Read Southern Kisi Īkīlīsi̍a̍a̍tīī 5 Bible Online

Īkīlīsi̍a̍a̍tīī 5 - Southern Kisi bible

Īkīlīsi̍a̍a̍tīī 5

¹“Wānā o̍ wānā tē ā kūɛ̄ o̍ chīɛ̍i̍ Mɛ̄lɛ̄ka̍a̍ ni᷄ŋ le̍ Mɛ̄lɛ̄ka̍ pīɛ̄īyo̍ pɛ̍, ma̍nda̍ŋ. Tē ā kūɛ̄ o̍ chīɛ̍i̍ Mɛ̄lɛ̄ka̍a̍ ni᷄ŋ pɛ̍, ō bɛ̄ndā mā cha̍l mā pɛ̍ɛ̍ku̍ mɛ̄ɛ̍ wāŋnda̍ sōlī sa̍lāla̍ŋ yɛ̍, mbo̍ hīāū sa̍lālā īdīɔ̄mnda̍ŋ sōlīo̍o̍ mɛ̄ɛ̍ dīɔ̄mnda̍ ā tōsā yɛ̍. Ā si̍nā māā nyɛ̄ nda̍ wā ko̍ŋ to̍sāa̍ wo̍ māā yɔ̄ŋ wɔ̄ɔ̍ŋndo̍ le̍ nda̍ wā ko̍ŋ to̍sāa̍ Mɛ̄lɛ̄ka̍ o̍ hɔ̄l te̍.

²Wānā o̍ wānā tē a̍ wa̍ sūɛ̍i̍ pɛ̍, yi̍ya̍ŋ fɛ̍lɛ̍ŋ nyɛ᷅ ŋ̄ chō dīmī wo̍. Tē a̍ wa̍ Mɛ̄lɛ̄ka̍ nyɛ̄ o̍ nyɛ̄ dīmūl pɛ̍, ma̍nda̍ŋ le̍ nyɛ̄ ŋ̄ chō ndu̍ dīmūllo̍. Mɛ̄lɛ̄ka̍ chō o̍ fo̍ndā ndɔ̄ɔ̍ chōo̍ cho̍o̍ pɔ̍ mi̍ nya̍ wā o̍ chi̍e̍ēŋndo̍ chōo̍ lɛ᷅ŋ na̍nu᷄ŋ. Lā di̍mī dīōmndā fāŋgā o̍ sūɛ̍i̍ nyɛ̄i̍ ni᷄ŋ te̍.

³Tē wānā hi̍u̍ yīya᷄ŋndo̍ a̍ nyɔ̄ɔ̍ pɛ̍ te̍i̍, a̍ hi̍ni̍ pɛ̍ ndu̍ ko̍ni̍ ŋ̄ sɔ̄l lu̍a̍a̍ŋ ni̍. Ndu̍yɛ̍ tē wānā hi̍u̍ sūɛ̍i̍ pɛ̍ te̍i̍ ā sōō sɔ̄ɔ̍ŋ ŋ̄dīɔ̄mndo̍ŋ.

⁴Wānā o̍ wānā tē a̍ chu̍a̍ ībūŋgā o̍ ībūŋgā o̍ Mɛ̄lɛ̄ka̍ lo̍ pɛ̍, to̍sā lāta̍ma̍la̍ le̍ nyɛ̄ ŋ̄ chūa̍ būŋgɛ̄i̍yo̍ tōsāa̍ le̍. Mɛ̄lɛ̄ka̍ ndu̍ ndu̍ ō yēēma̍ di̍ɔ̄mndo̍ le̍. Le̍la̍ŋ tē a̍ chu̍a̍ ībūŋgā o̍ ībūŋgā o̍ ndu̍ lo̍ pɛ̍, pe̍e̍lu̍ būŋgɛ̄ī kēŋ.

⁵Ō bɛ̄ndā bɛ̍ɛ̍ tē a̍ wa̍ nyɛ̄ o̍ nyɛ̄ tōsā pɛ̍ a̍ chu̍ē i̍bu̍ŋgā kpo̍so̍ŋ te̍, mbo̍ hīāū būŋgɛ̄i̍ chūa̍a̍ a̍ to̍sā nyɛ᷅ ŋ̄ chūā būŋgɛ̄i̍ yo̍ le̍.

