Read Southern Kisi Īkīlīsi̍a̍a̍tīī 12 Bible Online

Īkīlīsi̍a̍a̍tīī 12 - Southern Kisi bible

Īkīlīsi̍a̍a̍tīī 12

¹Bōōndi̍i̍ ŋ̄ chō fe̍le̍ŋgu̍nɔ̍ ve̍, lo̍o̍nu̍ŋ a̍ wāna̍ to̍o̍si̍a̍a̍ nu̍mndo̍. Yɔ̄ŋi̍ bōōndi̍i̍ fu̍u̍lu̍u̍ o̍ yōōmū nūmndo̍ ni᷄ŋ, bōōndi̍i̍ nyɛ̄ pālɛ̍i̍ bɛ̄ndūe̍i̍, bōōndi̍i̍ nu̍m ī mɛ̄ɛ̄lɛ̄i̍ mā di̍mi̍ māā, I̍ tu̍i̍i̍ yo̍o̍mōo̍ yēēlā le̍ fɔ̍.

²A̍ te̍le̍ŋ ko̍ŋ ni᷅ŋ pāa̍le̍ŋ bɛ̍ɛ̍ kɛ̍sɛ̍ kɛ̍sɛ̍, a̍ pāŋge̍i̍, a̍ lōo̍ŋ a̍ si̍o̍ū lɛ̍ nyɛ̄ ndā wa̍wo̍ŋndo̍ chɔ̄ le̍, chōo̍ kpo̍u̍ mbō yɔ̄nu̍ŋ nu̍m o̍ hɔ̄l yi̍sīmāā bɛ̄ndū, le̍ te̍le̍ŋ o̍ te̍le̍ŋ le̍nde̍ ko̍ni̍ ŋ̄ chā ndu̍ ni̍.

³A̍ te̍le̍ŋ ko̍ŋ, bālā nūmnda̍ cho̍ la᷅ŋ nu̍m māndāa̍ mɛ̄ɛ̍ chīɛ̄īyo̍ ō māndā nu̍a̍ā wānā yɛ̍ la̍ŋ, lā wā ni᷅ŋ nu̍m nyīīyāa̍. O̍ ko̍ŋ kɔ̍ɔ̍lī, pēlūŋ nu̍m cho̍ mu᷅ŋ mi̍ ŋ̄ nɔ̄ kpāāyāa̍ le̍ bālɔ̄ɔ̍ lēchōo̍ wo̍ŋ, ŋ̄ chō nu̍m hūnɔ̄ɔ̄ wā yōla̍ŋ pi̍ā pīā. Chīŋndo̍ŋ kpo̍u̍ mī ŋ̄ chūū kēēndɔ᷄ŋ nu̍m o̍ sōndō, mī ŋ̄ lo̍ da᷅ŋdāŋ, nyɛ̄ dīa̍a̍ bɛ̍ɛ̍ a̍ nɔ̍lā lɛ̍ ndu̍ tīāāmūū le̍. Hɔ̄lta̍ŋ mī lā yɔ̄nu̍ŋ nu̍m yi̍fīdīī a̍ si̍o̍ū lɛ̍ chɔ̄ le̍.

⁴Nīla̍ŋ bɛ̍ɛ̍ mī lā bāŋu̍l nu̍m, wāŋnda̍ wa̍ bɛ̍ɛ̍ bɔ̍ɔ̍lūūwo̍ nu̍m īkɛ̄i̍ a̍ tu̍i̍ī la̍pi̍ le̍. Wāŋnda̍ wā nu̍m chūo̍o̍ īkɛ̄i̍ a̍ tu̍i̍ī la̍pi̍ le̍. Nyɛ̄ chāa̍ bɛ̍ɛ̍ ā wa̍ ndu̍ bɛ̍ɛ̍ nu̍m lɔ̄ɔ̍ īkɛ̄i̍, a̍ tu̍i̍ī ndu̍ lāpi̍ le̍. Kɛ̍ ndu̍yɛ̍, yōūwo̍ bɛ̍ɛ̍ o̍ cha̍ŋ nu̍m īkɛ̄i̍ pɛ̍, wa̍ bɛ̍ɛ̍ o̍ lūa̍a̍ŋ, tūēīyɔ̄ɔ̍ ŋ̄ tūɛ̄ī ni̍ mā tēndū.

