Read Southern Kisi Īkīlīsi̍a̍a̍tīī 3 Bible Online

Īkīlīsi̍a̍a̍tīī 3 - Southern Kisi bible

Īkīlīsi̍a̍a̍tīī 3

¹Nyɛ̍ o̍ nyɛ̍ yɔ̍nu̍ŋ o̍ chi̍e̍ēŋndo̍ chōo̍ a̍ te̍le̍ŋ o̍ nɔ̍ le̍ yɔ̄nɔ᷄ŋndo̍ wo̍ o̍ yɔ̍nūŋ ni̍.

²Te̍le̍ŋndo̍ chō le̍ vīōlɔ᷄ŋndo̍, ndu̍yɛ̍ te̍le̍ŋndo̍ chō le̍ pīɔ̍mndo̍. Te̍le̍ŋndo̍ chō le̍ tɔ̄lɔ̄ɔ̍, ndu̍yɛ̍ te̍le̍ŋndo̍ chō le̍ tɔ̄lɔ̄ɔ̄ kōŋ sūŋgɔ̄ɔ̍.

³Te̍le̍ŋndo̍ chō le̍ dīyɔ̄ɔ̍, ndu̍yɛ̍ te̍le̍ŋndo̍ chō le̍ sīŋgīo̍o̍. Te̍le̍ŋndo̍ chō le̍ pīɔ̄lɔ̄ɔ̍, ndu̍yɛ̍ te̍le̍ŋndo̍ chō le̍ tāŋgūllo̍.

⁴Te̍le̍ŋndo̍ chō le̍ cha᷄ŋndo̍, ndu̍yɛ̍ te̍le̍ŋndo̍ chō lē māmɔ̄ɔ̍. Te̍le̍ŋndo̍ chō le̍ mɔ̍nɛ̍i̍ bīyɔ̄ɔ̍, ndu̍yɛ̍ te̍le̍ŋndo̍ chō le̍ yōla̍ŋ.

⁵Te̍le̍ŋndo̍ chō le̍ pōūta̍ŋ sɛ̄ŋīo̍o̍, ndu̍yɛ̍ te̍le̍ŋndo̍ chō le̍ pōūta̍ŋ dīyɔ̄ɔ̍ nāa̍ pi᷅lɛ̍. Te̍le̍ŋndo̍ chō le̍ kɔ̄ɔ̄mi̍āŋndo̍, ndu̍yɛ̍ te̍le̍ŋndo̍ chō kɔ̄ɔ̄mi̍āŋ ve᷅ le̍.

⁶Te̍le̍ŋndo̍ chō le̍ nūūwāa̍, ndu̍yɛ̍ te̍le̍ŋndo̍ chō le̍ mī nyɛ̄ o̍ nyɛ̄ lāāsīa̍ŋ. Te̍le̍ŋndo̍ chō le̍ kɛ̄sīo̍o̍, ndu̍yɛ̍ te̍le̍ŋndo̍ chō le̍ pīsīo̍o̍.

⁷Te̍le̍ŋndo̍ chō le̍ sɛ̄ɛ̄sīa̍a̍, ndu̍yɛ̍ te̍le̍ŋndo̍ chō le̍ sɔ̄ndɔ̄ɔ̍. Te̍le̍ŋndo̍ chō le̍ mēīyo̍, ndu̍yɛ̍ te̍le̍ŋndo̍ chō le̍ sūɛ̍i̍.

⁸Te̍le̍ŋndo̍ chō le̍ kāālāa̍, ndu̍yɛ̍ te̍le̍ŋndo̍ chō le̍ yɛ̄lē tūlāā le̍ŋ. Te̍le̍ŋndo̍ chō le̍ chɔ̄ūwo̍, ndu̍yɛ̍ te̍le̍ŋndo̍ wā le̍ kɔ̄l nyūlōo̍.

⁹Mɛ̄ɛ̍ o̍ mɛ̄ɛ̍ wāna̍ chi̍o̍o̍ ō yɔ̄kpa̍ tɔ̄nɔ̍ yɛ̄ɛ̍nɛ̍ o̍ sɔ̍lā yɛ̍ lēni᷄ŋ?

¹⁰I̍ che᷅ wōlɔ̄ɔ̄lā lūsu̍lɛ̍i̍la̍ Mɛ̄lɛ̄ka̍ ō hāndu̍ wāna̍ chi̍o̍o̍ chōo̍ la̍ŋ.

