Read Southern Kisi Īkīlīsi̍a̍a̍tīī 2 Bible Online

Īkīlīsi̍a̍a̍tīī 2 - Southern Kisi bible

Īkīlīsi̍a̍a̍tīī 2

¹“Mi̍ kɛ̍ɛ̍sīāā le̍ mī de᷅ yōōmū nūu̍ tɔ̄nɔ̄. Kɛ̍ ko̍ŋ bɛ̍ɛ̍ mi̍ cha᷅ māā nyɛ̄ fo̍ndō fu̍u̍.

²Mi̍ cha᷅ māā māmɔ̄ɔ̍ bɛ̍ɛ̍ dīōmnde̍ o̍ cho̍ ni̍, ndu̍yɛ̍ māā kɔ̄l kɛ̄ndɔ̄ɔ̍ bɛ̍ɛ̍ ō nɔ̍ tɔ̍nɔ̄ o̍ tɔ̄nɔ̄ lēni᷄ŋ te̍.

³Mi̍ kɛ̍ɛ̍sīāā a̍ kɔ̄l nūu̍ le̍ mī nu̍u̍wa̍ nɛ̄īla̍ŋ mɛ̄ɛ̍ ya̍ I̍ to̍sā mī na̍ŋ kɔ̄l o̍ yōōmū nūu̍ ni᷄ŋ yɛ̍, o̍ ko̍ŋ, mi̍ ko᷅l mūɛ̄īya̍ŋ. Kɛ̍ I̍ lo̍ o̍ kɔ̄l kālo̍o̍ nūūwāa̍ ni᷄ŋ mi̍ wo̍ū bāa̍ o̍ dīɔ̄mnde̍ ni᷄ŋ. Ya̍ i̍i̍ ye̍e̍ma̍ mī ya̍ i̍i̍ si̍na̍ nyɛ̍ kpe̍e̍kpe̍i̍ cho̍ ō kɛ̄ndɛ̄ mī wāna̍ chi̍o̍o̍ ō tōsa̍ ndu̍ o̍ yōōmū ndɔ̄ɔ̍ ni᷄ŋ a̍ te̍le̍ŋ bi̍ŋgī o̍ nɔ̍ le̍ wāa̍ o̍ chi̍e̍ēŋndo̍ chōo̍ wo̍.

⁴“I̍ to̍sa̍ wa̍lta̍ bɛ̍ndū o̍ yōōmū nūu̍ ni᷄ŋ. I̍ ta̍ŋgu̍l chīɛ̄īla̍ŋ le̍ ya̍ pi̍la̍, ndu̍yɛ̍ mi̍ tu̍āl kpe̍le̍la̍ mākīle̍pīi̍la̍ŋ.

⁵Mi̍ to̍sā kpe̍le̍la̍ŋ, ndu̍yɛ̍ a̍ kpe̍le̍la̍ yɔ̄mīī kūāmāāla̍ŋ, ndu̍yɛ̍ mi̍ tu̍āl yɔ̄mīī kūāmɛ̄i̍ su̍u̍ o̍ su̍u̍ le̍ni̍ŋ.

⁶Mi̍ bɛ̍ɛ̍ndīāā so̍o̍ŋnda̍ māmɛ̄ŋnda̍ŋ le̍ yɔ̄mīī kūāmɛ̄ī ya̍ I̍ tɔ᷅l he̍ī ve̍ pɔ̄ɔ̄līa̍a̍.

⁷Ya̍ i̍i̍ nɔ̍ chīa̍a̍ o̍ bā ta̍u̍ ta̍u̍, wāŋ pīāāndūa̍a̍ a̍ wāŋ lāāndūa̍a̍, a̍ ya̍ I̍ pe̍ndū wa̍, ndu̍yɛ̍ a̍ a̍ ve̍lu᷄ŋ o̍ ya̍ lo̍ chi̍ɛ̍ī ni̍ŋ nda̍. Ya̍ i̍i̍ nɔ̍ vɛ̄lɛ̄ chɔ̄lūa̍a̍ ta̍u̍ mbo̍ hīāū wānāa̍ ke̍e̍ku̍ ya̍ lāchī Chūlu̍sɛ̄lɛ̄m nda̍ kpo̍u̍.