⁵A̍ te̍le̍ŋ ko̍ŋ le̍ hēlɔ̄ɔ̍ nāa̍ te̍māa̍ bɛ̍ɛ̍ sīōōŋnde̍ wā nu̍m le̍ hēlɔ̄ɔ̍ yɔ̄ŋi̍ ŋ̄ de᷄l. Kēlāa̍ bɛ̍ɛ̍ a̍ chɛ᷅l mā kūɛ̄ ndu̍ o̍ bɛ̍ɛ̄la̍ŋ te̍ a̍ sīōōŋīī bɛ̄ndūi̍i̍ wa᷅ nu̍m nde̍. Bōlle̍ŋ mī lē dēndū nu̍m fo̍fo̍ a̍ yūlu̍ŋnde̍, to̍fa̍ wɔ̍ ko̍ mɛ̄ɛ̍ yɔ̄m a̍lmɔ̍ɔ̄ wo̍ ō sōlī nu̍a̍ā pe̍e̍ŋge̍la̍ŋ mbō dēndū fo̍ fo̍ kɔ̍ɔ̍lī kɔ̄ɔ̄lī yɛ̍. Le̍ kɔ̄lā kālāla̍ŋ bɛ̍ɛ̍ a̍ nɔ̍lā lɛ̍ la̍ŋ te̍, kɔ̄la̍ŋ a̍ pēlo᷄ŋ sɛ̄ɛ̄sūūwo̍. Yēēmɛ̍i̍ ve᷅ lɛ̍ nu̍m le̍ nyɛ̄ o̍ nyɛ̄ le̍. O̍ mɛ̄ɛ̄lu̍la̍ŋ kpɔ̍ŋ, mī nyi̍nā nūmndo̍ ō mīīŋgu̍ o̍ Mɛ̄lɛ̄ka̍ lo̍, Mɛ̄lɛ̄ka̍ to̍o̍si̍a̍a̍ nu̍m ndo̍. O̍ ko̍ŋ, mī cha᷄ŋnda̍ŋ lā tīu̍ o̍ bɛ̍ɛ̄la̍ŋ le̍ nūm.

⁶Lo̍o̍nu̍ŋ a̍ wāna̍ to̍o̍si̍a̍a̍ nu̍mndo̍, lɔ̍ɔ̍ te̍le̍ŋ ko̍ŋ ō fūūlu̍u̍ wɔ̍ le̍ wo̍, lɔ̍ɔ̍ yōōmū nu̍mndo̍ ō kīōlu̍ wɔ̍ o̍ lēpīlɛ̍ ni᷄ŋ mɛ̄ɛ̍ yɔ̄lūɛ̍i̍ ka̍ni̍i̍ hu̍mbūe̍i̍ ī kīōlū nu̍a̍ā yɛ̍ le̍ wo̍, lɔ̍ɔ̍ yōōmū nūmndo̍ ō tēmbu̍ wɔ̍ mɛ̄ɛ̍ la̍mbūi̍ īko̍o̍līi̍yo̍ ō pīɔ̄l nu̍a̍ā wɔ̍ wɔ̍ yɛ̍ le̍ wo̍, lɔ̍ɔ̍ o̍ te̍mbū wɔ̍ mɛ̄ɛ̍ kpɛ̍ɛ̍nɛ̍i̍ pūūlūi̍i̍ wa᷅ he̍ī o̍ pēēlo̍ le̍ mɛ̄ŋnda̍ŋ kɔ̄ndɔ̄ɔ̍ ve̍ ī pīɔ̄l nu̍a̍ā mī ī sāŋnu̍ŋ fa̍lu̍lu̍ yɛ̍ le̍ wo̍, lɔ̍ɔ̍ yōōle̍ cho̍ le᷅ŋ le̍ mɛ̄ŋnda̍ŋ nānɔ̄ɔ̍ o̍ so̍o̍ŋ māmɛ̄ŋndo̍ le̍ŋ lē kīōlu̍ wɔ̍ le̍ wo̍, le̍ŋ le̍ yɔ̍nūŋ māā yōōmū nūmndo̍ ni̍.

⁷Ndu̍yɛ̍ tē ā vī dɔ̍ɔ̍ pɛ̍, dīāllo̍ŋ ŋ̄ mīīŋgu̍ o̍ pūūlōo̍ ni᷄ŋ nāa̍ ŋ̍ fu̍la̍ wa̍, o̍ ko̍ŋ kɔ̍ɔ̍lī, mī nyi̍nāa̍ ndu̍ mi̍i̍ŋgu̍ o̍ Mɛ̄lɛ̄ka̍ lo̍ wāna̍ ke̍ nu̍m nyi̍nā kōŋ ndo̍.

⁸Le̍la̍ŋ I̍ che᷅ nyɛ̄ o̍ nyɛ̄ fo̍ndō fu̍u̍. Nyɛ̄ o̍ nyɛ̍ cho̍ o̍ chi̍e̍ēŋndo̍ ho̍ō chōo̍ nyɛ̄ fo̍ndō fu̍u̍ ya̍ I̍ che᷅ ndu̍ ni̍. Dīōmndā wānā si̍nāā dɛ̍nɛ̍ bɛ̍ndōo̍ ō sōō la̍ŋ, la̍ŋ la̍ cho̍ la̍ŋ ni̍.