¹¹Mbo̍ lō o̍ ko̍ŋ mbo̍ tōōsīāā nyɔ̄ɔ̍ŋ le̍nde̍ ŋ̄ kɛ̍ndɛ̄ kɛ̍ndɛ̄, ndu̍yɛ̍ mbo̍ hāndū te̍le̍ŋnda̍ŋ kpɛ̍ kpɛ̍, te̍le̍ŋnda̍ nyɛ̄ o̍ nyɛ̄ nɔ̄ le̍ yɔ̄nɔ᷄ŋndo̍ la̍ŋ. Mbo̍ lō o̍ ko̍ŋ mbo̍ dūāū vɛ̄lɛ̄ wāna̍ chi̍o̍o̍ yēēmɛ̍i̍ ke̍ŋ ni᷄ŋ le̍ mbō lāndu̍ŋ kɔ᷅l le̍ sīɔ̄dīi̍ lāchīo̍o̍. Kɛ̍ wāna̍ chi̍o̍o̍ ō nɔ̍lā le̍ mbō sīna̍ nyɛ̄ Mɛ̄lɛ̄ka̍ tōsā wo̍ pɛ̄ŋgu̍ le̍.

¹²I̍ si̍nā māā wāna̍ chi̍o̍o̍ ndu̍ nyɛ̍ bɛ̍nda̍ le̍ ndu̍ mbo̍ hīāū kpo̍u̍ wo̍ cho̍ wāa̍ a̍ kɔ̄l kɛ̄ndɛ̄, ndu̍yɛ̍ mbō wa̍ o̍ yōōmū kɛ̄ndɛ̄ ni᷄ŋ ha̍a̍a̍ a̍ yōōmū ndɔ̄ɔ̍ mɛ̄ɛ̄lu̍la̍ŋ ni̍.

¹³Ndu̍yɛ̍ Mɛ̄lɛ̄ka̍ kē ndɔ̍ o̍ ke̍ na̍a̍ wo̍ cho̍ ko̍ŋ ni̍, le̍ mī wānā o̍ wānā o̍ de᷅ mbō ko᷄l, ndu̍yɛ̍ mbō dē sāŋgā ndɔ̄ɔ̍ tɔ̄nɔ̄.

¹⁴I̍ si̍nā māā nyɛ̄ o̍ nyɛ̄ Mɛ̄lɛ̄ka̍ tōōsi̍a̍a̍ pɛ̍ ō chō le̍ fɛ̍ɛ̍ŋ a̍ fɛ̍ɛ̍ŋ, wānā he̍ndū le̍cho̍ō le̍ ndu̍yɛ̍ wānā fe̍ŋā le̍cho̍ō le̍. Mɛ̄lɛ̄ka̍ to̍o̍si̍a̍a̍ ndi̍ le̍nde̍ ni̍, le̍ mī wāna̍ chi̍o̍o̍ ō nɔ̄ sīōōŋīi̍ ndūɛ̍i̍.

¹⁵Nyɛ̄ o̍ nyɛ̍ cho̍ yɔ̄nɔ᷄ŋndo̍ ō yɔ̄nu̍ŋ ni᷅ŋ pāāndū, ndu̍yɛ̍ nyɛ̄ o̍ nyɛ̍ nɔ̍ le̍ yɔ̄nɔ᷄ŋndo̍ ō yɔ̄nu̍ŋ ni᷅ŋ pāāndū. Sɔ̄ɔ̍ŋ hi̍o̍ū wo̍ŋ mu̍ŋ Mɛ̄lɛ̄ka̍ ō mīŋgī vɛ̍lɛ̄ tōsā ni̍.

¹⁶Mi̍ sa̍a̍lu᷄ŋ vɛ̍lɛ̄ sūɛ̍i̍ pi᷅lɛ̍ o̍ chi̍e̍ēŋndo̍ ho̍ō chōo̍, nāa̍ sa̍kpōyɛ̍i̍ a̍ tōnya̍a̍ nda̍ a̍a̍ nɔ̍ le̍ wāa̍ wāŋnda̍ tɛ̄ɛ̄ŋ nda̍, dɛ̍nɛ̍ wɔ̍ɔ̍ŋndo̍ ndu̍ wānā sa̍a̍lūŋ lo̍ŋ ni̍.

