Read Southern Kisi Īkīlīsi̍a̍a̍tīī 4 Bible Online

Īkīlīsi̍a̍a̍tīī 4 - Southern Kisi bible

Īkīlīsi̍a̍a̍tīī 4

¹“O̍ ko̍ŋ kɔ̍ɔ̍lī, mi̍ cha᷅ vɛ̄lɛ̄ mɛ̄ɛ̍ nda̍ wa̍ wāŋndā chīe̍e̍ya̍ nyɛ̄ pālāa̍ tūsīo̍o̍ chōo̍ o̍ chi̍e̍ēŋndo̍ ho̍ō chōo̍ yɛ̍. Wānāā nda̍ wa̍ nyɛ̄ pālāa̍ tūsīo̍o̍ chōo̍ wa̍, mi̍ cha᷅ mɛ̍mi̍a̍ŋ mā chō nda̍ tōlɔ̄ɔ̍ le̍nde̍, wānā o̍ wānā ve̍ mbō nyɔ̄ɔ̄lu̍ nda̍ kɔ̄lta̍ŋ te̍. Ndu̍yɛ̍ wānāa̍ tu̍si̍ ha̍ā wāŋnda̍ ha̍ā nyɛ̄ pālāa̍ chōo̍ wa̍, ā nɔ̄ kpāāyāa̍ ā hīōū wāŋnda̍ ha̍ā. Wānāā nda̍ tūsi̍ ha̍ā nyɛ̄ pālāa̍ chōo̍ wa̍, nda̍ a̍a̍ nɔ̍ wa̍nā o̍ wāna̍ ma̍la̍ nda̍ le̍.

²O̍ ko̍ŋ, mi̍ yi̍ya᷄ŋ māā wānāa̍ vi᷅ ni᷅ŋ nda̍, māā nda̍ hi̍o̍ū wā o̍ fo̍ndāŋ a̍ wānāa̍ cho̍ yōōmū wa̍.

³Kɛ̍ wānāa̍ hi̍o̍ū bɛ̍ɛ̍ wa᷅ o̍ fo̍ndā wa̍ nda̍ cho̍ wānāa̍ vi̍lu̍ŋ ndɔ̍ kpo̍sōŋ te̍ wa̍ ni̍. Kāni̍ fu̍u̍le̍, sɔ̄ɔ̍ŋ dɛ̍nɛ̍ wɔ̍ɔ̍ŋ cho̍ mu᷅ŋ yɔ̄nɔ᷄ŋndo̍ o̍ chi̍e̍ēŋndo̍ chōo̍ ki̍nɛ̍i̍ yo̍ŋ chāānda̍ chi᷄ wɔ̍ mu̍ŋ te̍.

⁴“O̍ ko̍ŋ kɔ̍ɔ̍lī, mi̍ sa̍a̍lu᷄ŋ māā fāfa̍la̍ wāŋnda̍ ā fāfālā ho̍ō o̍ kpe̍ko̍o̍ sōlīo̍o̍ ni᷄ŋ ndo̍, ndu̍yɛ̍ a̍ tāāsi̍lā nda̍ nɔ̄ la᷅ŋ o̍ nyɔ̄ɔ̍ŋ tōōsīa̍a̍ ni᷄ŋ ndāŋ, māā o̍ hɔ̄lte̍ŋ ni᷄ŋ kpo̍so̍ŋ nda̍ wā mu̍ŋ tōsāa̍ ni̍, le̍ nyɛ̄m chāāŋāā ndāa̍. Ke̍ŋ bɛ̍ɛ̍ mi̍ cha᷅ ndi̍ nyɛ̄ fo̍ndō fu̍u̍. Ō chō māchūāā mɛ̄ɛ̍ wāŋndo̍ ō wa᷅ nu̍a̍ā hūēīye̍ nyāānɔ᷄ŋndo̍ kɔ̄ɔ̄lī le̍ ndi̍ bīyɔ̄ɔ̍ yɛ̍.

⁵Dīɔ̄mndo̍ ndu̍ nɔ̍ chālnɔ᷄ŋndo̍ ni̍ mbō dīīnu᷄ŋ si̍li̍ŋ, ō chɛ᷅l le̍ kpe̍ku̍ o̍ kpe̍ku̍ so̍lī le̍, mbō lo̍ ndu̍ pi̍la̍ tāūnɔ᷄ŋndo̍ ha̍a̍a̍ mbō vī.