⁶To̍sā mī sōndō nūmndo̍ ō tōsa̍ mā sīmnu᷄ŋ wa᷅na̍ yɔ̄ŋ wɔ̄ɔ̍ŋ te̍. Ō bɛ̍ndā mā kɔ̍ di̍mūl wāna̍ so̍līāā lāsa̍lāa̍ āā, ‘I̍ ve̍ kɔ̍l le̍ būŋgɛ̄i̍ he̍ī chūā le̍’ le̍. Tē a̍ to̍sa̍ le̍nde̍ pɛ̍, tu̍mbo̍o̍ Mɛ̄lɛ̄ka̍ ō dūāūnūŋ a̍ nūm le̍ nyɛ̄ ŋ̄ dīmi̍ ko̍ŋ ndo̍ ni̍, mbō tɛ̄ɛ̄mbu̍u̍ nyɛ̄ o̍ nyɛ̄ ŋ̄ sāŋga̍ le̍ ndu̍.

⁷Tē wāŋndo̍ hīu̍ lūa̍ŋ sɔ̄llo̍ pɛ̍ te̍i̍, ō dīmi̍ sɔ̄ɔ̍ŋ fo̍ndo᷄ŋ. Ndu̍yɛ̍ sūɛ̍i̍ bɛ̍ndū bɛ̄ndūe̍i̍, kɔ̄l kālu̍ o̍ kɔ̄l kālu̍ ve᷅ le̍ni̍ŋ te̍. Le̍la̍ŋ nyɛ̍ bɛ̍nda̍ le̍ tōsāa̍ wo̍, ndu̍ cho̍ bɛ̄ɛ̄le̍ŋ nɔ̄ɔ̍ le̍ Mɛ̄lɛ̄ka̍ ni̍.”

⁸“Tē ā chē pɛ̍ mī wānāa̍ nɔ̍ kpāāyāla̍ŋ nda̍ ā wa̍ wānāā tāmbɛ̍i̍ya̍ nyɛ̄ pālāa̍ tūsīo̍o̍ chōo̍ o̍ lɛ̄ŋnde̍ŋ ni᷄ŋ, o̍ ko̍ŋ kɔ̍ɔ̍lī, mā chē mā wa̍ wāŋnda̍ ka̍fāla̍ŋ tōsāllo̍, ndu̍yɛ̍ mā tūŋ wa᷅ŋnda̍ di̍la̍ ndāla̍ŋ o̍ sɔ̄ɔ̍ŋ ni᷄ŋ, kɔ̄ndɔ̄fi̍li̍ bi̍ī nu̍m te̍. Wāŋ bɛ̄ndūa̍a̍ cho̍ sɔ̄ɔ̍ŋ mu᷅ŋ tōsāa̍ wa̍ nda̍ bɛ̍ɛ̍ ā nɔ̄ wāŋ bɛ̄ndūa̍a̍ nɔ̍ nda̍ hɔ̄lte̍ŋ chōo̍ ma̍ wā nda̍ māndāa̍ wa̍. Ndu̍yɛ̍ wa̍ŋ bɛ̄ndūa̍a̍ cho̍ nda̍ ka̍ŋ māndāa̍ wa̍ bɛ̍ɛ̍ ā nɔ̄ wāŋ bɛ̄ndūa̍a̍ nɔ̍ nda̍ hɔ̄lte̍ŋ chōo̍ ma̍ wā nda̍ māndāa̍ wa̍.

⁹“Tɔ̄nɔ̄ o̍ tɔ̄nɔ̍ cho̍ o̍ lɛ̄ŋnde̍ŋ nde᷅ŋ ni᷄ŋ, wāŋnda̍ ha̍ā kpo̍u̍ nda̍ pi̍ɔ̍ūvi̍āŋ ndu̍ ni̍. Māsā bɛ̍ndōo̍ pīla̍ bɛ̍ɛ̍ kɛ̍sɛ̍ kɛ̍sɛ̍ mbō sɔ̄la̍ tɔ̄nɔ̄ɔ̍ o̍ wa̍lta̍ īchīɛ̄ɛ̄la̍ŋ ni᷄ŋ.