⁸Māsāā bɛ̍ndūa̍a̍, o̍ ya̍ lo̍ nda̍ a̍a̍ hu᷅ŋ a̍ nyɛ̄m ndāŋ sɔ̍la̍ŋ ni̍, ka̍ni̍ŋ hu̍mbo᷄ŋ a̍ ko̍o̍līi̍yo̍ŋ. O̍ ko̍ŋ kɔ̍ɔ̍lī, ya̍ i̍i̍ nɔ̍ wānāā ŋ̄chōndu̍a̍a̍ o̍ bā, wāŋ pīāāndūa̍a̍ a̍ wāŋ lāāndūa̍a̍ le̍ ya̍ chōndo̍ŋ sōlūllo̍, ndu̍yɛ̍ mi̍ nɔ᷅ vɛ̄lɛ̄ lāāndūāā pɔ̄mbūa̍a̍ ta̍u̍ ta̍u̍, ā wānā ndu̍ o̍o̍ cha᷅ mī nyɔ̄ɔ̍ hɛ̍na̍ŋ nu̍m nda̍.

⁹“Mi̍ si̍mnu̍ŋ wa᷅na̍ kpāāyā bɛ̍ndū hīōūwɔ̄ɔ̍ wānā o̍ wāna̍ ke̍e̍ku̍ ya̍ lāchī Chūlu̍sɛ̄lɛ̄m. Ndu̍yɛ̍ kɔ̄l kālu̍ nūu̍ bɛ̍ɛ̍ ō wa̍ le̍nde̍ o̍ pi̍a̍ā cha̍, nyɛ̄ o̍ nyɛ̄ fēŋa̍ŋ le̍cho̍ō le̍.

¹⁰Nyɛ̄ o̍ nyɛ̄ ya̍ i̍i̍ ye̍e̍ma̍ o̍ yōōmōo̍ ni᷄ŋ, mi̍ sɔ̍lā. Ndu̍yɛ̍ kɔ̄l kɛ̄ndɛ̄ o̍ kɔ̄l kɛ̄ndɛ̄ ya̍ i̍i̍ ye̍e̍ma̍ le̍ tōsāa̍ mi̍ to̍sā. Fāfa̍la̍ o̍ fāfa̍la̍ ya̍ I̍ wa̍, I̍ wa̍ a̍ kɔ̄l kɛ̄ndɛ̄ ta̍u̍ o̍ fāfa̍la̍ kōŋ ni᷄ŋ. Ndu̍yɛ̍ fāfa̍la̍ kōŋ kpo̍u̍ tɔ̄nɔ̍ ya̍ I̍ sɔ̍la̍ lēni᷄ŋ ndo̍ ndu̍ cho̍ ho̍ō ni̍.

¹¹Kɛ̍ mɛ̄ɛ̍ ya̍ I̍ mɛ̍ɛ̍nda᷄ŋ nyɛ᷅ o̍ nyɛ̄ ya̍ I̍ to̍sa̍ a̍ bālā nīla̍ŋ, ndu̍yɛ̍ a̍ fāfa̍la̍ o̍ fāfa̍la̍ ya̍ I̍ fa̍fa̍la̍, mi̍ sa̍a̍lu᷄ŋ māā nyɛ̄ fo̍ndō fu̍u̍, tɔ̄nɔ̄ o̍ tɔ̄nɔ̄ cho̍ mī wānā sɔ̍la̍ ndu̍ o̍ chi̍e̍ēŋndo̍ ho̍ō ni᷄ŋ te̍, ō chō māchūāā mɛ̄ɛ̍ wāŋndo̍ ō wā nu̍a̍ā hūēīye̍ nyāānɔ᷄ŋndo̍ kɔ̄ɔ̄lī le̍ ndi̍ bīyɔ̄ɔ̍ yɛ̍.

