Read Southern Kisi Īkīlīsi̍a̍a̍tīī 6 Bible Online

Īkīlīsi̍a̍a̍tīī 6 - Southern Kisi bible

Īkīlīsi̍a̍a̍tīī 6

¹“I̍ che᷅ vɛ̄lɛ̄ sūɛ̍i̍ wɔ̍ɔ̍ŋīī pīlɛ̍ mi̍ ī wā yɔ̄nɔ᷄ŋndo̍ o̍ chi̍e̍ēŋndo̍ ho̍ō ni᷄ŋ, ī chō sūɛ̍i̍ kɔ̄l tāmbɛ̍i̍ bɛ̍ndū le̍ wāna̍ chi̍o̍o̍.

²Wāŋndo̍ mbō wa̍ mī Mɛ̄lɛ̄ka̍ ō ke̍ ndu̍ sūllo̍ ta̍u̍ ta̍u̍, a̍ nyɔ̄ɔ̍ŋ ndu̍yɛ̍ mbō tōsa̍ mī wāŋnda̍ ā nɔ̄ bɛ̄ɛ̄le̍ŋ le̍ wānā ko̍ŋ ta̍u̍. Nyɛ̄ o̍ nyɛ̄ wānā ko̍ŋ ō yēēma̍ ō wā ndu̍ o̍ bā. Kɛ̍ mī Mɛ̄lɛ̄ka̍ tōsa̍ wānā ko̍ŋ ō tu̍i̍ī nyɛ̍m ndɔ̄ŋ mu̍ŋ yēēlā le̍, wāna̍ lēkāa̍ wo̍ pɔ̍ ndu̍ tu̍ɛ̍ī mu̍ŋ yēēlā ni̍. Nyɛ̄ fo̍ndō fu̍u̍ sūl wāā le̍nde̍ o̍ cho̍ ni̍. Ndu̍yɛ̍ ī chō sūɛ̍i̍ kɔ̄l tāmbɛ̍i̍ bɛ̍ndū le̍ sūl wāā le̍nde̍ nɔ̍ɔ̍.

³Ā yɔ᷄ŋ bɛ̍ɛ̍ mī wāŋndo̍ ō nɔ̄ chūāūwa̍ kɛ̄mɛ̄, ndu̍yɛ̍ mbō vīōū āchāl mbō yūwa̍ ku̍dɛ̄ɛ̄ chūāūwāā kāŋ chōo̍, kɛ̍ nyɛ̄m kɛ̄ndɛ̄ŋ wāna̍ chi̍o̍o̍ ō nɔ̄ mbō tūēī yēēlā o̍ yōōmōo̍ ni᷄ŋ ndo̍ŋ, tē ō tūi̍i̍ mu̍ŋ yēēlā le̍ ha̍a̍a̍ mbō vī, ndu̍yɛ̍ mbō sɔ̄la̍ vɛ̍lɛ̄ chɔ̄ kɛ̄ndɛ̄ le̍, ya̍ I̍ di̍mi̍ māā chɛ̄lɛ̍kpɛ̍ nda̍ vīālū ho̍ō ō vīlɛ̍i̍yo̍ ō bɛ̄nda̍ bɛ̍ɛ̍ mbo̍ hīāū wānā su̍lāā wāā le̍nde̍.

⁴Kāni̍ fo̍ndōle̍, chɛ̄lɛ̍kpɛ̍ nda̍ vīālū ho̍ō ō vīlɛ̍i̍ yo̍ nyɛ̄ fo̍ndōo̍ ko̍ni̍ o̍ wa᷅ ni̍. Mɛ̄ɛ̍ o̍ ve̍lu᷄ŋ ō de᷄l nyɛ᷅ wa̍wo̍ŋndo̍ lēhɔ̄l te̍ yɛ̍, le̍nde̍ ko̍ni̍ o̍ mi̍i̍ŋgū vɛ̍lɛ̄ o̍ nyūmnda̍ŋ ni᷄ŋ ni̍, ndu̍yɛ̍ dīōlā ndɔ̄la̍ŋ bɛ̍ɛ̍ le̍nde̍ la̍ lo᷅ la̍ ku̍mbāā o̍ nyūmnda̍ŋ ni᷄ŋ ni̍ wānā si̍nā la̍ŋ te̍.

⁵Chɛ̄lɛ̍kpɔ̍ɔ̍ ho̍ō vīōlɔ᷄ŋ ndɔ̄ɔ̍ ō de̍l pāa̍le̍ŋ hɔ̄lte̍ŋ pɛ̍ɛ̍ŋ te̍, kɛ̄lɛ̄ŋgāāle̍ mbō sīna̍ nyɛ̄ o̍ nyɛ̄. Kɛ̍ ndu̍yɛ̍ yōōmū ndɔ̄ɔ̍ wā o̍ pɛ̄ŋgīo̍o̍ ni᷄ŋ mbo̍ hīāū yōōmū wānā su̍lāa̍ ho̍ō.