¹⁷Mi̍ di̍mī o̍ kɔ̄l ni᷄ŋ a̍a̍, “Wāna̍ tōnya̍ ni̍ wāna̍ dɛ̍nɛ̍ wɔ̍ɔ̍ŋ ni̍ nda̍ kpo̍u̍ Mɛ̄lɛ̄ka̍ chō hūnɔ̄ɔ̄ kɔ̍ɔ̍sɔ̍ a̍ nda̍. Nyɛ̄ o̍ nyɛ̍ cho̍ yɔ̄nɔ᷄ŋndo̍ te̍le̍ŋ ndɔ̄ɔ̍ chō fūūlūū. Īsɔ̄ɔ̍ o̍ īsɔ̄ɔ̍ ī nɔ̄ te̍le̍ŋndo̍.”

¹⁸Mɛ̄ɛ̍ ya̍ I̍ chi̍i̍ sɔ̄ɔ̍ŋ mu᷅ŋ mɛ̄ɛ̄nda᷄ŋ kpo̍u̍ mi̍ di̍mī māā na̍a̍ wāŋndā chīe̍e̍ya̍ tōfāa̍ Mɛ̄lɛ̄ka̍ ō chō na̍a̍ kīo̍o̍ ni̍, le̍ mbō chɔ᷄m na̍a̍ māā mɛ̄ɛ̍ vīsīa̍a̍ ā chō yɛ̍ ko̍ni̍ na̍a̍ ŋ̄ chō ni̍.

¹⁹Kāni̍ fu̍u̍le̍, nyɛ̍ yɔ̍nūŋ a̍ vīsīa̍a̍ wo̍, ndu̍ ko̍ni̍ yɔ̍nūŋ a̍ wāŋndā chīe̍e̍ya̍ ni̍. Wāna̍ chīe̍e̍ ni̍ vīsī ni̍ wu᷄ pi᷅lɔ̍ɔ̍ kpe̍ nda̍ nɔ̄ ni̍ mā vī. Wāna̍ chīe̍e̍ ni̍ vīsī ni̍ nyāā yōōmāā pīli̍a̍a̍ kpe̍ na̍a̍ ŋ̄ chō ni̍. Wāna̍ chi̍e̍e̍ nɔ̍ le̍hɔ̍ɔ̍ya̍ mbō hīōū vīsīa̍a̍ le̍, kāni̍, wāna̍ chīe̍e̍ ni̍ vīsī ni̍ yōōmūlā nda̍ nɔ̄ la̍ŋ nyɛ̄ fo̍ndō fu̍u̍ la̍ cho̍ ni̍.

²⁰Nda̍ ŋi̍ɔ̍ɔ̍ŋ kpo̍u̍ nāa̍ pi᷅lɛ̍ kpe̍ nda̍ nɔ̄ ni̍ mā kūɛ̄. O̍ pūūlōo̍ ni᷄ŋ nda̍ fūla̍ ni̍, ndu̍yɛ̍ o̍ pūūlū pi᷅lɔ̍ɔ̍ ni᷄ŋ ko̍ni̍ nda̍ nɔ̄ vɛ̄lɛ̄ ni̍ mā mīīŋgu̍.

²¹Ndu̍yɛ̍ tē ā vī pɛ̍, bāā chōo̍ cho̍o̍ nyi̍nā wāna̍ chi̍o̍o̍ ō kūā ni̍, mī nyi̍nā vīsīo̍o̍ ndu̍ to᷅l lɛ̄ŋ wānā si̍nā le̍.

²²Le̍la̍ŋ nyɛ̄ ya̍ I̍ che᷅ māā ō bɛ̄nda̍ le̍ wāna̍ chi̍o̍o̍ mbo̍ hīāū kpo̍u̍ wo̍ cho̍ ho̍ō ni̍. Wāna̍ chi̍o̍o̍ ō nɔ̄ mbō dē sāŋgā ndɔ̄ɔ̍ tɔ̄nɔ̄, fo̍ndōle̍ nyɛ̄ o̍ ti̍i̍nda̍ŋ ndo̍ ko̍ni̍ cho̍ ko̍ŋ ni̍. Ō si̍nā nyɛ̍ cho̍ ndu̍ lāchī wo̍ le̍.