¹²Mi̍ lo᷅ o̍ ko̍ŋ mi̍ nyu̍nā ya̍ pi̍la̍ a̍a̍, ‘Ō yɛ̄ɛ̍nɛ̍ kpe̍e̍kpe̍i̍ lo̍ yɛ̍ I̍ to̍sa̍ ndu̍ le̍, ō māsā bɛ̍ndū chēle̍ŋ ō nɔ̄lā mbō hu᷄ŋ to̍sā ndu̍ ya̍ kɔ̄ɔ̄lī wo̍?’ “O̍ ko̍ŋ, mi̍ ka̍ndū yīya᷄ŋndo̍ a̍ kɔ̄l kālo̍o̍ o̍kɔ̄ɔ̄, ndu̍yɛ̍ a̍ dīɔ̄mnde̍, o̍ ko̍ŋ kɔ̍ɔ̍lī, a̍ sēēmāa̍ le̍ mī si̍na̍ yɛ̍ yi̍ɔ̍ɔ̍ sɔ̄ɔ̍ŋ sa̍lā yāa̍ wo̍ŋ mu᷅ŋ tɛ̍ɛ̄ŋ.

¹³Mi̍ sa̍a̍lu᷄ŋ māā kɔ̄l kālo̍o̍ bɛ̄nda̍ mbo̍ hīāū dīɔ̄mnde̍, mɛ̄ɛ̍ i̍ cho̍ dɔ̍ɔ̍ nu̍a̍ā mi̍ nyɛ̄ wa̍wo̍ŋndo̍ ō bɛ̄ndā mbo̍ hīāū nyūmnda̍ŋ yɛ̍.

¹⁴Wāna̍ kɔ̄l kālo̍o̍ chɔ̄ɔ̍ o̍ cha᷅ na̍a̍ o̍ wa᷅ kɔ̍la̍ŋ nda̍ ni̍. Kɛ̍ dīɔ̄mndo̍ ndu̍ ndu̍ o̍ nyūmnda̍ŋ ni᷄ŋ ko̍ni̍ o̍ wa᷅ ba̍lɔ̄ɔ̍ ni̍. Kɛ̍ wānāā ŋīɔ̍ɔ̍ŋnda̍ ha̍ā kpo̍u̍ mi̍ sa̍a̍lu᷄ŋ māā mɛ̄ɛ̄lu̍la̍ ndāla̍ŋ kpɔ̍ŋ nyɛ̄ pīlɛ̍ kpe̍.

¹⁵Mi̍ di̍mī o̍ kɔ̄l ni̍ŋ a̍a̍, ‘Mɛ̄ɛ̍ tɔ̄nɔ̍ yɛ̄ɛ̍nɛ̍ ya̍ I̍ sɔ̍la̍ yɛ̍ ni᷅ŋ o̍ kɔ̄l kālo̍o̍ ho̍ō ni᷄ŋ? Kāni̍ fu̍u̍le̍, nyɛ̍ nɔ̍ mbō yɔ̄nu̍ŋ a̍ dīɔ̄mndo̍ wo̍, ya̍ bɛ̍ɛ̍ nyɛ̄ pīlɛ̍ kōŋ ō chō ya̍ kōmāl.’ O̍ ko̍ŋ, mi̍ di̍mūl ya̍ pi̍la̍ a̍a̍, ‘Kɔ̄l kālo̍o̍ nɔ̄ɔ̍ bɛ̍ɛ̍ nyɛ̄ fo̍ndō fu̍u̍ o̍ cho̍ ni̍.’

¹⁶Kāni̍ fu̍u̍le̍, wāna̍ kɔ̄l kālu̍ ni̍, dīɔ̄mndo̍ ni̍, nda̍ ŋi̍ɔ̍ɔ̍ŋ kpo̍u̍ ā nɔ̄ mā vī wu̍ pi᷅lɔ̍ɔ̍. Ndu̍yɛ̍ tē ā vī dɔ̍ɔ̍ pɛ̍, le̍ te̍le̍ŋ bi̍ŋgī ko̍ni̍ wāŋnda̍ ā yīyāŋ a̍ nda̍ o̍kɔ̄ɔ̄ ni̍, mā pūɛ̄ɛ̄nu̍ŋ bɛ̍ɛ̍ a̍ nda̍.