⁶Ā yɔ᷄ŋ bɛ̍ɛ̍ mī wānā su̍lāa̍ ho̍ō ō chi̍i̍ wɔ̄sīla̍ŋ wāa̍la̍ŋ lā tīɔ̍ɔ̍ŋ (2,000) yōōmū, kɛ̍ nyɛ̄m kɛ̄ndɛ̄ŋ wāna̍ chi̍o̍o̍ ō nɔ̄ mbō tūēī yēēlā o̍ yōōmōo̍ ni᷄ŋ ndo̍ŋ, tē ō tūi̍i̍ mu̍ŋ yēēlā le̍, mɛ̄ɛ̍ ō bɛ̄nda̍ mbō hīōū chɛ̄lɛ̍kpɛ̍ ve̍lu᷄ŋ ho̍ō ō vīlɛ̍i̍yo̍ le̍, fo̍ndōle̍ nda̍ ŋi̍ɔ̍ɔ̍ŋ kpo̍u̍ tē ā vī pɛ̍ nāa̍ pi᷅lɛ̍ kpe̍ nda̍ chō kɔ̄la̍ŋ ni̍.

⁷“Sāŋgā o̍ sāŋgā wāna̍ chi̍o̍o̍ ō chō, le̍ dɔ̄wɔ̄ɔ̍ o̍ dēmbōo̍ ho̍ō ni᷄ŋ ko̍ni̍ o̍ cho̍ sāŋgāa̍ ni̍. Ndu̍yɛ̍ mɛ̄ɛ̍ o̍ mɛ̄ɛ̍ o̍ di̍o̍ ō hi̍nī kɔ̍l te̍.

⁸Mɛ̄ɛ̍ o̍ he̍ī ni᷄ŋ ɔ̍ɔ̄ hɔ̍ɔ̍ya̍lē wānāā kɔ̄l kālu̍a̍a̍ ā nɔ̄ ma̍ hīāū dīɔ̄mnda̍ le̍ŋ? Wānā ta̍mbɛ̍i̍yo̍ mɛ̄ɛ̍ o̍ mɛ̄ɛ̍ ŋ̄ kīndi̍ mā to̍sa̍ sɔ̄ɔ̍ŋ kɛ̍ndɔ᷄ŋ wāŋnda̍ o̍ hɔ̄l, tɔ̄nɔ̍ yɛ̄ɛ̍nɛ̍ ŋ̄ sɔ̄lā yɛ̍ o̍ ko̍ŋ kɔ̍ɔ̍lī?

⁹Ō bɛ̄nda̍ mī wānā hi̍ni̍ kɔ̄l a̍ nyɛ̄ ŋ̄ chē ni᷅ŋ mbo̍ wā nu̍m o̍ bā wo̍, mbo̍ hīāū a̍ yēēmɛ̍i̍ fa̍ŋgā fa̍ŋgɛ̄i̍ nɔ̄ɔ̍. He̍ī bɛ̍ɛ̍ nyɛ̄ fo̍ndō fu̍u̍ ya̍ I̍ che᷅ ndi̍ ni̍, ō chō māchūāā mɛ̄ɛ̍ wāŋndo̍ ō wā nu̍a̍ā hūēīye̍ nyāānɔ᷄ŋndo̍ kɔ̄ɔ̄lī le̍ ndi̍ bīyɔ̄ɔ̍ yɛ̍.

¹⁰“Nyɛ̄ o̍ nyɛ̍ chu̍ū ni᷅ŋ wā o̍ chi̍e̍ēŋndo̍ chōo̍, ō nɔ̄ ni᷅ŋ dīōlā ndɔ̄la̍ŋ. Na̍a̍ wāŋndā chīe̍e̍ya̍ bɛ̍ɛ̍, ŋ̄ sīnā nyɛ᷅ chō wāna̍ chi̍o̍o̍ wo̍. Ndu̍yɛ̍ ŋ̄ sīnā māā tē wāŋndo̍ ō hīōū nu̍m kpāāyāa̍ pɛ̍, a̍ sɔ̍lā ndu̍ di̍ le̍.

¹¹Tē wānā hi̍u̍ sūɛ̍i̍ pɛ̍ te̍i̍ a̍ di̍mi̍ dīɔ̄mnde̍. Ndu̍yɛ̍ tɔ̄nɔ̄ o̍ tɔ̄nɔ̄ cho̍ o̍ dīɔ̄mīī wāā le̍nde̍ ni̍ŋ te̍.

¹²Yōōmū wāna̍ chi̍o̍o̍ ō nɔ̄ o̍ chi̍e̍ēŋndo̍ ho̍ō chōo̍ wo̍, le̍ te̍le̍ŋ bi̍ŋgī ko̍ni̍ o̍ cho̍ ni̍, ndu̍yɛ̍ nyɛ̄ fo̍ndō fu̍u̍ yōōmū kālāa̍ ō chō ni̍. Yōōmū wāna̍ chi̍o̍o̍ mɛ̄ɛ̍ wūndu̍le̍ŋ lē kēlēŋā nu̍a̍ā lōo̍ yɛ̍, le̍nde̍ o̍ ke̍lēŋā lo̍o̍ ni̍. Ō nɛ̄ɛ̍nɛ̍ nɔ̍lā yɛ̍ mbō sīna̍ nyɛ̄ kpe̍e̍kpe̍i̍ bɛ̍nda̍ le̍ wāna̍ chi̍o̍o̍ o̍ yōōmū wāā ndo̍ō ni᷄ŋ ndo̍? Ō nɛ̄ɛ̍nɛ̍ nɔ̍lā yɛ̍ mbō chɔ᷄m wāna̍ chi̍o̍o̍ nyɛ̍ cho̍ kōmā yɔ̄nɔ᷄ŋ ndu̍ a̍ mākɔ̄ɔ̄ o̍ chi̍e̍ēŋndo̍ ho̍ō ni᷄ŋ ndo̍?”