ o̍ nyɛ̄ nya̍ yēēma̍ le̍ tōsāa̍. Kɛ̍ ndu̍yɛ̍ lā sīna̍ pɛ̍ŋgu̍ māā nyɛ̄ o̍ nyɛ̄ nya̍ tōsa̍, Mɛ̄lɛ̄ka̍ chō nya̍ hūnɔ̄ɔ̄ yāmɛ̍i̍ kīlūl le̍ ndu̍.

¹⁰Būūla᷄ŋ o̍ būūla᷄ŋ wa᷅ nya̍ o̍ lākɔ̄l te̍. Ndu̍yɛ̍ lā pūɛ̄ɛ̄nu̍ŋ a̍ nyɛ̄ nɛ̄īyāā o̍ nyɛ̄ nɛ̄īyāa̍ cho̍ nya̍ lūɛ̄īyɔ̄ɔ̍ o̍ ŋ̄dīāl, kāni̍ fo̍ndōle̍, yōōmū īfe̍le̍ŋgɔ̍ya̍a̍ nyɛ̄ fo̍ndō fu̍u̍ o̍ cho̍ ni̍.