¹⁷Mɛ̄ɛ̍ ya̍ I̍ chi̍i̍ yīya᷄ŋ a̍ sɔ̄ɔ̍ŋ mu᷅ŋ o̍kɔ̄ɔ̄ kpo̍u̍, yōōmū kālāa̍ bɛ̍ɛ̍ mi̍ tu᷅l ndu̍ lēyɛ̄. Kāni̍ fu̍u̍le̍, nyɛ̄ o̍ nyɛ̄ wāna̍ chi̍o̍o̍ ō tōsā o̍ yōōmōo̍ ni᷄ŋ, mi̍ to̍sā ndu̍, kɛ̍ kɔ̄l tāmbɛ̍i̍yo̍ ko̍ni̍ ya̍ I̍ sɔ̍la̍ lēni᷄ŋ ni̍. Nyɛ̄ fo̍ndō fu̍u̍ nyɛ̄ o̍ nyɛ̄ chō ni̍, ō chō māchūāā mɛ̄ɛ̍ wāŋndo̍ ō wā nu̍a̍ā hūēīye̍ nyāānɔ᷄ŋndo̍ kɔ̄ɔ̄lī le̍ ndi̍ bīyɔ̄ɔ̍ yɛ̍.”

¹⁸“Nyɛ̄ o̍ nyɛ̄ ya̍ I̍ fa̍fa̍la̍ le̍ ndu̍ o̍ chi̍e̍ēŋndo̍ ho̍ō chōo̍, mi̍ tu᷅l ndu̍ lēyɛ̄, kāni̍ fo̍ndōle̍, tē I̍ fa̍ŋa̍ŋ pɛ̍ wāna̍ cho̍ mīīŋgū o̍ fōōfo̍ nūu̍ wo̍, ndu̍ ko̍ni̍ ya̍ I̍ cho̍ nyɛ̄ o̍ nyɛ̄ mēl ni̍.

¹⁹Sāŋgā o̍ sāŋga̍ ya̍ I̍ sa̍ŋga̍ o̍ chi̍e̍ēŋndo̍ chōo̍, mi̍ so̍li᷄ŋ kpe̍ku̍ a̍ kɔ̍l kālu̍ nūu̍ le̍ ndu̍ nūūwāa̍, wānā che᷅le̍ŋ cho̍ kōmā īchāli̍ o̍ nyɛ̄m mu᷅ŋ chōo̍ ni̍. Ndu̍yɛ̍ wāna̍ ko̍ma̍ cha᷅l ni̍ŋ ho̍ō o̍ sāŋgā nūu̍ ho̍ō chōo̍ wo̍, ko̍ wāna̍ kɔ̄l kālu̍ o̍ wa᷅ ni̍ŋ ni̍, ko̍ dīɔ̄m ni̍, I̍ si̍nā le̍. He̍ī bɛ̍ɛ̍ mi̍ cha᷅ ndi̍ māā nyɛ̄ fo̍ndō fu̍u̍.

²⁰Mɛ̄ɛ̍ ya̍ I̍ chi̍i̍ yīya᷄ŋ kpo̍u̍, mi̍ kɔ̄llo̍ tāmbū ya̍ le̍ sāŋgā o̍ sāŋgā ya̍ I̍ sa̍ŋga̍ o̍ chi̍e̍ēŋndo̍ ho̍ō chōo̍.

²¹Kāni̍ fo̍ndōle̍, le̍ mā sa̍ŋga̍ le̍nde̍ mā so̍li̍ŋ kpe̍ku̍ a̍ kɔ̄l kālu̍ nu̍mndo̍ kpo̍u̍, ndu̍yɛ̍ a̍ tāāsi̍ nūmndo̍, o̍ ko̍ŋ kɔ̍ɔ̍lī, a̍ sīnā nūmndo̍, mā mɛ̍i̍ nyɛ̄ ŋ̄ sāŋga̍ ko̍ŋ le̍ ndu̍ wo̍, mī wānā che᷅le̍ŋ ō kōma̍ di̍ō ndu̍ tɔ̄nɔ̄ wāna̍ sa̍ŋga̍ bɛ̍ɛ̍ le̍ nyɛ̄ kōŋ te̍ wo̍, sāŋgā fo̍ndō fu̍u̍. He̍ī bɛ̍ɛ̍ mi̍ cha᷅ ndi̍ māā nyɛ̄ fo̍ndō fu̍ū, ndu̍yɛ̍ māā ī wɔ̄ɔ̍ŋnde̍ pīla̍ i̍ cho̍ ni̍.