¹⁰“Wānā o̍ wāna̍ ka̍a̍la̍ ka̍ni̍e̍i̍, mɛ̄ɛ̍ mɛ̄ɛ̍ o̍ sɔ̍la̍ ndi̍ ō hi̍nī kɔ̍l te̍. Wānā o̍ wāna̍ ka̍a̍la̍ sūllo̍, mɛ̄ɛ̍ mɛ̄ɛ̍ o̍ sɔ̍la̍ su᷅llo̍ ō hi̍nī kɔ̍l te̍. He̍ī bɛ̍ɛ̍ nyɛ̄ fo̍ndō fu̍u̍ i̍ cho̍ ni̍.

¹¹Mɛ̄ɛ̍ kpɛ̍ wāŋndo̍ ō sūl lɛ̍, le̍nde̍ ko̍ni̍ o̍ nɔ᷅ wa̍nāā dīa̍a̍ ni̍. Tɔ̄nɔ̍ o̍ sɔ̍lā o̍ sūl kōŋ ni᷄ŋ ndo̍ mɛ̄ɛ̍ le̍ nyɛ̄m mu᷅ŋ chɔ̄ɔ̍ a̍ lēhɔ̄l.

¹²Wāna̍ cho̍ ho̍ō mɛ̄ɛ̍ mbō fāfa̍la̍ le̍ nyɛ̄ o̍ di̍ā wo̍ wo̍, ō dīo̍ mbō pīm, ō pu᷅m te̍, tē ō hīnī pɛ̍ lūa̍a̍ŋ nyɛ̄ kɛ̄ndɛ̄ kpo̍o̍ŋ. Kɛ̍ wānā su̍lāa̍ ndu̍ ndu̍ ō nɔ̍lā mbō lɔ᷄l te̍, ō wā bu̍u̍la᷄ŋndo̍ le̍ sūl ndɔ̄ɔ̍.

¹³“I̍ che᷅ vɛ̄lɛ̄ sūɛ̍i̍ kɔ̄l tāmbɛ̍i̍ pīlɛ̍ mi̍ ī wā yɔ̄nɔ᷄ŋndo̍ o̍ chi̍e̍ēŋndo̍ ho̍ō ni᷄ŋ. Wānā su̍lāa̍ mbō lo̍ ka̍ka̍a̍ o̍ sūl ndɔ̄ɔ̍ chōo̍ ha̍a̍a̍,

¹⁴mī sūɛ̍i̍ o̍ ve̍ kɔ̍l te̍ ve̍ ī kōma̍l ndu̍. O̍ ko̍ŋ, sūl kōŋ kpo̍u̍ mbō hīvi̍ ndu̍ o̍ sūɛ̍i̍ ke̍ŋ bɛ̄ŋgu̍, mbō lōlnu̍ŋ ni̍ko̍ ba̍lā fo̍ndō, ō nɔ᷅ nyɛ᷅ o̍ nyɛ̄ o̍ me̍l chūāūwāā ndūa̍a̍ le̍.

¹⁵Wāna̍ chi̍o̍o̍ vīōlɔ̄ɔ̄ kālā nu̍m ō vīālū nu̍m o̍ chi̍e̍ēŋndo̍ ho̍ō chōo̍ wo̍, bālā fo̍ndō fu̍u̍ ŋ̄ hūŋ ni̍. Ndu̍yɛ̍ tē ā vī vɛ̄lɛ̄ pɛ̍, bālā fo̍ndō fu̍u̍ ŋ̄ kūā vɛ̍lɛ̄ ni̍. Nyɛ̄ o̍ nyɛ̄ ŋ̄ sāŋga̍ le̍ ndu̍ ō pīlɛ̍ bɛ̍ɛ̍ a̍ ku̍ē a̍ ndu̍ o̍ bā le̍.

¹⁶He̍ī bɛ̍ɛ̍ sūɛ̍i̍ kɔ̄l tāmbɛ̍i̍ye̍ pīla̍ i̍ cho̍ ni̍, le̍ dīmīo̍o̍ māā mɛ̄ɛ̍ wānā vi̍a̍lūŋ ba̍lā fo̍ndō yɛ̍, le̍nde̍ ko̍ni̍ ŋ̍ mīīŋgū ba̍lā fo̍ndō ni̍. Sāŋgā fo̍ndō fu̍u̍, ō chō māchūāā mɛ̄ɛ̍ wāŋndo̍ ō wā nu̍a̍ā hūēīye̍ nyāānɔ᷄ŋndo̍ kɔ̄ɔ̄lī le̍ ndi̍ bīyɔ̄ɔ̍ yɛ̍.