⁹Wāna̍ kɔ̄l kālu̍ bɛ̍ndōo̍ pīla̍ wānā si̍nāā dɛ̍nɔ̍ɔ̍ ho̍ō ō wa̍ ni̍. Ndu̍yɛ̍ mbo̍ kē wānāā bɔ̄ɔ̍ bɔ̍ɔ̍ dɛ̍nɛ̍ si̍nāa̍ o̍ kɔ̄l kālu̍ ndɔ̄ɔ̍ ho̍ō ni᷄ŋ. Sɔ̄ɔ̍ŋ kɔ̄l kālu̍ŋ o̍ di̍mi̍ wo̍ŋ ki̍nɛ̍i̍ ō cha᷄l fɛ̍lɛ̍ŋ mbo̍ yīya᷄ŋ mu̍ŋ nyɛ̄ kɛ̄ndɛ̄ kɛ̍ndɛ̄, mbo̍ yāāsīāā a̍ mu̍ŋ o̍kɔ̄ɔ̄ fɛ̍sɛ̄ fɛ̍sɛ̄, ndu̍yɛ̍ mbo̍ hɛ̄ɛ̄ndūū mu̍ŋ mɛ̄ɛ̍ ŋ̍ nɔ̍ le̍ wāa̍ yɛ̍.

¹⁰Dīōmndā tōnya̍la̍ bɛ̍nda̍ le̍ dīmīo̍o̍ la̍ŋ, la̍ŋ wānā si̍nāā dɛ̍nɔ̍ɔ̍ ho̍ō ō nu̍u̍vi̍a̍a̍ ni̍ mbo̍ chūūŋgīāā la̍ŋ nāa̍ pi᷅lɛ̍ le̍ wāŋnda̍ dīmūllo̍. Ndu̍yɛ̍ dīōm o̍ dīōm o̍ po̍o̍nyi̍a̍a̍, dīo̍m cho̍ sa̍kpō ndu̍yɛ̍ mbo̍ wā dīōm tōnya̍a̍ wo̍ o̍ cho̍ ni̍.

¹¹Dīōmnda̍ fu̍lā wa̍nāā kɔ̄l kālu̍a̍a̍ o̍ sōndō la̍ŋ, lā chō māchūāā mɛ̄ɛ̍ yɔ̄m wānā ma̍ndāā lāsāa̍ ō bīī o̍ bā le̍ sāa̍ kpēŋāa̍ wo̍ ō chō nu̍a̍ā yɛ̍. Ndu̍yɛ̍ mɛ̄ɛ̍ ŋ̄ bāŋ nu̍a̍ā lɔ̄ndīmɛ̄i̍ye̍ o̍ yɔ̄mndo̍ mī ī bīī ndu̍ le̍ te̍le̍ŋ vi̍lɛ̄ī yɛ̍, le̍nde̍ dīōmndā ndɔ̄la̍ŋ lā chō ni̍. Kāni̍ fo̍ndōle̍, o̍ wānā māndāā lāsāa̍ ō pīlɛ̍ lo̍ kpe̍ la̍ fu̍la̍ ni̍, ndu̍ yɔ̍nūŋ māā Mɛ̄lɛ̄ka̍ ni̍.

¹²Po̍ nūu̍, I̍ chɔ̍ɔ̍lū wɔ̍ nu̍m sīlāa̍ ho̍ō kē. Yāu̍la̍ŋ lā chu̍ū po̍o̍nyīāā le̍. Pɛ̄ɛ̄kōo̍ bɛ̍ɛ̍ tē wānā hi̍u̍ bōlle̍ŋ bāŋɔ̄ɔ̍ o̍ ndu̍ pɛ̍ te̍i̍, a̍ yɔ̍ɔ̍kpi̍a̍a̍ dīāllūŋ nūmndo̍ŋ.

¹³A̍ chi̍i̍ ni̍ko̍ nyɛ᷅ o̍ nyɛ̄ tūēīyɔ̄ɔ̄. Sūɛ̍i̍ he̍ī bōllē ndɔ̄le̍ŋ le̍ cho̍ le᷅ŋ ni᷅ŋ. Ke̍ Mɛ̍lɛ̄ka̍ bɛ̄ɛ̄le̍ŋ ndu̍yɛ̍ mā to̍sa̍ nyɛ̄ sāwāla̍ ndɔ̄la̍ŋ lā dīmi̍ le̍ tōsāa̍ wo̍. Nyɛ̍ cho̍ na̍a̍ kūēē na̍a̍ ŋ̄wāŋndā chīe̍e̍ le̍ tōsāa̍ wo̍ ndu̍ cho̍ ko̍ŋ ni̍.

¹⁴Kāni̍ fo̍ndōle̍, wānā o̍ wānā nyɛ̄ o̍ nyɛ̄ ŋ̄ chō tōsāa̍ wo̍, ō wa̍ o̍ sɔ̍ɔ̍ sɔ̍ɔ̍ ni̍ŋ, ō wa̍ i̍kɛ̍ndɛ̄, ō wa̍ i̍wɔ̍ɔ̍ŋ, Mɛ̄lɛ̄ka̍ chō nu̍m hūnɔ̄ɔ̄ yāmɛ̍i̍ kīlūl le̍ ndu̍.