²²Mɛ̄ɛ̍ o̍ mɛ̄ɛ̍ wāna̍ chi̍o̍o̍ ō yɔ̄kpa̍ o̍ chi̍e̍ēŋndo̍ chōo̍, mbō sāāŋgi̍a̍a̍ ndu̍ pi̍la̍, tɔ̍nɔ̄ yɛ̄ɛ̍nɛ̍ o̍ sɔ̍lā yɛ̍ lēni᷄ŋ?

²³Kāni̍ fo̍ndōle̍, pālɛ̍i̍ wāna̍ chi̍o̍o̍ ō nɔ̄ le̍ wāa̍ yōōmū o̍ chi̍e̍ēŋndo̍ chōo̍ ve̍, nyɛ̄ nɛ̄īyāa̍ kpo̍sōŋ ko̍ni̍ cho̍ le̍ ndu̍ ni̍ ha̍a̍a̍, a̍ yōōmū ndɔ̄ɔ̍ mɛ̄ɛ̄lu̍la̍ŋ. Ndu̍yɛ̍ o̍ wa̍llo̍ ni᷄ŋ bɛ̍ɛ̍ kɔ̄l tāmbɛ̍i̍yo̍ ndu̍ cho̍ le̍ ndu̍ ni̍. Yālāā o̍ hīnī i̍chɔ̍l te̍, kɔ̄l ndɔ̄ɔ̍ ō nɔ̍lā mbō pɛ̄ŋgi̍ le̍ a̍ yīya᷄ŋnda̍ŋ. He̍ī bɛ̍ɛ̍ mi̍ cha᷅ ndi̍ nyɛ̄ fo̍ndō fu̍u̍.

²⁴“Wāna̍ chi̍o̍o̍ nyɛ̍ bɛ̍nda̍ le̍ ndu̍ su̍e̍e̍ wo̍ ko̍ni̍ cho̍ dīo̍o̍ a̍ kōlɔ̄ɔ̍ ni̍ mbō dē sāŋgā ndɔ̄ɔ̍ tɔ̄nɔ̄. Kɛ̍ he̍ī bɛ̍ɛ̍ mi̍ cha᷅ māā mɛ̄ɛ̍ mī Mɛ̍lɛ̄ka̍ chɛ᷄l.

²⁵Kāni̍ fu̍u̍le̍, tē ō cho̍ mbō chɛ᷄l te̍ ō nɛ̄ɛ̍nɛ̍ nɔ̍lā yɛ̍ mbō dē le̍nde̍, ɔ̄ɔ̄ mbō tūēī yōōmū ndɔ̄ɔ̍ yēēlā le̍nde̍?

²⁶Wāna̍ to̍sā nyɛ̍ hi̍ni̍ Mɛ̍lɛ̄ka̍ kɔ̄llo̍ wo̍, wānā ko̍ŋ ndu̍ Mɛ̄lɛ̄ka̍ ō kē kɔ̍l kālo̍o̍ a̍ tāāsi̍o̍o̍ ni̍, ndu̍yɛ̍ mbō tōsa̍ mī wānā ko̍ŋ ō tūēī yōōmū ndɔ̄ɔ̍ yēēlā. Kɛ̍ wāna̍ yɔ̄ŋ wɔ̄ɔ̍ŋndo̍ ndu̍ ndu̍ mī Mɛ̄lɛ̄ka̍ tōsa̍ tē ō nūūvi̍a̍a̍ pɛ̍ mbō dīī si̍li̍ŋ, wāna̍ to̍sā nyɛ̍ hi̍nī Mɛ̍lɛ̄ka̍ kɔ̄llo̍ wo̍ ō kūɛ̄nu᷄ŋ a̍ mu̍ŋ. He̍ī bɛ̍ɛ̍ mi̍ cha᷅ ndi̍ nyɛ̄ fo̍ndō fu̍u̍, ō chō māchūāā mɛ̄ɛ̍ wāŋndo̍ ō wā nu̍a̍ā hūēīye̍ nyāānɔ᷄ŋndo̍ kɔ̄ɔ̄lī le̍ ndi̍ bīyɔ̄ɔ̍ yɛ̍.”