⁶Nyɔ̄ɔ̍ nɔ̄ɔ̍ ō pɔ̄mbɔ̄ mā hi̍ni̍ kɔ̄l a̍ ndu̍, ndu̍ hi̍o̍ū nāŋɔ̄ɔ̄ a̍ tōndɔ᷄ŋndo̍ o̍ wa̍lta̍ŋ ni᷄ŋ, sa̍ŋgā fo̍ndōo̍ lēbōl tē tūm te̍, ō chō māchūāā mɛ̄ɛ̍ wāŋndo̍ ō wā nu̍a̍ā hūēīye̍ nyāānɔ᷄ŋndo̍ kɔ̄ɔ̄lī le̍ ndi̍ bīyɔ̄ɔ̍ yɛ̍.

⁷“O̍ ko̍ŋ kɔ̍ɔ̍lī, mi̍ cha᷅ vɛ̄lɛ̄ sūɛ̍i̍ pi᷅lɛ̍ o̍ chi̍e̍ēŋndo̍ chōo̍, ke̍ŋ bɛ̍ɛ̍ mi̍ cha᷅ ndi̍ nyɛ̄ fo̍ndō fu̍u̍.

⁸Wāŋndo̍ mbō wa̍ ndu̍ pīlɛ̍ kpe̍ ō nɔ᷅ chu̍ā le̍, ō nɔ᷅ i̍wa᷅nāya̍ le̍, ndu̍ pīlɛ̍ le̍nde̍ kpe̍e̍le̍, kɛ̍ mbō sāa̍ fāfa̍la̍a̍ le̍ sūllo̍ nūūvīa̍a̍, mɛ̄ɛ̍ mɛ̄ɛ̍ o̍ sɔ̍la̍ ō hi̍nī kɔ᷅l te̍. Cha᷄lle̍ ndu̍ o̍o̍ cha᷅l ni̍ mī ndu̍ o̍o̍ nyu̍na̍ ndu̍ pi̍la̍ āā, ‘Sāŋgā bɛ̄ndū ya̍ I̍ cho̍ ho̍ō mi̍ kɛ̍ɛ̄ nyɛ̄ o̍ nyɛ̄ kɛ̄ndɛ̄ o̍ yōōmū nūu̍ ni᷄ŋ ndo̍, le̍ nɛ̄ɛ̍nɛ̍ kpe̍e̍kpe̍i̍ ya̍ I̍ cho̍ yɛ̍ ni᷅ŋ sāŋgāa̍ ho̍ō?’ He̍ī bɛ̍ɛ̍ mi̍ cha᷅ ndi̍ nyɛ̄ fo̍ndō fu̍u̍, sūɛ̍i̍ kɔ̄l tāmbɛ̍i̍ye̍ ko̍ni̍ i̍ cho̍ ni̍.

⁹“Wānāā ŋīɔ̍ɔ̍ŋ ā bɛ̄nda̍ mbo̍ hīāū wānā pi᷅lɔ̍ɔ̍, fo̍ndōle̍, wa̍li̍ wānāā ŋīɔ̍ɔ̍ŋ ā tōsā wo̍ wānā pi᷅lɛ̍ nɔ̍lā mbō tōsa̍ ndu̍ le̍.

¹⁰Wānāā ŋīɔ̍ɔ̍ŋ ō pīlɛ̍ dēl mī ho̍ō māla̍ chāa̍ŋ ndɔ̍ de̍l lo̍ mbō chɛ᷄ŋ. Kɛ̍ wānā pi᷅lɛ̍ nūm tē a̍ de̍l pɛ̍ a̍ chūū dēlɔ̄ɔ̄, wānā cho̍ mbō māla̍ nu̍m mā chɛ᷄ŋ te̍.