¹⁷Ndu̍yɛ̍ ō fūla̍ o̍ ko̍ŋ kɔ̍ɔ̍lī, wāna̍ chi̍o̍o̍ ha̍a̍a̍ a̍ yōōmū ndɔ̄ɔ̍ mɛ̄ɛ̄lu̍la̍ŋ, tē ō chō pɛ̍ o̍ chi̍e̍ēŋndo̍ ho̍ō chōo̍, sɔ̄ɔ̍ŋ pīɔ̍mndo̍ŋ, a̍ sɔ̄ɔ̍ŋ ŋ̄mɔ̍nɔ̍ŋ bɛ̍ndo᷄ŋ, mu̍ŋ ko̍māl ndu̍ le̍ te̍le̍ŋ o̍ te̍le̍ŋ ni̍. Nāāla̍ŋ la̍ŋ la̍ wa᷅ ndu̍ kōmāllo̍, mī sɔ̄ɔ̍ŋ to̍sā mbō dɔ̄ɔ̄nu᷄ŋ tu̍mbe̍ wo̍ŋ mu̍ŋ mu̍ŋ wa᷅ ndu̍ yɔ̄nɔ᷄ŋndo̍ pɛ̄ŋgu̍ o̍ pɛ̄ŋgu̍, mbō tāmbu̍ kɔ̄l ha̍a̍a̍ ō chi̍nūŋ ndɛ̍ ndu̍ pi̍la̍ nyɛ̄ o̍ nyɛ̄ le̍.

¹⁸“Nyɛ̄ ko̍ŋ ya̍ I̍ mɛ̍ɛ̍nda᷄ŋ ni̍ mi̍ di̍mī māā nyɛ̄ ya̍ I̍ che᷅ mbo̍ bɛ̄ndā le̍ wāna̍ chi̍o̍o̍ wo̍ cho̍ ho̍ō ni̍. Te̍le̍ŋ bi̍ŋgī Mɛ̄lɛ̄ka̍ ke̍ wāna̍ chi̍o̍o̍ le̍ wāa̍ o̍ chi̍e̍ēŋndo̍ ho̍ō chōo̍ wo̍, ō dīo̍ mbō ko᷄l, ndu̍yɛ̍ mbō tūēī sāŋgā ndɔ̄ɔ̍ yēēlā, fo̍ndōle̍, sāŋgā o̍ sāŋgā o̍ cho̍ o̍ chi̍e̍ēŋndo̍ ho̍ō chōo̍, nyɛ̄ o̍ ti̍i̍nda̍ŋ māā pāāwā ndɔ̄ wo̍ ko̍ni̍ cho̍ ko̍ŋ ni̍.

¹⁹Wānā o̍ wānā Mɛ̄lɛ̄ka̍ ke̍ pɛ̍ su᷅llo̍, a̍ nyɔ̄ɔ̍ŋ ndu̍yɛ̍ mbo̍ kē nu̍m kpāāyāa̍ le̍ mā tūēī sūl nūmndo̍ a̍ nyɛ̄m nūmndo̍ŋ yēēlā, me̍l mɛ̍lɛ̄ka̍ ba̍li̍ka̍, ndu̍yɛ̍ mā tūēī sāŋgā nūmndo̍ yēēlā. Ke̍ Mɛ̄lɛ̄ka̍ ō ke̍ nu̍m ndo̍ ndu̍ cho̍ ko̍ŋ ni̍.

²⁰Wānā wa̍ā le̍nde̍ ō kēndū ko̍ mā bu̍u̍la̍ŋ le̍ mɛ̄ɛ̍ te̍le̍ŋ nu̍mndo̍ o̍ chi̍e̍ēŋndo̍ chōo̍ o̍ cho̍ ō bīŋgī yɛ̍, fo̍ndōle̍ Mɛ̄lɛ̄ka̍ tōsa̍ mi̍ kɔ̄l nūmndo̍ ō wā a̍ nya̍a̍lo̍o̍ le̍ te̍le̍ŋ o̍ te̍le̍ŋ.”