¹¹Ndu̍yɛ̍ vɛ̍lɛ̄ wānāā ŋīɔ̍ɔ̍ŋ a̍ te̍le̍ŋ īhūēīyo̍ tē ā hīni̍ nāa̍ pi᷅lɛ̍ pɛ̍, tūūlōo̍ dīāllo̍ŋ ŋ̄ tūūlū nda̍ nyɛ̄ kɛ̄ndɛ̄ la̍fūū ni̍. Kɛ̍ wānā pi᷅lɛ̍ nūm nūm tē a̍ hi̍ni̍ pɛ̍ a̍ nɔ̍ wa̍nā o̍ wāna̍ tu̍u̍lu̍ nu̍m ŋ̄dīāl te̍.

¹²Wānā nɔ̍lā wa̍nā pi᷅lɛ̍ bɛ̄pɛ̄lā o̍ sɔ̍ŋgɔ̄ɔ̍ ni᷄ŋ, kɛ̍ ō cho̍ bɛ̍ɛ̍ŋ mī wānā nɔ̍la̍ wānāa̍ ŋīɔ̍ɔ̍ŋ te̍. Yōōle̍ cho̍ lē kpēēndāā a̍ yūe̍i̍ ī yāa̍ le̍ŋ wānā nɔ̍lā le̍ŋ kīōlɔ̄ɔ̄ chɔ̍chɔ̍ le̍.

¹³“Chūāāmbɔ̄ fɔ̍ŋndɔ̍ cho̍ ho̍ō ō tāmbɛ̍i̍ ō nɔ̍ nyɛ᷅ o̍ nyɛ̄ le̍, kɛ̍ mbo̍ nɔ̄ kɔ̄l kālo̍o̍ wo̍ ō bɛ̄nda̍ mbo̍ hīāū māsā bɛ̍ndū cho̍ ni᷅ŋ ho̍ō ō yūvɛ̍i̍ kɛ̍ ndu̍yɛ̍ ō nɔ̍ kɔ̍l kālu̍ le̍, ndu̍yɛ̍ ō ye᷅ŋ ndɛ̍ lānī o̍ sīlā le̍ wo̍.

¹⁴Wāŋndo̍ mbō fūla̍ o̍ bīyɔ̄ɔ̍ ni᷄ŋ mbō sīmnu̍ŋ ma̍sāa̍ wāŋnda̍ chōo̍, mbō vēlu᷄ŋ o̍ kūɛ̍i̍ ni᷄ŋ o̍ lɛ̄ŋndē ndɔ̄le̍ŋ ni᷄ŋ, mbō hu᷄ŋ si̍mnu̍ŋ ma̍sāa̍ lɛ̄ŋndē lēŋ chōo̍.

¹⁵I̍ che᷅ ni᷅ŋ wāŋnda̍ kpo̍u̍ o̍ chi̍e̍ēŋndo̍ ni᷄ŋ ma̍ tūāl chūāāmbɔ̄ pīāāndū wāā le̍nde̍ kɔ̍ɔ̍lī kpɔ̍lɔ̄kpɔ̄lɔ̄, o̍ mi̍i̍ŋgu̍ o̍ fōōfo̍ māsā bɛ̍ndōo̍ wāŋnda̍ chōo̍ wo̍.

¹⁶Wānāa̍ to᷅l ndu̍ kɔ̄ɔ̄lī wa̍ ā chu̍ū chɔ᷅m te̍. Ndu̍yɛ̍ nda̍ kpo̍u̍ ndu̍ cho̍ nda̍ chōo̍ ma̍sāa̍ ni̍. Kɛ̍ chɔ̍ŋ na̍nu᷄ŋ a̍ wɔ̄sīlā ti᷄ŋ, wānā o̍ wānā o̍ che̍ndū lɛ̍ ni̍ŋ ndu̍ le̍ sɔ̄ɔ̍ŋ kɛ̍ndɛ̄ŋ o̍ to̍sa̍ wo̍ŋ te̍. He̍ī bɛ̍ɛ̍ mi̍ cha᷅ ndi̍ nyɛ̄ fo̍ndō fu̍u̍, ō chō māchūāā mɛ̄ɛ̍ wāŋndo̍ ō wā nu̍a̍ā hūēīye̍ nyāānɔ᷄ŋndo̍ kɔ̄ɔ̄lī le̍ ndi̍ bīyɔ̄ɔ̍ yɛ̍.”